ວິທະຍຸກະຈາຍສຽງແຫ່ງຊາດລາວ

Lao National Radio

ຕັ້ງໜ້າຜັນຂະຫຍາຍມະຕິກອງປະຊຸມໃຫຍ່ ຄັ້ງທີ XI ຂອງພັກ ເຂົ້າສູ່ຊີວິດຈິງ
ທ່ານ ຄຳຂັນ ຈັນທະວີສຸກ ເຈົ້າແຂວງຫຼວງພະບາງ, ພ້ອມດ້ວຍຄະນະ ໄດ້ຢ້ຽມ ຢາມຄອບຄົວ ທ່ານ ບົວຈຸກື ຕົວແບບດ້ານການປູກພືດຜັກ ຢູ່ບ້ານນ້ຳມ້າດາວ ເມືອງພູຄູນ ເມື່ອບໍ່ດົນມານີ້ ເຊີ່ງເປັນຄອບຄົວໜື່ງທີ່ຫັນຈາກການເຮັດໄຮ່ປູກເຂົ້າ ມາປູກພືດຜັກເພື່ອສ້າງລາຍຮັບໃຫ້ຄົງທີ່ ຕາມແນວທາງນະໂຍບາຍຂອງພັກ-ລັດ.
ທ່ານ ບົວຈຸກື ໃຫ້ສຳພາດວ່າ: ຄອບຄົວມີສະມາຊິກທັງໝົດ 11 ຄົນ, ຍິງ 4 ຄົນ, ແຮງງານຕົ້ນຕໍ່ 4 ແຮງງານ, ໃນເມື່ອກ່ອນແມ່ນອາໄສເຮັດໄຮ່, ພໍກຸ້ມຢູ່ກຸ້ມກິນເທົ່ານັ້ນ ບໍ່ສາມາດຫຼຸດຜົນອອກຈາກຄວາມທຸກຍາກໄດ້, ມາຮອດປີ 2018 ຈື່ງໄດ້ເຊົ່າເນື້ອທີ່ດິນນໍາປະຊາຊົນບ້ານ ລ້ອງໂປດ ເພື່ອປູກກະລໍາປີໃນເນື້ອທີ່ 0.3 ເຮັດຕາ, ໃຊ້ທືນໃນການປູກກະລໍາປີປະມານ 10 ລ້ານກ່ວາກີບຕໍ່ປີ, ສາມາດເກັບກູ້ຜົນຜະລິດໄດ້ 1 ໂຕ່ນເຄີ່ງ, ສະເລ່ຍເປັນເງີນ 13 ລ້ານກ່ວາກີບຕໍ່ຊຸດ.
ມາຮອດປີ 2019 ເຖີງປັດຈຸບັນ ວິຊາການຂອງຫ້ອງການກະສິກຳ ແລະ ປ່າໄມ້ ໄດ້ລົງມາ ຝຶກອົບຮົມທາງດ້ານເຕັກນິກການປູກພືດ, ການເຮັດຝຸ່ນບົ່ມ, ການເຮັດນໍ້າສະກັດຊີວະພາບ ແລະສະໝຸນໄພປ້ອງກັນແມງໄມ້ສັດຕູພືດ ຢູ່ພາຍໃນບ້ານ, ເມື່ອໄດ້ຮັບຄຳແນະນຳແລ້ວ ຍິງເຮັດໃຫ້ຕົນເອງຢາກມີອາຊີບທີ່ໝັນຄົງ, ທັງເຫັນວ່າຄວາມສົນໃຈຜູ້ບໍລິໂພກ ແລະຕະຫຼາດຕ້ອງການຫຼາຍຂື້ນ, ຈື່ງໄດ້ຂະຫຍາຍເນື້ອທີ່ປູກກະລ່ຳປີ ແລະຜັກກາດຫໍ່ເພີ້ມເປັນ ເຄີ່ງເຮັກຕາ, ທັງໄດ້ລົງທືນ 15 ລ້ານກ່ວາກີບຕໍ່ຊຸດ, ສາ ມາດເກັບກູ້ຜົນຜະລິດໄດ້ປະມານ 5 ໂຕ່ນຕໍ່ຊຸດ ສະເລ່ຍເປັນເງີນ 26 ລ້ານກີບຕໍ່ຊຸດ, ລາຄາຂາຍກະລໍ່າປີ ແລະຜັກກາດຫໍ່ຕໍ່າສຸດ 3.000 ກີບຕໍ່ກິໂລ ແລະສູງສຸດ 9.000 ກີບຕໍ່ກິໂລ, ສະເລ່ຍການປູກກະລໍ່າປີ ແລະຜັກກາດຫໍ່ແມ່ນ 3 ຊຸດຕໍ່ປີ, ສ່ວນການຕະຫຼາດແມ່ນພໍ່ຄ້າມາເກັບຊື້ກັບສວນ ແລະຈຳນວນໜຶ່ງແມ່ນສົ່ງໄປ ແຂວງວຽງຈັນ ແລະແຂວງຫຼວງພະບາງ.
ທ່ານ ບົວຈຸກື ໃຫ້ຮູ້ຕື່ມວ່າ: ການປູກກະລ່ຳປີ ແລະຜັກກາດຫໍ່ ສາມາດແຫຼ່ງລາຍຮັບໜຶ່ງທີ່ໝັ້ນຄົງ, ຈຶ່ງຢຶດຖືເປັນອາຊີບຫຼັກ, ຊຶ່ງເຮັດໃຫ້ຄອບຄົວຕົນເອງ ມີລາຍຮັບຈາກການຂາຍພືດຜັກ ເປັນຈຳນວນ 80 ລ້ານກ່ວາກີບປີ, ສະ ເລ່ຍໄດ້ 7 ລ້ານກີບຕໍ່ຄົນຕໍ່ປີ ສາມາດສົ່ງລູກເຂົ້າໂຮງຮຽນ, ຕັ້ງເຮືອນຖາວອນ 1 ຫຼັງ, ຊື້ລົດຈັກ 3 ຄັນ, ລົດຊິ້ງ 1 ຄັນ, ທັງໄດ້ຊື້ດິນ, ຊື້ສັດມາລ້ຽງ ແລະມີເງີນເກັບໃນຄອບຄົວ.
ທ່ານ ບົວຈຸກື ໃຫ້ຮູ້ຕື່ມວ່າ: ສຳລັບຂໍ້ສະດວກໃນການປູກພືດຜັກ ຍ້ອນມີການຊີ້ ນຳຢ່າງໃກ້ຊິດຕິດແທດຈາກ ພະນັກງານວິຊາການຫ້ອງການກະສິກຳ ແລະ ປ່າໄມ້ ໄດ້ເອົາໃຈໃສ່ໃນການຕິດຕາມ ແລະແນະນໍາວິທີການປູກເປັນປົກ ກະຕິ, ສ່ວນຂໍ້ຫຍຸ້ງ ຍາກ: ການປູກກະລຳປີ ແລະຜັກກາດຫໍ່ ໃນໄລຍະລະດູແລ້ງ ແມ່ນບັນຫານໍ້າບໍ່ພຽງພໍ, ທິດທາງໃນຕໍ່ໜ້າ ຈະໄດ້ສືບຕໍ່ເຮັດສວນກະລຳປີ ແລະຜັກກາດຫໍ່ ໃຫ້ໄດ້ 4 ຊຸດຕໍ່ປີ, ທັງຈະຂະຫຍາຍພື້ນທີ່ປູກໃຫ້ກວ້າງຂື້ນຕື່ມ.