ທ່ານ ສົມພອນ ສຸທຳ ຮອງຫົວໜ້າຄະນະຄຸ້ມຄອງເຂດເສດຖະກິດພິເສດສາມຫຼ່ຽມຄຳໄດ້ລາຍງານສະພາບການພັດທະນາ ແລະ ຄຸ້ມຄອງເຂດເສດຖະກິດພິເສດສາມຫຼ່ຽມຄຳໂດຍຫຍໍ້ເມື່ອທ້າຍອາທິດທີ່ຜ່ານມານີ້ວ່າ: ລັດຖະບານໄດ້ມີນະໂຍບາຍພັດທະນາເຂດເສດຖະກິດພິເສດສາມຫຼ່ຽມຄຳທີ່ເມືອງຕົ້ນເຜິ້ງ ແຂວງບໍ່ແກ້ວ ເພື່ອຫັນປ່ຽນຈາກສ້າງເຂດຊົນນະບົດ,ທຸກຍາກແລະຫ່າງໄກສອກຫຼີກດວ້ຍການພັດທະນາແລະກາຍເປັນຕົວເມືອງໃໝ່ທີ່ທັນສະໄໝກ້າວໄປສູ່ການຍົກລະດັບເປັນນະຄອນໃນອະນາຄົດ.
ເຂດເສດຖະກິດພິເສດສາມຫຼ່ຽມຄໍາຕັ້ງຢູ່ພາຍໃນຂອບເຂດຂອງເມືອງຕົ້ນເຜິ້ງແຂວງບໍ່ແກ້ວ,ມີຈຸດເຂດແດນລະຫວ່າງລາວ-ໄທ-ມຽນມາໄດ້ຮັບການສ້າງຕັ້ງຂຶ້ນນັບແຕ່ປີ2007 ຊຶ່ງໃນເບື້ອງຕົ້ນແມ່ນການພັດທະນາເຂດເສດຖະກິດ ແລະ ທ່ອງທ່ຽວຄົບວົງຈອນອາຊຽນສາມຫຼ່ຽມຄຳ ໃນເນື້ອທີ່ 827 ເຮັກຕາ ໄລຍະສຳປະທານ 50 ປີ ແລະ ໄດ້ຍົກລະດັບຂຶ້ນເປັນເຂດເສດຖະກິດພິເສດໃນປີ 2010 ໂດຍມີໄລຍະສຳປະທານ 99 ປີ, ມີເນື້ອທີ່ທັງໝົດ 10.000 ເຮັກຕາ (ເຂດພັດທະນາຕົວເມືອງ 3.000 ຮຕ ແລະ ເຂດປ່າປ້ອງກັນສາຍພູກີ່ວລົມ 7.000 ຮຕ), ອີງຕາມສັນຍາການພັດທະ ນາເຂດໄດ້ກຳນົດມີ18ກິດຈະການຫຼັກທີ່ຕິດພັນກັບການພັດທະນາພື້ນຖານໂຄງລ່າງ ,ເສດຖະກິດ,ການຄ້າ,ການລົງທຶນ, ກະສິກຳ, ການສຶກສາ, ສາທາລະນະສຸກ, ການທ່ອງ ທ່ຽວ, ການບໍລິການ-ການບັນເທີງ ແລະ ກິດຈະກໍາອື່ນໆ.
ທ່ານ ສົມພອນ ສຸທຳ ກ່າວເນັ້ນຕື່ມອີກວ່າ: ນັບແຕ່ປີ 2007 ເປັນຕົ້ນມາຜູ້ພັດທະນາກໍຄືກຸ່ມບໍລິສັດດອກງິ້ວຄຳ ຈຳກັດ ໄດ້ເອົາໃຈໃສ່ລົງທຶນໃນບັນດາກິດຈະການຕ່າງໆ ພ້ອມນັ້ນ, ກໍມີນັກລົງທຶນທັງພາຍໃນ ແລະ ຕ່າງປະເທດເຂົ້າມາລົງທຶນດ້ານຕ່າງໆເປັນຈໍານວນຫຼາຍ ເຮັດໃຫ້ເຂດເສດຖະກິດພິເສດສາມຫຼ່ຽມຄຳໄດ້ມີການພັດທະນາຢ່າງໄວວາ, ມີການກໍ່ສ້າງພື້ນຖານໂຄງລ່າງທີ່ສົມບູນ ແລະ ກາຍເປັນຕົວເມືອງທີ່ມີລັກສະນະທັນສະໄໝ ແລະ ສີວິໄລ.
ອີງຕາມຂໍ້ມູນໃນເດືອນກຸມພາປີ 2024 ມີຜູ້ເຂົ້າມາລົງທຶນ,ດຳເນີນທຸລະກິດ, ອອກແຮງງານ ແລະ ດຳລົງຊີວິດທັງພາຍໃນ ແລະ ຕ່າງປະເທດລວມ 120.770 ຄົນ, ມີ 69 ສັນຊາດ, ໃນນັ້ນຄົນລາວ 38.330 ຄົນ ກວມ 31,73%, ມຽນມາ 41,317 ຄົນ ເທົ່າກັບ 34,21%, ຈີນ 33.588 ຄົນ ເທົ່າກັບ 27,81% ແລະ ສັນຊາດອື່ນໆ 7.537 ຄົນ.
Cr: ປະຊາຊົນ
