ON AIR

ຟັງວິທະຍຸ FM103.7Mhz ອອນລາຍ
Listen to Radio FM103.7Mhz Online

ມີນັກສອບສະໝັກເສັງຄັດເລືອກເອົາທຶນໄປສຶກສາຕໍ່ຕ່າງປະເທດ ທີ່ແຂວງຊຽງຂວາງປີນີ້ເພີ່ມຂຶ້ນ 5 ເທົ່າຕົວທຽບໃສ່ປີຜ່ານມາ

ພະ​ແນ​ກສຶກສາ​ທິການ ​ແລະ ກິລາ ​ແຂວງ​ຊຽງ​ຂວາງ​ຈັດການ​ສອບ​ເສັງ​ຄັດ​ເລືອກ​ເອົາ​ນັກຮຽນ​ໄປ​ສຶກສາ​ຕໍ່​ຢູ່

ປະ​ເທດ ສສ ຫວຽດນາມ ​ແລະ ປະ​ເທດ ສປ ຈີນ ສົກຮຽນ 2017-2018 ​ໃນ​ວັນ​ທີ 11 ສິງຫາ 2017 ນີ້ ທີ່​ໂຮງຮຽນ ມສ ​ໂພນ​ສະຫວັນ ພາຍ​ໃຕ້​ການ​ເປັນ​ປະທານ​ຂອງ​ທ່ານ ນາງ ສາຍສະໝອນ ມັງ​ໜໍ່​ເມກ ຮອງ​ຫົວໜ້າ​ພະ​ແນ​ກສຶກສາ​ທິການ ​ແລະ ກິລາ ​ແຂວງ, ​ເຂົ້າ​ຮ່ວມ​ມີຄະນະ​ຮັບຜິດຊອບ​ການ​ນສອບ​ເສັງ​ ພ້ອມ​ດ້ວຍ​ກຳມະການ​ຍາມ​ຫ້ອງ​ສອບ ​ແລະ ນ້ອງ​ນັກ​ສອບ 300 ກ່ວາ​ຄົນ.

ທ່ານ ລົດ ບົວ​ສະຫວັນ ຫົວໜ້າ​ຂະ​ແໜງ​ອາ​ຊີວະ​ສຶກສາ ພະ​ແນ​ກສຶກສາ​ທິການ ​ແລະ ກິລາ ​ແຂວງ​ຊຽງ​ຂວາງ ກ່າວລາຍ​ງານ​ໃຫ້​ຮູ້​ວ່າ: ສົກຮຽນ 2017-2018 ນີ້ ທົ່ວ​ແຂວງ​ມີ​ນັກຮຽນ​ສະໝັກ​ເຂົ້າ​ມາ​ສອບ​ເສັງ​ຄັດ​ເລືອກ​ເອົາ​ທຶນ ​ເພື່ອ​ໄປ​ສຶກສາ​ຕໍ່​ທີ່​ປະ​ເທດ ສສ ຫວຽດນາມ ​ແລະ ປະ​ເທດ ສປ ຈີນ ຈຳນວນ​ທັງ​ໝົດ 317 ນ້ອງ ຍິງ 145 ນ້ອງ, ​ໃນ​ນັ້ນ ທຶນ​ໄປ​ສຶກສາຕໍ່ທີ່​ປະ​ເທດ ສສ ຫວຽດນາມ ຕົວ​ເລກ​ຍັງ​ບໍ່​ເປັນ​ທາງ​ການ​ປະມານ 40 ທຶນ, ສປ ຈີນ 5 ທຶນ, ​ສະ​ນັ້ນ ເພື່ອ​ຄວາມ​ບໍລິສຸດ​ຍຸດຕິ​ທຳ, ​ໂປ່​ງ​ໃສ ​ແລະ ສະດວກ​ໃນ​ການຈັດ​ແບ່ງ​ທຶນ​ໃຫ້​ແກ່​ນັກ​ຮຽນ​ທີ່​ສະໝັກ​ໄປ​ສຶກສາ​ຕໍ່​ແຕ່​ລະ​ສາຂາ​ໃນ​ສອງ​ປະ​ເທດ​ດັ່ງກ່າວ, ທາງ​ພະ​ແນ​ກສຶກສາ​ທິການ ​ແລະ ກິລາ ​ແຂວງ​ຊຽງ​ຂວາງ​ຈິ່ງ​ໄດ້​ຈັດ​ຕັ້ງ​​ໃຫ້​ມີການ​ສອບ​ເສັງ ​ເພື່ອ​ຄັດ​ເລືອກ​ເອົານັກຮຽນ​ທີ່​ໄດ້​ຄະ​ແນນ​ຕາມ​ເກນ​ກຳນົດ ​ແລະ ຖືກຕ້ອງ​ກັບ​ເງື່ອນ​ໄຂ​ທີ່​ວາງ​ໄວ້.

ທ່ານ ລົດ​ບົວ​ສະຫວັນ ຍັງ​ລາຍ​ງານໃຫ້​ຮູ້ຕື່ມ​ອີກ​ວ່າ ການ​ຈັດການ​ສອບ​ເສັງ​ຄັ້ງ​ນີ້ ​ໄດ້​ແບ່ງ​ນັກຮຽນ​ອອກ​ເປັນ 10 ຫ້ອງ​ສອບ​ເສັງ, ​ແຕ່​ລະຫ້ອງສອບ​ຈະ​ມີ​ກຳ​ມະ​ການ​ຍາມ​ຈຳນວນ 2 ທ່ານ, ສໍາວິຊາ​ທີ່​ນຳ​ມາ​ສອບ​ເສັງ​ປະກອບ​ມີ 4 ວິຊາ​ຄື: ຄະນິດສາດ, ຟີ​ຊິກ​ສາດ, ​ເຄມີ​ສາດ ​ແລະ ຊີວະ​ສາດ, ​ແຕ່​ລະວິ​ຊາ​ໃຊ້​ເວລາ​ສອບ​ເສັງ​ທັງ​ໝົດ 120 ນາທີ ​ແລະ ​ດຳ​ເນີນ​ການ​ສອບ​ເສັງ​ເປັນ​ເວລາ 1 ວັນ​ເຕັມຈິ່ງ​ສໍາ​ເລັດ, ສ່ວນ​ຜົນ​ຂອງ​ການ​ສອບ​ຄາດ​ວ່າ​ຈະ​ໃຫ້​ຮູ້​ໃນ​ກາງ​ເດືອນ​ສິງຫາ​ນີ້.

ທ່ານ​ຫົວໜ້າ​ຂະ​ແໜງ​ອາ​ຊີວະສຶກສາ ພະ​ແນ​ກສຶກສາ​ທິການ ​ແລະ ກິລາ ​ແຂວງ​ຊຽງ​ຂວາງ​ໃຫ້​ຮູ້​ຕື່ມ​ອີກ​ວ່າ:

ຈຳນວນ​ນັກຮຽນ​ທີ່​ສະໝັກ​ສອບ​ເສັງ​ຄັດ​ເລືອກ​ເພື່ອ​ໄປ​ສຶກສາ​ຕໍ່​ທີ່​ຕ່າງປະ​ເທດ​ຢູ່​ແຂວງ​ຊຽງ​ຂວາງ​ປີ​ນີ້ ທຽບ​ໃສ່​ປີຜ່ານ ມາ​ເຫັນ​ວ່າ​ ມີ​ທ່າ​ອ່ຽງ​ເພີ່ມຂຶ້ນ 5 ​ເທົ່າ​ຕົວ ​ໂດຍ​ທີ່​ຕົວ​​ເລກທຶນ​ທີ່​ໄດ້​ຮັບ​ຍັງ​ບໍ່​ເປັນ​ທາງ​ການຍັງ​ສໍ່າ​ເກົ່າ.

​ໂອກາດ​ນີ້ ປະທານ​ການ​ສອບ​ເສັງ​ໄດ້​ເນັ້ນໜັກ​ໃຫ້​ກຳມະການ​ຍາມ​ຫ້ອງ​ສອບ​ທຸກ​ຄົນ ຈົ່ງ​ເຮັດ​ໜ້າ​ທີ່​ດ້ວຍ​ຄວາມ​ຮັບຜິດຊອບ​ສູງ, ຕິດຕາມ​ຈຳນວນ​ນັກ​ສອບ ​ແລະ ການ​ເຂົ້າ-ອອກ ຫ້ອງ​ສອບຂອງ​ນັກ​ສອບໃຫ້​ລະອຽດ, ມີ​ຫັຍ​ງຜິດ​ປົກກະຕິ​ໃຫ້​ລາຍ​ງານຕໍ່​ຄະນະ​ຮັບຜິດຊອບ​ການ​ສອບ​ເສັງຢ່າງ​ຮີບ​ດ່ວນ ​ເພື່ອ​ຈະ​ໄດ້ພ້ອມ​ກັນ​ແກ້​ໄຂ​ໃຫ້​ທັນ ຕາ​ມກຳນົດ​ເວລາ ​​ແນ​ໃສ່​ເຮັດໃຫ້​ບັ້ນ​ດຳ​ເນີນ​ການ​ສອບ​ເສັງ​ຄັ້ງ​ນີ້​ປະສົບ​ຜົນສຳ​ເລັດ ​ແລະ ບັນລຸ​ຕາມ​ຈຸດປະສົງ ​ເປົ້າ​ໝາ​ຍ.