ON AIR

ຟັງວິທະຍຸ FM103.7Mhz ອອນລາຍ
Listen to Radio FM103.7Mhz Online

ມີ 28 ປະເພດກິລາ ທີ່ໄດ້ກໍານົດແຂ່ງຂັນ ໃນງານມະຫາກໍາກິລາແຫ່ງຊາດ ຄັ້ງທີ XI ທີ່ແຂວງຊຽງຂວາງເປັນເຈົ້າພາບ

  • ງານ​ມະຫາ​ກໍາ​ກິລາ​ແຫ່ງ​ຊາດ​ຄັ້ງ​ທີ XI ທີ່​ແຂວງ​ຊຽງ​ຂວາງ​​ໄດ້​ຮັບ​ກຽດເປັນ​ເຈົ້າພາບ ​ເຊີ່ງ​ຈະ​ຈັດ​ຂຶ້ນ​​ໃນ​ວັນ​ທີ 11 ພະຈິກ

2018 ທີ່ຈະມາເຖິງນີ້, ມາ​ຮອດ​ປະຈຸ​ບັນ ​ແຂວງ​ເຈົ້າ​ພາ​ບກໍາລັງ​ຂຸ້ນຂ້ຽວປັບປຸງ​ຍົກ​ລະດັບ​ບັນ​ດາສະໜາມ​ແຂ່ງຂັນ​ກິລາ ​ແຕ່ລະ​ປະ​ເພດ, ຖະໜົນ​ຫົນທາງ ​ລວມ​ໄປ​ເຖິງພື້ນຖານ​ໂຄງ​ລ່າງ​ຕ່າງໆ ຢ່າງ​ຕໍ່​ເນື່ອງ ຄາດ​ວ່າ​ຈະ​ໃຫ້​ທ່ວງທັນ​ ​ແລະ ສໍາ​ເລັດ​ກ່ອນ​​ມື້​ເປີດງານ​ແຂ່ງຂັນ​​ 100 ​ເປີ​ເຊັນ.

          ທ່ານ ທອງ​ສີ ພັນທະ​ວົງ ຮອງ​ຫົວໜ້າ​ພະ​ແນ​ກສຶກສາ​ທິການ ​ແລະ ກິລາ ​ແຂວງຊຽງ​ຂວາງ, ຄະນະ​ກໍາມະການ​ກອງ​ເລຂາ, ຫົວໜ້າ​ອະນຸ​ກໍາມະການດ້ານ​ເນື້ອ​ໃນ ງານ​ມະຫາ​ກໍາ​ກິລາ​ແຫ່ງ​ຊາດ​ຄັ້ງ​ທີ XI  ກ່າວ​ລາຍ​ງານ​ໃຫ້​ຮູ້​ວ່າ: ສໍາລັບ​ງານ​ມະຫາ​ກໍາ​ກິລາ​ແຫ່ງ​ຊາດ​ຄັ້ງ​ທີ XI ທີ່​ແຂວງ​ຊຽງ​ຂວາງ​ເປັນ​ເຈົ້າພາບ​ໃນ​ທ້າຍ​ປີ 2018 ນີ້, ​ໄດ້​ກໍານົດ​ເອົາ 28 ປະ​ເພດ​ກິລາ​ເຂົ້າ​ຮ່ວມ​ແຂ່ງຂັນ​ເປັນ​ທາງ​ການ ​ເພື່ອ​ຊີງ​ຂັນ​ລາງວັນ, ​ພ້ອມ​ນັ້ນ ຍັງ​ໄດ້​ກໍານົດ​ເອົາ​ສະຖານ​ທີ່​ແຂ່ງຂັນ​ກິລາ​ແຕ່ລະປະ​ເພດໄວ້ຮອງຮັບ​ເປັນ​ທີ່​ຮຽບຮ້ອຍແລ້ວ, ໃນ​ນັ້ນ ກິລາ​ ບານ​ເຕະຍິງ ​ຈະ​ທໍາ​ການແຂ່ງຂັນ​ຢູ່​ສະໜາມກິລາ​ຂອງ​ແຂວງ ບ້ານ​ໂພນ​ມີ​ໄຊ​(ສະໜາມ​ເກົ່າ), ບານ​ເຕະຊາຍ​ ​​ແລະ ກິລາ ​ແລ່ນ​-ລານ ​ແຂ່ງຂັນ​ຢູ່ສະໜາມ ​ເປີດ-ປິດ(ຄັງ​ໜອງ​ຫຼວງ), ບານບ້ວງ ຫໍ​ພັກ​ເກົ່າ​ ໂຮງຮຽນ ມສ ​ໂພນ​ສະຫວັນ, ​ເທັນ​ນິດ​ສ໌ ສະ​ໂມ​ສອນ ​ໂຮງຮຽນ ມສ ​ໂພນ​ສະຫວັນ, ດອກ​ປີກ​ໄກ່ ເດີ່ນສະ​ໂມ​ສອນ​ດອກ​ປີກ​ໄກ່​ຂອງ​ແຂວງ, ກະຕໍ້ ​ແຂ່ງ​ຂັນຢູ່​ເດີ່ນ​ດອກ​ປີກ​ໄກ່​ທະຫານ​ແຂວງ, ປິງປ໋ອງ ສະ​ໂມ​ສອນ​ພະ​ແນ​ກ​ແຜນການ ​ແລະ ການ​ລົງທຶນ ​ແຂວງ, ກິລາ ​ເທ​ຄັວນ​ໂດ໋ ​ແລະ ມວຍ​ປໍ້າ ​ແຂ່ງຂັນ​ຢູ່ສະ​ໂມ​ສອນ​ພະ​ແນ​ກ​ໂຍທາ​ທິການ​ແຂວງ, ກິລາ(ຄາຣາເຕໂດ໋, ຢູໂດ໋, ປັ່ນຈັກສີລັກ, ວູຊູ ແລະ ໝາກແລ້) ແຂ່ງຂັນຢູ່ເດີ່ນກິລາໃນຮົ່ມ ວິທະຍາໄລຄູຄັງໄຂ, ກິລາ ໝາກເສິກ ແຂ່ງຂັນຢູ່ສະໂມສອນ ພະແນກກະສິກໍາ ແລະ ປ່າໄມ້ແຂວງ, ເຮືອຊ່ວງ ແຂ່ງຂັນຢູ່ໜອງສະ ເດັດ ສຸພານຸວົງ 02, ກິລາ(ໝາກຂ່າງ, ໜ້າເກັກ ແລະ ຍິງທະນູ) ແຂ່ງຢູ່ສະໜາມ ເປີດ-ປິດ(ຄັງໜອງຫຼວງ), ລົດຖີບ ເສັ້ນທາງເລກ 07 ແຕ່ບ້ານ ປ້າງປາງ ຫາ ໂພນສະຫວັນ, ລອຍນໍ້າ ແຂ່ງຂັນຢູ່ນະຄອນຫຼວງວຽງຈັນ, ກິລາ ບານສົ່ງໃນຮົ່ມ ແລະ ເປຕັ໋ງ ແຂ່ງຢູ່ສະໜາມ ສວນມອນ ບ້ານໂງຍ, ໂບລີ້ງ ສະໂມສອນໂບລີ້ງ ບ້ານໂພນມີໄຊ, ກ໊ອຟ໌ ແຂ່ງຂັນຢູ່ເດີ່ນກ໊ອຟ໌ ບ້ານນາເທົາ, ຍິງປືນ ແຂ່ງຂັນຢູ່ໂຮງຮຽນ ນາຍສິບ, ກິລາ ມວຍລາວ ແລະ ມວຍສາກົນ ແຂ່ງຢູ່ຫາດຊາຍ ອ່າງນໍ້າຫງໍາ ແລະ ກິລາ ສະນຸກເກີ້ ແຂ່ງຂັນຢູ່ເດີ່ນບານ ເຕະ ບ້ານຍວນ. ນອກຈາກ 28 ປະ​ເພດ​ກິລາ​ທີ່​ນໍາມາແຂ່ງຂັນ​ເປັນ​ທາງ​ການ​ແລ້ວ, ຍັງ​ມີ 02 ປະ​ເພດ​ກິລາ ເຊີ່ງເປັນກິລາສາທິດຄື: ກິລາ ຣັອກກີ໊ ແລະ ກິລາ ຣັກບີ໊ ເພື່ອໃຫ້ແຂກໄດ້ຊົມກັນຕື່ມອີກ.

         ທ່ານ ທອງສີ ພັນທະວົງ ກ່າວຕື່ມອີກວ່າ: ການທີ່ແຂວງຊຽງຂວາງໄດ້ກໍານົດເອົາແຕ່ລະປະເພດກິລາແຂ່ງຂັນເປັນທາງການ ແລະ ກໍານົດສະຖານທີ່ແຂ່ງຂັນແຕ່ລະປະເພດກິລາ ໃນງານມະຫາກໍາກິລາແຫ່ງຊາດຄັ້ງທີ XI ທີ່​ແຂວງ​ຊຽງ​ຂວາງ​ເປັນ​ເຈົ້າພາບ ​ໄວ້​ແຕ່​ຫົວທີ ກໍ​ເພື່ອ​ເປັນ​ບ່ອນ​ອີງ​ໃນ​ການຈັດ​ຕັ້ງ​ປະຕິບັດ ການ​ເກັບ​ຕົວ ​ແລະ ​ເຝິກຊ້ອມ​ນັກ​ກິລາ ແຕ່ລະແຂວງ ແຕ່ລະກະຊວງ, ພ້ອມທັງຍັງເປັນບ່ອນອີງ ໃຫ້ແກ່ການ​ປັບປຸງ​ ສ້ອມ​ແປງ ​ແລະ ກໍ່ສ້າງ ​ແຕ່​ລະສະໜາມ​ແຂ່ງຂັນ ​ໃຫ້ທັນຕາ​ມກໍານົດ​ເວລາອີກດ້ວຍ.

 

(​ໂດຍ: ຄານ​ສີສະ​ຫັວນ ພົງ​ພັກດີ)