ສະຫງວນລິຂະສິດ © ສະຖານີ ວິທະຍຸກະຈາຍສຽງແຫ່ງຊາດລາວ

ວິທະຍຸກະຈາຍສຽງແຫ່ງຊາດລາວ

Lao National Radio

ຊົມເຊີຍ ວັນສ້າງຕັ້ງວິທະຍຸກະຈາຍສຽງແຫ່ງຊາດລາວ ຄົບຮອບ 60 ປີ
(13 ສິງຫາ 1960-13 ສິງຫາ 2020) ຢ່າງສຸດໃຈ

ມື້ຜ່ານມາມີຜູ້ເດີນທາງເຂົ້າ ສປປ ລາວ 1,516 ຄົນ ທຸກຄົນໄດ້ກວດວິເຄາະຫາເຊື້ອ ແຕ່ບໍ່ພົບ

ທ່ານ ພູທອນ ເມືອງປາກ ຮອງລັດຖະມົນຕີກະຊວງສາທາລະນະສຸກ ຜູ້ປະຈໍາການຄະນະສະເພາະກິດຄວບຄຸມໂຄວິດ19 ຖະແຫລງຕໍ່ສື່ມວນຊົນ ຕອນບ່າຍວັນທີ 25 ພຶດສະພານີ້ ກ່ຽວກັບການຄວບຄຸມພະຍາດໂຄວິດວ່າ: ມື້ຜ່ານມາມີຜູ້ເດີນທາງ ເຂົ້າ ສປປ ລາວທັງໝົດ 1,516 ຄົນ, ໃນນັ້ນຜ່ານດ່ານຊາຍແດນ ລາວ-ໄທ ທັງໝົດ 823 ຄົນ, ມີແຮງງານລາວກັບມາຈາກປະເທດໄທ 26 ຄົນ, ເຫລືອນັ້ນແມ່ຄົນຂັບລົດຂົນສົົ່ງສິນຄ້າ.

ຈຸດຜ່ານດ່ານລາວຈີນ 38 ຄົນ, ມີແຮງງານຄົນລາວກັບມາຈາກປະເທດຈີນ 4 ຄົນ; ມີວິຊາການຄົນຈີນຂອງໂຮງງານຢາສູບລາວທຽນຫຼົງ ແລະ ບໍລິສັດຢ່າງພາລາຢຸນນານຈໍາກັດ ທັງໝົດ 26 ຄົນ ,ເຫຼືອນັ້ນ ແມ່ນຜູ້ຂັບລົດຂົນສົ່ງສິນຄ້າ.

ຈຸດຜ່ານດ່ານລາວຫວຽດ ທັງໝົດ 665 ຄົນ ທັງໝົດແມ່ນຄົນຂັບລົດຂົນສົ່ງສິນຄ້າ ທຸກດ່ານ ແມ່ນໄດ້ກວດແທກອຸນຫະພູມຮ່າງກາຍ ແລະ ບໍ່ມີຄົນເປັນໄຂ້., ທັງໝົດໄດ້ເກັບຕົວຢ່າງມາກວດ ແລ້ວນຳສົ່ງໄປຈຳກັດບໍລິເວນຢູ່ສະຖານທີ່ທີ່ກຳນົດໄວ້ ຈົນກ່ວາຈະຄົບກຳນົດ 14 ວັນ.

ທ່ານພູທອນ ເມືອງປາກ ໃຫ້ຮູ້ເຖິງການເກັບຕົວຢ່າງມາກວດວິເຄາະ ແລະ ຄົ້ນຫາຜູ້ຕິດເຊື້ອພະຍາດວ່າ: ວັນທີ 24 ພຶດສະພາ 2020, ໄດ້ເກັບຕົວຢ່າງມາກວດວິເຄາະທັງໝົດ 308 ຄົນ, ໃນນັ້ນມີແຮງງານລາວທີ່ກັບມາແຕ່ໄທ 247 ຄົນ, ແຮງງານຈີນ 58 ຄົນ, ກໍລະນີສົງໃສ 3 ຄົນ, ຜົນນກວດ ທັງໝົດ ທີ່ກວດມື້ວານນີ້ ບໍ່ພົບເຊື້ອ. ໝາຍຄວາມວ່າໃນວັນທີ 24 ພຶດສະພາ 2020 ບໍ່ມີຜູ້ຕິດເຊື້ອໃໝ່.

ສັງລວມການກວດວິເຄາະ ແຕ່ເດືອນມັງກອນ ຮອດ ວັນທີ 24 ພຶດສະພາ 2020 ໄດ້ເກັບຕົວຢ່າງມາກວດທັງໝົດ ມີ 5,795 ຕົວຢ່າງ, ກວດພົບເຊື້ອສະສົມ 19 ຄົນ (43 ມື້ແລ້ວທີ່ບໍ່ພົບຜູ້ຕິດເຊື້ອໃໝ່).

ປະຈຸບັນ, ມີຜູ້ນອນຕິດຕາມຢູ່ໂຮງໝໍມິດຕະພາບ 5 ຄົນ ຍີງ ທັງໝົດເຫັນວ່າມີອາການປົກກະຕິ

ທ່ານຮອງລັດຖະມົນຕີ ໃຫ້ຮູ້ອີກວ່າ: ໃນໄລຍະການປ່ຽນແປງຂອງດິນຟ້າອາກາດກ້າວເຂົ້າສູ່ລະດູຝົນ, ກະຊວງສາທາລະນະສຸກ ຍັງໄດ້ເອົາໃຈໃສ່ ປ້ອງກັນ ແລະ ຄວບຄຸມການລະບາດຂອງພະຍາດຕາມລະດູການເປັນຕົ້ນແມ່ນ: ພະຍາດຖອກທ້ອງ, ໄຂ້ຫວັດ, ໝາກແດງ, ມາລາເຣຍ ແລະ ໄຂ້ຍຸງລາຍ, ທັງໄດ້ເປີດຂະບວນການສັກຢາກັນພະຍາດທົ່ວປະເທດ.  ສະເພາະໄຂ້ຍຸງລາຍປີ 2019 ຜ່ານມາມີຜູ້ຕິດເຊື້ອທັງໝົດ 39,091 ຄົນ, ເສຍຊີວິດ  76 ຄົນ, ປີ 2020 ມາຮອດວັນທີ 22 ພຶດສະພາ 2020 ມີຜູ້ຕິດເຊື້ອທັງໝົດ 1,337 ຄົນ, ເສຍຊີວິດ 4 ຄົນ ຢູ່ນະຄອນຫຼວງວຽງຈັນ 2 ຄົນ, ໄຊຍະບູລີ 1 ຄົນ ແລະ ແຂວງຄຳມ່ວນ 1 ຄົນ,  ສະນັ້ນ ຈຶ່ງຂໍເຊີນຊວນພໍ່ແມ່ປະຊາຊົນບັນດາເຜົ່າຈົ່ງໄດ້ເປັນເຈົ້າການໃນການທຳລາຍແຫຼ່ງເພາະພັນຍຸງລາຍ ແລະ ນຳພາລູກຫຼານໄປສັກຢາກັນພະຍາດ ຕາມຕາຕະລາງສັກຢາ.