ສະຫງວນລິຂະສິດ © ສະຖານີ ວິທະຍຸກະຈາຍສຽງແຫ່ງຊາດລາວ

ວິທະຍຸກະຈາຍສຽງແຫ່ງຊາດລາວ

Lao National Radio

ຊົມເຊີຍ ວັນສ້າງຕັ້ງວິທະຍຸກະຈາຍສຽງແຫ່ງຊາດລາວ ຄົບຮອບ 60 ປີ
(13 ສິງຫາ 1960-13 ສິງຫາ 2020) ຢ່າງສຸດໃຈ

ມື້ຜ່ານມາມີຜູ້ເດີນທາງເຂົ້າ ສປປ ລາວທັງໝົດ 2,232 ຄົນ, ທຸກຄົນລ້ວນແຕ່ຜ່ານການກວດວິເຄາະຫາເຊື້ອ

ມື້ຜ່ານມາຈໍານວນຜູ້ເດີນທາງເຂົ້າມາລາວທັງໝົດ 2,232 ຄົນ, ໃນນັ້ນຈຸດຜ່ານດ່ານລາວ-ໄທ 1,428 ຄົນ, ມີແຮງງານລາວກັບມາຈາກປະເທດໄທ 48 ຄົນ ເຊິ່ງຜ່ານດ່ານສາກົນວັງເຕົ່າ-ຊ່ອງເມັກ ແຂວງຈຳປາສັກ, ເຫຼືອນັ້ນແມ່ນຄົນຂັບລົດສົົ່ງສິນຄ້າ. ຈຸດຜ່ານດ່ານລາວ-ຈີນ ທັງໝົດ 9 ຄົນ, ທັງໝົດແມ່ນຜູ້ຂັບລົດຂົນສົ່ງສິນຄ້າ.

ຈຸດຜ່ານດ່ານລາວຫວຽດ ທັງໝົດ 795 ຄົນ, ທັງໝົດ ແມ່ນຄົນຂັບລົດສົ່ງສິນຄ້າ. ໃນທຸກດ່ານ ແມ່ນໄດ້ກວດວັດອຸນຫະພູມຮ່າງກາຍ ແລະ ບໍ່ມີຄົນເປັນໄຂ້, ແຕ່ທັງໝົດໄດ້ເກັບຕົວຢ່າງມາກວດ ແລະ ນຳສົ່ງໄປຈຳກັດບໍລິເວນຢູ່ສູນຂອງແຂວງ ຈົນກ່ວາຈະຄົບກຳນົດ 14 ວັນ.

ໂອກາດຖະແຫລງຂ່າວປະຈໍາວັນ ທ່ານພູທອນ ເມືອງປາກ ຮອງລັດຖະມົນຕີກະຊວງສາທາລະນະສຸກ ຜູ້ປະຈໍາການຄະນະສະເພາະກິດຄວບຄຸມໂຄວິດ19 ໃຫ້ຮູ້ເຖິງການເຝົ້າລະວັງ ແລະ ວິເຄາະວ່າ: ວັນທີ 21 ພຶດສະພາ 2020, ໄດ້ເກັບຕົວຢ່າງມາກວດທັງໝົດ 232 ຄົນ, ໃນນັ້ນ ມີກໍລະນີສົງໄສ 8 ຄົນ, ແຮງງານລາວທີ່ກັບມາແຕ່ໄທ 134 ຄົນ, ແຮງງານຫວຽດນາມ 90 ຄົນ. ຜົນກວດທັງໝົດ ແມ່ນບໍ່ພົບເຊື້ອ. ໝາຍຄວາມວ່າໃນວັນທີ 21 ພຶດສະພາ 2020 ບໍ່ມີຜູ້ຕິດເຊື້ອໃໝ່. 40 ມື້ແລ້ວທີ່ບໍ່ພົບຜູ້ຕິດເຊື້ອໃໝ່.

ປະຈຸບັນນີ້ທົ່ວປະເທດ ມີສູນຈໍາກັດບໍລິເວນ ທັງໝົດ 93 ສູນ, ມີຜູ້ຈຳກັດບໍລິເວນຢູ່ສູນ 3,071 ຄົນ, ໄດ້ເກັບຕົວຢ່າງມາກວດວິເຄາະ ທັງໝົດ ແລະ ບໍ່ມີຜູ້ຕິດເຊື້ອ.

ການຕິດຕາມປີ່ນປົວຄົນເຈັບຢູ່ໂຮງໝໍ ຍັງເຫລືອ 5 ຄົນ ທັງໝົດມີອາການປົກກະຕິ ແຕ່ຈະໄດ້ສືບຕໍ່ຕິດຕາມຕໍ່ໄປຈົນກ່ວາຈະກວດຫາເຊື້ອບໍ່ພົບ.

ທ່ານພູທອນ ເມືອງປາກ ໃຫ້ຮູ້ເຖິງ ການຜ່ອນຜັນມາດຕະການຕ່າງໆ ແມ່ນນະໂຍບາຍຂອງພັກ-ລັດຖະບານທີ່ເປັນຮ່ວງເປັນໄຍຕໍ່ຜົນກະທົບດ້ານຊີວິດການເປັນຢູ່ຂອງພໍ່ແມ່ປະຊາຊົນ ແລະ ດ້ານເສດຖະກິດ-ສັງຄົມ ຊຶ່ງເປັນໂອກາດໃຫ້ພາກທຸລະກິດກໍ່ຄືພໍ່ແມ່ປະຊາຊົນບັນດາເຜົ່າໄດ້ກັບຄືນມາດຳເນີດກິດຈະການ ຫຼື ດຳເນີນຊີວິດເປັນປົກກະຕິເທື່ອລະກ້າວ ແຕ່ພ້ອມດຽວກັນນີ້ກໍ່ເປັນໂອກາດທີ່ຈະມີຄວາມສ່ຽງ ທີ່ຈະເກີດການລະບາດຮອບໃໝ່ ຖ້າຫາກວ່າພວກເຮົາ ບໍ່ປະຕິບັດວິທີການປ້ອງກັນການຕິດເຊື້ອຢ່າງເຂັ້ມງວດ ໂດຍສະເພາະຢູ່ສະຖານທີ່ໃຫ້ບໍລິການ, ພະຫະນະໃຊ້ບໍລິການ, ​ຜູ້ໃຫ້ບໍລິການ ແລະ ຜູ້ມາໃຊ້ບໍລິການ ເປັນຕົ້ນແມ່ນ: ການປະຕິບັດຫຼັກການອະນາໄມ, ການທໍາຄວາມສະອາດຂ້າເຊື້ອພະຍາດຢູ່ສະຖານທີ່ບໍລິການ, ການແທກອຸນຫະພູມຮ່າງກາຍ, ການລ້າງມືດ້ວຍນໍ້າສະອາດໃສ່ສະບູ ຫຼື ໃຊ້ເຈວລ້າງມື, ການປະຕິບັດໄລຍະຫ່າງທາງສັງຄົມ, ບໍ່ໃຫ້ມີການແອອັດ, ການໃສ່ຜ້າປິດປາກ-ດັງ ເວລາອອກຈາກບ້ານ ຫຼື ໄປສະຖານທີ່ ທີ່ມີຄວາມສ່ຽງຕໍ່ການຕິດເຊື້ອ ທັງໝົດນີ້ໃຫ້ກາຍເປັນຄວາມຊິນເຄີຍໃນການດຳລົງຊີວິດປະຈຳວັນ. ພວກເຮົາຈຶ່ງຈະສາມາດສະກັດກັ້ນ ການລະບາດຂອງພະຍາດ COVID-19 ບໍ່ໃຫ້ກັບຄືນມາຮອບໃໝ່.​

ກະຊວງສາທາລະນະສຸກ ນອກຈາກຄວບຄຸມການລະບາດຂອງພະຍາດ COVID-19ແລ້ວ  ຍັງໄດ້ເອົາໃຈໃສ່ ປ້ອງກັນ ແລະ ຄວບຄຸມການລະບາດຂອງພະຍາດຕາມລະດູການເປັນຕົ້ນແມ່ນ: ຖອກທ້ອງ, ໄຂ້ຫວັດ, ໝາກແດງ, ມາລາເຣຍ ແລະ ໄຂ້ຍຸງລາຍ, ທັງໄດ້ເປີດຂະບວນການສັກຢາກັນພະຍາດທົ່ວປະເທດ.

ສະເພາະໄຂ້ຍຸງລາຍປີ 2019 ຜ່ານມາມີຜູ້ຕິດເຊື້ອທັງໝົດ 39,091 ຄົນ, ເສຍຊີວິດ  76 ຄົນ, ປີ 2020 ມາຮອດວັນທີ່ 21 ພຶດສະພາ 2020 ມີຜູ້ຕິດເຊື້ອທັງໝົດ 1,299 ຄົນ, ເສຍຊີວິດ 3 ຄົນຢູ່ນະຄອນຫຼວງວຽງຈັນ 1, ໄຊຍະບູລີ 1 ແລະ ລ່າສຸດແຂວງຄຳມ່ວນ 1 ຄົນ, ຖືວ່າເປັນພະຍາດທີ່ມີຄວາມຮຸນແຮງເຊັ່ນກັນ. ສະນັ້ນ ຈຶ່ງຂໍເຊີນຊວນພໍ່ແມ່ປະຊາຊົນບັນດາເຜົ່າ ຈົ່ງໄດ້ເປັນເຈົ້າການໃນການທຳລາຍແຫຼ່ງເພາະພັນຍຸງລາຍ ແລະ ນຳພາລູກຫຼານໄປສັກຢາກັນພະຍາດ ຕາມຕາຕະລາງສັກຢາ.

ທົ່ວໂລກມີຜູ້ຕິດເຊື້ອທັງໝົດ 5.179.363 ຄົນ, ເພີ່ມຂຶ້ນ 95.520 ຄົນ, ເສຍຊີວິດ 332.808ຄົນ.

-ປະເທດອາເມລິກາ ຜູ້ຕິດເຊື້ອ 1.610.697 ຄົນ, ເພີ່ມຂຶ້ນ 24.788 ຄົນ, ເສຍຊີວິດ 95.038 ຄົນ,   -ຣັດເຊຍ ຜູ້ຕິດເຊື້ອ 317.554 ຄົນ, ເພີ່ມຂຶ້ນ 8.845 ຄົນ, ເສຍຊີວິດ 3.099. ຄົນ, ເບຼຊິນ ມີຜູ້ຕິດເຊື້ອ 310.087 ຄົນ, ເພີ່ມຂຶ້ນ 16.730 ຄົນ, ເສຍຊີວິດ 20.047 ຄົນ,   -ອັງກິດ ຜູ້ຕິດເຊື້ອ 250.908 ຄົນ, ເພີ່ມຂຶ້ນ 2.615 ຄົນ, ເສຍຊີວິດ 36.042 ຄົນ.

ສ່ວນປະເທດສະມາຊິກອາຊຽນ: ສິງກະໂປ: ຕິດເຊື້ອ 29.812 ຄົນ, ເສຍຊີວິດ 23 ຄົນ, -ອິນໂດເນເຊຍ: ຕິດເຊື້ອ 20.162 ຄົນ, ເສຍຊີວິດ 1.278 ຄົນ, -ຟິລິປິນ: ຕິດເຊື້ອ 13.434 ຄົນ, ເສຍຊີວິດ 846 ຄົນ, – ມາເລເຊຍ: ຕິດເຊື້ອ 7.059 ຄົນ, ເສຍຊີວິດ 114 ຄົນ, -ໄທ: ຕິດເຊື້ອ 3.037 ຄົນ, ເສຍຊີວິດ 56 ຄົນ, -ຫວຽດນາມ: ຕິດເຊື້ອ 324 ຄົນ, ບໍ່ມີຜູ້ເສຍຊີວິດ, -ມຽນມາ: ຕິດເຊື້ອ 199 ຄົນ, ເສຍຊີວິດ 6 ຄົນ, -ບຣູໄນ: ຕິດເຊື້ອ 141 ຄົນ, ເສຍຊີວິດ 1 ຄົນ, -ກຳປູເຈຍ: ຕິດເຊື້ອ 123 ຄົນ, ປົວດີໝົດແລ້ວ, -ຕີມໍເລສເຕ: ຕິດເຊື້ອ 24 ຄົນ,  ປົວດີໝົດແລ້ວ.