ສະຫງວນລິຂະສິດ © ສະຖານີ ວິທະຍຸກະຈາຍສຽງແຫ່ງຊາດລາວ

ວິທະຍຸກະຈາຍສຽງແຫ່ງຊາດລາວ

Lao National Radio

ຊົມເຊີຍ ວັນສ້າງຕັ້ງວິທະຍຸກະຈາຍສຽງແຫ່ງຊາດລາວ ຄົບຮອບ 60 ປີ
(13 ສິງຫາ 1960-13 ສິງຫາ 2020) ຢ່າງສຸດໃຈ

ລັດຖະບານເອົາໃຈໃສ່ແພດໝໍທີ່ປິ່ນປົວຜູ້ຕິດເຊື້ອພະຍາດ ໂຄວິດ-19 ເປັນຢ່າງດີ

ໃນໂອກາດຖະແຫລງຂ່າວຕໍ່ສື່ມວນຊົນ ທີ່ສູນປະຕິບັດງານຄະນະສະເພາະກິດເພື່ອປ້ອງກັນ, ຄວບຄຸມ ແລະ ແກ້ໄຂພະຍາດອັກເສບປອດທີ່ເກີດຈາກເຊື້ອຈຸລະໂລກ ສາຍພັນໃໝ່ ຫຼື ໂຄວິດ-19, ນະຄອນຫຼວງວຽງຈັນ, ທ່ານ ຮສຈ ປອ ພູທອນ ເມືອງປາກ, ຮອງລັດຖະມົນຕີກະຊວງສາທາລະນະສຸກ ຜູ້ປະຈໍາການຄະນະສະເພາະກິດເພື່ອປ້ອງກັນ, ຄວບຄຸມ ແລະ ແກ້ໄຂພະຍາດອັກເສບປອດທີ່ເກີດຈາກເຊື້ອຈຸລະໂລກສາຍພັນໃໝ່ ຫຼື ໂຄວິດ-19, ໃຫ້ຮູ້ເຖິງສະພາບ ການປະຕິບັດໜ້າທີ່ວຽກງານ ແລະ ຄວາມສ່ຽງຂອງທິມງານແພດໝໍທີ່ປິ່ນປົວຜູ້ທີ່ຕິດເຊື້ອພະຍາດໂຄວິດ-19 ວ່າ: ພະນັກງານແພດໝໍ ແລະ ພະຍາບານທັງໝົດ ທີ່ປະຕິບັດໜ້າທີ່ໃນການປິ່ນປົວຄົນເຈັບ ທີ່ຕິດເຊື້ອພະຍາດໂຄວິດ-19 ຢູ່ໂຮງໝໍມິດຕະພາບ ແມ່ນມີການຈັດເປັນທິມ, ເປັນກຸ່ມຕັ້ງໜ້າເຮັດວຽກ ເລີ່ມແຕ່ມື້ທໍາອິດທີ່ມີຄົນເຈັບເຂົ້າມາຮັບການປິ່ນປົວ ໂດຍແພດໝໍແຕ່ລະຄົນຈະປະຕິບັດໜ້າທີ່ກໍານົດ 2 ເດືອນ, ໂດຍທັງໝົດແມ່ນອາໄສພັກຢູ່ຫ້ອງພັກຂອງຕຶກອາຄານຫລັງໃໝ່ຂອງໂຮງໝໍມິດຕະພາບ ແລະ ອີກຈໍານວນໜຶ່ງແມ່ນໄປພັກຢູ່ເຮືອນຮັບແຂກຂອງກະຊວງແຮງງານ ແລະ ສະຫວັດດີການສັງຄົມ, ເຊິ່ງທຸກໆ 6 ຊົ່ວໂມງໃດຈະສັບປ່ຽນໜ້າທີ່ກັນ. ໃນໄລຍະ 6 ຊົ່ວໂມງທີ່ວ່ານີ້ ບັນດາທິມງານແພດໝໍແມ່ນຈະສຸມໃສ່ປະຕິບັດໜ້າທີ່ຢ່າງເຄັ່ງຄັດທີ່ສຸດ; ຫລັງຈາກປະຕິບັດໜ້າທີ່ສຳເລັດສົມບູນແລ້ວ ແຕ່ລະຄົນກໍ່ຈະຕ້ອງໄດ້ຖືກກັກແຍກປ່ຽວອີກເປັນເວລາ 14 ວັນ ຈຶ່ງຈະສາມາດກັບຄືນໄປຫາຄອບຄົວໄດ້, ເພາະວ່າ ບັນດາແພດໝໍທີ່ປະຕິບັດໜ້າທີ່ປິ່ນປົວຄົນເຈັບທີ່ຕິດເຊື້ອນັ້ນ ແມ່ນຈັດໃນກຸ່ມສ່ຽງກວ່າໝູ່ໝົດ, ເຖິງຈະມີເຄື່ອງ ແລະ ອຸປະກອນປ້ອງກັນຕົນເອງຄົບຊຸດກໍ່ຕາມ, ແຕ່ກໍ່ຍັງມີຄວາມສ່ຽງຫລາຍ ຍ້ອນວ່າຢູ່ອ້ອມຮອບແມ່ນເຕັມໄປດ້ວຍເຊື້ອພະຍາດຮ້າຍແຮງທີ່ໄປລວມສູນຢູ່ບ່ອນປິ່ນປົວບ່ອນດຽວ.

ໃນໂອກາດດຽວກັນນີ້, ທ່ານ ຮສຈ ປອ ພູທອນ ເມືອງປາກ, ຮອງລັດຖະມົນຕີກະຊວງສາທາລະນະສຸກ, ໄດ້ຕາງໜ້າໃຫ້ຄະນະສະເພາະກິດ ສົ່ງກໍາລັງໃຈເຖິງ ພະນັກງານຊຸດປະຕິບັດໜ້າທີຢູ່ໂຮງໝໍແຫ່ງຕ່າງໆ ທີ່ຍັງບໍ່ທັນໄດ້ກັບບ້ານກັບເຮືອນໄປສະຫລອງປີໃໝ່ກັບຄອບຄົວນັ້ນ, ທາງຄະນະສະເພາະກິດ ກໍ່ຄື ກະຊວງສາທາລະນະສຸກ ຈະເອົາໃຈໃສ່ເປັນພິເສດ, ໂດຍສະເພາະ ແມ່ນໄດ້ອໍານວຍຄວາມສະດວກດ້ານອາຫານການກິນ, ບ່ອນພັກເຊົາໃຫ້ຄະນະແພດໝໍ ເພື່ອໃຫ້ພວກເພິ່ນໄດ້ມີໂອກາດປະຕິບັດໜ້າທີ່ວຽກງານຢ່າງເຕັມສ່ວນ ທັງມີໂອກາດໄດ້ພັກຜ່ອນ; ອັນສໍາຄັນທີ່ສຸດ ແມ່ນທາງພາກສັງຄົມ ກໍ່ຄື ອົງການຈັດຕັ້ງມະຫາຊົນຕ່າງໆ ແລະ ບັນດາຄູ່ຮ່ວມພັດທະນາກໍ່ໄດ້ເອົາໃຈໃສ່ສະໜັບສະໜູນ ເປັນຕົ້ນອຸປະກອນປ້ອງກັນຕົນເອງໃຫ້ຄົບຊຸດ ແລະ ໄດ້ມາດຕະຖານ ເພື່ອໃຫ້ທິມແພດໝໍມີຄວາມສະດວກ ແລະ ປອດໄພໃນການປະຕິບັດໜ້າທີ່ວຽກງານຢ່າງເຕັມທີ່, ແລະ ພາຍຫລັງສໍາເລັດໜ້າທີ່ແລ້ວ, ທາງກະຊວງສາທາລະນະສຸກ ຍັງຈະໄດ້ປະຕິບັດນະໂຍບາຍຕາມເໝາະສົມຕື່ມອີກ. ດັ່ງນັ້ນ, ຈຶ່ງຂໍຮຽກຮ້ອງມາຍັງພະນັກງານແພດໝໍທີ່ກໍາລັງປິ່ນປົວຄົນເຈັບຢູ່ໃນປະຈຸບັນ ຈົ່ງມີຄວາມອົດທົນສູງ, ແລະຮຽກຮ້ອງເຖິງຄອບຄົວຂອງແພດໝໍຈົ່ງເສຍສະຫຼະຊ່ວຍກັນ ດ້ວຍການອານຸຍາດໃຫ້ຜົວ, ເມຍ ຫລື ລູກຫລານຂອງຕົນ ໄດ້ເຮັດວຽກອັນມີກຽດຂອງຕົນຢ່າງເຕັມສ່ວນເພື່ອປິ່ນປົວຄົນເຈັບທີ່ຕິດພະຍາດໂຄວິດ-19 ໃນປະຈຸບັນ ໃຫ້ຫາຍເຈັບປ່ວຍ ແລະ ກັບມາໃຊ້ຊີວິດປົກກະຕິຄືນໂດຍໄວ

ໂດຍ: ຄໍາກອງ ກິດຕິຄຸນ