ສະຫງວນລິຂະສິດ © ສະຖານີ ວິທະຍຸກະຈາຍສຽງແຫ່ງຊາດລາວ

ວິທະຍຸກະຈາຍສຽງແຫ່ງຊາດລາວ

Lao National Radio

ຊົມເຊີຍ ວັນສ້າງຕັ້ງວິທະຍຸກະຈາຍສຽງແຫ່ງຊາດລາວ ຄົບຮອບ 60 ປີ
(13 ສິງຫາ 1960-13 ສິງຫາ 2020) ຢ່າງສຸດໃຈ

ລັດຖະບານເຫັນດີໃຫ້ເລື່ອນການສະເຫຼີມສະຫຼອງສອງງານໃຫຍ່ ຢູ່ຊຽງຂວາງໃນ ເດືອນມິນາ ທີ່ຈະມາເຖິງນີ້

ກອງປະຊຸມລັດຖະບານສະໄໝສາມັນ ປະຈໍາເດືອນກຸມພາ 2020 ໄດ້ເປີດຂຶ້ນຢ່າງເປັນທາງການ ໃນວັນທີ 19 ກຸມພາແລະ ປິດລົງໃນຕອນບ່າຍຂອງວັນທີ 20 ກຸມພາ 2020 ທີ່ສໍານັກງານນາຍົກລັດ ຖະມົນຕີ, ນະຄອນຫຼວງວຽງຈັນ, ພາຍໃຕ້ການເປັນປະທານຂອງທ່ານ ທອງລຸນ ສີສຸລິດ, ນາຍົກລັດຖະມົນຕີ, ໂດຍມີບັນດາທ່ານຮອງນາຍົກລັດຖະມົນຕີ ແລະ ສະມາຊິກລັດຖະບານ ພ້ອມດ້ວຍແຂກທີ່ຖືກເຊີນ ເຂົ້າຮ່ວມຢ່າງພ້ອມພຽງ. ໃນກອງປະຊຸມເທື່ອນີ້, ໄດ້ມີການພິຈາລະນາບັນຫາສໍາຄັນຕ່າງໆຫຼາຍບັນຫາຄື:

ກອງປະຊຸມ ໄດ້ຮັບຟັງການລາຍງານຫຍໍ້ ຈາກຂະແໜງການທີ່ກ່ຽວຂ້ອງກ່ຽວກັບ ສະພາບການປ້ອງກັນ, ຄວບຄຸມ ແລະ ມາດຕະການຮັບມືຕໍ່ການລະບາດ ແລະ ຜົນກະທົບຂອງການແຜ່ລະບາດພະຍາດອັກເສບປອດ ເຊື້ອຈຸລະໂລກສາຍພັນໃໝ່ (COVID-19). ຕໍ່ບັນຫາດັ່ງກ່າວ, ກອງປະຊຸມ ໄດ້ພ້ອມກັນຄົ້ນຄວ້າ ແລະ ມີຄວາມເປັນເອກະພາບສູງ ເພື່ອກໍານົດມາດຕະການແກ້ໄຂ ເປັນຕົ້ນ: ມອບໃຫ້ຄະນະສະເພາະກິດ ເພື່ອປ້ອງກັນ, ຄວບຄຸມ ແລະ ແກ້ໄຂການລະບາດຂອງເຊື້ອພະຍາດ COVID-19 ສືບຕໍ່ເພີ່ມທະວີຄວາມເອົາໃຈໃສ່ສະກັດກັນ ແລະ ມີມາດຕະການຮັບມືຕໍ່ການແຜ່ລະບາດ ຂອງເຊື້ອພະຍາດດັ່ງກ່າວ, ສືບຕໍ່ປະຕິບັດບັນດາມາດຕະການທີ່ມີແລ້ວ, ພ້ອມທັງ ເຝົ້າລະວັງຕະຫຼອດ 24 ຊົ່ວໂມງ ເພື່ອຮັບປະກັນບໍ່ໃຫ້ເກີດມີການແຜ່ລະບາດ ຢ່າງເດັດຂາດ; ມອບໃຫ້ທ່ານ ສອນໄຊສີພັນດອນ ຮອງນາຍົກລັດຖະມົນຕີ, ລັດຖະມົນຕີກະຊວງແຜນການ ແລະ ການລົງທຶນ ຈັດສໍາມະນາຮ່ວມກັບບັນດາຂະແໜງການ ໃນຂົງເຂດເສດຖະກິດ-ສັງຄົມທີ່ກ່ຽວຂ້ອງ, ສະຖາບັນຄົ້ນຄວ້າ ແລະ ພາກທຸລະກິດ ເພື່ອປະເມີນ ແລະ ຕີລາຄາຜົນກະທົບການລະບາດຂອງ COVID-19 ຕໍ່ເສດຖະກິດຂອງ ສປປ ລາວ ຢ່າງຮອບດ້ານ, ພ້ອມທັງສະເໜີມາດຕະການຮັບມື ຕໍ່ຜົນກະທົບດັ່ງກ່າວ ໃຫ້ລະອຽດ, ແລ້ວລາຍງານລັດຖະບານພິຈາລະນາ; ສໍາລັບການອອກວີຊາໃຫ້ນັກທ່ອງທ່ຽວ ໃຫ້ສືບຕໍ່ປະຕິບັດຕາມທີ່ໄດ້ແຈ້ງອອກຜ່ານມາ ໄປກ່ອນໄລຍະໜຶ່ງກ່ອນ, ເມື່ອໃດມີຄວາມພ້ອມທາງດ້ານຕ່າງໆແລ້ວ ຈຶ່ງສະເໜີລັດຖະບານພິຈາລະນາຕື່ມ. ສໍາລັບວີຊາປະເພດອື່ນໆ ແມ່ນໃຫ້ສືບຕໍ່ປະຕິບັດຄືເກົ່າ ໂດຍໃຫ້ບັນດາແຂວງສົມທົບກັບຂະແໜງສາທາລະນະສຸກ ກວດກາສຸຂະພາບຂອງບັນດານັກທ່ອງທ່ຽວທີ່ໄດ້ເດີນທາງເຂົ້າມາລາວ ໃຫ້ດີ ແລະ ມີຄວາມຮັບປະກັນບໍ່ໄດ້ຜູ້ທີ່ຕິດເຊື້ອພະຍາດດັ່ງກ່າວ ເຂົ້າມາພາຍໃນປະເທດ; ມອບໃຫ້ກະຊວງສຶກສາທິການ ແລະ ກິລາ ສົມທົບກັບກະຊວງການຕ່າງປະເທດ ແລະ ພາກສ່ວນກ່ຽວຂ້ອງ ສືບຕໍ່ປຸກລະດົມສຶກສາອົບຮົມໃຫ້ນັກສຶກສາລາວ ແລະ ຄົນລາວທີ່ເຮັດວຽກຢູ່ ສປ ຈີນ ໃຫ້ມີຄວາມອຸ່ນອ່ຽນ, ສືບຕໍ່ຢູ່ ສປ ຈີນ ໄປກ່ອນ ເພາະວ່າ ສປ ຈີນ ກໍ່ໄດ້ມີຄວາມເອົາໃຈໃສ່ເບິ່ງແຍງດູແລດີຢູ່ແລ້ວ.

ພ້ອມກັນນັ້ນ, ກໍ່ໃຫ້ເອົາໃຈໃສ່ຕິດຕາມໃຫ້ກໍາລັງໃຈ ແລະ ໃຫ້ການຊ່ວຍເຫຼືອ ໃນການກິນຢູ່ປະຈໍາວັນຕາມຄວາມເໝາະສົມ; ໃຫ້ສືບຕໍ່ລະດົມການຊ່ວຍເຫຼືອ ສປ ຈີນ ໃນດ້ານຕ່າງໆ ທີ່ ສປປ ລາວ ເຮົາ ສາມາດຊ່ວຍເຫຼືອໄດ້ ໂດຍຮ່ວມກັບມູນລະນິທິຂອງ ສປ ຈີນ ປະຈໍາ ສປປ ລາວ; ການຈັດງານມະຫະກໍາກິລາແຫ່ງຊາດ ທີ່ແຂວງຊຽງຂວາງ, ດ້ານຫຼັກການແມ່ນເຫັນດີໃຫ້ນໍາສະເໜີຂໍຄໍາເຫັນນໍາກອງປະຊຸມກົມການເມືອງສູນກາງພັກຕື່ມ, ສໍາລັບການສະເຫຼີມສະຫຼອງທົ່ງໄຫຫີນ ເປັນມໍລະດົກໂລກ ແລະ ງານບຸນແຮ່ພະເຈົ້າອົງຫຼວງ ແມ່ນໃຫ້ເລື່ອນໄປກ່ອນ; ໃຫ້ກະຊວງອຸດສາຫະກໍາ ແລະ ການຄ້າ ສືບຕໍ່ໍຊຸກຍູ້ການນໍາເຂົ້າ-ສົ່ງອອກສິນຄ້າ ໂດຍສະເພາະ ກັບ ສປ ຈີນ, ຖ້າມີບັນຫາໃດຂ້ອງຄາ ກໍ່ໃຫ້ຮີບຮ້ອນປຶກສາຫາລືແກ້ໄຂ ເພື່ອບໍ່ໃຫ້ການນໍາສົ່ງສິນຄ້າເຂົ້າ-ອອກ ຢຸດສະງັກ.