ສະຫງວນລິຂະສິດ © ສະຖານີ ວິທະຍຸກະຈາຍສຽງແຫ່ງຊາດລາວ

ວິທະຍຸກະຈາຍສຽງແຫ່ງຊາດລາວ

Lao National Radio

ຊົມເຊີຍ ວັນສ້າງຕັ້ງວິທະຍຸກະຈາຍສຽງແຫ່ງຊາດລາວ ຄົບຮອບ 60 ປີ
(13 ສິງຫາ 1960-13 ສິງຫາ 2020) ຢ່າງສຸດໃຈ

ມື້ນີ້ ມີຂ່າວດີ ສປປ ລາວບໍ່ພົບຜູ້ຕິດເຊື້ອພະຍາດໂຄວິດ-19 ເພີ່ມ

ໃນໂອກາດຖະແຫລງຂ່າວກ່ຽວກັບສະພາບການແຜ່ລະບາດຂອງພະຍາດໂຄວິດ-19 ໃນຕອນບ່າຍມື້ນີ້ ວັນທີ 2 ເມສາ 2020 ທີ່ສູນປະຕິບັດງານ ຄະນະສະເພາະກິດ ຄວບຄຸມ ພະຍາດໂຄວິດ-19, ກະຊວງສາທາລະນະສຸກ, ນະຄອນຫຼວງວຽງຈັນ, ທ່ານ ລັດຕະນະໄຊ ເພັດສຸວັນ, ຫົວໜ້າກົມຄວບຄຸມພະຍາດຕິດຕໍ່ ກະຊວງສາທາລະນະສຸກ ທັງເປັນກຳມະການຄະນະສະເພາະກິດເພື່ອປ້ອງກັນຄວບຄຸມ ແລະ ແກ້ໄຂພະຍາດໂຄວິດ-19 ແຈ້ງໃຫ້ຊາບວ່າ: ຜ່ານການກວດວິເຄາະຫາເຊື້ອພະຍາດ ທັງໝົດ 61 ກໍລະນີ ໃນນັ້ນ ຢູ່ນະຄອນຫຼວງວຽງຈັນ 46 ຄົນ, ແຂວງບໍລິຄຳໄຊ, ຄຳມ່ວນ ແລະ ຫຼວງພະບາງ ແຂວງລະ 4 ຄົນ, ແຂວງອັດຕະປື 4 ຄົນ ແລະ ແຂວງ ຈຳປາສັກ 1 ຄົນ ແມ່ນບໍ່ພົບຜູ້ຕິດເຊື້ອເພີ່ມ ຄືຍັງຄົງທີ່ ຢູ່ຈໍານວນ 10 ຄົນ.

ປະຈຸບັນ, ລັດຖະບານໄດ້ສຸມໃສ່ຈັດຕັ້ງປະຕິບັດຫລາຍມາດຕະການ ເພື່ອຍົກລະດັບການປ້ອງກັນເຊື້ອພະຍາດໂຄວິດ-19 ໂດຍເນັ້ນໜັກໃຫ້ທຸກພາກສ່ວນເປັນເຈົ້າການໃນການຈັດຕັ້ງປະຕິບັດຄຳສັ່ງຂອງນາຍົກລັດຖະມົນຕີກ່ຽວກັບການເພີ່ມທະວີມາດຕະການສະກັດກັ້ນ, ກັນການລະບາດ, ຄວບຄຸມ ແລະກຽມຄວາມພ້ອມຮອບດ້ານ ເພື່ອຕ້ານພະຍາດໂຄວິດ-19 ຢ່າງເຂັ້ມງວດ. ຂໍ້ມູນກ່ຽວກັບຜູ້ສຳຜັດໃກ້ຊິດກັບ ທັງ 10 ຄົນທີ່ພົບເຊື້ອ ມີທັງໝົດ 191 ຄົນ ດັ່ງນີ້: ຜູ້ຕິດເຊື້ອທີ 1: ມີຜູ້ສຳຜັດໃກ້ຊິດກັບລາວ 44 ຄົນ ທັງໝົດຢູ່ນະຄອນຫຼວງວຽງຈັນ ຜູ້ຕິດເຊື້ອທີ 2: ມີຜູ້ສຳຜັດໃກ້ຊິດກັບລາວ 45 ຄົນ ຢູ່ນະຄອນຫຼວງ 11 ຄົນ, ຫຼວງພະບາງ 10 ແລະ ອຸດົມໄຊ 24 ຄົນ. ຜູ້ຕິດເຊື້ອທີ 3: ມີຜູ້ສຳຜັດໃກ້ຊິດກັບລາວ 21 ຄົນ ທັງໝົດຢູ່ນະຄອນຫຼວງວຽງຈັນ ຜູ້ຕິດເຊື້ອທີ 4: ມີຜູ້ສຳຜັດໃກ້ຊິດກັບລາວ 18 ຄົນ ທັງໝົດຢູ່ນະຄອນຫຼວງວຽງຈັນ ຜູ້ຕິດເຊື້ອທີ 5: ມີຜູ້ສຳຜັດໃກ້ຊິດກັບລາວ 2 ຄົນ ຢູ່ນະຄອນຫຼວງວຽງຈັນ ຜູ້ຕິດເຊື້ອທີ 6: ມີຜູ້ສຳຜັດໃກ້ຊິດກັບລາວ 8 ຄົນ ຢູ່ນະຄອນຫຼວງວຽງຈັນ ຜູ້ຕິດເຊື້ອທີ 7: ມີຜູ້ສຳຜັດໃກ້ຊິດກັບລາວ 16 ຄົນ ຢູ່ນະຄອນຫຼວງວຽງຈັນ ຜູ້ຕິດເຊື້ອທີ 8: ມີຜູ້ສຳຜັດໃກ້ຊິດກັບລາວ 22 ຄົນ ຢູ່ນະຄອນຫຼວງວຽງຈັນ ຜູ້ຕິດເຊື້ອທີ 9: ມີຜູ້ສຳຜັດໃກ້ຊິດກັບລາວ 7 ຄົນ ຢູ່ນະຄອນຫຼວງວຽງຈັນ ແລະ ຜູ້ຕິດເຊື້ອທີ 10: ມີຜູ້ສໍາຜັດໃກ້ຊິດກັບລາວ 8 ຄົນ ທັງໝົດຢູ່ນະຄອນຫລວງວຽງຈັນ

ຕໍ່ຜູ້ທີ່ໄດ້ສຳຜັດໃກ້ຊິດຈຳນວນດັ່ງກ່າວ, ຄະນະສະເພາະກິດ ເພື່ອປ້ອງກັນຄວບຄຸມ ແລະ ແກ້ໄຂພະຍາດໂຄວິດ-19 ໄດ້ຕິດຕາມຄົ້ນຫາ ເພື່ອກັກບໍລິເວນຕົນເອງຢູ່ເຮືອນຂອງເຂົາເຈົ້າ ແລະ ຈະມີແພດໄປຕິດຕາມອາການທຸກມື້; ຖ້າຫາກມີອາການ ຫຼື ກວດພົບວ່າເປັນບວກກໍ່ຕ້ອງໄດ້ນຳມາປິ່ນປົວຢູ່ໂຮງໝໍຕາມຫຼັກການຂອງການປິ່ນປົວໂຄວິດ-19. ແຕ່ສຳລັບຄົນເຈັບຈໍານວນໜຶ່ງທີ່ມີອາການດີຂຶ້ນແລ້ວ, ຄະນະແພດໝໍກໍ່ໃກ້ທີ່ຈະອານຸຍາດໃຫ້ອອກໂຮງໝໍແລ້ວ.

ທ່ານຫົວໜ້າກົມຄວບຄຸມພະຍາດຕິດຕໍ່ ກະຊວງສາທາລະນະສຸກ ໃຫ້ຮູ້ອີກວ່າ ອາດຈະມີຂ່າວດີ ຫາກບໍ່ມີການຕິດເຊື້ອພະຍາດເພີ່ມຂຶ້ນອີກ ປວງຊົນລາວທັງຊາດກໍ່ຈະໄດ້ສະເຫລີມສະຫອງປີໃໝ່ລາວດ້ວຍຄວາມເບີກບານມ່ວນຊື່ນ. ມາຮອດເວລາ 00 ໂມງຂອງວັນທີ 1 ເມສາ 2020, ທົ່ວໂລກມີລາຍງານກໍລະນີຕິດເຊື້ອພະຍາດ ທັງໝົດ 203 ປະເທດ/ເຂດປົກຄອງພິເສດ ແລະ 2 ເຮືອສໍາລານ, ມີກໍລະນີຢັ້ງຢືນຜູ້ຕິດເຊື້ອພະຍາດ COVID-19 ແລ້ວ 935,197 ກໍລະນີ ເພີ່ມຂື້ນ 76,872 ກໍລະນີ, ເສຍຊິວິດ 47,192 ເພີ່ມຂື້ນ 4,890 ກໍລະນີ ແລະ ປີ່ນປົວຫາຍດີ 193,989, ເພີ່ມຂື້ນ 16,058 ຄົນ.