ວິທະຍຸກະຈາຍສຽງແຫ່ງຊາດລາວ

Lao National Radio

ຕັ້ງໜ້າຜັນຂະຫຍາຍມະຕິກອງປະຊຸມໃຫຍ່ ຄັ້ງທີ XI ຂອງພັກ ເຂົ້າສູ່ຊີວິດຈິງ
ວັນທີ 25 ມິຖຸນາ 2024 ນີ້ ທ່ານ ວິໄລວົງ ບຸດດາຄໍາ ລັດຖະມົນຕີກະຊວງພາຍໃນ ພ້ອມຄະນະ ໄດ້ຕິດຕາມຊຸກຍູ້ວຽກງານຢູ່ເຂດເສດຖະກິດພິເສດ ແຂວງຫຼວງນໍ້າທາ ໂດຍການຕ້ອນຮັບຂອງທ່ານ ສີພອນ ກອງຈໍາປາ ຫົວຫນ້າຄະນະຄຸ້ມຄອງເຂດເສດຖະກິດພິເສດແຂວງຫຼວງນໍ້າທາ, ມີບັນດາຫົວໜ້າ-ຮອງຫົວໜ້າພະແນກພາຍໃນແຂວງ, ຕະຫຼອດຮອດພາກສ່ວນກ່ຽວຂ້ອງເຂົ້າຮ່ວມ
ທ່ານ ສີພອນ ກອງຈໍາປາ ຫົວຫນ້າຄະນະຄຸ້ມຄອງເຂດເສດຖະກິດພິເສດ ແຂວງຫຼວງນໍ້າທາ ໄດ້ລາຍງານໃຫ້ທ່ານລັດຖະມົນຕີຊາບວ່າ ເຂດເສດຖະກິດພິເສດ ແຂວງຫຼວງນໍ້າທາ, ເປັນເຂດທີ່ມີທ່າແຮງໃນຫຼາຍດ້ານເປັນຕົ້ນ: ມີແຫຼ່ງທໍາມະຊາດອຸດົມສົມບູນ, ມີດ່ານສາກົນບໍ່ເຕ່ນ ທີ່ຕິດເຂດເສດຖະກິດພິເສດ ບໍ່ເຕ່ນແດນງາມ, ມີເສັ້ນທາງ 13ເໜືອ ແລະມີເສັ້ນທາງລົດໄຟ ລາວ-ຈີນ ຜ່ານ ພ້ອມທັງມີສະຖານີລົດ ໄຟ ລາວ-ຈີນ 1ແຫ່ງ, ເຂດນີ້ ສອງລັດຖະບານ ລາວ-ຈີນ ຍັງໄດ້ລົງນາມເຂດຮ່ວມມື ບໍ່ເຕ່ນ ສປປ ລາວ-ບໍ່ຫ່ານ ສປ ຈີນ. ເຂດເສດຖະກິດພິເສດ ບໍ່ເຕ່ນແດນງາມ ໄດ້ຮັບອະນຸຍາດຈາກລັດຖະບານລາວ ປີ2012 ໃຫ້ພັດທະນາ ໃນເນື້ອທີ່ທັງໝົດ 1.640 ຮຕ, ອາຍຸນໍາໃຊ້ 50 ປີ ແລະສາມາດຕໍ່ໄດ້ 2 ຄັ້ງ, ຄັ້ງລະ 20 ປີ. ເຂດດັ່ງກ່າວ ຜູ້ພັດທະນາ ໄດ້ບຸກເບີກເນື້ອທີ່ໃຫ້ຮາບພຽງ ເພື່ອຮອງຮັບການລົງທຶນ ມີ 800 ຮຕ ຕາມແຜນແມ່ບົດ ທີ່ສະພາປະຊາຊົນແຂວງ ໄດ້ຮັບຮອງໃນປີ 2019 ມີ 11 ກິດຈະການຫຼັກ, ແຜນຜັງເຂດເສດຖະກິດພິເສດ ບໍ່ເຕ່ນແດນງາມ ໄດ້ແບ່ງເປັນ 4 ເຂດ ກິດຈະການໃຫ່ຍຄື: ເຂດສູນກາງທຸລະກິດ ແລະການເງິນສາກົນ, ເຂດການສຶກສາ ແລະການແພດສາກົນ, ເຂດທ່ອງທ່ຽວສາກົນ ແລະເຂດອຸດສາຫະກໍາປຸງແຕ່ງ-ໂລຈິດສະຕິກ, ເຊິ່ງເປັນທ່າແຮງໜຶ່ງໃນການເຊື່ອມຕໍ່ປະເທດຈີນ ໄປສູ່ບັນດາປະເທດໃນອາຊຽນ, ຕໍ່ກັບທ່າແຮງຂອງເຂດ ຄະນະນໍາຂອງແຂວງກໍໄດ້ສະໜັບສະໜູນໃຫ້ເຂດເສດຖະກິດພິເສດ ບໍ່ເຕ່ນແດນງາມ ແຫ່ງນີ້ ກາຍເປັນສູນກາງເສດຖະກິດພາກເໜືອ ທີ່ມີຄວາມເຂັ້ມແຂງ ໃນຕໍ່ໜ້າ.
ໂອກາດນີ້ ທ່ານ ວິໄລວົງ ບຸດດາຄໍາ ໄດ້ມີຄໍາເຫັນວ່າ ພາຍຫຼັງໄດ້ຮັບຟັງການລາຍງານສະພາບການຈັດຕັ້ງປະຕິບັດວຽກງານ ຂອງດ່ານສາກົນບໍ່ເຕ່ນ ຊຶ່ງເຫັນໄດ້ວ່າ ແຕ່ລະພາກສ່ວນ ໄດ້ເປັນເຈົ້າການເອົາໃຈໃສ່ໃນການຈັດຕັ້ງປະຕິບັດວຽກງານ ຂອງຕົນເຮັດໃຫ້ມີຜົນສໍາເລັດຫຼາຍດ້ານ. ເຖິງຢ່າງໃດກໍຕາມ, ຄຽງຄູ່ກັບຜົນສໍາເລັດທີ່ໄດ້ກ່າວມານັ້ນຍັງມີຂໍ້ຫຍຸ້ງຍາກຫຼາຍດ້ານ ທີ່ຄະນະຄຸ້ມຄອງເຂດເສດຖະກິດພິດເສດ ແຂວງຫຼວງນໍ້າທາ ຈະຕ້ອງໄດ້ພ້ອມກັນຈັດຕັ້ງປະຕິບັດ ໃຫ້ໄດ້ຮັບຜົນສໍາເລັດ ເປັນຕົ້ນແມ່ນ: ການປັບປຸງໂຄງຮ່າງການຈັດຕັ້ງໃຫ້ສອດຄ່ອງກັບການຈັດຕັ້ງປະຕິບັດຕົວຈິງ, ການກໍານົດນະໂຍບາຍຕໍ່ພະນັກງານທີ່ປະຕິບັດຫນ້າທີ່ຕ້ອງໃຫ້ຖືກຕ້ອງ ແລະ ຊັດເຈນ ຖືກຕາມລະບຽບກົດໝາຍ, ການຄົ້ນຄວ້ານິຕິກໍາລຸ່ມກົດຫມາຍ ແລະ ນິຕິກໍາທີ່ກ່ຽວຂ້ອງ ຄວນໄດ້ເຜີຍແຜ່ໃຫ້ພະນັກງານ-ລັດຖະກອນໄດ້ຮັບຮູ້ ແລະ ເຂົ້າໃຈແຈ້ງ ພ້ອມທັງກໍາແຫນ້ນໄດ້ແນວທາງເພື່ອນໍາໄປຈັດຕັ້ງປະຕິບັດ ເຂົ້າໃນວຽກງານໃຫ້ມີປະສິດທິພາບ-ປະສິດທິຜົນສູງກວ່າເກົ່າ, ການຈັດສັນສະຖານທີ່ເຊັ່ນ ບ່ອນພັກເຊົ່າ, ສະຖານທີ່ເຮັດວຽກຂອງພະນັກງານງານ ຕ້ອງໄດ້ຈັດສັນໃຫ້ຖືກຕ້ອງຕາມມາດຕະຖານ, ນອກນີ້ ກົງຈັກການຈັດຕັ້ງຕ່າງໆກໍຕ້ອງໄດ້ກໍານົດເປັນແບບແຜນອັນລະອຽດເພື່ອເຮັດໃຫ້ການຈັດຕັ້ງປະຕິບັດວຽກງານ ມີຄວາມເຂັ້ມແຂງ.
ຂ່າວ: ກະຊວງພາຍໃນ