1. ທ່ານ ບົວສອນ ບຸບຜາວັນ, ນາຍົກລັດຖະມົນຕີ ແຫ່ງ ສປປ ລາວ ຢ້ຽມຢາມຍີ່ປຸ່ນຢ່າງເປັນທາງການ ຕາມການເຊື້ອ ເຊີນຂອງ ທ່ານ ອາເບະ ຊິນໂຊ, ນາຍົກລັດຖະມົນຕີຍີ່ປຸ່ນ ໃນປີ 2007
ວັນທີ 14-17 ພຶດສະພາ 2007, ທ່ານ ບົວສອນ ບຸບຜາວັນ, ນາຍົກລັດຖະມົນຕີ ແຫ່ງ ສປປ ລາວ ພ້ອມດ້ວຍ ຄະນະໄດ້ເດີນທາງໄປຢ້ຽມຢາມຍີ່ປຸ່ນຢ່າງເປັນທາງການ ຕາມການເຊື້ອ ເຊີນຂອງ ທ່ານ ອາເບະ ຊິນໂຊ, ນາຍົກລັດຖະມົນຕີຍີ່ປຸ່ນ.
ໃນວັນທີ 14 ພຶດສະພາ 2007 ທີ່ ນະຄອນຫຼວງໂຕກຽວ, ໄດ້ມີການພົບປະສຸດຍອດສອງຝ່າຍ ລະຫວ່າງ ທ່ານ ບົວສອນ ບຸບຜາວັນ, ນາຍົກລັດຖະມົນຕີ ແຫ່ງ ສປປ ລາວ ແລະ ທ່ານ ອາເບະ ຊິນໂຊ, ນາຍົກລັດຖະມົນຕີຍີ່ປຸ່ນ ແລະ ຖະແຫຼງການຮ່ວມສອງຝ່າຍ ກ່ຽວກັບຜົນການພົບປະດັ່ງກ່າວ.
ໃນວັນທີ 16 ພຶດສະພາ 2007, ທ່ານ ບົວສອນ ບຸບຜາວັນ, ນາຍົກລັດຖະມົນຕີ ແຫ່ງ ສປປ ລາວ ໄດ້ເປັນສັກຂີພິຍານ ໃນການລົງນາມເອກະສານໂຄງການຊ່ວຍເຫຼືອລ້າຈາກລັດຖະບານຍີ່ປຸ່ນ ຄື:
(1) ໂຄງການກໍ່ສ້າງຂົວຫີນເຫີບ (the Project for the Construction of Hinheup Bridge), ມູນຄ່າ 933 ລ້ານເຢນ.
(2) ໂຄງການທຶນການສຶກສາເພື່ອພັດທະນາຊັບພະຍາກອນມະນຸດ (the Project for Human Resource Development Scholarship), ມູນຄ່າ 362 ລ້ານເຢນ.
2. ທ່ານ ອາເບະ ຊິນໂຊ, ນາຍົກລັດຖະມົນຕີຍີ່ປຸ່ນ ຢ້ຽມຢາມ ສປປ ລາວ ຢ່າງເປັນທາງການ ໃນປີ 2013
ໃນວັນທີ 17 ພະຈິກ 2013, ທ່ານ ຊິນໂຊ ອາເບະ, ນາຍົກລັດຖະມົນຕີ ຍີ່ປຸ່ນ ເດີນທາງມາຢ້ຽມຢາມ ສປປ ລາວ ຢ່າງເປັນທາງການ ແລະ ໄດ້ມີການພົບປະສອງຝ່າຍ ລະຫວ່າງ ທ່ານ ທອງສິງ ທໍາມະວົງ, ນາຍົກລັດຖະມົນຕີ ແຫ່ງ ສປປ ລາວ ແລະ ທ່ານ ອາເບະ ຊິນໂຊ, ນາຍົກລັດຖະມົນຕີຍີ່ປຸ່ນ. ພ້ອມນັ້ນ, ກໍໄດ້ຮ່ວມເປັນສັກຂີພິຍານໃນການລົງນາມ ບົດບັນທຶກການຮ່ວມມືໃນຂົງເຂດການຮັກສາສຸຂະພາບ ລະຫວ່າງ ກະຊວງສາທາລະນະສຸກ ສປປ ລາວ ແລະ ກະຊວງສາທາລະນະສຸກ, ແຮງງານ ແລະ ສະຫວັດດີການສັງຄົມ ຍີ່ປຸ່ນ.
3. ທ່ານ ທອງສິງ ທໍາມະວົງ, ນາຍົກລັດຖະມົນຕີ ຢ້ຽມຢາມຍີ່ປຸ່ນ ຢ່າງເປັນທາງການ ແລະ ພົບປະສອງຝ່າຍ ກັບ ທ່ານ ອາເບະ ຊິນໂຊ, ນາຍົກລັດຖະມົນຕີຍີ່ປຸ່ນ ໃນປີ 2015
ວັນທີ 4-7 ມີນາ 2015, ທ່ານ ທອງສິງ ທໍາມະວົງ, ນາຍົກລັດຖະມົນຕີ ເດີນທາງຢ້ຽມຢາມທາງການ ແລະ ເຮັດວຽກທີ່ ປະເທດຍີ່ປຸ່ນ ໃນໂອກາດສະເຫລີມສະຫລອງວັນສ້າງຕັ້ງສາຍພົວພັນການທູດ ລາວ-ຍີ່ປຸ່ນ ຄົບຮອບ 60 ປີ.
ໃນວັນທີ 6 ມີນາ 2015, ທີ່ ນະຄອນຫຼວງໂຕກຽວ, ທ່ານ ທອງສິງ ທໍາມະວົງ, ນາຍົກລັດຖະມົນຕີ ແຫ່ງ ສປປ ລາວ ໄດ້ພົບປະສອງຝ່າຍກັບ ທ່ານ ອາເບະ ຊິນໂຊ, ນາຍົກລັດຖະມົນຕີຍີ່ປຸ່ນ, ເຊິ່ງໃນການພົບປະດັ່ງກ່າວ, ສອງຝ່າຍ ໄດ້ເຫັນດີເປັນເອກະພາບຍົກລະດັບສາຍພົວພັນຈາກ ຄູ່ຮ່ວມມືຮອບດ້ານ ເປັນ ຄູ່ຮ່ວມຍຸດທະສາດ. ພ້ອມນັ້ນ ເນື່ອງໃນໂອກາດສະເຫລີມສະຫລອງວັນສ້າງຕັ້ງສາຍພົວພັນການທູດ ລາວ-ຍີ່ປຸ່ນ ຄົບຮອບ 60 ປີ, ກໍໄດ້ມີການປະກາດນໍາໃຊ້ສັນຍາລັກ (ໂລໂກ້) ຄົບຮອບ 60 ປີ ສາຍພົວພັນການທູດ ລາວ-ຍີ່ປຸ່ນ, ການສົ່ງຊ້າງລາວ ໄປຢູ່ ສວນສັດກຽວໂຕ, ປະເທດຍີ່ປຸ່ນ ແລະ ການນໍາເອົາຕົ້ນຊາກຸຣະ ມາປູກຢູ່ ແຂວງຫົວພັນ, ສປປ ລາວ ເພື່ອເປັນສັນຍາລັກແຫ່ງການພົວພັນຂອງສອງປະເທດ ແລະ ຊຸກຍູ້ການແລກປ່ຽນລະຫວ່າງປະຊາຊົນສອງຊາດ. ພາຍຫຼັງການພົບປະສອງຝ່າຍດັ່ງກ່າວ, ກໍໄດ້ມີການຖະແຫຼງການຮ່ວມ ວ່າດ້ວຍການເປັນຄູ່ຮ່ວມຍຸດທະສາດ ເຊິ່ງໄດ້ມີການລົງນາມໃນເອກະສານຖະແຫຼງການຮ່ວມດັ່ງກ່າວໂດຍສອງນາຍົກລັດຖະມົນຕີ ລາວ – ຍີ່ປຸ່ນ.
4. ທ່ານ ອາເບະ ຊິນໂຊ, ນາຍົກລັດຖະມົນຕີຍີ່ປຸ່ນ ເດີນທາງຢ້ຽມຢາມ ສປປ ລາວ ຢ່າງເປັນທາງການ ແລະ ເຂົ້າຮ່ວມກອງປະຊຸມສຸດຍອດອາຊຽນ ຄັ້ງທີ 28-29 ທີ່ ນະຄອນຫລວງວຽງຈັນ ໃນປີ 2016
ໃນວັນທີ 6-8 ກັນຍາ 2016, ທ່ານ ອາເບະ ຊິນໂຊ, ນາຍົກລັດຖະມົນຕີຍີ່ປຸ່ນ ເດີນທາງຢ້ຽມຢາມ ສປປ ລາວ ຢ່າງເປັນທາງການ ແລະ ເຂົ້າຮ່ວມກອງປະຊຸມສຸດຍອດອາຊຽນ ຄັ້ງທີ 28-29 ທີ່ ນະຄອນຫລວງວຽງຈັນ.
(1) ໃນວັນທີ 6 ກັນຍາ 2016, ທີ່ ສໍານັກງານນາຍົກລັດຖະມົນຕີ, ໄດ້ມີພິທີຕ້ອນຮັບຢ່າງເປັນທາງການ ແລະ ພົບປະສອງຝ່າຍ ລະຫວ່າງ ທ່ານ ທອງລຸນ ສີສຸລິດ, ນາຍົກລັດຖະມົນຕີ ແຫ່ງ ສປປ ລາວ ແລະ ທ່ານ ອາເບະ ຊິນໂຊ, ນາຍົກລັດຖະມົນຕີ ແຫ່ງ ຍີ່ປຸ່ນ, ເຊິ່ງການພົບປະສອງຝ່າຍ ໄດ້ແລກປ່ຽນຄໍາຄິດຄຳເຫັນ ແລະ ປຶກສາຫາລືກັນ ດ້ວຍບັນຍາກາດສະໜິດສະໜົມເຂົ້າອົກເຂົ້າໃຈ ແລະ ກົງໄປກົງມາ ກ່ຽວກັບການຮ່ວມມືຂອງສອງປະເທດ, ປຶກສາຫາລືກ່ຽວກັບການເປັນຄູ່ຮ່ວມມືຍຸດທະສາດ ລະຫວ່າງ ສປປ ລາວ ແລະ ຍີ່ປຸ່ນ, ສອງຝ່າຍໄດ້ຕິລາຄາສູງ ຕໍ່ການເປັນຄູ່ຮ່ວມມືຍຸດທະສາດ ທີ່ນັບມື້ນັບຂະຫຍາຍຕົວ. ໃນໂອກາດດັ່ງກ່າວ, ທ່ານ ທອງລຸນ ສິສຸລິດ, ນາຍົກລັດຖະມົນຕີແຫ່ງ ສປປ ລາວ, ໄດ້ສະແດງ ຄວາມຂອບໃຈຕໍ່ການຊ່ວຍເຫລືອທາງການ ເພື່ອການພັດທະນາ (ODA) ຂອງລັດຖະບານຍີ່ປຸ່ນ ຕະ ຫລອດໄລຍະຜ່ານມາ ໂດຍສະເພາະລັດຖະບານຍີ່ປຸ່ນ ໄດ້ຕົກລົງເຫັນດີໃຫ້ການຊ່ວຍເຫລືອລ້ານອກໂຄງການ (Non Project) ສົກປີ 2016 ແກ່ ສປປ ລາວ ມູນຄ່າ 500 ລ້ານເຢັນ ເພື່ອດູ່ນດ່ຽງງົບປະມານແຫ່ງຊາດ, ສະແດງຄວາມຂອບໃຈຕໍ່ລັດຖະບານຍີ່ປຸ່ນ ທີ່ໄດ້ປະກອບສ່ວນເຂົ້າໃນການຊ່ວຍເຫລືອດ້ານຕ່າງໆ ໃນການເປັນເຈົ້າພາບຈັດກອງປະຊຸມສຸດຍອດອາຊຽນ ຄັ້ງທີ 28, 29 ແລະ ກອງປະຊຸມທີ່ກ່ຽວ ຂ້ອງອື່ນໆຕື່ມອີກ.
(2) ໃນວັນທີ 7 ກັນຍາ 2016, ທີ່ ທຳນຽບປະທານປະເທດ, ພະນະທ່ານ ບຸນຍັງ ວໍລະຈິດ, ປະທານປະເທດ ແຫ່ງ ສປປ ລາວ, ໄດ້ຕ້ອນຮັບການເຂົ້າຢ້ຽມຂ່ຳນັບຂອງ ພະນະທ່ານ ອາເບະ ຊິນໂຊ, ນາຍົກລັດຖະມົນຕີ ແຫ່ງ ຍີ່ປຸ່ນ ໃນໂອກາດເດີນທາງມາຢ້ຽມຢາມ ສປປ ລາວ ຢ່າງເປັນທາງການ ແລະ ເຂົ້າຮ່ວມກອງປະຊຸມສຸດຍອດອາຊຽນ ຄັ້ງທີ 28 ແລະ 29, ໃນລະຫວ່າງວັນທີ 6-8 ກັນຍາ 2016 ທີ່ ນະຄອນຫຼວງວຽງຈັນ.
5. ທ່ານ ທອງລຸນ ສີສຸລິດ, ນາຍົກລັດຖະມົນຕີ ໄດ້ພົບປະສຸດຍອດຢ່າງເປັນທາງການສອງຝ່າຍ ກັບ ທ່ານ ອາເບະ ຊິນໂຊະ, ນາຍົກລັດຖະມົນຕີ ແຫ່ງ ຍີ່ປຸ່ນ, ໃນໂອກາດທີ່ເຂົ້າຮ່ວມກອງປະຊຸມເປີດກວ້າງ ຈີ7 (G7) ໃນປີ 2016
ໃນວັນທີ 28 ພຶດສະພາ 2016, ທີ່ ນາໂກຢາ, ປະເທດ ຍີ່ປຸ່ນ, ທ່ານນາຍົກລັດຖະມົນຕີ ທອງລຸນ ສີສຸລິດ ໄດ້ພົບປະສຸດຍອດຢ່າງເປັນທາງການ ສອງຝ່າຍ ກັບ ທ່ານ ຊິນໂຊະ ອາເບະ, ນາຍົກລັດຖະມົນຕີ ແຫ່ງ ຍີ່ປຸ່ນ, ໃນໂອກາດທີ່ເຂົ້າຮ່ວມກອງປະຊຸມເປີດກວ້າງ ຈີ7 (G7) ໃນລະຫວ່າງວັນທີ 26-27 ພຶດສະພາ 2016 ທີ່ ປະເທດ ຍີ່ປຸ່ນ ຕາມຄໍາເຊີນຂອງ ລັດຖະບານຍີ່ປຸ່ນ ໃນຖານະທີ່ ສປປ ລາວ ເປັນປະທານອາຊຽນ ປີ 2016.
6. ທ່ານ ທອງລຸນ ສີສຸລິດ, ນາຍົກລັດຖະມົນຕີ ແຫ່ງ ສປປ ລາວ ໄດ້ພົບປະສອງຝ່າຍ ກັບ ທ່ານ ອາເບະ ຊິນໂຊະ, ນາຍົກລັດຖະມົນຕີ ແຫ່ງ ຍີ່ປຸ່ນ ໃນໂອກາດເຂົ້າຮ່ວມກອງປະຊຸມສາກົນ ກ່ຽວກັບ ອະນາຄົດ ຂອງ ອາຊີ (Future of Asia) ຄັ້ງທີ 23 ທີ່ ປະເທດຍີ່ປຸ່ນ ໃນປີ 2017
ໃນວັນທີ 05 ມິຖຸນາ 2017, ພະນະທ່ານ ທອງລຸນ ສີສຸລິດ, ນາຍົກລັດຖະມົນຕີ ແຫ່ງ ສປປ ລາວ, ໄດ້ຂຶ້ນກ່າວຄຳປາໄສ ຕໍ່ກອງປະຊຸມສາກົນ ກ່ຽວກັບ ອະນາຄົດ ຂອງ ອາຊີ, ຊຶ່ງໄດ້ຮັບຄວາມສົນໃຈຈາກ ບັນດາຜູ້ເຂົ້າຮ່ວມກອງປະຊຸມ ເປັນຢ່າງຍິ່ງ.
ໃນວັນທີ 07 ມິຖຸນາ 2017, ທ່ານນາຍົກລັດຖະມົນຕີ ໄດ້ທຳການຢ້ຽມຢາມຍີ່ປຸ່ນ ຢ່າງເປັນທາງການ, ຊຶ່ງພິທີຕ້ອນຮັບໄດ້ຈັດຂຶ້ນທີ່ ເຮືອນຮັບຮອງລັດຖະບານ ໂດຍສອງທ່ານນາຍົກໄດ້ຍ່າງກວດແຖວກອງກຽດຕິຍົດ, ພົບປະສຸດຍອດສອງຝ່າຍ, ຖະແຫລງຂ່າວຮ່ວມ ແລະ ງານລ້ຽງຮັບຮອງ ຕາມພິທີການຕ້ອນຮັບ ຂອງ ຝ່າຍຍີ່ປຸ່ນ. ໃນການພົບປະສອງຝ່າຍ, ຝ່າຍລາວ ໄດ້ສະແດງຄວາມຂອບໃຈ ຕໍ່ການຊ່ວຍເຫຼືອຂອງລັດຖະບານຍີ່ປຸ່ນ ໃນດ້ານຕ່າງໆເຊັ່ນ: ການຊ່ວຍເຫຼືອທາງການເພື່ອການພັດທະນາ (ODA) ທີ່ເປັນອັນດັບ 01 ຂອງປະເທດທີ່ໃຫ້ການຊ່ວຍເຫຼືອແກ່ ສປປ ລາວ, ເຊິ່ງໃນປີ 2016 ໄດ້ມີ 05 ໂຄງການ ລວມມູນຄ່າທັງໝົດ 13,854 ຕື້ເຢນ (ປະມານ 122 ລ້ານໂດລາສະຫະລັດ) ແລະ ໃນສົກ 06 ເດືອນຕົ້ນປີ 2017 ກໍ່ມີການລົງນາມເອກະສານແລກປ່ຽນ 02 ໂຄງການ ລວມມູນຄ່າ 367 ລ້ານເຢນ (ປະມານ 3,7 ລ້ານໂດລາສະຫະລັດ); ການອະນຸມັດໂຄງການຮ່ວມມືດ້ານວິຊາການ ໃນສົກປີ 2015-2016 ຈໍານວນ 11 ໂຄງການ, ເຊິ່ງບັນດາໂຄງການເຫຼົ່ານັ້ນ ຈະຈັດຕັ້ງປະຕິບັດ ໃນສົກປີ 2017-2018; ການອະນຸມັດທຶນການສຶກສາໄລຍະຍາວ ລະດັບປະລິນຍາໂທ ແລະ ປະລິນຍາເອກ ເພື່ອສ້າງຂີດຄວາມສາມາດໃຫ້ ສປປ ລາວ ໃນການປັບປຸງວຽກງານ ບູລະນະຮັກສາທາງຫຼວງແຫ່ງຊາດຂອງລາວ; ໂຄງການຊ່ວຍເຫຼືອທາງດ້ານການຄຸ້ມຄອງເສດຖະກິດມະຫາພາກ ໂດຍສະເພາະການຄຸ້ມຄອງ ແລະ ເກັບລາຍຮັບເຂົ້າງົບປະມານ; ໂຄງການສ້າງຂີດຄວາມສາມາດໃຫ້ແກ່ການນຳຂັ້ນສູງ ຂອງ ສປປ ລາວ; ໂຄງການຂະຫຍາຍສະໜາມບິນສາກົນວັດໄຕ; ການສົ່ງອາສາສະໝັກຍີ່ປຸ່ນ ມາຊ່ວຍ ສປປ ລາວ, ເຊິ່ງນັບແຕ່ປີ 1965 ມາເຖິງປັດຈຸບັນ ມີອາສາສະໝັກ ຫຼາຍກວ່າ 800 ຄົນ ແລະ ຊ່ຽວຊານ ຫຼາຍກວ່າ 4.500 ຄົນ; ແລະ ການໃຫ້ທຶນຊ່ວຍເຫຼືອລ້າແກ່ ສປປ ລາວ ເຂົ້າໃນໂຄງການເລັ່ງລັດວຽກງານເກັບກູ້ລະເບີດ ເພື່ອສະໜັບສະໜູນໃຫ້ແກ່ວຽກງານພັດທະນາຊົນນະບົດ ແລະ ລຶບລ້າງຄວາມທຸກຍາກ ໄລຍະ 02 ເປັນຈໍານວນເງິນ 7,03 ລ້ານໂດລາສະຫະລັດ.
7. ທ່ານ ທອງລຸນ ສີສຸລິດ, ນາຍົກລັດຖະມົນຕີ ແຫ່ງ ສປປ ລາວ ໄດ້ພົບປະສອງຝ່າຍ ກັບ ທ່ານ ອາເບະ ຊິນໂຊະ, ນາຍົກລັດຖະມົນຕີ ແຫ່ງ ຍີ່ປຸ່ນ ໃນໂອກາດເຂົ້າຮ່ວມກອງປະຊຸມສາກົນ ກ່ຽວກັບ ອະນາຄົດຂອງອາຊີ ຄັ້ງທີ 24 ຈັດໂດຍ ສຳນັກຂ່າວ ນິກເກ ຍີ່ປຸ່ນ ທີ່ ປະເທດຍີ່ປຸ່ນ ໃນປີ 2018
ໃນວັນທີ 12 ມິຖຸນາ 2018, ທີ່ ຫ້ອງວ່າການສໍານັກງານນາຍົກລັດຖະມົນຕີ ຍີ່ປຸ່ນ, ໄດ້ມີການພົບປະສຸດຍອດ ລະຫວ່າງ ທ່ານ ທອງລຸນ ສີສຸລິດ, ນາຍົກລັດຖະມົນຕີ ແຫ່ງ ສປປ ລາວ ແລະ ທ່ານ ອາເບະ ຊິນໂຊະ, ນາຍົກລັດຖະມົນຕີ ແຫ່ງ ຍີ່ປຸ່ນ, ແລະ ຖະແຫຼງຂ່າວຮ່ວມຕໍ່ສື່ມວນຊົນກ່ຽວກັບຜົນການພົບປະສອງຝ່າຍລາວ-ຍີ່ປຸ່ນ.
ໃນໂອກາດດັ່ງກ່າວ, ສອງນາຍົກລັດຖະມົນຕີ ລາວ – ຍີ່ປຸ່ນ ໄດ້ເປັນສັກຂີພິຍານໃນການລົງນາມເອກະສານແລກປ່ຽນຄື:
(1) ໂຄງການທຶນການສຶກສາເພື່ອພັດທະນາຊັບພະຍາກອນມະນຸດ (the Project for Human Resource Development Scholarship), ມູນຄ່າ 310 ລ້ານເຢນ.
8. ທ່ານ ທອງລຸນ ສີສຸລິດ, ນາຍົກລັດຖະມົນຕີ ແຫ່ງ ສປປ ລາວ ໄດ້ພົບປະສອງຝ່າຍ ກັບ ທ່ານ ອາເບະ ຊິນໂຊະ, ນາຍົກລັດຖະມົນຕີ ແຫ່ງ ຍີ່ປຸ່ນ ໃນໂອກາດເຂົ້າຮ່ວມກອງປະຊຸມສຸດຍອດແມ່ນໍ້າຂອງ-ຍີ່ປຸ່ນ ຄັ້ງທີ 10 ທີ່ ປະເທດຍີ່ປຸ່ນ ໃນປີ 2018
ໃນວັນທີ 8 ຕຸລາ 2018, ທີ່ ຫ້ອງວ່າການສໍານັກງານນາຍົກລັດຖະມົນຕີ ຍີ່ປຸ່ນ, ຫຼັງຈາກການພົບປະສຸດຍອດ ລະຫວ່າງ ທ່ານ ທອງລຸນ ສີສຸລິດ, ນາຍົກລັດຖະມົນຕີ ແຫ່ງ ສປປ ລາວ ແລະ ທ່ານ ອາເບະ ຊິນໂຊະ, ນາຍົກລັດຖະມົນຕີ ແຫ່ງ ຍີ່ປຸ່ນ, ຜູ້ນຳທັງສອງໄດ້ຖະແຫຼງຂ່າວຮ່ວມຕໍ່ສື່ມວນຊົນກ່ຽວກັບຜົນການພົບປະສອງຝ່າຍລາວ-ຍີ່ປຸ່ນ ເພື່ອສືບຕໍ່ຢືນຢັນເຖີງການຜັນຂະຫຍາຍຂອງການເປັນຄູ່ຮ່ວມຍຸດທະສາດ ຂອງສອງປະເທດໃຫ້ເຂົ້າສູ່ລວງເລິກ ແລະ ລວງກ້ວາງຂວາງໃຫ້ແໜ້ນແຟ້ນຍີ່ງໆຂື້ນນັ້ນຜູ້ນຳທັງສອງໄດ້ເປັນເອກະພາບກັນດັ່ງນີ້:
1. ສປປ ລາວ ຕີລາຄາສູງຕໍ່ສາຍພົວພັນມິດຕະພາບ ແລະ ການຮ່ວມມືລະຫວ່າງສອງປະເທດ ລາວ-ຍີ່ປຸ່ນ ແມ່ນໄດ້ຮັບການເສີມຂະຫຍາຍຂື້ນຢ່າງຕໍ່ເນື່ອງ, ເຊີ່ງໄດ້ສະແດງອອກໃນຜົນສຳເລັດຂອງຂົງເຂດການຮ່ວມມືຕ່າງໆເປັນຕົ້ນ: ການແລກປ່ຽນການຢ້ຽມຢາມຂອງການນຳຂັ້ນສູງຢ່າງເປັນປົກກະຕິ, ການຮ່ວມມືດ້ານເສດຖະກິດກໍຄືດ້ານວັດທະນະທຳ-ສັງຄົມ ແລະ ການທ່ອງທ່ຽວແມ່ນມີການຂະຫຍາຍຕົວຂື້ນ.
2. ສອງຝ່າຍຕີລາຄາສູງຕໍ່ການຮ່ວມມືສອງຝ່າຍ ລາວ-ຍີ່ປຸ່ນ ໃນກອບຂອງການຮ່ວມມື ແມ່ນໍ້າຂອງ-ຍີ່ປຸ່ນ ໂດຍສະເພາະ ການຈັດຕັ້ງປະຕິບັດວຽກງານຕ່າງໆພາຍໃຕ້ຍຸດທະສາດໂຕກຽວ 2015 ແລະ ແຜນປະຕິບັດງານສຳລັບປີ 2016-2018 ທີ່ໄດ້ຮັບການຈັດຕັ້ງປະຕິບັດຢ່າງມີປະສິດທິຜົນ ແລະ ເຫັນດີຮ່ວມກັນເພື່ອສືບຕໍ່ເສີມຂະຫຍາຍການຮ່ວມມື ລາວ-ຍີ່ປຸ່ນ ໃຫ້ກ້າວສູ່ລວງເລີກຄຽງຄູ່ກັບການຍົກລະດັບການພົວພັນລະຫວ່າງແມ່ນໍ້າຂອງ ແລະ ຍີ່ປຸ່ນ ຂື້ນເປັນຄູ່ຮ່ວມມືຍຸດທະສາດ ແລະ ພ້ອມກັນພັດທະນາເສດຖະກິດ-ສັງຄົມເພື່ອຄວາມສົມບຸນພູນສຸກຂອງປະຊາຊົນໃນພາກພື້ນແມ່ນໍ້າຂອງກໍຄືການເສີມຂະຫຍາຍສາຍພົວພັນມິດຕະພາບ ແລະ ການຮ່ວມມືລະຫວ່າງສອງປະເທດ ລາວ-ຍີ່ປຸ່ນ ໃຫ້ແໜ້ນແຟ້ນຍີ່ງໆຂື້ນ. ສປປ ລາວ ກຽມພ້ອມເຂົ້າຮ່ວມຈັດຕັ້ງປະຕິບັດຍຸດທະສາດໂຕກຽວ 2018 ທີ່ໄດ້ຖືກຮັບຮອງເອົາໃນກອງປະຊຸມສຸດຍອດແມ່ນໍ້າຂອງ-ຍີ່ປຸ່ນ ໃນຄັ້ງນີ້ໃຫ້ປະກົດຜົນເປັນຈີງ.
3. ສອງຝ່າຍຕີລາຄາສູງຕໍ່ຄວາມຄືບໜ້າການຈັດຕັ້ງປະຕິບັດແຜນການຮ່ວມມືລະຫວ່າງ ສປປ ລາວ ແລະ ຍີ່ປຸ່ນ ເພື່ອແນໃສ່ຊ່ວຍເຫຼືອ ສປປ ລາວ ຈັດຕັ້ງປະຕິບັດແຜນພັດທະນາເສດ ຖະກິດ-ສັງຄົມ 5 ປີຄັ້ງທີ່ 8, ກໍຄືແຜນຍຸດທະສາດເຖີງປີ 2025 ແລະ ວິໄສທັດເຖີງປີ 2030 ຂອງ ສປປ ລາວ ໃຫ້ສໍາເລັດຕາມຄາດໝາຍທີ່ວາງໄວ້.
4. ສປປ ລາວ ສະແດງຄວາມເຫັນໃຈຕໍ່ລັດຖະບານ ແລະ ປະຊາຊົນ ຍີ່ປຸ່ນ ທີ່ໄດ້ຮັບຜົນກະທົບຈາກໄພພິບັດທຳມະຊາດເປັນຕົ້ນ: ໄພນໍ້າຖ້ວມ, ດີນເຈື່ອນ, ພະຍຸໄຕ້ຝຸ່ນ ແລະ ແຜ່ນດີນໄຫວ ໃນໄລຍະທີ່ຜ່ານມາ. ພ້ອມດຽວກັນນີ້, ສປປ ລາວ ກໍສະແດງຄວາມຂອບໃຈມາຍັງລັດຖະບານ ແລະ ປະຊາຊົນຍີ່ປຸ່ນ ທີ່ໄດ້ໃຫ້ການຊ່ວຍເຫຼື່ອອັນລໍ້າຄ່າແກ່ ສປປ ລາວ ທີ່ໄດ້ຮັບຜົນກະທົບຈາກໄພພິບັດທີ່ເກີດຂື້ນຢູ່ເມືອງ ສະໜາມໄຊ, ແຂວງ ອັດຕະປື ສປປ ລາວ, ເຊີ່ງເປັນການຊ່ວຍເຫຼືອທີ່ທັນການ ແລະ ໄດ້ກາຍເປັນກຳລັງໃຈທີ່ສຳຄັນໃນການບັນເທົາທຸກແກ່ຜູ້ປະສົບເຄາະຮ້າຍຄັ້ງນີ້ໃຫ້ຄືນສູ່ສະພາບປົກກະຕິໂດຍໄວ.
5. ສປປ ລາວ ສະແດງຄວາມຂອບໃຈມາຍັງລັດຖະບານ ຍີ່ປຸ່ນ ທີ່ຈະສືບຕໍ່ໃຫ້ການຊ່ວຍເຫຼືອໃນຂົງເຂດຕ່າງໆເຊັ່ນ: ການພັດທະນາພື້ນຖານໂຄງລ່າງ, ການແກ້ໄຂຜົນກະທົບຈາກລະເບີດບໍ່ທັນແຕກ, ການຊ່ວຍເຫຼືອດ້ານການເງີນ ແລະ ອື່ນໆ.
6. ສອງນາຍົກລັດຖະມົນຕີ ໄດ້ເປັນສັກຂີພິຍານໃນການລົງນາມສັນຍາການຮ່ວມມືສອງຝ່າຍຄື:
(1) ເອກະສານແລກປ່ຽນ ໂຄງການເລັ່ງລັດການເກັບກູ້ລະເບີດບໍ່ທັນແຕກຢູ່ ສປປ ລາວ ໃນມູນຄ່າ 900 ລ້ານເຢນ.
(2) ສັນຍາການຮ່ວມມືດ້ານວິຊາການ ລະຫວ່າງ ໂຮງໝໍມິດຕະພາບ ແລະ ສະຖາບັນຜ່າຕັດສະໝອງ ຄິຕາຮາຣະ (Kitahara) ຍີ່ປຸ່ນ.
9. ທ່ານ ທອງລຸນ ສີສຸລິດ, ນາຍົກລັດຖະມົນຕີ ແຫ່ງ ສປປ ລາວ ໄດ້ພົບປະສອງຝ່າຍ ກັບ ທ່ານ ອາເບະ ຊິນໂຊະ, ນາຍົກລັດຖະມົນຕີ ແຫ່ງ ຍີ່ປຸ່ນ ໃນໂອກາດເຂົ້າຮ່ວມກອງປະຊຸມສາກົນ ກ່ຽວກັບ ອະນາຄົດຂອງອາຊີ ຄັ້ງທີ 25 ຈັດໂດຍ ສຳນັກຂ່າວ ນິກເກ ຍີ່ປຸ່ນ ທີ່ ປະເທດຍີ່ປຸ່ນ ໃນປີ 2019
ໃນວັນທີ 30 ພຶດສະພາ 2019, ທີ່ ຫ້ອງວ່າການສໍານັກງານນາຍົກລັດຖະມົນຕີ ຍີ່ປຸ່ນ, ໄດ້ມີການພົບປະເຮັດວຽກ ແລະ ຮັບປະທານອາຫານທ່ຽວ (Working Lunch) ລະຫວ່າງ ທ່ານ ທອງລຸນ ສີສຸລິດ, ນາຍົກລັດຖະມົນຕີ ແຫ່ງ ສປປ ລາວ ແລະ ທ່ານ ອາເບະ ຊິນໂຊະ, ນາຍົກລັດຖະມົນຕີ ແຫ່ງ ຍີ່ປຸ່ນ. ກ່ອນການພົບປະດັ່ງກ່າວ, ສອງນາຍົກລັດຖະມົນຕີ ລາວ – ຍີ່ປຸ່ນ ໄດ້ເປັນສັກຂີພິຍານໃນການລົງນາມເອກະສານຄື:
(1) ເອກະສານແລກປ່ຽນໂຄງການທຶນການສຶກສາເພື່ອພັດທະນາຊັບພະຍາກອນມະນຸດ (ສໍາລັບລັດຖະກອນໜຸ່ມນ້ອຍ), ມູນຄ່າ 308 ລ້ານເຢນ.
(2) ເອກະສານການດັດແກ້ເອກະສານຄັດຕິດ ຂອງສັນຍາການບິນລະຫວ່າງ ສປປ ລາວ ແລະ ຍີ່ປຸ່ນ.
