ຢາເສບຕິດ ເປັນບັນຫາໃຫຍ່ລະດັບໂລກ ທີ່ບັນດາປະເທດຕ່າງໃຫ້ຄວາມສໍາຄັນ ແລະ ເອົາໃຈໃສ່ຮ່ວມມືກັນໃນການຄວບຄຸມ, ສະກັດກັ້ນ ແລະ ແກ້ໄຂ ເພາະຢາເສບຕິດເປັນບໍ່ເກີດແຫ່ງການກໍ່ອາຊະຍາກຳ, ການສໍ້ລາດບັງຫຼວງ, ກົດໜ່ວງຖ່ວງດຶງການພັດທະນາເສດຖະກິດ-ສັງຄົມ ຂອງຊາດ, ທັງຍັງສ້າງຄວາມເສຍຫາຍຢ່າງໃຫຍ່ຫຼວງຕໍ່ຄົນ ແລະ ຄອບຄົວຜູ້ທີ່ຕົກເປັນທາດຂອງມັນ.
ປັດຈຸບັນ, ຢູ່ປະເທດເຮົາ ພວມປະເຊີນກັບໄພຂົ່ມຂູ່ຈາກບັນຫາຢາເສບຕິດເຊັ່ນດຽວກັນ, ເຊິ່ງໄດ້ແພ່ລະບາດໄປທົ່ວທຸກບ່ອນ ນັບທັງຕົວເມືອງ, ຊົນນະບົດ ແລະ ເຂດຫ່າງໄກສອກຫຼີກ ໃນລະດັບທີ່ແຕກຕ່າງກັນ; ບັນຫາຢາເສບຕິດ ໄດ້ກາຍເປັນໜຶ່ງໃນບັນດາປະກົດການຫຍໍ້ທໍ້ທາງສັງຄົມ, ການລະບາດຂອງຢາເສບຕິດ ໄດ້ເປັນໜໍ່ແໜງ ແລະ ເປັນສາຍເຫດຕົ້ນຕໍ ຂອງການເກີດຄວາມຮຸນແຮງ ກໍ່ອາຊະຍາກຳ ແລະ ສິ່ງຫຍໍ້ທໍ້ຕ່າງໆ ໃນສັງຄົມ, ເຊິ່ງເປັນໄພອັນຕະລາຍຕໍ່ຄວາມໝັ້ນຄົງຂອງຊາດ ແລະ ໄດ້ສົ່ງຜົົນກະທົບໂດຍກົງ ຕໍ່ການພັດທະນາເສດຖະກິດ-ສັງຄົມ, ຕໍ່ສຸຂະພາບຂອງປະຊາຊົນ, ພົນລະເມືອງລາວເຮົາ ໂດຍສະເພາະໄດ້ເບື່ອເມົາຊາວໜຸ່ມ, ເຍົາວະຊົນ ທີ່ເປັນກໍາລັງແຮງງານໃນການປົກປັກຮັກສາ ແລະ ສ້າງສາພັດທະນາປະເທດຊາດ, ເປັນຜູ້ສືບທອດພາລະກິດ ແລະ ອະນາຄົດ ຂອງປະເທດຊາດ.
ໄລຍະຜ່ານມາ, ເຖິງວ່າລັດຖະບານໄດ້ອອກກົດໝາຍ ແລະ ບັນດານິຕິກຳກ່ຽວ ຂ້ອງ ເພື່ອຄວບຄຸມ, ສະກັດກັ້ນ ຕ້ານ ແລະ ປາບປາມຢາເສບຕິດຢ່າງເຂັ້ມງວດກໍຕາມ ແຕ່ຍັງບໍ່ສາມາດສະກັດກັ້ນ ແລະ ແກ້ໄຂບັນຫາຢາເສບຕິດໄດ້ຢ່າງມີປະສິດທິຜົນເທົ່າທີ່ຄວນ ເນື່ອງຈາກສະພາບການລັກລອບຄ້າຂາຍຢາເສບຕິດ ໂດຍສະເພາະແມ່ນຢາບ້າຍັງເກີດຂຶ້ນຢ່າງແຜ່ ຫລາຍ. ນອກນີ້ ຍັງມີການສົມຮູ້ຮ່ວມຄິດລະຫວ່າງຄົນລາວ ແລະ ຄົນຕ່າງປະເທດເພື່ອເຄື່ອນໄຫວ ຄ້າຂາຍຢາເສບຕິດຂ້າມຊາດ ໂດຍນຳໃຊ້ພາຫະນະ-ເຕັກນິກທີ່ທັນສະໄໝ ເຂົ້າໃນການລັກລອບຂົນສົ່ງຄ້າຂາຍທີ່ເລິກແລບແນບນຽນທີ່ສຸດ.
ແຕ່ທີ່ໜ້າເປັນຫ່ວງທີ່ສຸດ ຄື: ຢາເສບຕິດ ໄດ້ຊຶມເລິກເຂົ້າຫຼາຍຊັ້ນຄົນໃນສັງຄົມ ແລະ ສ້າງຄວາມບໍ່ສະຫງົບໃຫ້ແກ່ປະເທດຊາດ-ບ້ານເມືອງ, ທຳລາຍຖັນແຖວ ໄວໜຸ່ມ-ເຍົາວະຊົນ, ກໍ່ໃຫ້ເກີດການຫຼິ້ນກິນຟຸມເຟືອຍ, ເປັນນັກເລງອັນຕະພານ, ຂີ້ລັກງັດແງະ, ປຸ້ນ ຈີ້ຊີງຊັບ, ອາລະວາດຕີກັນ. ນອກນີ້, ຢາເສບຕິດ ຍັງເປັນສາເຫດໃຫ້ເກີດການຟອກເງິນ, ການຊື້ຈ້າງ ແລະ ໃຫ້ສິນບົນ, ສ້າງຄວາມເສຍຫາຍໃຫ້ແກ່ຖັນແຖວພະນັກງານ ແລະ ເຈົ້າໜ້າທີ່ຕ່າງໆຫຼາຍສົມຄວນ.
ຜ່ານການຈັດຕັ້ງປະຕິບັດ ວາລະແຫ່ງຊາດ ວ່າດ້ວຍການແກ້ໄຂບັນຫາຢາເສບຕິດ ນັບແຕ່ປີ 2021 ເປັນຕົ້ນມາ, ເຖິງວ່າສາມາດຈັບຜູ້ກະທໍາຜິດ ກໍຄື ຜູ້ລັກລອບຄ້າຂາຍຢາເສບຕິດໄດ້ເປັນຈໍານວນຫລາຍ ແຕ່ບໍ່ໝົດໄປຈັກເທື່ອ ແລະ ຍັງສືບຕໍ່ຈັບກຸມໄດ້ເປັນຈໍານວນຫລາຍ. ໃນນີ້ ສະເພາະ ໄລຍະ 5 ເດືອນຕົ້ນປີ 2024 ນີ້, ອິງຕາມຂໍ້ມູນທີ່ ທ່ານ ສອນໄຊ ສີພັນດອນ, ນາຍົກລັດຖະມົນຕີ ສະເໜີຕໍ່ກອງປະຊຸມສະໄໝສາມັນເທື່ອທີ 7 ຂອງສະພາແຫ່ງຊາດ ຊຸດທີ 9 ໃນວັນທີ 10 ມິຖຸນານີ້ ໃຫ້ຮູ້ວ່າ: ລາວເຮົາສາມາດແກ້ໄຂມ້າງລາຍຄະດີຢາເສບຕິດ ໄດ້ທັງໝົດ 1.680 ເລື່ອງ, ຈັບຜູູ້ຖືກຫາໄດ້ທັງໝົດ 2.616 ຄົນ/ ຍິງ 555 ຄົນ; ໃນນີ້ ເປັນຕ່າງປະເທດ 96 ຄົນ, ຍິງ 08 ຄົນ; ຍຶດຂອງກາງຢາເສບຕິດປະເພດຢາບ້າ, ຢາ ໄອສ໌, ເຮໂຣອິນ, ຄັນຊາ, ຢາຝິ່ນ, ຢາອີ, ເຄຕາມິນ, ໂຄເຄນ, ຄາເຟອິນ ເປັນຈໍານວນຫຼາຍພໍ ສົມຄວນ. ນອກນັ້ນສາມາດຍຶດລົດໃຫ່ຍ, ລົດຈັກ, ອາວຸດ, ລູກກະສູນ, ລະເບີດ ແລະ ທາດແຕກເປັນຈໍານວນຫລາຍເຊັ່ນກັນ.
ຂະນະທີ່ ພົນເອກ ວິໄລ ຫລ້າຄໍາຟອງ, ຮອງນາຍົກລັດຖະມົນຕີ, ລັດຖະມົນຕີກະຊວງປ້ອງກັນຄວາມສະຫງົບ ໄດ້ຊີ້ແຈງຕໍ່ກອງປະຊຸມສະໄໝສາມັນເທື່ອທີ 7 ຂອງສະພາແຫ່ງຊາດ ຊຸດທີ 9 ໃນວັນທີ 14 ມິຖຸນານີ້ວ່າ: ໄລຍະຜ່ານມາ ເຈົ້າໜ້າທີ່ກ່ຽວຂ້ອງສາມາດຈັບຜູ້ລັກລອບຄ້າຂາຍຢາເສບຕິດໄດ້ ຈໍານວນຫລາຍ ແຕ່ສ່ວນໃຫຍ່ແມ່ນຜູ້ຄ້າຂາຍລາຍຍ່ອຍ ແຕ່ບໍ່ແມ່ນຫົວໂປ່ໂຕການແທ້. ສະນັ້ນ ທຸກພາກສ່ວນໃນສັງຄົມຕ້ອງເປັນເຈົ້າການຮ່ວມກັນແກ້ໄຂບັນຫາຢາເສບຕິດ ຕາມຄວາມສາມາດ ແລະ ເງື່ອນໄຂຕົວຈິງຂອງຕົນໃຫ້ດີຂຶ້ນກວ່າເກົ່າ.
ຢາເສບຕິດ ເປັນບັນຫາອັນຕະລາຍຮ້າຍແຮງ, ເປັນຄວາມທ້າທາຍ ຂອງທຸກຊາດ ແລະ ເປັນໄພຂົ່ມຂູ່ ຕໍ່ຄວາມສະຫງົບສຸກ, ຄວາມເປັນລະບຽບຮຽບຮ້ອຍຂອງສັງຄົມ ແລະ ຄວາມໝັ້ນຄົງ ຂອງບັນດາປະຊາຊາດໃນໂລກ.
ດັ່ງນັ້ນ, ເນື່ອງໃນໂອກາດ ວັນສາກົນຕ້ານຢາເສບຕິດ ວັນທີ 26 ມິຖຸນາ ຄົບຮອບ 37 ປີ ໃນປີນີ້ ຮຽກຮ້ອງມາຍັງເຈົ້າໜ້າທີ່ກ່ຽວຂ້ອງ ຈົ່ງເພີ່ມຄວາມເຂັ້ມງວດຕໍ່ການນຳໃຊ້ມາດຕະການດ້ານກົດໝາຍ ເພື່ອປາບປາມຜູ້ຜະລິດ, ຄ້າຂາຍຢາເສບຕິດໃນຂອບເຂດທົ່ວປະເທດຢ່າງເດັດຂາດ ໂດຍສະເພາະກຸ່ມເປົ້າໝາຍທີ່ເປັນຫົວໂປ່ໂຕການ ແລະ ກຸ່ມແກ້ງອັນຕະລາຍ ເພື່ອຈັບຕົວມາດຳເນີນຄະດີຕາມລະບຽບກົດໝາຍຢ່າງເຂັ້ມງວດ.
ຮຽກຮ້ອງມາປະຊາຊົນບັນດາເຜົ່າ ທຸກຊັ້ນຄົນຈົ່ງເປັນເຈົ້າການ ເຂົ້າຮ່ວມຂະບວນການສະກັດກັ້ນ ແລະ ຕ້ານຢາເສບຕິດຕາມຄວາມສາມາດຂອງຕົນໃຫ້ຫລາຍຂຶ້ນ. ພ້ອມນີ້ ຂໍຝາກມາຍັງຫົວໜ່ວຍຄອບຄົວທຸກຄອບຄົວ ຕ້ອງເພີ່ມຄວາມເປັນເຈົ້າການຕັກເຕືອນ, ສັ່ງສອນ ແລະ ຕິດຕາມພຶດຕິກຳລູກຫລານຂອງຕົນຢ່າງໃກ້ຊິດ ໃຫ້ຫ່າງໃກຈາກສິ່ງເສບຕິດ ແລະ ອະບາຍຍະມຸກຕ່າງໆ ເພື່ອໃຫ້ເຂົາເຈົ້າກາຍເປັນຄົນຮູ້ຜູ້ດີ ແລະ ກາຍເປັນຜູ້ສືບທອດພາລະກິດສ້າງສາ ແລະພັດທະນາປະເທດຊາດທີ່ດີໃນອະນາຄົດ.
“ຢາເສບຕິດ ເປັນພິດເປັນໄພ ຜູ້ເສບຕາຍ ຜູ້ຂາຍຕິດຄຸກ ຜູ້ເປັນທຸກຄືພໍ່-ແມ່ ແລະ ຄອບຄົວ”
