ວິທະຍຸກະຈາຍສຽງແຫ່ງຊາດລາວ

Lao National Radio

ຕັ້ງໜ້າຜັນຂະຫຍາຍມະຕິກອງປະຊຸມໃຫຍ່ ຄັ້ງທີ XI ຂອງພັກ ເຂົ້າສູ່ຊີວິດຈິງ
ທ່ານສຸວັນນະພອນ ພົມສະຫວັດ ປະທານມູນນິທິຮ່ວມໃຈທໍາ ພ້ອມຄະນະ ໄດ້ນໍາອາຫານຈໍານວນ 500 ຊຸດ ແລະຢາປົວພະຍາດຈໍານວນໜຶຶ່ງ ໄປຊ່ວຍເຫລືອສູນສົງເຄາະ ບ້ານສົມສະຫງ່າ ເມືອງໄຊເຊດຖາ ນະຄອນຫລວງວຽງຈັນ ໃນວັນທີ 16 ທັນວາ 2023. ໂດຍການຕ້ອນຮັບ ຂອງທ່ານສຸດທິໄຊ ສົມພາວັດ ຫົວໜ້າຂະແໜງສັງຄົມສົງເຄາະ ພະແນກແຮງງານ ແລະສະຫວັດດີການສັງຄົມ ນະຄອນຫລວງວຽງຈັນ ແລະຄະນະ.
ອາຫານຈໍານວນດັ່ງກ່າວ ແມ່ນໄດ້ມາຈາກການປະກອບສ່ວນຂອງສະມາຊິກພາຍໃນກຸ່ມ ມູນນິທິຮ່ວມໃຈທໍາ, ອາສາສະໝັກ ຕະຫລອດຮອດຜູ້ມີຈິດໃຈເມດຕາຈໍານວນໜຶ່ງຮ່ວມກັນລະດົມ ແລະຕັດຕັ້ງຂຶ້ນມາເພື່ອຊ່ວຍເຫລືອຜູ້ດອ້ຍໂອກາດ. ກ່າວມອບໂດຍ ທ່ານສຸວັນນະພອນ ພົມສະຫວັດ ປະທານມູນນິທິຮ່ວມໃຈທໍາ ແລະກ່າວຮັບໂດຍທ່ານ ສຸດທິໄຊ ສົມພາວັດ ຫົວໜ້າຂະແໜງສັງຄົມສົງເຄາະ.
ມູນນິທິ ຮ່ວມໃຈທໍາ ໄດ້ສ້າງຕັ້ງໂຄງການຄອບຄົວດຽວກັນ (“One Family” ເປັນອົງການຈັດຕັ້ງທີ່ບໍ່ຫວັງຜົນກໍາໄລ ຂຶ້ນກັບກະຊວງພາຍໃນ ໃຫ້ການຊ່ວຍເຫລືອສັງຄົມດ້ານອາຫານແກ່ຜູ້ປະສົບໄພພິບັດ, ໄພແຫ້ງແລ້ງ ແລະຜູ້ອຶດຫິວ, ຜູ້ທີ່ມີລາຍຮັບຕໍ່າທີ່ບໍ່ສາມາດຊື້ອາຫານສຸຂະພາບ ແລະມີຄຸນຄ່າທາງໂພຊະນາການໄດ້ດ້ວຍຕົນເອງ.
ໂອກາດດຽວກັນນີ້ ຄະນະທິມງານອາສາ ຂອງມູນນິທິຮ່ວມໃຈທໍາ ຍັງໄດ້ຮ່ວມຈັດກິດຈະກໍາຈໍານວນໜຶ່ງເພື່ອສ້າງຄວາມເບີກບານມ່ວນຊື່ນ ແລະຄວາມສາມັກຕີຮັກແພງກັບບຸກຄົນພາຍໃນສູນອີກດ້ວຍ.
ສູນສົງເຄາະ ບ້ານສົມສະຫງ່າ ເມືອງໄຊເຊດຖາ ນະຄອນຫລວງວຽງຈັນ ປະຈຸບັນມີຜູ້ຕ້ອງການຄວາມຊ່ວຍເຫລືອ ມາພັກອາໄສ ແລະບໍາບັດດ້ານສຸຂະພາບ ແລະດ້ານຈິດໃຈ ຈໍານວນ 300ຄົນ,
ໂດຍ: ຄໍາກອງ