ວິທະຍຸກະຈາຍສຽງແຫ່ງຊາດລາວ

Lao National Radio

ຕັ້ງໜ້າຜັນຂະຫຍາຍມະຕິກອງປະຊຸມໃຫຍ່ ຄັ້ງທີ XI ຂອງພັກ ເຂົ້າສູ່ຊີວິດຈິງ
ວັນທີ 12 ພຶດສະພາ 2024 ນີ້, ເຈົ້າໜ້າທີ່ຕຳຫລວດ ພະແນກສະກັດກັ້ນ ແລະ ຕ້ານຢາເສບຕິດກອງບັນຊາການປ້ອງກັນຄວາມສະຫງົບ (ປກສ) ແຂວງບໍ່ແກ້ວ ໄດ້ມ້າງຄະດີຢາເສບຕິດ ຢູ່ບ້ານຈຽງຕອງ ເມືອງປາກທາ ແຂວງບໍ່ແກ້ວ ສາມາດຈັບຕົວຜູ້ຖືກຫາ ໄດ້ຈໍານວນ 2 ຄົນ, ຍຶດຢາເສບຕິດ ປະເພດຢາບ້າ ໄດ້ທັງໝົດ 14.106.000 ເມັດ.
ຜູ້ຖືກຫາ ທີ່ຈັບໄດ້ທັງ 2 ຄົນ ແມ່ນປະຊາຊົນຢູ່ບ້ານຈຽງຕອງ ເມືອງປາກທາ ແຂວງບໍ່ແກ້ວ, ປັດຈຸບັນ ທາງເຈົ້າໜ້າທີ່ ວິຊາສະເພາະ ພວມດຳເນີນການສືບສວນ-ສອບສວນ ເພື່ອຂະຫຍາຍຜົນຫາ ຜູ້ຮ່ວມຂະບວນການ ໃນການຄ້າ-ຂາຍໃນຄັ້ງນີ້, ເພື່ອນຳມາດຳເນີນຄະດີ ຕາມລະບຽບກົດໝາຍ.
ສຳລັບຜູ້ຖືກຫາທີ່ຈັບໄດ້ ຜູ້ທີ່ 1 ຊື່ທ້າວ ນໍຄົວ ຊົງ ອາຍຸ 29 ປີ ພ້ອມຂອງກາງ ແລະ ເຄື່ອງຕິດຕົວມີ ຢາເສບຕິດປະເພດຢາບ້າ ຈຳນວນ 6.055.800 ເມັດ, ນ້ຳໜັກ 605 ກິໂລກຣາມ, ແປ້ງຝຸ່ນສີອອນ ຈຳນວນ 1 ຖົງໜ້ອຍ, ໜັກ 50 ກຣາມ, ແປ້ງຝຸ່ນສີຂາວ 1 ຖົງນ້ອຍ, ໜັກ 60 ກຣາມ, ລູກປືນ ອາກາ 180 ລູກ, ປືນສັ້ນ 1 ກະບອກ, ປືນຫັນລີ (ຍິງແກັດ) 1 ກະບອກ, ປ້າຍລົດໃຫຍ່ (ປ້າຍແດງ) ປກສ ລະຫັດ 07 ໝາຍເລກ 0057 ຈໍານວນ 1 ຄູ່, ເງິນບາດ ຈໍານວນ 1 ລ້ານບາດ (ສະກຸນເງິນໄທ), ໂທລະສັບ ຈຳນວນ 1 ໜ່ວຍ, ສຳມະໂນຄົວ 1 ຫົວ ແລະ ໜັງສືຜ່ານແດນ 1 ຫົວ.
ສ່ວນຜູ້ທີ 2 ຊື່ທ້າວ ກົວຊົງ ຫລື ທ້າວ ສົງຄາມ ຊົງ ອາຍຸ 38 ປີ ພ້ອມຂອງກາງ ແລະ ເຄື່ອງຕິດຕົວ ມີ ຢາເສບຕິດ ປະເພດຢາບ້າ 8.050.200 ເມັດ, ນໍ້າໜັກ 805 ກິໂລກຣາມ, ລົດວີໂກສະມາດແຄັບ ສີຂາວ ຈຳນວນ 1 ຄັນ, ປືນເບີ 1 ກະບອກ ພ້ອມລູກປືນ 8 ລູກ ແລະ ໂທລະສັບ 1 ໜ່ວຍ.