ໃນວັນທີ 31 ກໍລະກົດ 2024 ເຈົ້າໜ້າທີ່ຕໍາຫຼວດ ກອງບັນ ຊາການ ປກສ ເຂດເສດຖະກິດພິເສດສາມຫຼ່ຽມຄໍາ ສົມທົບກັບ ກຳລັງປ້ອງກັນຊາດປະຈຳເຂດ, ເຈົ້າໜ້າທີ່ຕໍາຫຼວດ ສປ ຈີນ ແລະ ໜ່ວຍງານຮັກສາຄວາມປອດໄພເຂດເສດຖະກິດພິເສດສາມຫຼຽມຄຳ ໄດ້ເຂົ້າມ້າງກຸ່ມແກ້ງສໍ້ໂກງຊັບທາງໂທລະຄົມ (Call Center) ຕິດພັນກັບບັນດາເປົ້າໝາຍທີ່ລະເມີດກົດໝາຍ, ລະບຽບການເຂົ້າ-ອອກ ຂອງ ສປປ ລາວ ຢູ່ພາຍໃນເຂດເສດຖະ ກິດພິເສດສາມຫຼຽມຄໍາ ເມືອງ ຕົ້ນເຜີ້ງ, ແຂວງ ບໍ່ແກ້ວ.
ສາມາດຈັບຕົວໄດ້ທັງໝົດ 29 ຄົນ, ຍິງ 2 ຄົນ ສັນຊາດຈີນ ໃນນັ້ນແມ່ນລັກລອບເຂົ້າເມືອງຜິດກົດໝາຍ 20 ຄົນ ແລະ ເປົ້າ ໝາຍລົບໜີການຈັບກຸມທີ່ທາງການຈີນຕ້ອງການຕົວ 09 ຄົນ ພ້ອມເຄື່ອງ ຂອງກາງຈຳນວນໜຶ່ງ ແລະ ມາໃນວັນທີ 03 ສິງຫາ 2024 ກໍ່ໄດ້ນຳສົງຄົນສັນຊາດຈີນຈໍານວນດັ່ງກ່າວ ພ້ອມເຄື່ອງ ຂອງກາງ ໃຫ້ເຈົ້າໜ້າທີ່ຝ່າຍຈີນຢູ່ຊາຍແດນລາວ-ຈີນ ດ່ານບໍ່ເຕັນ -ບໍ່ຫານ ເພື່ອໄປດຳເນີນຄະດີຕາມລະບຽບກົດໝາຍ.
ການລົງມ້າງກຸ່ມແກ້ງສໍ້ໂກງຊັບທາງໂທລະຄົມ (Call Center) ຢູ່ພາຍໃນເຂດເສດຖະກິດພິເສດສາມຫຼ່ຽມຄຳໃນຄັ້ງນີ້ ເພື່ອສະກັດກັ້ນ-ແກ້ໄຂ ປະກົດການຫຍໍ້ທໍ້ຢູ່ໃນເຂດເສດຖະ ກິດພິເສດສາມຫຼ່ຽມຄຳໃຫ້ໝົດໄປ ແນໃສ່ເຮັດໃຫ້ສັງຄົມ ກໍຄື ເຂດເສດຖະກິດພິເສດສາມຫຼ່ຽມຄຳ ໃຫ້ມີຄວາມສະຫງົບ, ມີຄວາມ ເປັນລະບຽບຮຽບຮ້ອຍ ແລະ ມີຄວາມປອດໄພ100%.
ທີ່ມາ: ຄວາມສະຫງົບລາວ
