ສື່ມວນຊົນຕ່າງປະເທດ ຈໍານວນ 40 ຄົນ ຈາກອາຊີ- ປາ ຊີຟິກ ແລະ ອາຟຣິກາ, ໃນນີ້ ມີສື່ມວນຊົນຈາກ ສປປ ລາວ 3 ຄົນ ຄື: ວິທະຍຸກະຈາຍສຽງແຫ່ງຊາດລາວ, ສໍານັກຂ່າວ ສານປະເທດລາວ ແລະ ໜັງສືພິມກອງທັບ ພາກສ່ວນລະ 1 ຄົນ ໄດ້ສຳເລັດເຂົ້າຮ່ວມໂຄງການສຶກສາການພັດທະນາຂອງ ສປຈີນ ແລະ ການແລກປ່ຽນດ້ານສື່ມວນຊົນທີ່ຈັດ ຕັ້ງປະຕິບັດຮ່ວມກັນ ລະຫວ່າງ ໂຮງຮຽນ ສື່ມວນຊົນ ແລະ ການສື່ສານຂອງມະຫາວິທະຍາໄລ ເຫຼິນໝິງ ( Renmin University ) ແລະ ສູນຂ່າວສາກົນແຫ່ງປະ ເທດຈີນຂອງກະຊວງການຕ່າງປະເທດຈີນ.
ໂຄງການດັ່ງກ່າວ ໄດ້ຈັດຕັ້ງປະຕິບັດໃນທຸກປີ ໃນໄລ ຍະເວລາ 8 ປີຜ່ານມາ ໂດຍສະເພາະ ໃນປີນີ້ ໂຄງການ ໄດ້ເລີ່ມເຄື່ອນໄຫວມາແຕ່ເດືອນກໍລະກົດຫາ ເດືອນຕຸລາ ຜ່ານມານີ້ ໂດຍມີຈຸດປະສົງເພື່ອເຮັດໃຫ້ສື່ມວນຊົນຕ່າງປະ ເທດທີ່ເຂົ້າຮ່ວມໂຄງການມີຄວາມຮັບຮູ້ ແລະ ເຂົ້າໃຈຢ່າງເລິກເຊິ່ງກ່ຽວກັບ ສປ ຈີນ, ທັງທາງດ້ານການພັດທະນາເສດຖະກິດ-ສັງຄົມ ກໍຄື ນະໂຍບາຍການຕ່າງປະເທດຂອງ ສປ ຈີນ ໂດຍຜ່ານການບັນຍາຍໃນຫລາຍຫົວຂໍ້ທີ່ສໍາຄັນຈາກອາຈານທີ່ມາຈາກມະຫາວິທະຍາໄລ ເຫຼິນໝິງ ເພື່ອໃຫ້ມີການແລກປ່ຽນບົດຮຽນຮ່ວມກັນກັບສື່ມວນຊົນຕ່າງປະ ເທດ.
ທ່ານ ຫລຸຍ ຢູຕົງ ທີ່ປຶກສາ ກົມຂໍ້ມູນຂ່າວສານ, ກະຊວງການຕ່າງປະເທດຈີນ ໄດ້ມີຄຳເຫັນໃນພິທີປີດໂຄງ ການດັ່ງກ່າວ ທີ່ຈັດຂຶ້ນໃນວັນທີ 31 ຕຸລາຜ່ານມາ ທີ່ນະຄອນຫຼວງປັກກິ່ງ ເຊີ່ງທ່ານໄດ້ສະແດງຄວາມເຊື່ອໝັ້ນວ່າ ໂຄງການທີ່ໄດ້ເຄື່ອນໄຫວເຮັດວຽກຮ່ວມກັນກັບມະຫາວິທະຍາໄລ ເຫຼິນໝິງ ຈະເຮັດໃຫ້ບັນດາສື່ມວນຊົນເຂົ້າໃຈຢ່າງເລິກ ເຊິ່ງ ແລະ ຖືກຕ້ອງກ່ຽວກັບ ສປ ຈີນ ເພື່ອໄປເຜີຍແຜ່ໃຫ້ປະຊາຊົນພາຍໃນປະເທດຂອງຕົນໄດ້ຮັບຮູ້ ແລະ ເຂົ້າໃຈກ່ຽວກັບ ສປ ຈີນ ຢ່າງຖືກຕ້ອງ ແລະ ເລິກເຊີ່ງກວ່າເກົ່າ ເຊັ່ນດຽວກັນ ເຊີ່ງກົມຂໍ້ມູນຂ່າວສານໄດ້ກາຍເປັນໃຈກາງ ໃນການແລກປ່ຽນຄຳຄິດຄຳເຫັນ ລະຫວ່າງ ປະຊາຊົນຈີນ ແລະ ປະຊາຊົນ ຈາກຂົງເຂດຕ່າງໆໃນທົ່ວໂລກ. ການປະ ຕິບັດໜ້າທີ່ຂອງສື່ມວນຊົນດັ່ງກ່າວຖືເປັນການປະກອບສ່ວນເຂົ້າໃນການເສີມຂະຫຍາຍການພົວພັນແລກປ່ຽນ ແລະ ການຮ່ວມມື ລະຫວ່າງ ຈີນ ແລະ ປະເທດຕ່າງໆ ກໍຄື ບັນດາປະເທດຂອງສື່ມວນຊົນຕ່າງປະເທດທີ່ເຂົ້າຮ່ວມໂຄງການໃນຄັ້ງນີ້.
ສ່ວນ ສາດສະດາຈານ ຫູ ໄບຈິງ ຮອງອະທິການບໍດີ ມະຫາວິທະຍາໄລ ເຫຼິນໝິງ ກ່າວວ່າ ສື່ມວນຊົນ ມີບົດ ບາດສຳຄັນໃນການນຳສະເໜີ ສິດສຽງ, ຄຳຄິດຄຳເຫັນ ຂອງ ສປຈີນ ອອກມາເຜີຍແຜ່ສູ່ຊາວໂລກ ໃນຂະນະດຽວກັນ ສປ ຈີນ ຕ້ອງການຈະແບ່ງປັນສິ່ງທີ່ເປັນລັກສະ ນະພິເສດຂອງຕົນ ແລະ ບົດຮຽນໃນການຫັນເປັນທັນສະ ໄໝຂອງຕົນໃຫ້ແກ່ຊາວໂລກໄດ້ຮັບຮູ້.
ສໍາລັບ ມະຫາວິທະຍາໄລ ເຫຼິນໝິງ (RUC) ເປັນມະ ຫາວິທະຍາໄລທີ່ຈັດຢູ່ໃນລະດັບ A ໃນ ສປ ຈີນ ຕັ້ງຢູ່ໃນນະຄອນຫລວງປັກກິ່ງທີ່ມີການຮຽນ-ການສອນໃນຫລາກຫລາຍສາຂາວິຊາ ເຊີ່ງມີນັກສຶກສາທັງພາຍໃນ ແລະ ຕ່າງປະເທດເຂົ້າສຶກສາຈໍານວນຫລວງຫລາຍໃນແຕ່ລະປີ. ຂະ ນະດຽວກັນ ທາງມະຫາວິທະຍາໄລຍັງໄດ້ໃຫ້ທຶນການສຶກ ສາໃນລະດັບຕ່າງໆ ແກ່ນັກສຶກສາຕ່າງປະເທດຈໍານວນບໍ່ໜ້ອຍໃນແຕ່ລະປີ.
