ວັນທີ 25 ມິຖຸນານີ້, ຫ້ອງການຖະແຫຼງຂ່າວຂອງຄະນະລັດຖະບານຈີນໄດ້ອອກປຶ້ມປົກຂາວວ່າດ້ວຍ “ລະບົບພັກການເມືອງແບບໃໝ່ຂອງຈີນ” ໂດຍໄດ້ສະຫຼຸບກ່ຽວກັບລະບົບພັກການເມືອງຂອງຈີນ ແລະ ສະແດງໃຫ້ເຫັນເຖິງຄວາມດີເລີດທີ່ເປັນເອກະລັກຂອງຕົນ ແລະ ຄວາມມີຊີວິດຊີວາທີ່ແຂງແຮງຂອງພັກການເມືອງແບບໃໝ່ຂອງຈີນ.
ໃນສະໄໝໃໝ່, ຈີນໄດ້ຜ່ານຜ່າຂະບວນ ການປະຕິວັດທີ່ຍືດເຍື້ອຍາວນານເປັນເວລາຮ້ອຍປີ, ຈາກການປະຕິວັດໃນປີ 1911 ຫາສົງຄາມຕໍ່ຕ້ານຍີ່ປຸ່ນຂອງປະ ຊາຊົນຈີນ ຮອດການໄຂກອງປະຊຸມສະພາປຶກສາການເມືອງປະຊາຊົນຈີນຄັ້ງປະຖົມມະລືກ ແລະ ການກຳເນີດເປັນຮູບເປັນຮ່າງຂອງລະບົບຫຼາຍພັກການເມືອງທີ່ຮ່ວມມືກັນແລະປຶກສາການເມືອງຮ່ວມກັນ ພາຍໃຕ້ການນຳພາຂອງພັກກກອມມູນິດຈີນ ໃນທີ່ສຸດກໍໄດ້ກາຍເປັນລະບົບພັກການເມືອງແບບໃໝ່.
ພາຍໃຕ້ການນຳພາຂອງລະບົບພັກການເມືອງແບບໃໝ່ດັ່ງກ່າວ, ເສດຖະກິດຈີນໄດ້ບັນລຸການພັດທະນາແບບກ້າວກະ ໂດດຂັ້ນ, ຈາກສະພາບການທີ່ເກືອບບໍ່ມີພື້ນຖານອຸດສາຫະກຳແລະທຸກຍາກຫຼ້າຫຼັງໃນເວລາຫາກໍ່ສະຖາປະນາ ສປ ຈີນຈົນກາຍເປັນປະເທດທີ່ມີຂະໜາດເສດຖະກິດໃຫຍ່ເປັນອັນດັບ 2 ຂອງໂລກ ແລະ ສາມາດລຶບລ້າງຄວາມທຸກຍາກເດັດຖານ ພ້ອມທັງໄດ້ປະກອບສ່ວນທີ່ນັບມື້ນັບສຳຄັນໃນການປົກປັກຮັກສາສະຖຽນລະພາບ, ສັນຕິພາບ ແລະ ຄວາມຈະເລີນຮຸ່ງເຮືອງຂອງໂລກ. ລະບົບພັກການເມືອງແບບໃໝ່ຂອງຈີນໄດ້ສະແດງໃຫ້ເຫັນເຖິງຄວາມດີເລີດທີ່ເປັນເອກະລັກພິເສດ ແລະ ຄວາມມີຊີວິດຊີວາອັນແຂງແຮງຂອງຕົນໂດຍໃຊ້ເວລາຫຼາຍສິບປີ ແລະ ສາມາດສົ່ງຜົນງານທີ່ສະຫງ່າລາສີຂອງຈີນ.
ທ່ານລູອິສ ອິນາຊີໂອ ລູລາ ດາ ຊິວວາ ອະດີດປະທານາທິບໍດີບຣາຊິນໄດ້ໃຫ້ສຳພາດຕໍ່ນັກຂ່າວວ່າ: ນະໂຍບາຍທາງສັງຄົມຫຼາຍຢ່າງທີ່ປະຊາຊົນຕ້ອງການນັ້ນ, ມີແຕ່ລັດຖະບານທີ່ເຂັ້ມແຂງຈິ່ງສາມາດຈັດຕັ້ງປະຕິບັດ. ຈີນສາມາດຕ້ານກັບການແຜ່ລະບາດຂອງພະຍາດໂຄວິດ-19 ໄດ້ຢ່າງວ່ອງໄວນັ້ນກໍເປັນຍ້ອນວ່າຈີນມີພັກການເມືອງທີ່ເຂັ້ມແຂງ ແລະ ລັດຖະບານທີ່ເຂັ້ມແຂງ.
ພາຍຫຼັງກ້າວເຂົ້າສູ່ສະຕະວັດໃໝ່ແລ້ວ, ເມື່ອທຽບກັບໂລກທຶນນິຍົມທີ່ເກີດວິກິດການດ້ານເສດຖະກິດແລະສັງຄົມຢູ່ເລື້ອຍໆ ໂດຍສະເພາະປະເທດທຶນນິຍົມທີ່ນຳພາໂດຍອາເມຣິກາໄດ້ເກີດມີປາກົດການທີ່ຝືນກັບໂລກາພິວັດ, ລັດທິຝ່າຍດຽວ ແລະ ລັດທິປົກປ້ອງການຄ້ານັ້ນ, ປະເທດສັງຄົມນິຍົມທີ່ມີສີສັນພິເສດຂອງຈີນພາຍໃຕ້ການນຳພາຂອງພັກກອມມູນິດຈີນໄດ້ປະສົບຜົນສຳເລັດອັນໃຫຍ່ຫຼວງ, ເຮັດໃຫ້ຄວາມດີເລີດຂອງລະບົບພັກການເມືອງແບບໃໝ່ຂອງຈີນໄດ້ພົ້ນເດັ່ນຍິ່ງຂຶ້ນ.
ລະບົບພັກການເມືອງແມ່ນພາກສ່ວນສຳຄັນຂອງລະບອບການເມືອງຂອງປະເທດ, ລະບົບພັກການເມືອງໃນໂລກມີຫຼາກຫຼາຍສີສັນ, ແຕ່ບໍ່ມີລະບົບພັກການເມືອງໃດທີ່ສາມາດໃຊ້ໄດ້ທົ່ວໄປຢູ່ໃນທຸກປະເທດ. ລະບົບພັກການເມືອງແບບໃໝ່ຂອງຈີນກຳເນີດເກີດຈາກປະເທດຈີນ, ກໍໄດ້ເຊື່ອມຊຶມ ແລະ ຖອດຖອນບົດຮຽນຈາກຜົນງານທີ່ດີເດັ່ນຂອງອະລິຍະທຳທາງດ້ານການເມືອງຂອງມວນມະນຸດ, ເປັນລະບອບການເມືອງທີ່ສອດຄ່ອງກັບສະພາບຄວາມເປັນຈິງຂອງປະເທດຈີນ, ເປັນການເລືອກເຟັ້ນທາງປະຫວັດສາດ ແລະ ກໍເປັນພຶດຕິກຳທີ່ຕ້ອງເປັນໄປ.
ຄືດັ່ງທີ່ໄດ້ລະບຸໄວ້ໃນປຶ້ມປົກຂາວ: ໂດຍຜ່ານການພັດທະນາມາເປັນເວລາ 70 ກວ່າປີ, ລະບົບພັກການເມືອງແບບໃໝ່ຂອງຈີນນັບມື້ນັບສຸກງອມ, ໄດ້ເປັນການອຸທິດສະຕິປັນຍາຂອງຈີນເພື່ອການພັດທະນາດ້ານການເມືອງກໍຄືພັກການເມືອງໃນໂລກປັດຈຸບັນ, ທັງໄດ້ກາຍເປັນຮູບແບບໃໝ່ໃນດ້ານຄວາມສີວິໄລໃນທາງການເມືອງຂອງມວນມະນຸດ. ຈີນຈະປະສານສົມທົບກັບເງື່ອນໄຂຂອງຍຸກສະໄໝໃໝ່, ເຮັດໃຫ້ລະບົບພັກການເມືອງແບບໃໝ່ດັ່ງກ່າວມີຊີວິດຊີວາອີກໃໝ່ ໃນຂະບວນການສ້າງສາປະເທດສັງຄົມນິຍົມທັນສະໄໝຢ່າງຮອບດ້ານ ແລະ ຂະບວນການຟື້ນຟູຄວາມຈະເລີນຮຸ່ງເຮືອງອັນຍິ່ງໃຫຍ່ຂອງຊົນຊາດຈີນ.
Loading...