ການດໍາເນີນກອງປະຊຸມສະໄໝສາມັນເທື່ອທີ 4 ຂອງສະພາແຫ່ງຊາດ ຊຸດທີ 9 ໃນຕອນເຊົ້າ ວັນທີ 8 ທັນວາ 2022, ພາຍໃຕ້ການເປັນະທານຂອງ ທ່ານ ໄຊສົມພອນ ພົມວິຫານ, ປະທານສະພາແຫ່ງຊາດ, ສະມາຊິກສະພາແຫ່ງຊາດຈາກແຕ່ລະເຂດເລືອກຕັ້ງໄດ້ຮັບຟັງ ແລະ ປະກອບຄໍາເຫັນໃສ່ບົດລາຍງານຂອງລັດຖະບານກ່ຽວກັບການຈັດຕັ້ງປະຕິບັດວາລະແຫ່ງຊາດ ວ່າດ້ວຍການແກ້ໄຂຄວາມຫຍຸ້ງຍາກທາງດ້ານເສດຖະກິດ-ການເງິນ ທີ່ຕາງໜ້າສະເໜີໂດຍ ທ່ານ ສອນໄຊ ສີພັນດອນ, ຮອງນາຍົກລັດຖະມົນຕີ.
ທ່ານໄດ້ຍົກໃຫ້ເຫັນວ່າ: ຜ່ານການຈັດຕັ້ງປະຕິບັດວາລະແຫ່ງຊາດ ວ່າດ້ວຍການແກ້ໄຂຄວາມຫຍຸ້ງຍາກທາງດ້ານເສດຖະກິດ-ການເງິນ ນັບແຕ່ເດືອນກັນຍາປີກາຍນີ້ມາຮອດປັດຈຸບັນ ມີຫລາຍໜ້າວຽກຈຸດສຸມທີ່ກໍານົດໄວ້ມີຄວາມຄືບໜ້າ ແລະ ປະສົບຜົນສໍາເລັດ ເປັນຕົ້ນ: ການສົ່ງເສີມການຜະລິດເພື່ອທົດແທນການນໍາເຂົ້າ ແລະ ເປັນສິນຄ້າສົ່ງອອກ ໄດ້ສໍາເລັດການກໍານົດບັນຊີພືດ ແລະ ສັດທີ່ສາມາດນໍາເຂົ້າແລະຜະລິດໄດ້ພາຍໃນ, ກໍານົດບັນຊີສົ່ງເສີມການຜະລິດຈໍານວນ 9 ລາຍການ, ລວມເປັນ 47 ລາຍການ, ການຜະລິດເຂົ້າໃນປີນີ້ຈະບັນລຸເກີນແຜນ, ຜ່ານການສົ່ງເສີມການຜະລິດເປັນສິນຄ້າ ເຮັດໃຫ້ມູນຄ່າການນໍາເຂົ້າສິນຄ້າຫລຸດລົງຫລາຍກວ່າ 9 ລ້ານໂດລາສະຫະລັດ, ໂຄງການທົດລອງຂຸດຄົ້ນແຮ່ທາດ ມີການສະເໜີຂໍລົງທຶນ 357 ໂຄງການ, ໃນນັ້ນເຊັນສັນຍາແລ້ວ 62 ໂຄງການ ແຕ່ການສົ່ງອອກແຮ່ຕົວຈິງຍັງບໍ່ຫລາຍ, ໃນນັ້ນ ການສົ່ງອອກແຮ່ເຫລັກບັນລຸພຽງ 3 ແສນກວ່າໂຕນ ຫລື ເທົ່າກັບ 2,9 ສ່ວນຮ້ອຍຂອງແຜນການສົ່ງອອກໃນປີນີ້.
ນອກຈາກນີ້, ພາຍຫລັງເປີດປະເທດນັບແຕ່ເດືອນພຶດສະພາປີນີ້ເປັນຕົ້ນມາ, ນັກທ່ອງທ່ຽວຕ່າງປະເທດເຂົ້າມາທ່ຽວລາວເພີ່ມຂຶ້ນ ຄາດວ່າໝົດປີນີ້ຈະບັນລຸຫລາຍກວ່າ 1 ລ້ານຄົນ, ການຂົນສົ່ງສິນຄ້າຜ່ານລົດໄຟລາວ-ຈີນ ບັນລຸ 1 ລ້ານ 4 ແສນກວ່າໂຕ ແລະ ບໍລິການຜູ້ໂດຍສານໄດ້ 1 ລ້ານກວ່າເທື່ອຄົນ, ສ່ວນການແກ້ໄຂໜີ້ສິນຕ່າງປະເທດ ລັດຖະບານສາມາດປະຄັບປະຄອງໄວ້ໄດ້ ແລະ ອື່ນໆ.
ຄຽງຄູ່ກັບຜົນສໍາເລັດ, ການຈັດຕັ້ງປະຕິບັດວາລະແຫ່ງຊາດ ວ່າດ້ວຍການແກ້ໄຂຄວາມຫຍຸ້ງຍາກທາງດ້ານເສດຖະກິດ-ການເງິນ ຍັງມີບາງດ້ານທີ່ເປັນຂໍ້ຫຍຸ້ງຍາກຕ້ອງໄດ້ສືບຕໍ່ແກ້ໄຂໃຫ້ດີຂຶ້ນ ເປັນຕົ້ນ: ການເລັ່ງທວງການຈັດເກັບລາຍຮັບຍັງບໍ່ທັນແຂງແຮງ, ການອໍານວຍຄວາມສະດວກໃຫ້ແກ່ການລົງທຶນຍັງມີຫລາຍດ້ານຕ້ອງປັບປຸງ ແລະ ອື່ນໆ.
ພາຍຫລັງ ທ່ານ ສອນໄຊ ສີພັນດອນ ຂຶ້ນສະເໜີສໍາເລັດ, ທ່ານ ສົມມາດ ພົນເສນາ, ຮອງປະທານສະພາແຫ່ງຊາດ ໄດ້ຕາງໜ້າຄະນະປະຈໍາສະພາແຫ່ງຊາດ ປະກອບຄໍາເຫັນໃສ່ບົດລາຍງານກ່ຽວກັບການຈັດຕັ້ງປະຕິບັດວາລະແຫ່ງຊາດ ວ່າດ້ວຍການແກ້ໄຂຄວາມຫຍຸ້ງຍາກທາງດ້ານເສດຖະກິດ-ການເງິນ. ທ່ານໄດ້ສະເໜີໃຫ້ລັດຖະບານສືບຕໍ່ເອົາໃຈໃສ່ປັບປຸງຫລາຍວຽກງານສໍາຄັນໃຫ້ດີຂຶ້ນກວ່າເກົ່າ ເປັນຕົ້ນ: ໃຫ້ລັດຖະບານຮີບຮ້ອນຜັນຂະຫຍາຍແຜນວຽກຈຸດສຸມໃນປີ 2023 ໃຫ້ທັນເວລາ ແລະ ປະສົບຜົນສໍາເລັດ, ຄົ້ນຄ້ວາສ້າງແຜນຊໍາລະໜີ້ສິນໃຫ້ລະອຽດຊັດເຈນ.
ຫລັງຈາກນັ້ນ, ສະມາຊິກສະພາແຫ່ງຊາດ ໄດ້ຜັນປ່ຽນກັນປະກອບຄໍາເຫັນໃສ່ບົດລາຍງານຂອງລັດຖະບານທີ່ສະເໜີໂດຍຮອງນາຍົກລັດຖະມົນຕີໃນຄັ້ງນີ້ ຕາມການເຈາະຈີ້ມຂອງປະທານກອງປະຊຸມ.
ທ່ານ ສຸວັນນີ ໄຊຊະນະ, ສະມາຊິກສະພາແຫ່ງຊາດຈາກເຂດເລືອກຕັ້ງທີ 11 ແຂວງບໍລິຄໍາໄຊ ໄດ້ປະກອບຄໍາເຫັນສະເໜີຫລາຍບັນຫາສໍາຄັນ ເປັນຕົ້ນ: ການສົ່ງເສີມການຜະລິດຂອງລັດຖະບານຍັງບໍ່ທັນເປັນຮູບປະທໍາເທົ່າທີ່ຄວນ, ຂະນະດຽວກັນຍັງບໍ່ທັນໄດ້ວິເຄາະວິໄຈກ່ຽວກັບຕົ້ນທຶນການຜະລິດ ແລະ ການປັບປຸງຄຸນນະພາບການຜະລິດຊ່ວຍປະຊາຊົນໃຫ້ໄດ້ຕາມທີ່ຕະຫລາດຕ້ອງການ.
ສໍາລັບການດໍາເນີນກອງປະຊຸມສະໄໝສາມັນເທື່ອທີ 4 ຂອງສະພາແຫ່ງຊາດ ຊຸດທີ 9 ໃນຕອນບ່າຍມື້ນີ້ ຕາມວາລະແລ້ວ ສະມາຊິກສະພາແຫ່ງຊາດຈະໄດ້ພ້ອມກັນຮັບຟັງ ແລະ ປະກອບຄໍາເຫັນໃສ່ບົດລາຍງານຂອງລັດຖະບານກ່ຽວກັບການຈັດຕັ້ງປະຕິບັດວາລະແຫ່ງຊາດ ວ່າດ້ວຍການແກ້ໄຂບັນຫາຢາເສບຕິດ.
Loading...