ON AIR

ຟັງວິທະຍຸ FM103.7Mhz ອອນລາຍ
Listen to Radio FM103.7Mhz Online

ມູນນິທິ ລາງວັນສົມເດັດເຈົ້າຟ້າມະຫາຈັກກີ ປະເທດໄທ ກຽມມອບລາງວັນໃຫ້ຄູອາຈານດີເດັ່ນລາວ ປະຈໍາປີ 2019 ຢູ່ຫລວງພະບາງ

ໃນວັນທີ 13 ມິຖຸນາ 2019, ຄະນະກໍາມະການມູນນິທິ ລາງວັນສົມເດັດເຈົ້າຟ້າມະຫາຈັກກີ ແຫ່ງຣາຊະອານາຈັກໄທ ຈໍານວນ 17 ທ່ານ ໄດ້ເດີນທາງມາເຖິງນະຄອນຫລວງວຽງຈັນ, ເພື່ອຢ້ຽມຢາມ ແລະ ພົບປະກັບ ບັນດາຄູອາຈານຂອງລາວ ທີ່ໄດ້ຮັບລາງວັນນີ້ ແລະ ກະກຽມພິທີມອບລາງວັນໃຫ້ຄູອາຈານດີເດັ່ນຂອງລາວ ປະຈໍາປີ 2019 ຢູ່ແຂວງຫລວງພະບາງ, ໂດຍສົມເດັດພະເທບລັດຕະນະຣາຊະສຸ ດາສະຫຍາມບໍຣົມຣາຊະກຸມາຣີຈະເດີນທາງມາມອບໃຫ້ເອງ ໃນເດືອນຕຸລາທີ່ຈະມາເຖິງນີ້.

ທ່ານນາງປອ ເບັນຈະລັກ ນາມຟ້າ, ຄະນະກໍາມະການມູນນິທິ ລາງວັນສົມເດັດເຈົ້າຟ້າມະຫາຈັກກີ ແຫ່ງຣາຊະອານາຈັກໄທ ໃຫ້ສໍາພາດຕໍ່ສື່ມວນຊົນລາວວ່າ: ລາງວັນນີ້ເປັນລາງວັນພະຣາຊະທານລະດັບນານາຊາດ ເພື່ອເຊີດຊູກຽດສັກສີຂອງຄູດີເດັ່ນໃນລະດັບການສຶກສາຂັ້ນພື້ນຖານຂອງປະເທດສະມາຊິກອາຊຽນ ແລະ ຕີມໍເລສເຕ, ທັງເປັນການເຊີດຊູພະກຽດສົມເດັດ ພະກະນິຖາທິຣາດເຈົ້າ ກົມສົມເດັດພະເທບລັດຕະນະຣາຊະສຸດາ ສະຫຍາມບໍຣົມຣາຊະກຸມາຣີ, ຜູ້ທີ່ມີຄວາມສາມາດ ແລະ ມີຜົນງານຢ່າງຫລວງຫລາຍຕໍ່ການສຶກສາ ທັງພາຍໃນ ແລະ ຕ່າງປະເທດ ດໍາເນີນການ, ໂດຍມູນນິທິລາງວັນສົມເດັດເຈົ້າຟ້າມະຫາຈັກກີ ຮ່ວມກັບສໍານັກງານເລຂາທິການຄຸຣຸສະພາ, ກະຊວງສຶກສາທິການ, ກອງທຶນເພື່ອຄວາມສະເໝີພາບດ້ານການສຶກສາທິການ, ກະຊວງພາຍໃນ, ກະຊວງການຕ່າງປະເທດ ແລະ ໜ່ວຍງານຕ່າງໆຂອງຣາຊະອານາຈັກໄທ ໂດຍກໍານົດໃຫ້ມີການພະຣາຊະທານລາງວັນ ຄັ້ງທໍາອິດໃນວັນທີ 2 ຕຸລາ 2015 ແລະ ຈັດຂຶ້ນ 2 ປີຕໍ່ຄັ້ງ. ຜູ້ທີ່ໄດ້ຮັບລາງວັນນີ້ຕ້ອງໄດ້ຮັບການຄັດເລືອກຈາກກະຊວງສຶກສາທິການຂອງແຕ່ລະປະເທດໃນອາຊຽນ ແລະ ຕີມໍເລສເຕ. ຄຸນສົມບັດຂອງຜູ້ຖືກຄັດເລືອກຕ້ອງເປັນຄູຜູ້ທີ່ສ້າງການປ່ຽນແປງແກ່ຊີວິດຂອງລູກສິດ ແລະ ທັງມີຄຸນງາມຄວາມດີຕໍ່ວົງການສຶກສາ, ປະເທດລະ 1 ຄົນ ເຊິ່ງລາງວັນປະກອບດ້ວຍຫລຽນລາງວັນ, ປະກາດສະນິຍະບັດ, ໂລ້ຄຳເຊີດຊູກຽດ, ແລະ ເງິນລາງວັນ ຈໍານວນ 10.000 (ຫນຶ່ງຫມື່ນ) ໂດລາສະຫະລັດ. ສໍາລັບປີ 2019 ນີ້, ຄູອາຈານລາວດີເດັ່ນ ທີ່ຈະໄດ້ຮັບລາງວັນນີ້ແມ່ນອາຈານ ໄພສະນິດ ປັນຍາສະຫວັດ, ຫົວໜ້າສາຂາວິຊາ ການພາສາລາວ ແລະວັນນະຄະດີ, ທັງເປັນ ຮອງຫົວໜ້າຝ່າຍວິຊາການໂຮງຮຽນມັດທະຍົມສຶກສາສັນຕິພາບ, ນະຄອນຫລວງພະບາງ, ແຂວງຫລວງພະບາງ, ເຊິ່ງເປັນຜູ້ທີ່ມີຜົນງານດ້ານສາລະຄະດີກ່ຽວກັບວັນນະຄະດີລາວ, ໂດຍ ໃນໄລຍະຜ່ານມາ ເຄີຍໄດ້ຮັບລາງວັນຕ່າງໆຈາກຂັ້ນເທິງຈໍານວນຫລວງຫລາຍມາແລ້ວ.

ອາຈານຄໍາສ້ອຍ ວົງສໍາພັນ

ໃນໄລຍະຜ່ານມາ, ຄູອາຈານດີເດັ່ນຂອງລາວໄດ້ຮັບລາງວັນນີ້ແລ້ວຈໍານວນ 2 ທ່ານ ຄື ປີ 2015 ແມ່ນ ອາຈານ ນາງຄໍາສ້ອຍ ວົງສໍາພັນ, ຫົວໜ້າອໍານວນການໂຮງຮຽນມັດທະຍົມສົມບູນວຽງຈັນ, ແລະ ປີ 2017 ແມ່ນ ອາຈານ ນາງຄຸນວິໄລ ເຄນກິຕິສັກ, ຫົວໜ້າອໍານວຍການໂຮງຮຽນມັດທະຍົມສົມບູນທົ່ງກາງ, ເມືອງສີສັດຕະນາກ, ນະຄອນຫຼວງວຽງຈັນ.

ອາຈານຄຸນວິໄລ ເຄນກິຕິສັກ