ໂຄງການແສງສະຫວ່າງເຂດເທສະບານໃຈກາງນະຄອນຫລວງວຽງຈັນ ດ້ວຍທຶນຊ່ວຍເຫຼືອລ້າ ຈາກລັດຖະບານ ສປ ຈີນ ຈັດຂຶ້ນຕອນແລງວັນທີ 26 ມິນາ 2021 ທີ່ສວນປະຕູໄຊ ນະຄອນຫລວງວຽງຈັນ, ໂດຍການເຂົ້າຮ່ວມຂອງທ່ານສິນລະວົງ ຄຸດໄພທູນ ກໍາມະການກົມການເມືອງສູນກາງພັກ, ເຈົ້າຄອງນະຄອນຫຼວງວຽງຈັນ, ທ່ານຈ່ຽງຈ້າຍຕົງ ເອກອັກຄະລັດຖະທູດຜູ້ມີອໍານາດເຕັມແຫ່ງ ສປ ຈີນ ປະຈໍາ ສປປ ລາວ ພ້ອມດ້ວຍພາກສ່ວນກ່ຽວຂ້ອງ.
ທ່ານ ຊົງເລົ່າ ຢົງນູ ຫົວໜ້າຄະນະຮັບຜິດຊອບໂຄງການຝ່າຍລາວໃຫ້ຮູ້ວ່າ:ໂຄງການຍົກລະດັບລະບົບໄຟຟ້າໃນນະຄອນຫຼວງວຽງຈັນ ແມ່ນໂຄງການຫນຶ່ງທີ່ນອນຢູ່ໃນກອບສັນຍາວ່າດ້ວຍການຮ່ວມມືດ້ານເສດຖະກິດ ແລະ ເຕັກນິກ ລະຫວ່າງ ລັດຖະບານແຫ່ງ ສປປ ລາວ ແລະ ລັດຖະບານແຫ່ງ ສປຈີນ ປະກອບມີ 3 ໜ້າວຽກຫຼັກຄື:
– ຍົກລະດັບລະບົບໄຟຟ້າເຂດເທດສະບານ ແລະ ຊານເມືອງ ໃນນະຄອນຫຼວງວຽງຈັນ ດ້ວຍການຍົກລະດັບ ລະບົບຕາຂ່າຍໄຟຟ້າແຮງດັນກາງ 22 ກວ, ແລະ ໝໍ້ແປງໄຟຟ້າ 22/0.4 ກວ – ປັບປຸງລະບົບນ້ຳພຸສວນປະຕູໄຊ; ແລະ ຍົກລະດັບໄຟຟ້າແສງສະຫວ່າງໄຟເຍືອງທາງ 7 ເສັ້ນທາງໃນເຂດເທດສະບານໃຈກາງຕົວເມືອງນະຄອນຫຼວງວຽງຈັນ.
ສໍາລັບການປັບປຸງລະບົບນ້ຳພຸສວນປະຕູໄຊ ແລະ ປັບປຸງລະບົບແສງສະຫວ່າງໄຟເຍືອງທາງ 7 ເສັ້ນ ຢູ່ໃນເຂດໃຈກາງຕົວເມືອງນະຄອນຫລວງ ເລີ່ມລົງມືປະຕິບັດຕົວຈິງ ມາຕັ້ງແຕ່ວັນທີ 12 ກັນຍາ ເຖິງ ວັນທີ 27 ພະຈິກ 2020 ໃຊ້ເວລາພຽງ 2 ເດືອນ ກັບ 15 ວັນ ໄດ້ສໍາເລັດໂດຍພື້ນຖານດ້ານການກໍ່ສ້າງ-ຕິດຕັ້ງ ແລະ ສາມາດເປີດນຳໃຊ້ໄດ້ທັນຕາມກຳນົດເວລາທີ່ສອງພັກສອງລັດໄດ້ກໍານົດເອົາໂຄງການນີ້ເປັນຂອງຂວັນຈາກລັດຖະບານ ແລະ ປະຊາຊົນຈີນ ມອບໃຫ້ແກ່ລັດຖະບານ ແລະ ປະຊາຊົນລາວ ເພື່ອ ຂໍ່ານັບຊົມເຊີຍວັນຊາດທີ 2 ທັນວາ ວັນສະຖາປານາ ສປປລາວ ຄົບຮອບ 45 ປີ ແລະ ຂໍ່ານັບຮັບຕ້ອນກອງປະຊຸມໃຫຍ່ຄັ້ງທີ XI ຂອງພັກປະຊາຊົນປະຕິວັດລາວ.
ຈາກນັ້ນ, ທີມງານໄດ້ສືບຕໍ່ຈັດຕັ້ງປະຕິບັດໜ້າວຽກຈໍານວນໜຶ່ງທີ່ຍັງບໍ່ທັນສໍາເລັດ ເປັນຕົ້ນ: ການຟື້ນຟູ ທາງຍ່າງ, ການຕິດຕັ້ງລະບົບກ້ອງວົງຈອນປິດ ແລະ ຫ້ອງຄວບຄຸມລວມທັງລະບົບສັນຍານສົ່ງຂໍ້ມູນ, ໄດ້ສໍາເລັດ100% ບັນດາໜ້າວຽກທີ່ໄດ້ຈັດຕັ້ງປະຕິບັດລະອຽດມີດັ່ງນີ້:
– ການປັບປຸງລະບົບນ້ຳພຸຢູ່ສວນປະຕູໄຊ.
© ປ່ຽນລະບົບຫົວສີດນ້ຳພຸໃໝ່, ປໍ້ານໍ້າໃໝ່, ປ່ຽນກະໂລຂອບອ່າງໃໝ່ ແລະ ຍົກຂອບອ່າງໃຫ້ສູງຂຶ້ນຕື່ມທັງສອງອ່າງ.
© ຕິດຕັ້ງລະບົບຄວບຄຸມຫົວສີດນ້ຳພຸໃໝ່ທັງສອງອ່າງ.
© ໄດ້ອອກແບບລະບົບສີດນ້ຳພຸໃໝ່ທັງໝົດທີ່ປະກອບມີຫຼາຍຮູບແບບ ແລະ ຫຼາຍສີສັນນໍ້າບິນ ແລະ ນ້ຳ
ເຕັ້ນທີ່ສວຍງາມປະສານກັບສຽງເພັງຈໍານວນ 10 ເພັງ.
© ປ່ຽນລະບົບໄຟເຍືອງສວນ ແລະ ລະບົບຫົດນໍ້າສວນຫຍ້າຄືນໃໝ່.
ສໍາລັບການຍົກລະດັບ ແລະ ປັບປຸງລະບົບໄຟເຍືອງທາງ 7 ເສັ້ນທາງ (ຈໍານວນ 341 ຊຸດ) ມີດັ່ງນີ້:
– ເສັ້ນທາງ ຖະໜົນລ້ານຊ້າງ: ໄດ້ຮື້ຖອນເສົາໄຟເຍືອງທາງເກົ່າອອກທັງໝົດ ແລະ ຕິດຕັ້ງລະບົບໄຟເຍືອງທາງໃໝ່ ດ້ວຍການອອກແບບເປັນເສົາໄຟ 4 ຫຼ່ຽມ ສີຄໍາ, ຊຸດດອກໄຟເປັນລັກສະນະຊໍ່ດອກກ້ວຍໄມ້ທີ່ມີຄວາມໝາຍທາງດ້ານມິດຕະພາບ ແລະ ການຮ່ວມມືຈຳນວນ 9 ດອກເປັນດອກໂຊ ແລະ ດອກໄຟເຍືອງທາງອີກ 4
ດອກ ລວມ 13 ດອກ ໃນຕົ້ນດຽວ ທີ່ມີຄວາມໂດດເດັ່ນ, ສວຍງາມ ແລະ ຮຸ່ງສະຫວ່າງ;
– ເສັ້ນທາງເບີ 2-5 (ຖະໜົນ 23 ສິງຫາ, ຖະໜົນໜອງບອນ, ຖະໜົນໄກສອນ ພົມວິຫານ, ຖະໜົນເສດຖາທິລາດ-ແຄມຂອງ): ໄດ້ຮື້ເສົາໄຟເຍືອງທາງເກົ່າອອກທັງໝົດ ແລະ ຕິດຕັ້ງເສົາໄຟເຍືອງທາງໃໝ່ ທີ່ມີການອອກແບບເປັນເສົາໄຟສີຂາວ ຕີນເສົາໂອບດ້ວຍຮູບດອກບົວ ສີຄໍາ ແລະ ປາຍເສົາເປັນສັນຍາລັກຮູບຈອມທາດ ຊຶ່ງມີຄວາມໝາຍທາງດ້ານພຸດທະສາດສະໜາທີ່ປະຊາຊົນລາວເຊື່ອຖື
– ເສັ້ນທາງເບີ 6 (ຖະໜົນແຄມຂອງ): ຍັງນຳໃຊ້ເສົາໄຟເກົ່າທີ່ມີໃນປະຈຸບັນ ແຕ່ໄດ້ປ່ຽນດອກໄຟ ແລະ ສາຍໄຟໃໝ່ໃສ່ແທນ;
– ເສັ້ນທາງເບີ 7 (ຖະໜົນເຈົ້າຟ້າງຸ່ມ): ໄດ້ຮື້ຖອນເສົາໄຟເຍືອງທາງເກົ່າອອກ ແລະ ຕິດຕັ້ງເສົາໄຟໃໝ່ດ້ວຍການອອກແບບເປັນເສົາໄຟແບບທໍາມະດາ ແລະ ໄດ້ຕິດຕັ້ງສັນຍາລັກການຮ່ວມມືລາວ-ຈີນ ໃສ່ກາງຂອງຕົ້ນເສົາໄຟເຍືອງທາງເປັນຮູບດອກຈໍາປາຕິດເປັນຄູ່ ແລະ ຂອດຈີນສີແດງເປັນຄູ່ທີ່ມີຄວາມໝາຍອັນເປັນສິລິມົງຄຸນສະລັບຕົ້ນກັນ,ຈໍານວນ 50 ຕົ້ນ;
– ຕິດຕັ້ງລະບົບກ້ອງວົງຈອນປິດໃສ່ສວນປະຕູໄຊ ແລະ 7 ເສັ້ນທາງ ຈໍານວນ 22 ຈຸດ ລວມ 40 ໜ່ວຍ ແລະ ປັບປຸງຫ້ອງຄວບຄຸມ, ຕິດຕັ້ງລະບົບຄວບຄຸມໄຟເຍືອງທາງແບບລວມສູນທີ່ທັນສະໄໝ ຢູ່ຊັ້ນ 1 ຂອງຫ້ອງການ ຄຸ້ມຄອງ ແລະ ບໍລິການຕົວເມືອງ ນະຄອນຫຼວງວຽງຈັນ.
– ການນໍາໃຊ້ເສົາໄຟເກົ່າ ທີ່ຮື້ຖອນອອກຈາກເຂດໂຄງການ ທີ່ເປັນຄວາມຮັບຜິດຊອບຂອງຝ່າຍລາວ. ເສົາໄຟ ແລະ ອຸປະກອນໄຟເຍືອງທາງເກົ່າທີ່ຮື້ຖອນອອກຈາກ 7 ເສັ້ນທາງ ແມ່ນໄດ້ນໍາໄປ ຕິດຕັ້ງໃສ່
ເສັ້ນທາງອື່ນທີ່ບໍ່ທັນມີໄຟເຍືອງທາງ ຄື: ເສັ້ນທາງ T6 ໄລຍະແຕ່ບ້ານຫ້ວຍຫົງ-ໂຮງໝໍແມ່ ແລະ ເດັກ-ບ້ານໜອງ
ພະຍາ ແລະ ເຂດເທດສະບານເມືອງປາກງື່ມ ແລະ ເມືອງສັງທອງ ນະຄອນຫຼວງວຽງຈັນ;
ທ່ານຊົງເລົ່າ ຢົງນູ ໃຫ້ຮູ້ຂໍ້ສະດວກ ແລະ ຂໍ້ຫຍຸ້ງຍາກໃນການຈັດຕັ້ງປະຕິບັດໂຄງການວ່າ: ຍ້ອນໄລຍະຈັດຕັ້ງປະຕິບັດໂຄງການ ແມ່ນມີເວລາຫຼາຍ ແລະ ຖືກໄລຍະທີ່ມີການແຜ່ລະບາດຂອງພະຍາດ ໂຄວິດ19 ເຮັດໃຫ້ການນຳເຂົ້າຊ່ຽວຊານ, ວິຊາການ ແລະ ວັດຖຸອຸປະກອນຈາກ ສປ ຈີນ ພົບຂໍ້ຫຍຸ້ງຍາກຫຼາຍ; ສະຖານທີ່ການຈັດຕັ້ງປະຕິບັດໂຄງການເປັນເຂດໃຈກາງຕົວເມືອງທີ່ມີລະບົບການສັນຈອນຢ່າງໜາແໜ້ນ ແລະ ທັງເປັນພື້ນທີ່ບ່ອນເຮັດວຽກ, ດຳເນີນກິດຈະການປະຈໍາວັນຂອງຊາວເມືອງຫຼວງ. ແຕ່ຍ້ອນໄດ້ຮັບການຊີ້ນໍາຢ່າງໃກ້ຊິດຈາກທ່ານເຈົ້າຄອງນະຄອນຫຼວງວຽງຈັນ, ຈາກຄະນະກໍາມະການຮ່ວມມືລາວ-ຈີນ ແລະຈາກທ່ານທູດຈີນ ແລະ ຄວາມເອົາໃຈໃສ່ດ້ວຍຄວາມຮັບຜິດຊອບສູງຂອງຄະນະຮັບຜິດຊອບໂຄງການ ຝ່າຍລາວ ແລະ ຝ່າຍຈີນ ຈຶ່ງສາມາດຈັດຕັ້ງປະຕິບັດໂຄງການສໍາເລັດຕາມແຜນການທີ່ວາງໄວ້ ແລະ ມີປະສິດທິຜົນດີຫຼາຍ.
ຈາກນັ້ນທ່ານທ່ານຈ່ຽງຈ້າຍຕົງ ເອກອັກຄະລັດຖະທູດຜູ້ມີອໍານາດເຕັມແຫ່ງ ສປຈີນ ປະຈໍາ ສປປ ລາວ ໄດ້ຂຶ້ນກ່າວມອບໂຄງການໃຫ້ຝ່າຍລາວ ແລະທ່ານອາດສະພັງທອງ ສີພັນດອນ ຮອງເຈົ້າຄອງນະຄອນຫລວງວຽງຈັນ ຂຶ້ນກ່າວ ຮັບເອົາໂຄງການ ແສງສະຫວ່າງໃນເຂດເທດສະບານໃຈກາງເມືອງ ນະຄອນຫລວງວຽງຈັນຢ່າງເປັນທາງການ.
May be an image of 1 person, standing and flower
Loading...