ພິທີມອບຮັບ 10 ໂຄງລ່າງພື້ນຖານໃຫ້ປະຊາຊົນບ້ານ ນໍ້າໂມ້, ນໍ້າຍອນ ເມືອງອະນຸວົງ ແລະ ບ້ານ ນາໄຊສະຫວ່າງ ເມືອງລ້ອງເເຈ້ງແຂວງ ໄຊສົມບູນ ພາຍໃຕການສະໜັບສະໜູນໂດຍທຶນພັດທະນາຊຸມຊົນຂອງບໍລິສັດພູເບ້ຍ ມາຍນິງ ຈໍາກັດໃນມູນຄ່າທັງໝົດຫລາຍກວ່າ 387.000 ໂດລາສະຫະລັດ ໄດ້ຈັດຂຶ້ນໃນຕອນເຊົ້າ ວັນທີ 15 ທັນວາ 2023 ທີ່ເດີ່ນໂຮງຮຽນປະຖົມ ບ້ານນໍ້າໂມ້ ເມືອງອານຸວົງ ແຂວງໄຊສົມບູນ. ໂດຍການເຂົ້າຮ່ວມຂອງທ່ານ ສົມບູນ ສອນລິດທິເດດ ຫົວໜ້າຫ້ອງວ່າການແຂວງ ໄຊສົມບູນ, ມີທ່ານ ຈັນເພັງ ບຸນນະຜົນ ປະທານບໍລິສັດ ພູເບ້ຍມາຍນິງ ຈໍາກັດ, ທ່ານ ພູທອນ ວົງພະຈັນ ຮອງປະທານສະພາປະຊາຊົນແຂວງ, ທ່ານ ສະຕິບ ຈີມໂປ ຜູ້ອໍານວຍການ ບໍລິສັດ ພູເບ້ຍມາຍນິງ ຈໍາກັດ, ຕາງໜ້າການນໍາຂອງແຂວງ, ບໍລິສັດ ພູເບ້ຍ ມາຍນິງ ຈໍາກັດ ແລະ ອົງການປົກຄອງທັງ 3 ບ້ານ ຕະຫລອດຮອດປະຊາຊົນ ແລະ ແຂກຮັບເຊີນເຂົ້າຮ່ວມ.
ທ່ານ ສະຕິບ ຈີມໂປ ຜູ້ອໍານວຍການ ບໍລິສັດ ພູເບ້ຍມາຍນິງມີຄໍາເຫັນວ່າ: ພິທີມອບນັບ 10 ໂຄງລ່າງພື້ນຖານໃຫ້ປະຊາຊົນບ້ານ ນໍ້າໂມ້, ນໍ້າຍອນ ແລະ ບ້ານ ນາໄຊສະຫວ່າງແຂວງ ໄຊສົມບູນໃນຄັ້ງນີ້ ສຸດທີ່ມີຄວາມໝາຍສໍາຄັນຂອງທາງບໍລິສັດ ພູເມ້ຍ ມາຍນິງ ກ່ຽວກັບການກໍ່ສ້າງ 10 ໂຄງລ່າງພື້ນຖານໃຫ້ປະຊາຊົນ 3 ບ້ານນີ້, ເຊິ່ງສະແດງໃຫ້ເຫັນເຖິງການປະກອບສ່ວນ ແລະ ພັນທະສັນຍາຕ່າງໆ ທີ່ທາງບໍລິສັດໄດ້ມີຄໍາໝັ້ນສັນຍາຕໍ່ປະຊາຊົນຢູ່ 3 ບ້ານກໍ່ຄືປະຊາຊົນທີ່ຢູ່ອ້ອມຂ້າງຂອງການຈັດຕັ້ງປະຕິບັດວຽກງານພັດທະນາຊຸມຊົນຂອງບໍລິສັດ, ພ້ອມທັງເປັນພັນທະອັນໜຶ່ງທີ່ທາງບໍລິສັດ ພູເບ້ຍ ມາຍນິງຈະປັບປຸງຊີວິດການເປັນຢູ່ປະຊາຊົນອ້ອມຂ້າງການດໍາເນີນງານຂອງບໍລິສັດ ພູເບ້ຍ ມາຍນິງ ໃຫ້ມີຊີວິດການເປັນຢູ່ດີຂຶ້ນກວ່າເກົ່າ ແລະ ຂໍສະແດງຄວາມຂອບໃຈເປັນຢ່າງສູງ ແລະ ຊົມເຊີຍຕໍ່ຄະນະນໍາ, ໜ່ວຍງານຕ່າງໆ ຕະຫລອດພະນັກງານທຸກຄົນຂອງບໍລິສັດ ພູເບ້ຍ ມາຍນິງ ທີ່ສຸມໃສ່ພັດທະນາຊຸມຊົນຈົນໄດ້ຮັບຜົນສໍາເລັດຢ່າງຈົບງາມ.
ໃນໂອກາດນີ້ ທ່ານ ສົມບູນ ສອນລິດທິເດດ ຫົວໜ້າຫ້ອງວ່າການແຂວງ ໄຊສົມບູນມີຄໍາເຫັນວ່າ: ໃນ 10 ໂຄງການທີ່ມອບຮັບໃນມື້ນີກໍ່ເປັນສ່ວນໜຶ່ງທີ່ໄດ້ປະກອບເຂົ້າແຜນພັດທະນາເສດຖະກິດສັງຄົມຂອງແຂວງ ໄຊສົມບູນ ທັງເປັນການຕອບສະໜອງຄວາມຮຽກຮ້ອງຕ້ອງການທີ່ຈໍາເປັນຂອງປະຊາຊົນໃນສາມບ້ານຂອງເມືອງອານຸວົງ ແລະ ເມືອງລ້ອງແຈ້ງ ແລະ ເປັນການປະກອບສ່ວນ ຊ່ວຍພັດທະນາຊີວິດການເປັນຢູ່ຕອບສະໜອງໃຫ້ແກ່ສິ່ງອໍານວຍຄວາມສະດວກໃຫ້ແກ່ປະຊາຊົນທີ່ມີມູນຄ່າອັນມະຫາສານ ແລະ ຕະຫລອດໄລຍະຜ່ານມາ ບໍລິສັດ ພູເບ້ຍ ມາຍນິງ ກໍ່ໄດ້ປະກອບສ່ວນຫລາຍກິດຈະກໍາທີ່ເປັນປະໂຫຍດສໍາຄັນໃຫ້ປະຊາຊົນອ້ອມຂ້າງການດໍາເນີນການຂອງທາງບໍລິສັດ, ຕາງໜ້າໃຫ້ການນໍາແຂວງກໍ່ຄືໃນນາມສ່ວນຕົວຂໍສະແດງຄວາມຂອບໃຈເປັນຢ່າງສູງ ແລະ ຊົມເຊີຍມາຍັງທາງບໍລິສັດ ພູເບ້ຍ ມາຍນິງ ທີ່ໄດ້ປະກອບ ສ່ວນອັນສໍາຄັນໃນການພັດທະນາເສດຖະກິດສັງຄົມກໍ່ຄືການແກ້ໄຂຊີວິດການເປັນຢູ່ຂອງປະຊາຊົນໃນ 3 ບ້ານຢູ່ຂົງເຂດຂອງໂຄງການຂຸດຄົ້ນບໍ່ແຮ່ທອງ-ຄໍາຂອງພູຄໍາໃນຄັ້ງນີ້.
ສໍາລັບ 10 ໂຄງລ່າງພື້ນຖານທີ່ທາງບໍລິສັດ ພູເບ້ຍ ມາຍນິງ ຈໍາກັດ ມອບໃຫ້ປະຊາຊົນ 3 ບ້ານຂອງເມືອງອານຸວົງ ແລະ ເມືອງ ລ້ອງແຈ້ງໃນຄັ້ງນີ້ ປະກອບມີ ບ້ານນໍ້າໂມ້ ມີ 4 ໂຄງການຄື: ການກໍ່ສ້າງຊົນລະປະທານນໍ້າແດງ, ຫ້ອງນ້ໍາໂຮງຮຽນປະຖົມ, ໂຮງໝໍນ້ອຍຊຸມຊົນ ແລະ ການກໍ່ສ້າງຕະ ຫລາດສົດ, ບ້ານນໍ້າຍອນມີ 5 ໂຄງການຄື: ການປັບປຸງໂຮງຮຽນອະນຸບານ, ການກໍ່ສ້າງຫ້ອງນໍ້າໂຮງ ຮຽນປະຖົມ, ການກໍ່ສ້າງເສັ້ນທາງຫາໂຮງຮຽນປະຖົມ, ກໍ່ສ້າງໂຮງຮຽນ 4 ຫ້ອງ ແລະ ປັບປຸງຫໍພັກຄູ. ແລະ ບ້ານນາໄຊສະຫວ່າງເມືອງລ້ອງແຈ້ງມີ 1 ໂຄງການຄື: ການກໍ່ສ້າງຫໍພັກຄູ ແລະ ອະນຸບານ, ຕອນທ້າຍຂອງພິທີຍັງໄດ້ເຊັນບົດບັນທຶກການມອບ-ຮັບໂຄງລ່າງພື້ນຖານຊຸມຊົນ ພ້ອມທັງຕັດແທບຜ້າ ເພື່ອນໍາໃຊ້ໂຄງການດັ່ງກ່າວຢ່າງເປັນທາງການ ໂດຍຕາງໜ້າສອງກໍ່້າສອງຝ່າຍເຂົ້າຮ່ວມເປັນສັກຂີພິຍານ.%
ໂດຍ: ບຸນຍັງ ພຸດສະຫວັດ
