ມັດສະດາ ແນະນໍາຊຸດແຂ່ງຂັນ ກຽມເຂົ້າຮ່ວມຫຼາຍລາຍການໃນປີ 2023-2024

ສະໂມສອນ ມັດສະດາ ລາວ ຈີບີ ເອັບຊີ ຈັດພິທີແນະນໍາຊຸດແຂ່ງຂັນ ປະຈຳປີ 2023-2024 ໃນຮຸ່ນເຍົາວະຊົນ ອາຍຸບໍ່ເກີນ 9 ປີ ຫຼື ຢູ 9, ຢູ 12 ປີ ແລະ ຢູ 15 ປີ ເພື່ອກຽມເຂົ້າຮ່ວມແຂ່ງຂັນບານເຕະ 7 ຄົນ ລາຍການ ຢູ 9 ແຊ້ມພົບແຊ້ມປະເທດໄທ ເຊີ່ງຈະຈັດຂຶ້ນທີ່ແຂວງຊຽງຣາຍ ຣາຊະ ອານາຈັກໄທ ເປັນເຈົ້າພາບ ລະຫວ່າງວັນທີ 12-13 ສິງຫາ 2023, ຮ່ວມແຂ່ງຂັນ ລາຍການ Mazda youth league 2023, ຮ່ວມແຂ່ງຂັນບານເຕະ 7 ຄົນ ຮຸ່ນເຍົາວະຊົນ 3 ຊາດ ລາວ, ຈີນ ແລະ ໄທ ລາຍການ Puer-Vinetiane Football Tournament ຄັ້ງທີ l ທີ່ສະຖາບັນບຸນເກີດສຶກສາ ຊຶ່ງມີ 32 ທີມ ຕັ້ງແຕ່ຮຸ່ນອາຍຸ 9 ປີ ຫາ 14 ປີ ເຊີ່ງຈະຈັດຂຶ້ນໃນກາງເດືອນສິງຫານີ້ ແລະ ເປັນຕົວແທນໃຫ້ ສະໂມສອນ ວຽງຈັນ ເອັບຊີ ທີມໃນລີກສູງສຸດຂອງປະ ເທດ ກໍຄື ເປບຊີ ລາວລີກ 1 ເຂົ້າຮ່ວມແຂ່ງຂັນເຕະບານ 11 ຄົນ ຊີງຂັນປະທານສະຫະພັນບານເຕະແຫ່ງຊາດລາວ ຫຼື ສຕລ ປະຈຳປີ 2023 ຊຶ່ງຈັດຂຶ້ນໃນຕອນບ່າຍວັນທີ 8 ສິງຫາ 2023.

ພິທີແນະນໍາຊຸດແຂ່ງຂັນໃໝ່ຢ່າງເປັນທາງການ ຈັດຂຶ້ນ ໃນຕອນເຊົ້າວັນທີ 8 ສິງຫາ 2023 ທີ່ບໍລິສັດ ແກ້ວ ໂອໂຕ ກຣຸບ ( ສູນ Mazda ) ບ້ານສີໄຄ ເມືອງສີໂຄດຕະບອງ ນະຄອນຫຼວງວຽງຈັນ ກ່ອນອອກເດີນທາງໄປແຂ່ງຂັນລາຍການ ແຊ້ມພົບແຊ້ມ 2023 ຮຸ່ນອາຍຸບໍ່ເກີນ 9 ປີ ລະຫວ່າງວັນທີ 12-13 ສິງຫາ 2023 ທີ່ແຂວງຊຽງຣາຍ ປະເທດໄທ ໃນຕອນແລງຂອງວັນດັ່ງກ່າວ ໂດຍມີ ທ່ານ ທິບພະເນດ ແກ້ວມະນິວົງ ປະທານບໍລິສັດ ແກ້ວໂອໂຕກຣຸບ ຈຳກັດ ຕົວແທນຈຳໜ່າຍລົດໃຫຍ່ Mazda ພຽງຜູ້ດຽວໃນສປປ ລາວ ທັງເປັນປະທານສະໂມສອນ ມັດສະດາ ລາວ ຈີບີ ເອັບຊີ, ພາກສ່ວນກ່ຽວຂ້ອງ ແລະ ນັກກິລາເຂົ້າ ຮ່ວມ.

ສຳລັບຊຸດແຂ່ງຂັນຂອງ ມັດສະດາ ລາວ ຈີບີ ເອັບຊີ ມີຢູ່ 2 ຊຸດໃໝ່ ຄື: ສີແດງ ເປັນຊຸດແຂ່ງຂັນໃນບ້ານ ແລະ ສີຟ້າ ເປັນຊຸດແຂ່ງຂັນນອກບ້ານ. ນອກຈາກນັ້ນ, ເສື້ອສີສົ້ມ ແລະ ເສື້ອສີຂຽວ ເປັນຊຸດຝຶກຊ້ອມ ລວມເຖິງຍັງມີຊຸດຂອງຄະນະຄູຝຶກເປັນສີຂຽວມິນກ່ານດໍາ ແລະ ຍັງມີຊຸດວອມ.