Kuaishou ແມ່ນບໍລິສັດທີ່ສ້າງ ແອັບພລີເຄເຊິ່ນໃນສື່ສັງຄົມອອນລາຍຜ່ານລະບົບມືຖືປະເພດວິດີໂອສັ້ນໃນ ສປ ຈີນ ເຊີ່ງພັດທະນາໂດຍ ປັກກິ່ງ Kuaishou ເຕັກໂນໂລຊີ ຈໍາກັດ ພວມໄດ້ຮັບຄວາມນິຍົມສູງໃນປະເທດຈີນ ກໍຄືອີກຫລາຍປະເທດ ແລະ ຖືເປັນຄູ່ແຂ່ງສໍາຄັນຂອງ Douyin ຫລື ຮູ້ກັນໃນຊື່ TikTok ຢູ່ນອກປະເທດຈີນໃນປັດຈຸບັນນີ້.
ຄະນະບໍລິຫານຂອງ ບໍລິສັດ Kuaishou ໄດ້ອະທິບາຍໃຫ້ຮູ້ໃນໂອກາດທີ່ສື່ມວນຊົນເກືອບ 40 ຄົນ ຈາກເກືອບ 20 ປະເທດທີ່ເຂົ້າໂຄງການສູນສື່ຂ່າວສາກົນ 2022 ( China International Press Communication Center 2022 Program: CIPCC) ຢ້ຽມຢາມບໍລິສັດດັ່ງກ່າວໃນວັນທີ 8 ກໍລະກົດ 2022 ວ່າ: ວິດີໂອສັ້ນທີ່ Kuaishou ສ້າງຂຶ້ນ ແຕ່ລະຄລິປມີຄວາມຍາວສະເລ່ຍ 15-20 ວິນາທີ ທີ່ມີເນື້ອຫາສາລະທີ່ກວມເອົາຫລາຍດ້ານໃນການເຄື່ອນໄຫວ ກໍຄືການດໍາລົງຊີວິດຂອງຄົນໃນສັງຄົມ ທັງທາງດ້ານຄວາມບັນເທີງ, ການສຶກສາ, ກິລາ, ທ່ອງທ່ຽວ, ກະສິກໍາ, ການຄ້າຂາຍ, ສາລະໜ້າຮູ້ ແລະ ອື່ນໆ ທັງກວມເອົາທຸກທຸກເພດໄວ, ນອກຈາກນີ້ ຍັງໄດ້ເຊີນຜູ້ຕາງໜ້າທູດຈາກບັນດາປະເທດທີ່ມີສໍານັກງານປະຈໍາຢູ່ນະຄອນ ຫລວງປັກກິ່ງເຂົ້າຮ່ວມສໍາພາດຜະລິດເປັນລາຍການ ເພື່ອແນະນໍາ ແລະ ເຜີຍແຜ່ວັດທະນະທໍາຂອງປະເທດນັ້ນໆ ຜ່ານແອັບດັ່ງກ່າວນີ້ ເພື່ອໃຫ້ຄົນຈີນໄດ້ຮັບຮູ້ ຕື່ມອີກ.
Kuaishou ຜະລິດວິດີໂອສັ້ນທີ່ມີຜູ້ເຂົ້າໃຊ້ງານຕໍ່ວັນໃຫຍ່ເປັນອັນດັບສອງຂອງໂລກ ແລະ ເປັນແອັບທີ່ອອນລາຍຂາຍສິນຄ້າໃຫຍ່ອັນດັບຕົ້ນຕາມປະລິມານສິນຄ້າລວມ. ນອກຈາກນີ້ ຍັງໄດ້ເປີດບໍລິການ ແອັບ Kwai ທີ່ມີລັກລະນະຄ້າຍຄືກັນເພື່ອບໍລິການນອກປະເທດຈີນຕື່ມອີກ.
Kuaishou ເປັນແອັບທີ່ນໍາໃຊ້ກັນຢ່າງກວ້າງຂວາງໃນປະເທດຈີນ, ເຊີ່ງຈາກສະຖິຕິ ມາຮອດວັນທີ 31 ມີນາ 2022 ຜ່ານມານີ້ ມີຜູ້ເຂົ້າເຖີງ Kuaishou ຕໍ່ວັນຢູ່ທີ່ 345,5 ລ້ານຄົນໃນປະເທດຈີນ, ສະເລ່ຍຜູ້ໜຶ່ງໃຊ້ງານ 128,1 ນາທີຕໍ່ວັນ, ເຮັດໃຫ້ໃນໄລຍະໄຕມາດທໍາອິດຂອງປີ 2022 Kuaishou ສາມາດສ້າງລາຍຮັບໄດ້ 21,1 ຕື້ຢວນ, ເພີ່ມຂຶ້ນ 23,08% ເມື່ອທຽບໃສ່ໄລຍະດຽວກັນຂອງປີ 2021 ຜ່ານມາ.
ຄົນລາວອາດຍັງບໍ່ຄຸ້ຍເຄີຍກັບ Kuaishou ແຕ່ແອັບນີ້ໄດ້ຮັບຄວາມນິຍົມຫລາຍໃນປະເທດຈີນ ແລະ ອີກຫລາຍປະເທດ ໂດຍຕິດອັນດັບການດາວໂຫລດຫລາຍທີ່ສຸດຂອງ Google Play ແລະ Apple App Store ເຊີ່ງເວົ້າໄດ້ວ່າເປັນຄູ່ແຂ່ງທີ່ສໍາຄັນຂອງ TikTok ໃນປັດຈຸບັນນີ້ ເພາະມີການບໍລິການດ້າຍເນື້ກາທີ່ຄ້າຍຄືກັນສົມຄວນ.
