ວິທະຍຸກະຈາຍສຽງແຫ່ງຊາດລາວ

Lao National Radio

ຕັ້ງໜ້າຜັນຂະຫຍາຍມະຕິກອງປະຊຸມໃຫຍ່ ຄັ້ງທີ XI ຂອງພັກ ເຂົ້າສູ່ຊີວິດຈິງ
ໃນວັນທີ 10 ສິງຫາ 2021 ສະຫາຍ ທອງລຸນ ສີສຸລິດ ເລຂາທິການໃຫຍ່ ຄະນະບໍລິ ຫານງານສູນກາງພັກ ປະຊາຊົນ ປະຕິວັດລາວ, ປະທານປະເທດ ແຫ່ງ ສາທາ ລະນະລັດ ປະຊາທິປະໄຕ ປະຊາຊົນລາວ ຮ່ວມກັບ ສະຫາຍ ຫງວຽນ ຊວັນ ຟຸກ ກໍາມະການກົມການເມືອງສູນກາງພັກກອມມູນິດຫວຽດນາມ, ປະທານປະເທດ ແຫ່ງ ສາທາ ລະນະລັດ ສັງຄົມນິຍົມຫວຽດນາມ ພ້ອມດ້ວຍການນຳ ພັກ-ລັດ ສອງປະເທດ ໄດ້ໃຫ້ກຽດເຂົ້າຮ່ວມພິທີມອບ-ຮັບ ແລະ ເປີດນຳໃຊ້ຫໍສະພາແຫ່ງຊາດລາວ ຢ່າງເປັນທາງການ.
ໂອກາດນີ້, ສະຫາຍ ປະທານປະເທດ ຫງວຽນ ຊວັນ ຟຸກ ໄດ້ຕາງໜ້າໃຫ້ພັກ, ລັດ ແລະ ປະ ຊາຊົນຫວຽດນາມອ້າຍນ້ອງ ກ່າວມອບຕຶກສະພາແຫ່ງຊາດລາວຫລັງໃໝ່, ເຊິ່ງເປັນຂອງຂວັນຂອງພັກ, ລັດ ແລະ ປະຊາຊົນຫວຽດນາມອ້າຍນ້ອງ ມອບໃຫ້ ພັກ, ລັດຖະບານ ແລະ ປະຊາຊົນລາວ ນຳໃຊ້ ແລະ ທັງເປັນສັນຍາລັກແຫ່ງຄວາມສາມັກຄີພິເສດ ຫວຽດນາມ-ລາວ.
ສະຫາຍ ປະທານປະເທດ ຫງວຽນ ຊວັນ ຟຸກ ກ່າວວ່າ: ມື້ນີ້, ໃນໂອກາດເດີນທາງມາຢ້ຽມຢາມສັນຖະວະໄມຕີ ສາທາລະນະລັດ ປະຊາທິປະໄຕ ປະຊາຊົນລາວ ຢ່າງເປັນທາງການ, ຂ້າພະເຈົ້າ ແລະ ຄະນະຜູ້ແທນຂັ້ນສູງ ສສ.ຫວຽດນາມ ມິຄວາມປິນຕິຍິນດີເປັນຢ່າງຍິ່ງ ທີ່ໄດ້ມາຮ່ວມພິທີເປີດນຳໃຊ້ ແລະ ມອບຮັບ ຫໍສະພາແຫ່ງຊາດລາວ. ນີ້ແມ່ນໂຄງທີ່ມີຄວາມໝາຍດ້ານການເມືອງ, ການພົວພັນຕ່າງປະເທດ, ເປັນສັນຍາລັກທີ່ເລິກເຊິ່ງ ແລະ ເຂັ້ມຂຸ້ນ ແຫ່ງສາຍພົວພັນມິດຕະພາບອັນຍິ່ງໃຫຍ່, ຄວາມສາມັກຄີພິເສດ ແລະ ການຮ່ວມມືຮອບດ້ານ ຫວຽດນາມ-ລາວ.
ສະຫາຍ ປະທານປະເທດ ຫງວຽນ ຊວັນ ຟຸກ ສະແດງຄວາມເຊື່ອໝັ້ນວ່າ: ຫໍສະພາແຫ່ງຊາດຫລັງນີ້, ຈະເປັນສະຖານທີ່ໃຫ້ກຳເນີດ ແລະ ກຳນົດບັນດາຂໍ້ຕົກລົງສຳຄັນ ໃຫ້ແກ່ການພັດທະນາປະເທດລາວ ກ້າວສູ່ຄວາມຈະເລີນຮຸ່ງເຮືອງ. ສະຖານທີ່ແຫ່ງນີ້, ຈະເປັນສັນຍາລັກທີ່ໝັ້ນຄົງແຫ່ງຄວາມຮັກແພງສາມັກຄີຕິດພັນສະໜິດສະໜົມ ລະຫວ່າງສອງພັກ, ລັດ ແລະ ປະຊາຊົນສອງຊາດ.
ໃນພິທີດັ່ງກ່າວ, ສະຫາຍ ທອງລຸນ ສີສຸລິດ ກ່າວວ່າ: ສປປ ລາວ ສຸດທີ່ມີຄວາມປິຕິຍິນດີ ແລະ ພາກພູມໃຈເປັນຢ່າງຍິ່ງ ທີ່ໄດ້ມີຫໍສະພາແຫ່ງຊາດລາວຫລັງໃໝ່ແຫ່ງນີ້, ເຊິ່ງເປັນຂອງຂວັນອັນລ້ຳຄ່າ ທີ່ພັກ, ລັດ ແລະ ປະຊາຊົນຫວຽດນາມອ້າຍນ້ອງ ມອບໃຫ້ແກ່ພັກ, ລັດຖະບານ ແລະ ປະຊາຊົນລາວ ຂອງພວກເຮົາ. ຫໍສະພາແຫ່ງຊາດຫລັງໃໝ່ນີ້, ເປັນອາຄານທີ່ມີຄວາມໂອໂຖງ, ໂດດເດັ່ນ, ມີຄຸນຄ່າທາງດ້ານສິລະປະກຳ, ມີມາດຕະຖານເຕັກນິກ ທີ່ທັນສະໄໝໃນການອອກແບບ ແລະ ການກໍ່ສ້າງ, ມີຄວາມງົດງາມ ດ້ວຍເອກະລັກສະເພາະ ແລະ ສະຖາປັດຕິຍະກຳແບບລາວ.
ສະຫາຍ ປະທານປະເທດ ໄດ້ໃຫ້ສັນຍານາມໄວ້ວ່າ: ເປັນຕຶກແຫ່ງຄວາມເປັນທີ່ສຸດ 4 ຢ່າງ ຄື: ທັນສະໄໝທີ່ສຸດ, ສວຍງາມມີເອກະລັກ ຂອງວັດທະນະສະຖາປັດຕິຍະກຳຂອງລາວດີທີ່ສຸດ, ເປັນອາຄານທີ່ແໜ້ນໜາແຂງແຮງຈະໃຊ້ງານໄດ້ຍາວນານທີ່ສຸດ ແລະ ມີມູນຄ່າສູງທີ່ສຸດ ສຳລັບຕຶກຫລັງໜຶ່ງເທົ່າທີ່ເຄີຍມີມາ ຢູ່ປະເທດລາວ ເຖິງປັດຈຸບັນ. ຫໍສະພາແຫ່ງຊາດຫລັງນີ້, ຍັງມີຄວາມໝາຍປະຫວັດສາດສໍາຄັນຕໍ່ສອງຊາດລາວ-ຫວຽດນາມອ້າຍນ້ອງ ກໍຄື ເປັນສັນຍາລັກໃຫ້ແກ່ສາຍພົວພັນມິດຕະພາບອັນຍິ່ງໃຫຍ່, ຄວາມສາມັກຄີພິເສດ ແລະ ການຮ່ວມມືຮອບດ້ານ ທີ່ເປັນສາຍພົວພັນໜຶ່ງດຽວໃນໂລກ, ຫາຍາກ, ບໍ່ ເໝືອນໃຜ ແລະ ບໍ່ມີໃຜເໝືອນ. ສັນຍາລັກຂອງຕຶກສະພາແຫ່ງຊາດຫລັງນີ້, ແມ່ນສັນຍາລັກແຫ່ງຄວາມບໍລິສຸດຜຸດຜ່ອງ, ສັນຍາລັກແຫ່ງນ້ຳໃຈເອື້ອເຟື້ອເພື່ອແຜ່ຂອງປະຊາຊົນຫວຽດນາມອ້າຍນ້ອງ ທີ່ມີຕໍ່ປະ ຊາຊົນລາວ ດ້ວຍຄຳເວົ້າທີ່ເປັນອຳມະຕະ ທີ່ມີຊີວິດຊີວາ ທີ່ວ່າ ລາວ-ຫວຽດນາມ ແມ່ນຖືເປັນອ້າຍນ້ອງ ທີ່ສາມາດເວົ້າໄດ້ວ່່າ “ຍາມທຸກ ແລະ ສຸກ ກໍຢູ່ຄຽງຂ້າງກັນຕະຫລອດເວລາ ເຂົ້າເມັດຫັກ, ຜັກເສັ້ນດຽວ ກໍ່ແບ່ງກັນກິນ”.
ສະຫາຍ ປະທານປະເທດ ທອງລຸນ ສີສຸລິດ ໄດ້ຕາງໜ້າໃຫ້ພັກ, ລັດ ແລະ ປະຊາຊົນລາວບັນ ດາເຜົ່າ ສະແດງຄວາມຮູ້ບຸນຄຸນ ແລະ ຂອບໃຈເປັນຢ່າງສູງ ຜ່ານສະຫາຍ ປະທານປະເທດ ຫງວຽນ ຊວັນ ຟຸກ ໄປຍັງການນຳຂອງພັກ, ລັດ ແລະ ປະຊາຊົນຫວຽດນາມ ທຸກຖ້ວນໜ້າ ຕໍ່ສົມບັດອັນໃຫຍ່ຫລວງ, ລ້ຳຄ່າ ແລະ ຢືນຢັນວ່າ ຈະພ້ອມກັນປົກປັກຮັກສາຫໍສະພາແຫ່ງຊາດຫລັງນີ້ ໃຫ້ຄົງຢູ່ກັບພະ ທາດຫລວງ ທີ່ເປັນສະຖານທີ່ຊັກກາລະບູຊາ ຂອງປະຊາຊົນລາວຕະຫລອດໄປ.
ພາຍຫລັງສຳເລັດພິທີເປີດນຳໃຊ້ ແລະ ມອບຮັບຫໍສະພາແຫ່ງຊາດລາວແລ້ວ, ສະຫາຍປະທານປະເທດທັງສອງ ກໍໄດ້ໃຫ້ກຽດປະດັບຫລຽນໄຊອິດສະຫລະຊັ້ນ 1 ແລະ ຊັ້ນ 2 ຂອງ ສປປ ລາວ ໃຫ້ 3 ກົມກອງຂອງຝ່າຍຫວຽດນາມ ແລະ ປະດັດຫລຽນໄຊແຮງງານຊັ້ນ 1 ແລະ ຊັ້ນ 2 ຂອງ ສປປ ຫວຽດ ນາມ ໃຫ້ບຸກຄົນຝ່າຍລາວ ຈຳນວນ 3 ສະຫາຍ.
ພ້ອມກັນນັ້ນ, ສະຫາຍ ປະທານປະເທດ ທອງລຸນ ສີສຸລິດ ແລະ ຫງວຽນ ຊວັນ ຟຸກ ໄດ້ພ້ອມກັນເປີດແຖບຜ້າຫີນສີລາຈາລຶກ ທີ່ມີເນື້ອໃນ “ຫໍສະພາແຫ່ງຊາດຂອງຂວັນຈາກພັກ, ລັດ ແລະ ປະຊາ ຊົນຫວຽດນາມ” ແລະ ຮ່ວມກັນປູກຕົ້ນໄມ້ ທີ່ລະນຶກເພື່ອເປັນສິລິມົງຄຸນ ແກ່ສະພາແຫ່ງຊາດລາວ.
ຂ່າວ: ສິງຄຳ ແຍງຕາວັນ
May be an image of 4 people, people standing, flower and indoor
May be an image of one or more people and people standing