ວິທະຍຸກະຈາຍສຽງແຫ່ງຊາດລາວ

Lao National Radio

ຕັ້ງໜ້າຜັນຂະຫຍາຍມະຕິກອງປະຊຸມໃຫຍ່ ຄັ້ງທີ XI ຂອງພັກ ເຂົ້າສູ່ຊີວິດຈິງ
ພິທີມອບ-ໂອນທີ່ດິນກະຊວງກະສິກໍາ ແລະ ປ່າໄມ້ ໃຫ້ກອງບັນຊາການທະຫານອາກາດກະຊວງປ້ອງກັນປະເທດ ຈັດຂຶ້ນໃນວັນທີ 4 ກໍລະກົດ 2024 ທີ່ສໍານັກງານກອງບັນຊາການທະຫານອາກາດ.
ທ່ານ ພັນເອກ ສໍາເຮືອງ ພັນທະນີ ຮອງຫ້ອງການພະລາ ກອງບັນຊາການທະຫານອາກາດ ໄດ້ລາຍງານໄດ້ຮູ້ວ່າ: ໃນໄລຍະຜ່ານມາ ກອງບັນຊາການທະຫານອາກາດແມ່ນມີຄວາມຈຳເປັນຕ້ອງການນຳໃຊ້ທີ່ດິນປຸກສ້າງສຳນັກງານກອງບັນຊາການທະຫານອາກາດ ຢູ່ແຫ່ງໃໝ່ ຜ່ານການສຳຫຼວດສະຖານທີ່ຕົວຈິງ, ເຫັນວ່າ ພື້ນທີ່ດິນຂອງສະຖານີລ້ຽງໝູ (ກະຊວງກະສິກຳ ແລະ ປ່າໄມ້) ຕັ້ງຢູ່ບ້ານຈັນສະຫວ່າງ, ເມືອງ ສີໂຄດຕະບອງ, ນະຄອນຫຼວງວຽງຈັນ ແມ່ນມີຄວາມເໝາະສົມນຳໃຊ້ເປັນສະຖານທີ່ປຸກສ້າງ.
ສະນັ້ນ, ກະຊວງປ້ອງກັນປະເທດ ຈຶ່ງໄດ້ສະເໜີຂໍນຳໃຊ້ທີ່ດິນດັ່ງກ່າວ, ໂດຍໄດ້ຮັບການເຫັນດີຈາກ ຂັ້ນເທິງ ກໍ່ຄືລັດຖະບານ ຕໍ່ມາ ກະຊວງກະສິກຳ ແລະ ປ່າໄມ້ ຈຶ່ງໄດ້ອອກຂໍ້ຕົກລົງ ວ່າດ້ວຍການມອບເນື້ອທີ່ດິນ ສະຖານີລ້ຽງໝູ ຈຳນວນ 2,85 ເຮັກຕາ ໃຫ້ກະຊວງປ້ອງກັນປະເທດ ເພື່ອກໍ່ສ້າງສຳນັກງານກອງບັນຊາ ການທະຫານອາກາດ ສະບັບເລກທີ 0359/ກປ, ລົງວັນທີ 12 ມີນາ 2021 (ປັດຈຸບັນການກໍ່ສ້າງສຳນັກງານກອງບັນຊາການທະຫານອາກາດ ແມ່ນໄດ້ສຳເລັດແລ້ວ) ຢ່າງໃດກໍ່ຕາມສະຖານທີ່ດັ່ງກ່າວຍັງບໍ່ພຽງພໍ ກັບຄວາມຮຽກຮ້ອງຕ້ອງການ ໃນການກໍ່ສ້າງພື້ນຖານໂຄງລ່າງທີ່ມີຄວາມຈຳເປັນໃຫ້ຄົບຖ້ວນ, ຖືກຕ້ອງຕາມລະບຽບການຂອງກອງທັບ.
ອີງໃສ່ຄວາມຈໍາເປັນ ແລະ ດ້ວຍເຫດຜົນດັ່ງກ່າວນັ້ນ, ກະຊວງປ້ອງກັນປະເທດ ຈຶ່ງໄດ້ສະເໜີຂໍເອົາທີ່ດິນ ຂອງກະຊວງປ້ອງກັນປະເທດ ຕັ້ງຢູ່ບ້ານດ່ານຊີ, ເມືອງນາຊາຍທອງ ເນື້ອທີ່ 8,55 ເຮັກຕາ ແລກປ່ຽນກັບທີ່ດິນ ຂອງກະຊວງກະສິກຳ ແລະ ປ່າໄມ້ ຢູ່ບ້ານຈັນສະຫວ່າງ, ເມືອງສີໂຄດຕະບອງ, ນະຄອນຫຼວງວຽງຈັນ (ຢູ່ດ້ານຫຼັງສຳນັກງານກອງບັນຊາການທະຫານອາກາດ) ເນື້ອທີ່ 4,98 ເຮັກຕາ ບວກໃສ່ກັບ 2,85 ເຮັກຕາ ລວມເປັນ 7,83 ເຮັກຕາ, ເຊິ່ງພາຍຫຼັງກໍ່ໄດ້ມີການຕົກລົງເຫັນດີໃນການແລກປ່ຽນທີ່ດິນດັ່ງກ່າວ.
ສະນັ້ນ. ເພື່ອຈັດຕັ້ງວຽກງານດັ່ງກ່າວ ໃຫ້ສຳເລັດຕາມແຜນການທີ່ວາງໄວ້, ທັງ 02 ພາກສ່ວນ ຈຶ່ງໄດ້ຈັດພິທີ ມອບ-ໂອນ ທີ່ດິນ ລະຫວ່າງ ກະຊວງກະສິກຳ ແລະ ປ່າໄມ້ ແລະ ກະຊວງປ້ອງ ກັນປະເທດ ໂດຍຕາງຫນ້າເຊັນມອບ-ໂອນລະຫວ່າງສອງຝ່າຍຄັ້ງນີ້ ໂດຍ ທ່ານ ສີສະຫວາດ ຫອມດາລາ ຮອງຫົວຫນ້າຫ້ອງການກະຊວງກະສິກໍາ ແລະ ປ່າໄມ້ ແລະ ທ່ານ ພັນເອກ ຈັນທາ ທໍາມະເທວາ ຮອງກອງບັນຊາການ ຫົວຫນ້າຫ້ອງພະລາທິການທະຫານອາກາດ.
ທີ່ມາ: ຂ່າວສານກະຊວງກະສິກຳ ແລະ ປ່າໄມ້