ສະຫງວນລິຂະສິດ © ສະຖານີ ວິທະຍຸກະຈາຍສຽງແຫ່ງຊາດລາວ

ວິທະຍຸກະຈາຍສຽງແຫ່ງຊາດລາວ

Lao National Radio

ຊົມເຊີຍ ວັນສ້າງຕັ້ງວິທະຍຸກະຈາຍສຽງແຫ່ງຊາດລາວ ຄົບຮອບ 60 ປີ
(13 ສິງຫາ 1960-13 ສິງຫາ 2020) ຢ່າງສຸດໃຈ

ມື້ຜ່ານມາໄດ້ກວດວິເຄາະຫາເຊື້ອໂຄວິດ19ຈໍານວນ 279 ຄົນ ແຕ່ບໍ່ມີຜົນບວກ

ທ່ານ ພູທອນ ເມືອງປາກ ຮອງລັດຖະມົນຕີກະຊວງສາທາລະນະສຸກ ຜູ້ປະຈໍາການຄະນະສະເພາະກິດຄວບຄຸມໂຄວິດ 19 ຖະແຫລງຕໍ່ສື່ມວນຊົນ ໃນຕອນບ່າຍວັນທີ 10 ພຶດສະພານີ້ ວ່າ: ໃນວັນທີ 9 ພຶດສະພາ 2020, ໄດ້ເກັບຕົວຢ່າງມາກວດທັງໝົດ 279 ຄົນ, ໃນນັ້ນ ມີກໍລະນີສົງໄສ 27 ຄົນ, ແຮງງານລາວທີ່ກັບມາຈາກປະເທດໄທ 161 ຄົນ ແລະ ແຮງງານຈີນທີ່ເຂົ້າມາລາວ 91 ຄົນ, ຜົນກວດທັງໝົດຂອງແຮງງານ ຈີນ ແລະ ລາວ ທີ່ເຂົ້າມາ ແລະ ກໍລະນີສົງໄສຂອງມື້ວານນີ້ ບໍ່ພົບເຊື້ອ. ໝາຍຄວາມວ່າໃນວັນທີ 9 ພຶດສະພາ 2020 ບໍ່ມີຜູ້ຕິດເຊື້ອໃໝ່.

ນັບແຕ່ເດືອນມັງກອນ ຮອດ ວັນທີ 09 ພຶດສະພາ 2020 ໄດ້ເກັບຕົວຢ່າງມາກວດທັງໝົດ ມີ 3,187 ຕົວຢ່າງ, ກວດພົບເຊື້ອສະສົມ 19 ຄົນ (28 ມື້ແລ້ວທີ່ບໍ່ພົບຜູ້ຕິດເຊື້ອໃໝ່).

ການຕິດຕາມຜູ້ເດີນທາງມາຈາກຕ່າງປະເທດໂດຍສະເພາະແຮງງານລາວ ຢູ່ສະຖານທີ່ຈຳກັດບໍລິເວນຕ່າງໆຂອງແຂວງ:ປະຈຸບັນນີ້ທົ່ວປະເທດ ມີສູນຈໍາກັດບໍລິເວນ ທັງໝົດ 60  ສູນ, ມີຜູ້ຈຳກັດບໍລິເວນຢູ່ສູນ 1,237 ຄົນ, ໄດ້ເກັບຕົວຢ່າງມາກວດວິເຄາະ ທັງໝົດນີ້ບໍ່ມີຜູ້ຕິດເຊື້ອ.

ການຕິດຕາມປີ່ນປົວຄົນເຈັບຢູ່ໂຮງໝໍ : ປະຈຸບັນນີ້ ມີຜູ້ນອນຕິດຕາມຢູ່ໂຮງໝໍມິດຕະພາບ 6 ຄົນ ລວມທັງນ້ຳເບີ 14 ທີ່ເອົາກັບຄືນມານອນຕິດຕາມອາການຢູ່ໂຮງໝໍ, ທັງໝົດເຫັນວ່າມີອາການເບົາບາງ ແລະ ສືບຕໍ່ຕິດຕາມອາການ ແລະ ກວດວິເຄາະຊອກຫາເຊື້ອອີກໃນໜື່ງອາທິດຕໍ່ໜ້າ.

ມາຮອດເວລາ 6:00 ໂມງເຊົ້າ ຂອງວັນທີ 10 ພຶດສະພາ 2020, ທົ່ວໂລກມີການລາຍງານການລະບາດ ທັງໝົດ 212 (ປະເທດ/ເຂດ)

–  ມີການຢັ້ງຢືນ ຜູ້ຕິດເຊື້ອພະຍາດ COVID-19 ແມ່ນ 4,097,429 ຄົນ (ເພີ່ມຂຶ້ນ 88,138ຄົນ)

–  ເສຍຊິວິດ 280,162 ຄົນ(ເພີ່ມຂຶ້ນ4,186 ຄົນ) ກວມເອົາ 6,83 % ຂອງຜູ້ຕິດເຊື້ອທັງໝົດ;

–  ປີ່ນປົວດີ 1,431,967ຄົນ (ເພີ່ມຂຶ້ນ54,844 ຄົນ)  ກວມເອົາ 34.9 % ຂອງຜູ້ຕິດເຊື້ອທັງໝົດ.

ທ່ານພູທອນ ເມືອງປາກ ໃຫ້ຮູ້ເຖິງມາດຕະການສຳຄັນໃນໄລຍະຜ່ອນຜັນ ແຕ່ນີ້ເຖິງ ວັນທີ 17 ພຶດສະພານີ້ ເຊິ່ງຄະນະສະເພາະກິດໄດ້ເອົາໃຈໃສ່ເຝົ້າລະວັງຢ່າງເຂັ້ມງວດ ຕໍ່ຜູ້ທີ່ເດີນທາງເຂົ້າມາ ສປປ ລາວ  ຕ້ອງໄດ້ກວດວິເຄາະຫາເຊື້ອພະຍາດທຸກຄົນ ເຖິງວ່າຈະມີອາການໄຂ້ ຫຼື ບໍ່ກໍ່ຕາມ ເພື່ອບໍ່ໃຫ້ນໍາເຊື້ອພະຍາດເຂົ້າມາປະເທດເຮົາອີກ. ຜູ້ທີ່ມີຜົນກວດວິເຄາະບວກ ກໍ່ຈະໄດ້ເອົາເຂົ້ານອນແຍກປ່ຽວຢູ່ໂຮງໝໍ ເພື່ອບໍ່ໃຫ້ມີຄວາມສ່ຽງທີ່ຈະແຜ່ກະຈາຍເຊື້ອອອກໄປຕິດໃສ່ຜູ້ອື່ນ, ຜູ້ທີ່ມີຜົນກວດວິເຄາະລົບກໍ່ຈະໄດ້ໄປຈຳກັດບໍລິເວນ ຢູ່ສູນຂອງແຕ່ລະແຂວງຈົນຄົບກຳນົດ 14 ວັນ, ບັນດາທ່ານ ກໍ່ຄື ພໍ່ແມ່ປະຊາຊົນບັນດາເຜົ່າ ທີ່ຢູ່ພາຍໃນປະເທດຖ້າມີອາການສົງໄສ ຫຼື ເຈັບເປັນກໍ່ໃຫ້ໄປພົບແພດຢູ່ໂຮງໝໍ ເພື່ອກວດກາບົງມະຕິວິໄຈຫາເຊື້ອພະຍາດ ພ້ອມທັງເອົາໃຈໃສ່ປະຕິບັດມາດຕະການປ້ອງກັນຕົນເອງຈາກການຕິດເຊື້ອພະຍາດ. ເພື່ອຊ່ວຍສະໜັບສະໜູນມາດຕະການຄວບຄຸມ ແກ້ໄຂການລະບາດຂອງພະຍາດ COVID-19 ນີ້ ໃຫ້ມີປະສິດທິຜົນ.