ພິທີສະເຫລີມສະຫລອງ ເພື່ອລະນຶກເຖິງ ວັນມີຜົນບັງຄັບໃຊ້ສົນທິສັນຍາວ່າດ້ວຍການເກືອດຫ້າມລະເບີດລູກຫວ່ານຄົບຮອບ 14 ປີ ຈັດຂຶ້ນໃນຕອນເຊົ້າ ວັນທີ 01 ສິງຫາ 2024 ທີ່ສູນຝຶກອົບຮົມແຫ່ງຊາດ ແກ້ໄຂບັນຫາລະເບີບໍ່ທັນແຕກ ບ້ານອີໄລ ເມືອງນາຊາຍທອງ ນະຄອນຫຼວງວຽງຈັນ, ໂດຍການເຂົ້າຮ່ວມຂອງທ່ານ ໂພໄຊ ໄຂຄຳພິທູນ ຮອງລັດຖະມົນຕີ ກະຊວງການຕ່າງປະເທດ, ຮອງປະທານຜູ້ປະຈໍາການ ຄະນະກໍາມະ ການຄຸ້ມຄອງແຫ່ງຊາດ ເພື່ອແກ້ໄຂບັນຫາລະເບີດບໍ່ທັນແຕກທີ່ຕົກຄ້າງຢູ່ລາວ, ມີທ່ານ ນາງ ມາຕິນ ເຕເຣ ( Mrs. Martine Thérer ) ຜູ້ຕາງໜ້າອົງການສະຫະປະຊາຊາດ ເພື່ອການພັດທະ ນາປະຈຳລາວ ພ້ອມດ້ວຍບັນດາທູດຕານຸທູດ ອົງການຈັດຕັ້ງສາກົນ, ກະຊວງ ຂະແໜງການອ້ອມຂ້າງສູນກາງ.
ໃນໂອກາດນີ້ ທ່ານ ໂພໄຊ ໄຂຄຳພິທູນ ຮອງລັດຖະມົນຕີ ກະຊວງການຕ່າງປະເທດ, ຮອງປະ ທານຜູ້ປະຈໍາການ ຄະນະກໍາມະ ການຄຸ້ມຄອງແຫ່ງຊາດ ເພື່ອແກ້ໄຂບັນຫາລະເບີດບໍ່ທັນແຕກທີ່ຕົກຄ້າງຢູ່ລາວ ມີຄໍາເຫັນວ່າ: ເພື່ອລະນຶກເຖິງວັນມີຜົນບັງຄັບໃຊ້ສົນທິສັນຍາວ່າດ້ວຍການເກືອດຫ້າມລະເບີດລູກຫວ່ານຄົບຮອບ 14 ປີ ຖືເປັນການຢັ້ງຢືນຄືນຄວາມໝາຍໝັ້ນຂອງລັດຖະບານລາວກໍ່ຄືຂອງບັນດາປະເທດລັດພາຄີສົນທິສັນ ຍາໃນທົ່ວໂລກ ເພື່ອຕ້ານການນຳໃຊ້, ຜະລິດ ເກັບມ້ຽນ ສົ່ງຄ່ຽນລະເບີດລູກຫວ່ານ ແລະ ເພື່ອສົ່ງເສີມສັນຕິພາບ ແລະ ຄວາມໝັ້ນຄົງຂອງໂລກ.ເພື່ອເປັນການສະກັດກັ້ນບໍ່ໃຫ້ປະຊາຄົມໂລກຕ້ອງຕົກຢູ່ໃນຊະຕາກຳທີ່ພົບພໍ້ກັບຄວາມອັນຕະລາຍຂອງຜົນກະທົບຈາກລະເບີດລູກຫວ່ານ, ບັນດາປະເທດຕ່າງໆ ທີ່ຮັກຫອມສັນຕິພາບ ລວມທັງລາວເຮົາໄດ້ຮ່ວມກັນລິເລີ່ມຂະບວນ ການ ໂອສໂລ, ນັບແຕ່ປີ 2007 ທີ່ປະເທດນອກແວ ເປັນເຈົ້າ ພາບຈັດກອງປະຊຸມວ່າດ້ວຍລະເບີດລູກຫວ່ານ, ທີ່ມີບັນດາປະເທດ ແລະ ອົງການຈັດຕັ້ງສາກົນເຂົ້າຮ່ວມປຶກສາຫາລືຜົນກະທົບທາງດ້ານມະນຸດສະທຳ ແລະ ໄດ້ເປັນຈຸດເລີ່ມຕົ້ນຂອງການຮ່າງສົນທິສັນຍາຂື້ນມາ, ເພື່ອເຈລະຈາ ແລະ ຮັບຮອງສົນທິສັນ ຍາວ່າດ້ວຍການເກືອດຫ້າມລະເບີດລູກຫວ່ານໃນປີ 2008 ຫລື ເອີ້ນວ່າ ສົນທິສັນຍາ CCM ທີ່ເປັນສົນທິສັນຍາສາກົນໃນການເກືອດຫ້າມອາວຸດອັນຕະລາຍນີ້ ແລະ ກຳນົດມາດຕະການໃນການແກ້ໄຂບັນຫາລະເບີດບໍ່ທັນແຕກ ພ້ອມກັບສົ່ງເສີມການ ຮ່ວມມື ແລະ ການຊ່ວຍເຫລືອສາກົນຕໍ່ວຽກງານດັ່ງກ່າວ. ຊຶ່ງລາວເຮົາໃນນາມປະເທດທີ່ໄດ້ຮັບຜົນກະທົບຈາກລະເບີດລູກຫວ່ານໄດ້ເປັນໜຶ່ງໃນປະເທດນຳພາຂະບວນການເຈລະຈາ ແລະ ມີສ່ວນຮ່ວມການສ້າງສົນທິສັນຍາມາແຕ່ເລີ່ມຕົ້ນ ແລະ ເປັນປະເທດທີ່ 2 ທີ່ໄດ້ລົງນາມໃນສົນທິສັນຍາ CCM ຖັດຈາກປະເທດນອກແວ ແລະ ໄດ້ເປັນປະເທດເຈົ້າພາບຈັດກອງປະຊຸມລັດພາຄີສົນທິສັນຍາ CCM ເປັນຄັ້ງທຳອິດໃນປີ 2010 ທີ່ນະຄອນຫຼວງວຽງຈັນ.
ຮອງລັດຖະມົນຕີ ກະຊວງການຕ່າງປະເທດ, ຮອງປະທານຜູ້ປະຈໍາການ ຄະນະກໍາມະການຄຸ້ມຄອງແຫ່ງຊາດ ເພື່ອແກ້ໄຂບັນ ຫາລະເບີດບໍ່ທັນແຕກທີ່ຕົກຄ້າງຢູ່ລາວມີຄໍາເຫັນຕື່ມວ່າ: ຜ່ານມາຈົນເຖິງປັດຈຸບັນ ລາວເຮົາເປັນໜຶ່ງໃນປະເທດທີ່ໄດ້ຮັບຜົນກະ ທົບຫລາຍທີ່ສຸດຈາກລະເບີດລູກຫວ່ານທີ່ໄດ້ຖືກຖີ້ມລະເບີດໃສ່ຫລາຍກວ່າ 270 ລ້ານໜ່ວຍໃນໄລຍະສົງຄາມ ແລະ ຫລັງຈາກສົງຄາມສິ້ນສຸດຄາດວ່າມີ 80 ລ້ານໜ່ວຍທີ່ຍັງບໍ່ແຕກ ແລະ ຍັງສືບຕໍ່ເປັນໄພຂົ່ມຂູ່ຕໍ່ຊີວິດສັບຊິນປະຊາຊົນທົ່ວປະເທດ ແລະ ເປັນສິ່ງກີດຂວາງການພັດທະນາປະເທດຊາດ. ສະເພາະໃນປີ 2024 ນັບແຕ່ເດືອນມັງກອນ ຫາ ປັດຈຸບັນ, ອຸປະຕິເຫດຈາກລະເບີດບໍ່ທັນແຕກໄດ້ເກີດຂຶ້ນທັງໝົດ 21 ຄັ້ງ, ເຮັດໃຫ້ມີຜູ້ໄດ້ຮັບຜົນກະທົບ 44 ຄົນ ກວມເອົາ 50 ສ່ວນຮ້ອຍແມ່ນເດັກ ນ້ອຍ. ໃນນາມສ່ວນຕົວຂໍສະແດງຄວາມເສຍໃຈ ແລະ ສະແດງຄວາມເຫັນອົກເຫັນໃຈຕໍ່ບັນດາຜູ້ຖືກເຄາະຮ້າຍ ແລະ ຄອບຄົວຜູ້ທີ່ໄດ້ຮັບຜົນກະທົບຈາກຄວາມອັນຕະລາຍຂອງລະເບີດລູກຫວ່ານ. ຮຽກຮ້ອງໃຫ້ທຸກພາກສ່ວນກໍ່ຄືວົງຄະນະ ຍາດສາກົນຕ້ອງໄດ້ເພີ່ມຄວາມເອົາໃຈໃສ່ໃນການໂຄສະນາເຜີຍແຜ່ ແລະ ຮ່ວມມືກັນໃນການແກ້ໄຂບັນຫາລະເບີດບໍ່ທັນແຕກໃຫ້ນັບມື້ຫລາຍຂຶ້ນກວ່າເກົ່າ.
ຂ່າວ: ບຸນຍັງ ພຸດສະຫວັດ
