ສະຫງວນລິຂະສິດ © ສະຖານີ ວິທະຍຸກະຈາຍສຽງແຫ່ງຊາດລາວ

ວິທະຍຸກະຈາຍສຽງແຫ່ງຊາດລາວ

Lao National Radio

ຊົມເຊີຍ ວັນສ້າງຕັ້ງວິທະຍຸກະຈາຍສຽງແຫ່ງຊາດລາວ ຄົບຮອບ 60 ປີ
(13 ສິງຫາ 1960-13 ສິງຫາ 2020) ຢ່າງສຸດໃຈ

ມື້ນີ້ ວັນທີ 11 ເມສາ 2020 ສປປ ລາວ ພົບຜູ້ຕິດເຊື້ອພະຍາດ ໂກວິດ 19 ເພີ່ມ 2 ຄົນ

ທ່ານ ພູທອນ ເມືອງປາກ ຮອງລັດຖະມົນຕີກະຊວງສາທາລະນະສຸກ ທັງເປັນຜູ້ປະຈຳການຄະນະສະເພາະກິດເພື່ອປ້ອງກັນຄວບຄຸມ ແລະ ແກ້ໄຂພະຍາດໂຄວິດ 19 ໃຫ້ຮູ້ໂອກາດຖະແຫລງຂ່າວຕໍ່ສື່ມວນຊົນ ເຖິງສະພາບການລະບາດຂອງພະຍາດ ໂກວິດ 19 ໃນຕອນບ່າຍວັນທີ 11 ເມສານີ້ທີ່ກະຊວງສາທາລະນະສຸກ ວ່າ: ໃນວັນທີ 10 ເມສາ 2020, ໄດ້ ເກັບຕົວຢ່າງມາກວດທັງໝົດ 62 ຄົນ, ໃນນັ້ນ ມີຜູ້ສຳຜັດໃກ້ຊິດ ກັບຜູ້ຕິດເຊື້ອ 21 ຄົນ, ກໍລະນີສົງໄສໃໝ່ ມີ 40 ຄົນ, ແຮງງານລາວ ທີ່ກັບມາແຕ່ໄທ 1 ຄົນ.


ໃນຈຳນວນ 62 ຄົນທີ່ມາກວດນັ້ນ ມີ ນະຄອນຫຼວງວຽງຈັນ 40 ຄົນ ແລະ ຕ່າງແຂວງ 22 ຄົນ (ຫຼວງພະບາງ 3 ຄົນ, ໄຊສົມບູນ 2 ຄົນ, ຄຳມ່ວນ 2 ຄົນ, ໄຊຍະບູລີ 3 ຄົນ, ບໍລິຄຳໄຊ 3 ຄົນ, ວຽງຈັນ 4 ຄົນ, ສະຫວັນນະເຂດ 2 ຄົນ ແລະ ສາລະວັນ 1 ຄົນ) ເຊິ່ງຜົນກວດທັງໝົດ ແມ່ນພົບເຊື້ອ 2 ກໍລະນີ ຄື:
ກໍລະນີ ທີ່ 1: ເພດຍິງ ອາຍຸ 32 ປີ, ອາຊີບ: ຫວ່າງງານ, ໜ່ວຍ 01, ຢູ່ຫ້ອງແຖວ ຂື້ນກັບບ້ານໜອງດ້ວງທົ່ງ, ເມືອງສີໂຄດຕະບອງ, ນະຄອນຫຼວງວຽງຈັນ (ຢູ່ຫ້ອງແຖວ ເບີ 7).
ຜູ້ກ່ຽວສໍາຜັດໃກ້ຊິດກັບກໍລະນີທີ 16 (ເພດຍິງ ອາຍຸ 23 ປີ ຢູ່ຫ້ອງແຖວດຽວກັນ, ຫ້ອງແຖວເບີ 8)
ວັນທີ 4 ເມສາ 2020: ຜູ້ກ່ຽວໄດ້ກີນເຂົ້າຮ່ວມກັບ ກໍລະນີທີ 16 ຢູ່ຫ້ອງແຖວດຽວກັນ ຫ້ອງເບີ 8 (ກິນນຳກັນທັງໝົດ 4 ຄົນ ຄື:ຜູ້ກ່ຽວ, ເພດຊາຍ 2 ຄົນ ແລະ ກໍລະນີທີ 16)
ວັນທີ 5-6 ເມສາ 2020: ເຂົາເຈົ້າຍັງໄດ້ມີການພົວພັນໄປມາຫາສູ່ກັນເປັນປົກກະຕິ.
ວັນທີ 7 ເມສາ 2020: ຜູ້ກ່ຽວເລີ່ມຮູ້ສຶກຄີງຮ້ອນ, ໄອແຫ້ງ ແລະ ປວດຕົນໂຕ, ໄດ້ໄປຊື້ຢາຢູ່ຮ້ານຂາຍຢາມາກິນເອງ ແລະ ຍັງໄດ້ກິນເຂົ້າກັບເພື່ອນຢູ່ຫ້ອງແຖວດຽວກັນຈໍານວນ 4 ຄົນ.
ວັນທີ 8- 9 ເມສາ 2020 : ຍັງມີອາການບໍ່ດີຂື້ນ ແຕ່ຜູ້ກ່ຽວໄດ້ພັກຜ່ອນຢູ່ຫ້ອງແຖວ.
ວັນທີ 10 ເມສາ 2020: ພາຍຫຼັງທີ່ກໍລະນີທີ່ 16 ຖືກຢັ້ງຢືນວ່າຕິດເຊື້ອ ທີມງານແພດໄດ້ໄປຮັບເອົາຜູ້ກ່ຽວມາກວດຫາເຊື້ອ ແລະ ເຂົ້ານອນຕິດຕາມ, ປິ່ນປົວ ຢູ່ໂຮງໝໍມິດຕະພາບ
• ສັງລວມຜູ້ສໍາຜັດໃກ້ຊິດກັບກໍລະນີີທີ 17 ທັງໝົດມີ 6 ຄົນ (ເຊີ່ງເປັນໝູ່ຢູ່ຫ້ອງແຖວດຽວກັນ ທີ່ກີນເຂົ້າຮ່ວມກັນ ແລະ ໝູ່ທີ່ກີນເຂົ້ານຳກັນຢູ່ບ້ານສາລາຄຳ)
ກໍລະນີທີ 2: ເພດຍິງ, ອາຍຸ 32 ປີ, ອາຊີບ: ຫວ່າງງານ (ເປັນໝູ່ໃກ້ຊິດໃຊ້ຊິວິດຮ່ວມກັນ ຢູ່ຫ້ອງດຽວກັນ ກັບກໍລະນີທີ 17) ການເຄື່ອນໄຫວທັງໝົດ ແມ່ນຄືກັນ, ລົດອໍາບູລັງ ຮັບໄປໂຮງໝໍໃນເວລາດຽວກັນ.
• ນັບແຕ່ເດືອນມັງກອນ ຮອດ ວັນທີ 10 ເມສາ 2020 ຄະນະສະເພາະກິດໄດ້ເກັບຕົວຢ່າງມາກວດ ທັງໝົດ ມີ 1,094 ຄົນ, ກວດພົບເຊື້ອທັງໝົດ 18 ຄົນ (ມື້ນີ້ພົບເຊື້ອເພີ່ມອີກ 2 ຄົນ) ລວມທັງໝົດ 18 ຄົນ .
• ຈໍານວນຜູ້ສໍາຜັດໃກ້ຊິດທັງໝົດ ທີ່ໄດ້ຕິດຕາມ ແຕ່ວັນທີ 23 ມີນາ – 10 ເມສາ 2020 ມີ ທັງໝົດ 388 ຄົນ, ໝົດກໍານົດຕິດຕາມທັງໝົດ 307 ຄົນ, ຍັງສືບຕໍ່ຕິດຕາມທັງໝົດ 81 ຄົນ ເຊິ່ງມີລາຍລະອຽດດັ່ງນີ້:
– ນະຄອນຫຼວງວຽງຈັນ 40 ຄົນ.
– ແຂວງໄຊສົມບູນ 36 ຄົນ.
– ແຂວງ ຫຼວງພະບາງ 2 ຄົນ.
– ແຂວງຄຳມ່ວນ 2 ຄົນ.
– ແຂວງວຽງຈັນ 1 ຄົນ
• ສຳລັບ ການຕິດຕາມ ສະຖານທີ່ຈຳກັດບໍລິເວນ ແລະ ຜູ້ຈຳກັດບໍລິເວນຢູ່ເຮືອນ ໃນທົ່ວປະເທດ
– ສະຖານທີ່ຈຳກັດບໍລິເວນ ໃນຂອບເຂດທົ່ວປະເທດມີ 2,142 ແຫ່ງ
– ຈຳນວນຄົນທີ່ຕິດຕາມຢູ່ ສູນຈຳກັດບໍລິເວນມີ 68,534 ຄົນ
– ຈຳນວນທີ່ຈຳກັດບໍລິເວນ ຢູ່ເຮືອນຂອງຕົນເອງ ມີ 44,870 ຄົນ
– ສະເພາະ ໃນວັນທີ 10 ເມສາ 2020 ພົບຄົນທີ່ມີອາການສົງໄສ 1 ຄົນ ຈາກແຂວງຄຳມ່ວນ ຜົນກວດບໍ່ພົບເຊື້ອ.