ວິທະຍຸກະຈາຍສຽງແຫ່ງຊາດລາວ

Lao National Radio

ຕັ້ງໜ້າຜັນຂະຫຍາຍມະຕິກອງປະຊຸມໃຫຍ່ ຄັ້ງທີ XI ຂອງພັກ ເຂົ້າສູ່ຊີວິດຈິງ
ວັນທີ 25 ພຶດສະພາ 2024, ທີ່ຫ້ວຍມາລາ ບ້ານໂພນໄຮ ເມືອງເຊໂປນ ແຂວງສະຫວັນນະເຂດ ໄດ້ຈັດພິທີມອບ-ຮັບ ໂຄງການກໍ່ສ້າງ, ຕິດຕັ້ງ ແລະ ຕົບແຕ່ງເດີ່ນອະນຸສອນສະຖານ ສະຫາຍ ມາ ໄຂຄໍາພິທູນ, ມີ ສະຫາຍ ບຸນທອງ ຈິດມະນີ ກໍາມະການກົມການເມືອງສູນກາງພັກ, ຜູ້ປະຈຳການຄະນະເລຂາທິການສູນກາງພັກ, ຮອງປະທານປະເທດ, ສະຫາຍ ພົນເອກ ຈັນສະໝອນ ຈັນຍາລາດ ກໍາມະການກົມການເມືອງສູນກາງພັກ, ຮອງນາຍົກລັດຖະມົນຕີ, ລັດຖະມົນຕີກະຊວງປ້ອງກັນປະເທດ, ສະຫາຍ ກິແກ້ວ ໄຂຄໍາພິທູນ, ກໍາມະການກົມການເມືອງສູນກາງພັກ, ຮອງນາຍົກລັດຖະມົນຕີ, ພ້ອມດ້ວຍບັນດາລັດຖະມົນຕີ-ຮອງລັດຖະມົນຕີ, ເຈົ້າແຂວງ, ເຈົ້າເມືອງ ແລະ ປະຊາຊົນຊາວເມືອງເຊໂປນ ແຂວງສະຫວັນນະເຂດ ເຂົ້າຮ່ວມ.
ສະຫາຍ ທອງສະຫວັດ ໄຂຄໍາພິທູນ ພະນັກງານປະຕິວັດອາວຸໂສບໍານານ ຕາງໜ້າຄອບຄົວ ໄຂຄໍາພິທູນ ໄດ້ກ່າວມອບອະນຸສອນສະຖານແຫ່ງນີ້ ໃຫ້ແຂວງສະຫວັນນະເຂດ. ພ້ອມທັງຍົກບາງບັນຫາທີ່ສໍາຄັນກ່ຽວກັບການຈັດຕັ້ງປະຕິບັດໂຄງການດັ່ງກ່າວ ເພື່ອສະແດງຄວາມຮັກ, ຄວາມເຄົາລົບນັບຖື ແລະ ຮູ້ບຸນຄຸນຕໍ່ນັກຮົບປະຕິວັດອາວຸໂສທີ່ໄດ້ເສຍສະຫຼະເພື່ອພາລະກິດປະຕິວັດຕະຫຼອດມາ.
ສະຫາຍ ມາ ໄຂຄໍາພິທູນ ແມ່ນໜຶ່ງໃນຜູ້ນໍາອະວຸໂສຂອງພັກ, ຂອງລັດ ແມ່ນນັກຮົບປະຕິວັດຜູ້ອົງອາດກ້າແກ່ນ, ເດັດດ່ຽວໜຽວແໜ້ນມີນໍ້າໃຈຮັກຊາດ, ຮັກປະຊາຊົນຢ່າງສຸດຊຶ້ງ, ມີຄວາມຈົງຮັກພັກດີຕໍ່ອຸດົມການ ແລະ ພາລະກິດປະຕິວັດຂອງພັກ ສະຫາຍ ເປັນຜູ້ນຳທີ່ສະຫຼຽວສະຫຼາດ ປະກອບສ່ວນເຂົ້າໃນການນໍາພາ-ຊີ້ນໍາ ຂອງພັກ-ລັດ, ແມ່ນຜູ້ມີສິນທໍາປະຕິວັດບໍລິສຸດ ຜ່ອງໃສ, ຊື່ສັດບໍລິສຸດຕໍ່ພັກ, ຕໍ່ລັດ, ຕໍ່ປະເທດຊາດຕະຫຼອດມາ.
ໂຄງການດັ່ງກ່າວ ມີເນື້ອທີ່ 5 ເຮັກຕາ ຢູ່ທີ່ຫ້ວຍມາລາ ບ້ານໂພນໄຮ ເມືອງເຊໂປນ ແຂວງສະຫວັນນະເຂດ ທີ່ລັດຖະບານໄດ້ຕົກລົງຜ່ານມາ. ພິທີວາງສີລາຈາລຶກການກໍ່ສ້າງໄດ້ຈັດຂຶ້ນໃນວັນ ທີ 19 ສິງຫາ 2023 ມາຮອດ ວັນທີ 25 ພຶດສະພາ 2024 ເປັນ ເວລາ 10 ເດືອນຈິ່ງສໍາເລັດໂດຍພື້ນຖານ, ເພື່ອໃຫ້ສະຖານທີ່ແຫ່ງນີ້ ເປັນບ່ອນສຶກສາຮຽນຮູ້ທາງດ້ານປະຫວັດສາດ, ຄຸນສົມບັດສິນທໍາປະຕິວັດແບບຢ່າງອັນດີງາມ ຂອງນັກຮົບປະຕິວັດອັນກ້າແກ່ນເດັດດ່ຽວໜຽວແໜ້ນໃຫ້ຮຸ່ນຄົນສືບທອດ. ນອກນັ້ນ, ຍັງສ້າງໃຫ້ເປັນແຫຼ່ງທ່ອງທ່ຽວທາງດ້ານປະຫວັດສາດ ແລະ ວັດທະນະທຳຂອງເມືອງເຊໂປນແຂວງສະຫວັນນະເຂດ ຕື່ມອີກ.
ໂອກາດນີ້, ສະຫາຍ ບຸນໂຈມ ອຸບົນປະເສີດ ກໍາມະການ ສູນກາງພັກ, ເຈົ້າແຂວງ ແຂວງສະຫວັນນະເຂດ ໄດ້ຕາງໜ້າໃຫ້ຄະນະພັກ-ອໍານາດການປົກຄອງ ແລະ ປະຊາຊົນບັນດາເຜົ່າຊາວແຂວງສະຫວັນນະເຂດ ກ່າວຮັບເອົາໂຄງການກໍ່ສ້າງ, ຕິດຕັ້ງ ແລະ ຕົບແຕ່ງເດີ່ນອະນຸສອນສະຖານ ສະຫາຍ ມາ ໄຂຄໍາພິທູນ ພ້ອມທັງໃຫ້ຄໍາໝັ້ນສັນຍາວ່າ ຈະສືບຕໍ່ບົວລະບັດປົກປັກຮັກສາ ເສີມຂະຫຍາຍຄຸນປະໂຫຍດອະນຸສອນສະຖານດັ່ງກ່າວ ໃນການສຶກສາອົບຮົມ, ປູກຈິດສໍານຶກໃຫ້ແກ່ຮຸ່ນສືບທອດໄດ້ຮຽນຮູ້ ກ່ຽວກັບຄຸນງາມຄວາມດີ ແລະ ຜົນງານອັນໃຫຍ່ຫຼວງຂອງ ສະຫາຍ ມາ ໄຂຄໍາພິທູນ ທີ່ໄດ້ອຸທິດຕົນຕະຫຼອດຊີວິດ ເພື່ອປະເທດຊາດ ແລະການປະຕິວັດໃຫ້ຍືນຍົງຄົງຕົວຕະຫຼອດໄປ.
ໂດຍ: ອາຫວຸ້ນ ອິນຫຼວງເຮືອງ