ON AIR

ຟັງວິທະຍຸ FM103.7Mhz ອອນລາຍ
Listen to Radio FM103.7Mhz Online

ມື້ທີສອງກອງປະຊຸມສະໄໝສາມັນເທື່ອ 8 ຂອງສະພາແຫ່ງຊາດຊຸດທີ VIII ຜູ້ແທນກອງປະຊຸມປະກອບຄໍາເຫັນໃສ່ບົດລາຍງານຂອງລັດຖະບານ

ການ​ດຳ​ເນີນກອງ​ປະ​ຊຸມ​ສະ​ໄໝ​ສາ​ມັ​ນ​ເທື່ອ 8 ຂອງ​ສະ​ພາ​ແຫ່ງ​ຊາດ​ຊຸດ​ທີ VIII ຕອນ​ເຊົ້າວັນທີ 8 ພະຈິກ 2019 ພາຍ​ໃຕ້​ການ​ເປັ​ນ​ປະ​ທານ​ຂອງ ທ່ານ ນາງ ປາ​ນີ ຢາ​ທໍ່​ຕູ້ ປະ​ທານ​ສະ​ພາ​ແຫ່ງ​ຊາດ ສະ​ມາ​ຊິກ​ສະ​ພາ​ແຫ່ງ​ຊາດ​ຈາກ​ເຂດ​ເລືອກ​ຕັ້ງ​ຕ່າງໆ ໄດ້​ສືບ​ຕໍ່​ປະ​ກອບ​ຄຳ​ຄິດ​ເຫັນ​ຢ່າງ​ກົງ​ໄປ ກົງ​ມາ ແລະ ມີ​ເນື້ອ​ໃນ​ສ້າງ​ສັນ ບົນ​ພື້ນ​ຖານ​ຄວາມ​ເປັນ​ຈິງ ແລະ ເງື່ອນ​ໄຂ​ຂອງ​ປະ​ເທດ​ເຂົ້າ​ໃສ່​ວຽກ​ງານ​ຂອງ​ລັດ​ຖະ​ບານ ດ້ວຍ​ບັນ​ຍາ​ກາດ​ພົດ​ຟຶ້ນ ແລະ ເລີກ​ເຊິ່ງ

ໃນ​ນີ້ ທ່ານ ໄຊພອນ ຄຸນສີລິເຮືອງ ສະມາຊິກສະພາແຫ່ງຊາດ ເຂດເລືອກຕັ້ງທີ 3 ແຂວງຫຼວງນ້ຳທາມີຄຳເຫັນວ່າ ການຄຸ້ມຄອງລັດ ຄຸ້ມຄອງສັງຄົມດ້ວຍກົດໝາຍ ເຖິງວ່າ ຈະມີກົດໝາຍແລ້ວ ແຕ່ການສ້າງນິຕິກຳລຸ່ມກົດໝາຍຍັງມີໜ້ອຍ ດ້ານໜຶ່ງການໂຄສະນາ ເຜີຍແຜ່ກົດໝາຍຍັງບໍ່ກວ້າງຂວາງ ການລົງວິໄນຕໍ່ຜູ້ລະເມີດກົດໝາຍຍັງບໍ່ທັນເຂັ້ມງວດ ຜູ້ເຄີຍລະເມີດກໍ່ສືບຕໍ່ລະເມີດໄປເລື້ອຍໆ ສ້າງປະກົດການຫຍໍ້ທໍ້ໃນສັງຄົມ .

ຜ່ານມາລັດຖະບານໄດ້ມີນະໂຍບາຍດຶງດູດການລົງທຶນ ຈາກພາຍໃນ ແລະ ຕ່າງປະເທດ ເປັນການປະກອບສ່ວນສຳຄັນ ເຮັດໃຫ້ເສດຖະກິດຂອງຊາດຂະຫຍາຍຕົວ ຍ້ອນເບື້ອງລັດຖະບານໄດ້ປັບປຸງກົດໝາຍການລົງທຶນ ທີ່ສອດຄ່ອງ ແລະ ເໝາະສົມ ແຕ່ການປະຕິບັດຂັ້ນຕອນການລົງທຶນຍັງເຮັດບໍ່ທັນໄດ້ດີ ຍັງມີຜູ້ລະເມີດຂັ້ນຕອນ ການລົງທຶນ  ຫຼາຍໂຄງການກໍາລັງປະກອບເອກະສານ ແຕ່ ລົງມືປະຕິບັດໄປພ້ອມ ທັງທີ່ບໍ່ໄດ້ຮັບການອະນຸມັດເທື່ອ ເຮັດໃຫ້ເກີດມີຫຼາຍບັນຫາ ແລະ ແກ້ໄຂບັນຫາໄປເລື້ອຍໆ

ການປະກອບບຸກຄະລາກອນເຂົ້າໃນວຽກງານການລົງທຶນຍັງບໍ່ທັນສອດຄ່ອງ ສິດໃນການຕັດສິນບັນຫາຂອງພະນັກງານຍັງບໍ່ທັນເຕັມສ່ວນ ຫຼື ແກ່ຍາວການແກ້ໄຂບັນຫາ ,ການລົງທຶນໃນຂົງເຂດພັດທະນາຊົນນະບົດ ແລະ ລົບລ້າງຄວາມທຸກຍາກ ຢູ່ໃນບົດລາຍງານຂອງລັດຖະບານ ກໍ່ໄດ້ຍົກໃຫ້ເຫັນຄວາມແຕກໂຕນ ລະຫວ່າງ ຊົນນະບົດກັບຕົວເມືອງ ສະນັ້ນຂໍໃຫ້ລັດຖະບານລົງທຶນໃສ່ຢ່າງມີຈຸດສຸມ ເພື່ອເປັນຕົວແບບໃຫ້ການພັດທະນາຢູ່ບ່ອນອື່ນ ຈຶ່ງຈະສາມາດແກ້ໄຂຄວາມທຸກຍາກໄດ້ ອີກບັນຫາໜຶ່ງມີຫຼາຍໂຄງການບໍ່ຜ່ານການປະເມີນ ມີມູນຄ່າສູງເກີນຄວາມຈິງ ຫຼື ໂຄງການສຳເລັດແລ້ວບໍ່ມີເງິນຊຳລະ.

ທ່ານ ສາຍທອງ ໄຊຍະວົງ ສະມາຊິກສະພາແຫ່ງຊາດ ເຂດເລືອກຕັ້ງທີ 15 ແຂວງຈຳປາສັກ ມີຄຳເຫັນວ່າ ມີຄວາມຫຍຸ້ງຍາກດ້ານເອກະສານ ແລະ ບໍ່ມີຄວາມສະດວກຢູ່ດ່ານ ເພື່ອສົ່ງ ສິນຄ້າກະສິກຳໄປຕ່າງປະເທດ ສະເໜີໃຫ້ສະພາແກ້ໄຂຊ່ວຍຕໍ່ການແກ່ ຍາວເວລາ ການສົ່ງອອກ ເຊິ່ງມີຜົນກະທົບຕໍ່ຄຸນນະພາບຂອງສິນຄ້າ ສະນັ້ນຄວນເພີ່ມຄວາມວ່ອງໄວ ການສົ່ງອອກຂຶ້ນຕື່ມ.

ແຜນ ແລະ ງົບປະມານຂອງລັດຖະບານເພື່ອແກ້ໄຂໄພພິບັດຍັງຊັກຊ້າ ຍ້ອນວ່າໄພພິບັດປີນີ້ຢູ່ 6 ແຂວງພາກກາງ ແລະ ພາກໃຕ້ ໜັກໜ່ວງທີ່ສຸດ ໄຮ່ນາ ຮົ້ວສວນ ຕະຫຼອດເຖິງ ຜົນຜະລິດເສຍຫາຍ ສະນັ້ນ ການກະກຽມໃສ່ລະດູນາແຊງ ຄວນໃຫ້ມີຄວາມພ້ອມ ທ່ວງທັນລະດູການທຸກຢ່າງ ,ອີກດ້ານໜຶ່ງຄວນສຸມທຶນຮອນໃສ່ໂຄງການທີ່ປະຕິບັດໃກ້ຈະສຳເລັດ ໂດຍສະເພາະ ໂຄງການທີ່ມີປະສິດທິຜົນທາງດ້ານເສດຖະກິດ.

ສໍາລັບຕອນບ່າຍ ສະມາຊິກສະພາຫ່ງຊາດຈາກເຂດເລືອກຕັ້ງຕ່າງໆ ໄດ້ສືບຕໍປະກອບຄໍາເຫັນເຂົ້າໃສ່ວຽກງານຂອງລັດຖະບານ.

ກອງ​ປະ​ຊຸມ​ສະ​ໄໝ​ສາ​ມັ​ນ​ເທື່ອ 8 ຂອງ​ສະ​ພາ​ແຫ່ງ​ຊາດ​ຊຸດ​ທີ VIII ໄຂຂຶ້ນແຕ່ວັນທີ 7 ພະຈິກ ແລະຈະດໍາເນີນຮອດວັນທີ 6 ທັນວາ 2019.

ທ່ານໄຊພອນ ຄຸນສີລິເຮືອງ                                                                    ທ່ານສາຍທອງ ໄຊຍະວົງ