ວິທະຍຸກະຈາຍສຽງແຫ່ງຊາດລາວ

Lao National Radio

ຕັ້ງໜ້າຜັນຂະຫຍາຍມະຕິກອງປະຊຸມໃຫຍ່ ຄັ້ງທີ XI ຂອງພັກ ເຂົ້າສູ່ຊີວິດຈິງ
ວັນທີ 21 ພຶດສະພາ 2024, ທ່ານ ສະເຫລີມໄຊ ກົມມະສິດ ຮອງນາຍົກລັດຖະມົນຕີ, ລັດຖະມົນຕີກະຊວງການຕ່າງປະເທດ ໄດ້ຕ້ອນຮັບ ແລະ ຕາງໜ້າໃຫ້ລັດຖະບານລາວ ປະດັບຫລຽນໄຊມິດຕະພາບ ໃຫ້ແກ່ ທ່ານ ຊັກ ຢູເຊັບ ໂຮກາແຢມ (Mr. Jacques YOUSESEF HOKAYEM) ກົງສຸນກິດຕິມະສັກຂອງ ສປປ ລາວ ປະຈຳ ລີບັງ ເພື່ອເປັນການຍ້ອງຍໍຊົມເຊີຍ ແລະ ສັນລະເສີນຕໍ່ຜົນງານໃນການປະກອບສ່ວນ ເຂົ້າໃນການເສີມຂະຫຍາຍສາຍພົວພັນ ແລະ ການຮ່ວມມືລະຫວ່າງ ສປປ ລາວ ແລະ ລີບັງ ໃນໂອກາດທີ່ໄດ້ເດີນທາງມາເຄື່ອນໄຫວ ແລະ ຢ້ຽມຢາມ ສປປ ລາວ.
ໃນໂອກາດດັ່ງກ່າວ, ທ່ານຮອງນາຍົກລັດຖະມົນຕີ ໄດ້ສະແດງຄວາມຊົມເຊີຍ ແລະ ຕີລາຄາສູງຕໍ່ຜົນງານຂອງ ທ່ານ ຊັກ ຢູເຊັບ ໂຮກາແຢມ ທີ່ມີຄວາມເອົາໃຈໃສ່ບຸກບືນ, ເສຍສະລະໃນການປະຕິບັດໜ້າທີ່ເປັນກົງສຸນກິດຕິມະສັກແຫ່ງ ສປປ ລາວ ໃນໄລຍະເວລາ 15 ປີ ຜ່ານມາ ໂດຍບໍ່ຫວັງຜົນຕອບແທນໃດໆ ເຊິ່ງໄດ້ອຸທິດເຫື່ອແຮງຂອງຕົນ ປະກອບສ່ວນຢ່າງຕັ້ງໜ້າເຂົ້າໃນວຽກງານກົງສຸນ, ການປະກອບສ່ວນຂົນຂວາຍດຶງດູດນັກລົງທຶນ ແລະ ໂຄສະນາໃຫ້ນັກທ່ອງທ່ຽວຈາກປະເທດລີບັງ ເຂົ້າມາທ່ອງທ່ຽວ ແລະ ລົງທຶນຢູ່ ສປປ ລາວ. ນອກນັ້ນ, ຍັງໄດ້ໃຫ້ການຊ່ວຍເຫລືອປະກອບສ່ວນທຶນຮອນ ແລະ ອຳນວຍຄວາມສະດວກໃຫ້ແກ່ຄະນະຜູ້ແທນລາວ ທີ່ໄປປະຕິບັດພາລະກິດ ຢູ່ ປະເທດ ລີບັງ.
ໃນໂອກາດດຽວກັນ, ທ່ານ ຊັກ ຢູເຊັບ ໂຮກາແຢມ ກໍໄດ້ສະແດງຄວາມພາກພູມໃຈ ແລະ ຂອບອົກຂອບໃຈຢ່າງສູງມາຍັງ ທ່ານຮອງນາຍົກລັດຖະມົນຕີ ທີ່ໄດ້ຕາງໜ້າ ໃຫ້ລັດຖະບານ ສປປ ລາວ ປະດັບຫລຽນໄຊມິດຕະພາບ ອັນຊົງກຽດນີ້.
ພ້ອມກັນນີ້, ທ່ານໄດ້ຢືນຢັນທີ່ຈະສືບຕໍ່ເອົາໃຈໃສ່ເຮັດໜ້າທີ່ເປັນກົງສຸນກິດຕິມະສັກ ເພື່ອເສີມຂະຫຍາຍການພົວພັນຮ່ວມມືທາງເສດຖະກິດ, ການທ່ອງທ່ຽວ ແລະ ວັດທະນະທຳ ເພື່ອຊຸກຍູ້, ສົ່ງເສີມສາຍພົວພັນມິດຕະພາບຂອງສອງປະເທດ ລະຫວ່າງ ສປປ ລາວ ແລະ ລີບັງ ໃຫ້ນັບມື້ນັບຂະຫຍາຍຕົວຍິ່ງຂຶ້ນ.