ສະຫງວນລິຂະສິດ © ສະຖານີ ວິທະຍຸກະຈາຍສຽງແຫ່ງຊາດລາວ

ວິທະຍຸກະຈາຍສຽງແຫ່ງຊາດລາວ

Lao National Radio

ຊົມເຊີຍ ວັນສ້າງຕັ້ງວິທະຍຸກະຈາຍສຽງແຫ່ງຊາດລາວ ຄົບຮອບ 60 ປີ
(13 ສິງຫາ 1960-13 ສິງຫາ 2020) ຢ່າງສຸດໃຈ

ລັດຖະບານຮຽກຮ້ອງປະຊາຊົນບໍ່ໃຫ້ເດີນທາງໄປເຂດທີ່ມີຄວາມສ່ຽງ ເພື່ອປ້ອງກັນການແຜ່ລະບາດຂອງໂຄວິດ-19

ໃນຕອນເຊົ້າມື້ນີ້ ວັນທີ 16 ມິນາ 2020, ທ່ານທອງລຸນ ສີສຸລິດ ນາຍົກລັດຖະມົນຕີ ພ້ອມຄະນະ ໄດ້ລົງເຄື່ອນໄຫວຢ້ຽມຢາມ ແລະ ເຮັດວຽກຢູ່ຫລາຍຈຸດພາຍໃນນະຄອນຫລວງວຽງຈັນ, ເພື່ອຕິດຕາມການເຝົ້າລະວັງ, ການປ້ອງກັນ, ການຄວບຄຸມ ແລະ ການແກ້ໄຂການແຜ່ລະບາດຂອງພະຍາດໂຄວິດ-19 ຢູ່ດ່ານສາກົນຂົວມິດຕະພາບລາວ-ໄທ 1, ໂຮງໝໍ 103, ໂຮງໝໍ 150 ຕຽງ ແລະ ສະໜາມບິນສາກົນວັດໄຕ. ຫລັງຈາກນັ້ນ, ທ່ານນາຍົກລັດຖະມົນຕີ ກໍ່ໄດ້ໃຫ້ສໍາພາດຕໍ່ສື່ມວນຊົນ ເຖິງສະພາບການແຜ່ລະບາດ ແລະ ການຮັບມືກັບພະຍາດດັ່ງກ່າວນີ້, ໂດຍບາງຕອນ ທ່ານກ່າວວ່າ: ປະຈຸບັນ, ພະຍາດໂຄວິດ-19 ໄດ້ແຜ່ລະບາດໄປທົ່ວໂລກ ແລະ ແຕ່ລະປະເທດ ແລະ ອົງການຈັດຕັ້ງສາກົນຕ່າງໆ ກໍ່ໄດ້ເອົາໃຈໃສ່ຕໍ່ບັນຫານີ້ເປັນພິເສດ; ເຖິງແມ່ນວ່າຈະບໍ່ມີການລະບາດຢູ່ລາວເທື່ອກໍ່ຕາມ, ແຕ່ລັດຖະບານກໍ່ໄດ້ເອົາໃຈໃສ່ເປັນພິເສດໃນກໍລະນີນີ້ເຊັ່ນກັນ, ແລະ ຂໍຮຽກຮ້ອງມາຍັງທຸກຄົນຈົ່ງມີສະຕິລະວັງຕົວບໍ່ປະໝາດ, ຂໍໃຫ້ທຸກຄົນໃນຂອບເຂດທົ່ວປະເທດຈົ່ງຕິດຕາມຢ່າງໃກ້ຊິດ ແລະ ປະຕິບັດຕາມມາດຕະການທີ່ວາງອອກມາແລ້ວນັ້ນ ເຊິ່ງເຫັນວ່າຜ່ານມາມາດຕະການເຫລົ່ານີ້ກໍ່ໄດ້ຮັບຜົນດີພໍສົມຄວນ, ໂດຍໜຶ່ງໃນມາດຕະການນັ້ນແມ່ນລັດຖະບານໄດ້ໂຈະກອງປະຊຸມສາກົນ ທີ່ລາວຈະເປັນເຈົ້າພາບ, ເລື່ອນງານມະຫາກໍາກິລາແຫ່ງຊາດຄັ້ງທີ່ 11 ທີ່ແຂວງຊຽງຂວາງ, ໂຈະການໂຮມຊຸມນຸມມິດຕິງ ແລະ ງານຕ່າງໆໄວ້ ກໍ່ແມ່ນໜຶ່ງໃນຫລາຍມາດຕະການເພື່ອຜົນປະໂຫຍດຂອງສ່ວນລວມ. ຍ້ອນວ່າພະຍາດ COVID 19 ຈະກະທົບເຖິງເສດຖະກິດຂອງທົ່ວໂລກ ແລະ ຂອງລາວເຮົາຢ່າງແນ່ນອນ, ສະນັ້ນພວກເຮົາຈຶ່ງຕ້ອງກຽມຕົວ, ແລະ ກຽມຈິດໃຈໄວ້, ເພາະວ່າລາວເຮົາເຄີຍມີມູນເຊື້ອເພິ່ງຕົນເອງ, ກຸ້ມຕົນເອງ ມີຄວາມດຸໝັ່ນຂະຫຍັນພຽນມາແລ້ວ ຫາກເກີດກໍລະນີຂາດແຄນສະບຽງອາຫານຕາມທ້ອງຕະຫລາດ ຂໍໃຫ້ປະຊາຊົນເຮົາ ຫັນໄປປູກຝັງລ້ຽງສັດສໍາຮອງໄວ້ ເຊິ່ງມາດຕະການຕ່າງໆຈະປະກາດອອກມາອີກໃນບໍ່ດົນນີ້. ຖ້າພວກເຮົາຫາກຮ່ວມແຮງຮ່ວມໃຈກັນ, ພະຍາດໂຄວິດ-19 ອາດຈະບໍ່ມາເຖິງພວກເຮົາກໍ່ເປັນໄປໄດ້.

ທ່ານ ທອງລຸນ ສີສຸລິດ, ນາຍົກລັດຖະມົນຕີ ຍັງໄດ້ໃຫ້ຮູ້ເຖິງມາດຕະການ ແລະ ສິ່ງຮອງຮັບທີ່ລັດຖະບານໄດ້ກະກຽມໄວ້ ຫາກມີກໍລະນີເກີດຂຶ້ນ, ໂດຍໜຶ່ງໃນນັ້ນແມ່ນພວກເຮົາບໍ່ຄວນພາກັນເດີນທາງໄປຕ່າງປະເທດ ໂດຍສະເພາະປະເທດທີ່ມີການລະບາດ ເພາະເວລາກັບມາປະເທດຕົນ ຈະນໍາເອົາສິ່ງທີ່ບໍ່ເພິ່ງປາຖະໜາເຂົ້າມານໍາ; ດັ່ງນັ້ນຈຶ່ງຂໍໃຫ້ພວກເຮົາຈົ່ງສຶກສາອົບຮົບລູກຫລານ, ສະມາຊິກພາຍໃນຄອບຄົວຂອງເຮົາ ຈົ່ງປະຕິບັດຕາມມາດຕະການທີ່ຄະນະສະເພາະກິດວາງອອກມານັ້ນຢ່າງເຄັ່ງຄັດ, ເພື່ອພ້ອມກັນຜ່ານຜ່າວິກິດການອັນນີ້ໃຫ້ໄດ້, ແຕ່ພວກເຮົາກໍ່ຍັງມີຄວາມຫວັງຢູ່ ເພາະວ່າ ສປ ຈີນ ທີ່ຖືກຜົນກະທົບໜັກໜ່ວງກວ່າໝູ່ ເປັນບ່ອນລະບາດທໍາອິດ ກໍ່ສາມາດຄວບຄຸມພະຍາດນີ້ໄດ້ໂດຍພື້ນຖານແລ້ວ; ພ້ອມກັນນັ້ນ, ທິມແພດໝໍຂອງຈີນຜູ້ທີ່ມີບົດຮຽນ ແມ່ນຍັງໄດ້ຖືກສົ່ງໄປຊ່ວຍເຫລືອປະເທດບ່ອນທີ່ມີການລະບາດຮຸນແຮງແລ້ວ, ໃນຂະນະທີ່ພວກເຮົາກໍ່ມີຄວາມເຊື່ອໝັ້ນ ໃນຄວາມພະຍາຍາມ, ຄວາມເອົາໃສ່, ແລະ ຄວາມຮັບຜິດຊອບຂອງລັດຖະບານ ແລະ ທຸກໆຄົນທີ່ມີສ່ວນຮ່ວມໃນການຮັບມືກັບວຽກງານນີ້ ກໍ່ຈະສາມາດຜ່ານຜ່າສະພາບການນີ້ໄປໄດ້ໃນທີ່ສຸດ. ໃນຕອນທ້າຍ, ທ່ານນາຍົກລັດຖະມົນຕີ ໄດ້ຢືນຢັນວ່າ ລັດຖະບານບໍ່ໄດ້ປິດບັງຂໍ້ມູນໃດໆເລີຍ, ຫາກມີສິ່ງໃດເກີດຂຶ້ນກໍ່ຈະແຈ້ງໃຫ້ປະຊາຊົນທຸກພາກສ່ວນໄດ້ຮູ້ຢ່າງທັນການ ເພື່ອຈະມີສະຕິລະວັງຕົວນໍາກັນ.