15 ກໍລະກົດ 2022, ກອງປະຊຸມພົບປະແລກປ່ຽນລະຫວ່າງພາກລັດຖະບານລາວ ແລະນັກທຸລະກິດຈີນຄັ້ງທີ 6 ໄດ້ຈັດຂຶ້ນທີ່ນະຄອນຫຼວງວຽງຈັນ, ໂດຍເປັນປະ ທານຮ່ວມຂອງທ່ານ ຄໍາເຈນ ວົງໂພສີ ລັດຖະມົນຕີ ກະຊວງແຜນການ ແລະການລົງທຶນ ແລະ ທ່ານ ຈ່ຽງຈ້າຍຕົ່ງ ເອກອັກຄະລັດຖະທູດ ສປ ຈີນປະຈໍາ ສປປ ລາວ, ມີບັນດາການນໍາລະດັບລັດຖະ ມົນຕີ, ຮອງລັດຖມົນຕີ, ສະພາການຄ້າຈີນ ແລະຜູ້ຕາງຫນ້າວິສາຫະກິດແຂວງຢູນນານປະຈໍາລາວ ພ້ອມດ້ວຍຜູ້ຕາງໜ້າພາກສ່ວນທີ່ກ່ຽວຂ້ອງເຂົ້າຮ່ວມຈໍານວນ 150 ກວ່າທ່ານ.
ກອງປະຊຸມຄັ້ງນີ້, ເປັນເວທີພົບປະແລກ ປ່ຽນກ່ຽວກັບສະພາບການດໍາເນີນທຸລະ ກິດ ແລະ ການລົງທຶນຂອງ ສປ ຈີນໃນ ສປປ ລາວ, ພ້ອມດຽວກັນນັ້ນກໍ່ເພື່ອເປັນການສ້າງສາຍພົວພັນອັນດີໃຫ້ແກ່ພາກລັດຖະບານລາວ ແລະຜູ້ລົງທຶນຈາກ ສປ ຈີນແລະເປັນການສ້າງກົນໄກໜຶ່ງໃນການຊ່ວຍພາກລັດກໍາໄດ້ສະພາບຄວາມຫຍຸ້ງຍາກຂອງພາກທຸລະກິດຈີນ ທີ່ພວມດໍາເນີນທຸລະກິດຢູ່ ສປປ ລາວ.
ທ່ານ ຈ້າວ ທີ່ປຶກສາດ້ານເສດຖະກິດການຄ້າສະຖານທູດຈີນປະຈໍາລາວ ແລະບັນ ດາພາກທຸລະກິດຈີນໄດ້ລາຍງານສະພາບການດໍາເນີນທຸລະກິດຢູ່ ສປປ ລາວ ລວມທັງສະເໜີຂໍ້ສະດວກ ແລະຂໍ້ຫຍຸ້ງຍາກປະກອບມີ 5 ຫົວຂໍ້ສໍາຄັນຄື: ໜຶ່ງ, ການຟື້ນຟູເສດຖະກິດຫຼັງການແຜ່ລະບາດຂອງພະຍາດໂຄວິດ-19 ແລະ ການປັບປຸງສະພາບການດໍາເນີນທຸລະກິດໃຫ້ດີຂຶ້ນ; ສອງ, ຂະແຫນງຄົມມະນາຄົມ ແລະຂົນສົ່ງ; ສາມ, ຂະແຫນງໄຟຟ້າ; ສີ່, ການພັດທະນາເຂດເສດຖະກິດພິເສດ ແລະ ຫ້າ, ຂະແຫນງບໍ່ແຮ່.
ໃນໂອກາດນີ້, ທ່ານ ຄໍາເຈນ ວົງໂພສີໄດ້ມີຄໍາເຫັນວ່າ: ໃນໄລຍະ 1 ປີ ຜ່ານມາ, ເຖິງວ່າ ສປປ ລາວ ຍັງສືບຕໍ່ໄດ້ຮັບຜົນກະທົບຈາກໂຄວິດ-19, ບັນຫາເສດຖະກິດ-ການເງິນ ແລະອັດຕາການແລກປ່ຽນເງິນຕາ, ແຕ່ວ່າທ່າອ່ຽງການລົງທຶນຂອງພາກເອກະຊົນທັງພາຍໃນ ແລະຕ່າງປະເທດໃນຂອບເຂດທົ່ວປະເທດຍັງຖືວ່າຢູ່ໃນລະດັບທີ່ດີ, ເຫັນໄດ້ຈາກການອະນຸມັດໂຄງການລົງທຶນທີ່ຜ່ານມາໃນປີ 2021 ມີມູນຄ່າການລົງທຶນ, ທັງຫມົດຈໍານວນ 22,2 ຕື້ໂດລາ, ໃນນັ້ນອະນຸມັດຈາກຂະແຫນງແຜນການ ແລະການລົງທຶນມີຈໍານວນ 364 ໂຄງການ, ຂະແຫນງອຸດສາຫະກໍາ ແລະການຄ້າຈໍານວນ 13.303 ຫົວຫນ່ວຍ ແລະເຂດເສດຖະກິດພິເສດຈໍານວນ 59 ຫົວຫນ່ວຍ ເຊິ່ງຕົວເລກອະນຸມັດດັ່ງກ່າວແມ່ນເກີນກວ່າຕົວເລກທີ່ໄດ້ກໍານົດໄວ້ໃນແຜນ 5 ປີ 2021- 2025 ແລະເມື່ອປຽບທຽບມູນຄ່າການລົງທຶນໃນປີ 2020 ມີມູນຄ່າການລົງທຶນຈໍານວນ 26,2 ຕື້ ໂດລາແມ່ນເຫັນວ່າມີມູນຄ່າຫຼຸດລົງປະມານ 8,47% ໃນມູນຄ່າການລົງທຶນທັງຫມົດກວມເອົາໂຄງການ, ກິດຈະການທີ່ລົງທຶນໃນຂະແຫນງການໄຟຟ້າ, ບໍ່ ແຮ່, ກະສິກໍາ ແລະ ປ່າໄມ້, ຂະແຫນງການບໍລິການ ແລະ ຂະແຫນງການອື່ນໆ. ສໍາລັບການລົງທຶນ ຂອງ ສປ ຈີນ ແມ່ນຍັງສືບຕໍ່ຢູ່ໃນລໍາດັບຫນຶ່ງຢູ່ ສປປ ລາວ ເຊິ່ງການລົງທຶນສະສົມແມ່ນມີເຖິງ 933 ໂຄງການ, ໂດຍມີມູນຄ່າການລົງທຶນທັງຫມົດປະມານ 16,4 ຕື້ ໂດລາ, ອັນພົ້ນເດັ່ນແມ່ນບັນດາໂຄງການຮ່ວມມືຍຸດທະສາດ ແລະໂຄງການຂະໜາດໃຫ່ຍເຊັ່ນ: ໂຄງການທາງລົດໄຟລາວ-ຈີນ, ໂຄງການທາງດ່ວນວຽງຈັນ-ວັງວຽງ, ເຂດເສດຖະກິດພິເສດກວມລວມໄຊເສດຖາ ແລະເຂດເສດຖະກິດບໍ່ເຕ່ນ-ບໍ່ຫານ, ໂຄງການສາຍສົ່ງ ແລະ ເຂື່ອນໄຟຟ້າແລະອື່ນໆ ເຊິ່ງໄດ້ຮັບການພັດທະນາ ແລະນໍາເອົາໝາກຜົນຕົວຈິງມາສູ່ສອງຝ່າຍ
ທ່ານລັດຖະມົນຕີກະຊວງແຜນການ ແລະການລົງທຶນຍັງກ່າວອີກວ່າ: ການສະເໜີຂອງຝ່າຍຈີນທັງ5ຫົວຂໍ້ນັ້ນຈະສະເໜີໃຫ້ຂະແໜງການກ່ຽວຂ້ອງຂອງ ສປປ ລາວ ສືບຕໍ່ນໍາເອົາໄປພິຈາລະນາ ແລະຮ່ວມກັນຄົ້ນຄວ້າຄືນໃນຈຸດທີ່ຍັງຄ້າງຄາ ແລະພ້ອມກັນແກ້ໄຂຕາມລະບຽບການ ແລະຕາມພາລະບົດບາດຂອງແຕ່ລະພາກສ່ວນ.
ກ່ອນກ່ອນປະຊຸມ, ທັງສອງຝ່າຍລາວ-ຈີນ ຍັງໄດ້ສະເຫຼີມສະຫຼອງວັນສ້າງຕັ້ງຄະນະກໍາມະການຮ່ວມມືລາວ-ຈີນ ແລະຈີນ-ລາວຄົບຮອບ 25 ປີ.
