ຫວ່າງມໍ່ໆ ມານີ້, ທ່ານ ໂຕເລີ່ມ ເລຂາທິການໃຫຍ່ ຄະນະບໍລິຫານງານສູນກາງພັກກອມມູນິດຫວຽດນາມ, ປະທານປະເທດຫວຽດນາມ ໄດ້ເດີນທາງມາຢ້ຽມຢາມຈີນ ທາງລັດຖະກິດ ເຊິ່ງແມ່ນທ່ານ ໄດ້ເດີນທາງໄປຢ້ຽມຢາມຕ່າງປະເທດເປັນຄັ້ງທຳອິດ ພາຍຫລັງທ່ານ ຂຶ້ນດຳລົງຕຳແໜ່ງ ເລຂາທິການໃຫຍ່ ຄະນະບໍລິຫານງານສູນກາງພັກກອມມູນິດຫວຽດນາມ ໃນຕົ້ນເດືອນນີ້ ເຊິ່ງສະແດງໃຫ້ເຫັນເຖິງການພົວພັນ ຈີນ-ຫວຽດນາມ ມີລະດັບສູງ ແລະມີຄວາມໝາຍທາງຍຸດທະສາດ.
ທ່ານ ສີຈິ້ນຜິງ ເລຂາທິການໃຫຍ່ ຄະນະກຳມະການສູນກາງພັກກອມມູນິດຈີນ, ປະທານປະເທດຈີນ ໄດ້ພົບປະກັບທ່ານ ໂຕ່ເລີ່ມ, ສອງຝ່າຍລ້ວນແຕ່ໄດ້ເນັ້ນໜັກເຖິງຄຳວ່າ “ບຸລິມະສິດ ແລະ ລົງເລິກ” ເປັນຕົ້ນ. ຝ່າຍຈີນ ກ່າວວ່າ: ຈະຖື ຫວຽດນາມ ເປັນທິດທາງບຸລິມະສິດໃນການຂະຫຍາຍການພົວພັນທາງການທູດກັບປະເທດໃກ້ຄຽງ, ສອງຝ່າຍຄວນສືບຕໍ່ລົງເລິກການສ້າງຄູ່ຮ່ວມຊາຕາກຳ ຈີນ-ຫວຽດນາມ ທີ່ມີຄວາມໝາຍທາງຍຸດທະສາດຢ່າງຕໍ່ເນື່ອງ, ປັບປຸງບູລະນະສະພາບການພັດທະນາໃນ 6 ດ້ານຄື: ປັບປຸງບູລະນະໃຫ້ມີຄວາມໄວ້ເນື້ອເຊື່ອໃຈທາງການເມືອງໃຫ້ສູງກວ່າເກົ່າ, ປັບປງຸການຮ່ວມມືດ້ານຄວາມໝັ້ນຄົງໃຫ້ໜັກແໜ້ນກວ່າເກົ່າ, ປັບປຸງການຮ່ວມມືລົງສູ່ລ່ວງເລິກກວ່າເກົ່າ, ປັບປຸງໃຫ້ພື້ນຖານທາງຈິດໃຈປະຊາຊົນມີຄວາມໜັກແໜ້ນກວ່າເກົ່າ, ປັບປຸງໃຫ້ການປະສານງານຫລາຍຝ່າຍແໜ້ນແຟ້ນກວ່າເກົ່າ ແລະປັບປຸງໃຫ້ການຄຸ້ມຄອງ ແລະຄວບຄຸມຄວາມຂັດແຂ້ງກັນດີຂຶ້ນກວ່າເກົ່າ; ຝ່າຍຫວຽດນາມ ກ່າວວ່າ: ຈະຖືຈີນ ເປັນທາງເລືອກຍຸດທະສາດ ແລະທິດທາງບຸລິມະສິດໃນນະໂຍບາຍການຕ່າງປະເທດຂອງຫວຽດນາມ, ຈະອີງຕາມເປົ້າໝາຍລວມກ່ຽວກັບ ປັບປຸງບູລະນະການພັດທະນາໃນ 6 ດ້ານ, ລົງເລິກການພົວພັນຄູ່ຮ່ວມມືຍຸດທະສາດຮອບດ້ານ ຫວຽດນາມ-ຈີນ ເພື່ອຊຸກຍູ້ການສ້າງຄູ່ຮ່ວມຊາຕາກຳ ຫວຽດນາມ-ຈີນ ທີ່ມີຄວາມໝາຍທາງຍຸດທະສາດ.
ການສະແດງຄວາມເຫັນຂອງສອງຝ່າຍ ໄດ້ສ່ອງແສງໃຫ້ເຫັນເຖິງມິດຕະພາບພິເສດ ລະຫວ່າງສອງປະເທດ, ກໍໄດ້ສະແດງໃຫ້ເຫັນເຖິງຄວາມປາດຖະໜາ ແລະຄວາມຕັດສິນໃຈແຫ່ງການຮ່ວມມືລະຫວ່າງສອງຝ່າຍ ໃນໄລຍະສຳຄັນທີ່ເປັນຂໍກະ ແຈແຫ່ງການສ້າງຄວາມຈະເລີນຮຸ່ງເຮືອງຂອງປະເທດຕົນ ເຊິ່ງໄດ້ຊີ້ທິດເຍືອງທາງໃຫ້ແກ່ການເສີມຂະຫຍາຍການພົວພັນລະຫວ່າງ ສອງພັກ ແລະສອງປະເທດໃນອະ ນາຄົດ. ການລົງເລິກການສ້າງຄູ່ຮ່ວມຊາຕາກຳ ຈີນ-ຫວຽດນາມ ບໍ່ພຽງແຕ່ສຸມໃສ່ການພັດທະນາຂອງສອງປະເທດເທົ່ານັ້ນ, ແຕ່ຍັງຈະອວ່າຍໜ້າໄປສູ່ໂລກເຊັ່ນດຽວ ກັນ.
ໃນອະນາຄົດ, ສອງຝ່າຍຍັງຈະສືບຕໍ່ເພີ່ມທະວີການປະສານສົມທົບພາຍໃຕ້ກົນ ໄກຫລາຍຝ່າຍຕ່າງໆເຊັ່ນ: ອົງການສະຫະປະຊາຊາດ, ອາຊຽນ, ການຮ່ວມມືແມ່ນ້ຳລ້ານຊ້າງ-ແມ່ນ້ຳຂອງ, ຊຸກຍູ້ການຮ່ວມມືກັນພາຍໃຕ້ຂອບ 3 ຂໍ້ລິເລີ່ມທົ່ວໂລກ ທີ່ຈີນສະເໜີອອກມາເພື່ອຊຸກຍູ້ການສ້າງໂລກທີ່ມີຫລາຍຂົ້ວທີ່ສະເໝີພາບ ແລະເປັນລະບຽບຮຽບຮ້ອຍ, ພ້ອມທັງຊຸກຍູ້ຂະບວນການເສດຖະກິດໂລກາພິວັດທີ່ເປີດກວ້າງ ແລະເອື້ອປະໂຫຍດຕໍ່ທຸກຝ່າຍ.
ທີ່ມາ: ວິທະຍຸໂທລະພາບສູນກາງຈີນ CMG
