ວິທະຍຸກະຈາຍສຽງແຫ່ງຊາດລາວ

Lao National Radio

ຕັ້ງໜ້າຜັນຂະຫຍາຍມະຕິກອງປະຊຸມໃຫຍ່ ຄັ້ງທີ XI ຂອງພັກ ເຂົ້າສູ່ຊີວິດຈິງ
ທ່ານ ພັທ ສຸກທອງ ວົງສາ ຫົວໜ້າດ່ານຕຳຫຼວດກວດຄົນ ເຂົ້າ-ອອກເມືອງ (ຕມ) ປະຈຳດ່ານສາກົນຂົວມິດຕະພາບ 3 ແຂວງ ຄຳມ່ວນ ໃຫ້ສຳພາດຕໍ່ສື່ມວນຊົນຂອງແຂວງ ເມື່ອບໍ່ດົນຜ່ານມາ ກ່ຽວກັບການຈັດຕັ້ງປະຕິບັດວຽກງານໃນໄລຍະຜ່ານມາ ກໍ່ຄືການໃຫ້ບໍລິການຄວາມສະດວກ ໃຫ້ຜູ້ຄົນທີ່ຜ່ານເຂົ້າ-ອອກພາຍໃນດ່ານ ເພື່ອໃຫ້ຄົນລາວ ແລະ ຕ່າງປະເທດ ໄດ້ເດີນທາງເຂົ້າ-ອອກໄດ້ຢ່າງສະດວກ, ວ່ອງໄວ ແລະ ຖືກຕ້ອງວ່າ: ປີ 2023 ຜ່ານມາສາມາດກວດຄົນເຂົ້າເມືອງໄດ້ທັງໝົດ 338.659 ຄົນ, ຍິງ 102.034 ຄົນ, ເດັກ 18.750 ຄົນ, ພາຫະນະແຈ້ງເຂົ້າເມືອງທັງໝົດ 182.678 ຄັນ. ສະເພາະໃນປີ 2024 ເລີ່ມແຕ່ເດືອນມັງກອນ 2024 ມາຮອດປັດຈຸບັນ ມີຈຳນວນຄົນເຂົ້າ-ອອກ ທັງໝົດ 85.871 ຄົນ. ໃນນັ້ນເປັນຄົນລາວ 31.222 ຄົນ, ຍິງ 17.882 ຄົນ, ເດັກ 3.630 ຄົນ, ຄົນຕ່າງປະເທດ 54.649 ຄົນ, ຍິງ 11.920 ຄົນ, ເດັກ 1.536 ຄົນ ແລະ ມີພາຫະນະເຂົ້າ-ອອກ 67.059 ຄັນ, ຖ້າທຽບໃສ່ໃນໄລຍະດຽວກັນຂອງປີຜ່ານມາ ແມ່ນເພີ່ມຂຶ້ນ 3.937 ຄົນ, ສ່ວນຫລາຍແມ່ນກຸ່ມນັກທ່ອງທ່ຽວທີ່ເປັນຄົນໄທ.
ທ່ານ ໃຫ້ຮູ້ຕື່ມວ່າ :ດ້ານຂໍ້ສະດວກ ໃນການຈັດຕັ້ງປະຕິບັດໃນໄລຍະຜ່ານມາ ແມ່ນມີກົດໝາຍ, ນິຕິກຳ ກ່ຽວກັບວຽກງານກວດຄົນເຂົ້າ-ອອກເມືອງ, ການນຳຂັ້ນເທິງໄດ້ເອົາໃຈໃສ່ລົງກວດກາຢ່າງໃກ້ຊິດ, ເປັນປະຈຳ, ພະນັກງານມີແນວຄິດຫຼັກໝັ້ນຫ້າວຫັນໃນການຈັດຕັ້ງປະຕິບັດ ເຮັດໜ້າທີ່ວິຊາສະເພາະຂອງຕົນດ້ວຍຄວາມເປັນເຈົ້າການສູງ. ໄປຄຽງຄູ່ກັນນັ້ນ ກໍ່ຍັງມີດ້ານຄົງຄ້າງອີກຈຳນວນໜຶ່ງ ເປັນຕົ້ນ: ບໍ່ທັນມີເຄື່ອງມືໃນການກວດກາທີ່ທັນສະໄໝ ໂດຍສະເພາະເຄື່ອງເອັກສະເລ ເຮັດໃຫ້ມີຄວາມຫຍຸ້ງຍາກທີ່ຈະກວດພົບສິ່ງຂອງທີ່ຜິດກົດໝາຍ ທີ່ບຸກຄົນບໍ່ຫວັງດີ ຊຸກເຊື່ອງໄວ້ນຳກະເປົາເດີນທາງ, ເຄື່ອງຂອງຕິດຕົວ ແລະ ພາຫະນະລົດເຂົ້າ-ອອກ.
ເພື່ອບໍລິການຮອງຮັບໃຫ້ແກ່ນັກທ່ອງທ່ຽວ ໃນປີທ່ອງທ່ຽວລາວ ປີ 2024 ແມ່ນໄດ້ເອົາໃຈໃສ່ປັບປຸງຂອດການບໍລິການແຈ້ງເອກະສານ ໃຫ້ມີຄວາມສະດວກ, ຂະຫຍາຍປ່ອງບໍລິການ ພ້ອມທັງເອົາໃຈໃສ່ໃນດ້ານວຽກງານຮັກສາຄວາມສະຫງົບ ແລະ ຄວາມເປັນລະບຽບຮຽບຮ້ອຍ ຊຶ່ງໄດ້ຈັດວາງກຳລັງ ປະຈຳແຕ່ລະຈຸດພາຍໃນດ່ານ ຕາມແຜນທີ່ໄດ້ກຳນົດໄວ້ ເພື່ອກວດກາສະພາບທາງດ້ານຄວາມເປັນລະບຽບຮຽບຮ້ອຍ ຂອງກຸ່ມນັກທ່ອງທ່ຽວ ແລະ ຜູ້ໂດຍສານທີ່ເດີ່ນທາງເຂົ້າມາ ສປປ ລາວ ຕາມປະຕູດ່ານ ໃຫ້ຖືກຕ້ອງຕາມຂັ້ນຕອນ, ຕາມລະບຽບການ, ໄດ້ເອົາໃຈໃສ່ກວດກາເອກະສານເດີນທາງຂອງນັກທ່ອງທ່ຽວ ຢ່າງເຂັ້ມງວດ ເພື່ອແນໃສ່ປ້ອງກັນ ບໍ່ໃຫ້ມີການເຂົ້າ-ອອກ ທີ່ຜິດລະບຽບການ.
ສຳລັບດ້ານຟື້ນຖານໂຄງລ່າງ ໂດຍລວມແລ້ວ ແມ່ນໄດ້ຮັບການປັບປຸງໃຫ້ດີຂຶ້ນ ເປັນຕົ້ນແມ່ນ ຕຶກ, ອາຄານສະຖານທີ່ເຮັດວຽກ ໄດ້ຮັບການປັບປຸງ, ປົວແປງ ທາສີຕາມສຳນັກງານ, ອາຄານ, ປັບປຸງລະບົບໄຟຟ້າຢູ່ຕຶກອາຄານ, ໄຟເຍືອງທາງ ໃຫ້ມີຄວາມສະຫວ່າງ ນອກນີ້ກໍ່ຈະໄດ້ມີການປັບປຸງ, ປະດັບປະດາພາຍໃນຕຶກອາຄານ, ເດີ່ນພາຍໃນບໍລິເວນດ່ານໃຫ້ມີຄວາມສະດວກ, ມີຄວາມສະອາດສວຍງາມ ເພື່ອແນໃສ່ດຶງດູດນັກທ່ອງທ່ຽວໃຫ້ເຂົ້າມາທ່ຽວແຂວງຄຳມ່ວນຫຼາຍຂຶ້ນ.
(ຂ່າວ-ພາບ: ກອງຄຳ), ໜັງສືພິມ ປະຊາຊົນ