ນະຄອນຫຼວງວຽງຈັນ, ວັນທີ 3 ສິງຫາ 2022, ກະຊວງສາທາລະນະສຸກ, ຮ່ວມກັບສະຫະພາບເອີຣົບ ແລະ ອົງການຢູນີເຊັບ ໄດ້ຈັດງານສະເຫຼີມສະຫຼອງ ສັບປະດາສາກົນຂອງການລ້ຽງລູກດ້ວຍນົມແມ່ ເຊີ່ງໄດ້ຈັດຂຶ້ນທີ່ ມະຫາວິທະຍາໄລວິທະຍາສາດສຸຂະພາບ ທີ່ ນະຄອນຫຼວງວຽງຈັນ, ສປປ ລາວ ໃນວັນທີ 3 ສິງຫາ 2022.
ພິທີ ດັ່ງກ່າວໄດ້ໃຫ້ກຽດເປັນປະທານໂດຍ ດຣ. ບຸນແຝງ ພູມມະໄລສິດ, ລັດຖະມົນຕີກະຊວງສາທາລະນະສຸກ, ໂດຍມີ ທ່ານນາງ ລາວັນ ສຸດທິສານ, ຮອງປະທານສູນກາງສະຫະພັນແມ່ຍິງລາວ, ທ່ານນາງ ບາຍບາ ຊາຣີນາ, ວ່າການແທນອຸປະທູດຂອງຄະນະຜູ້ແທນ ສະຫະພາບເອີຣົບ ປະຈໍາ ສປປ ລາວ, ເເລະ ທ່ານນາງ ດຣ. ເພຍ ເຣເບນໂລ ບຣິໂຕ, ຜູ້ຕາງໜ້າອົງການຢູນິເຊັບ ປະຈໍາ ສປປ ລາວ, ພ້ອມດ້ວຍຜູ້ຕາງໜ້າຈາກບັນດາອົງການຈັດຕັ້ງສັງຄົມ ແລະ ຄູ່ຮ່ວມພັດທະນາອື່ນໆ ເຂົ້າຮ່ວມ.
ການສະເຫຼີມສະຫຼອງ ສັບປະດາສາກົນຂອງການລ້ຽງລູກດ້ວຍນົມແມ່ນັ້ນ ແມ່ນຈັດຂຶ້ນໃນອາທິດທຳອິດຂອງທຸກໆເດືອນສິງຫາ, ໂດຍຫົວຂໍ້ຂອງການສະເຫຼີມສະຫຼອງປີນີ້ເເມ່ນ “ເພີ່ມຄວາມເຂົ້າໃຈ ແລະ ການສະໜັບສະໜູນສຳລັບການລ້ຽງລູກດ້ວຍນົມແມ່” ເຊີ່ງມີຈຸດປະສົງເພື່ອຊີ້ໃຫ້ເຫັນເຖີງຄວາມສໍາຄັນຂອງການຮ່ວມມືລະຫວ່າງພາກສ່ວນທີ່ກ່ຽວຂ້ອງທຸກຄົນໃນທົ່ວສັງຄົມເພື່ອປົກປ້ອງ, ສົ່ງເສີມ ແລະ ສະໜັບສະໜູນການລ້ຽງລູກດ້ວຍນົມແມ່. ໃນ ສປປ ລາວ, ສັບປະດາດັ່ງກ່າວ ຍັງມີຈຸດປະສົງເພື່ອສະໜັບສະໜູນການສ້າງສະພາບແວດລ້ອມທີ່ເອື້ອອຳນວຍໃນສະຖານທີ່ເຮັດວຽກ ເເລະ ນະໂຍບາຍທີ່ສົ່ງເສີມການລ້ຽງລູກດ້ວຍນົມແມ່.
ດຣ. ບຸນແຝງ ພູມມະໄລສິດ ໄດ້ກ່າວວ່າ: “ນ້ຳນົມແມ່ສາມາດໃຫ້ໂພຊະນາການ ແລະ ພູມຄຸ້ມກັນຢ່າງສົມບູນແບບໃຫ້ເເກ່ເດັກ ເເລະ ສາມາດຊ່ວຍປ້ອງກັນການຕິດເຊື້ອຕ່າງໆ, ພ້ອມຍັງສົ່ງເສີມຄວາມຜູກພັນລະຫວ່າງແມ່ ແລະ ເດັກ. ຄຸນປະໂຫຍດຂອງນ້ຳນົມແມ່ນັ້ນເເມ່ນໄດ້ຮັບການຄົ້ນຄວ້າຢ່າງດີ ແລະ ຫຼັກຖານຕ່າງໆນຍັງສະແດງໃຫ້ເຫັນວ່າເດັກນ້ອຍທີ່ກິນນົມແມ່ມີໂອກາດຢ່າງນ້ອຍ 6 ເທົ່າໃນການຢູ່ລອດໃນໄລຍະຕົ້ນເດືອນເມື່ອທຽບໃສ່ເດັກນ້ອຍທີ່ບໍ່ໄດ້ກິນນົມແມ່.”
ມາດຕະການຫຼຸດຜ່ອນການລະບາດຂອງພະຍາດ ໂຄວິດ-19 ໄດ້ສົ່ງຜົນກະທົບຕໍ່ການໃຫ້ບໍລິການດ້ານໂພຊະນາການສຳລັບເດັກໃນ ສປປ ລາວ ເເລະ ຜົນສຳເລັດຕ່າງໆທີ່ ສປປ ລາວ ໄດ້ບັນລຸໃນສຳລັບໂພຊະນາການຂອງເດັກໃນໄລຍະທີ່ຜ່ານມາ. ການປິດປະເທດ ແລະ ມາດຕະການຮັກສາໄລຍະຫ່າງນັ້ນ ກໍ່ຍັງໄດ້ເຮັດໃຫ້ພໍ່ແມ່ ແລະ ຜູ້ປົກຄອງບໍ່ສາມາດເຂົ້າເຖີງໂອກາດໃນການຮັບຄໍາປຶກສາການລ້ຽງລູກດ້ວຍນົມແມ່ ຈາກຜູ້ຊ່ຽວຊານ.
ນອກຈາກນັ້ນ, ການໄດ້ຮັບຂໍ້ມູນຂ່າວສານທີ່ບໍ່ຖືກຕ້ອງກ່ຽວກັບໂຄວິດ-19 ແລະ ການຕະຫຼາດສຳລັບສິ່ງທົດແທນນໍ້ານົມແມ່ໂດຍຜູ້ຜະລິດສິນຄ້າດັ່ງກ່າວ ກໍ່ໄດ້ສົ່ງຜົນກະທົບໃນດ້ານລົບຕໍ່ການຕັດສິນໃຈຂອງພໍ່ແມ່ໃນການໃຫ້ອາຫານລູກຂອງຕົນ ເເລະ ສຸຂະພາບຂອງເດັກນ້ອຍ.
ທ່ານນາງ ບາຍບາ ຊາຣີນາ, ວ່າການແທນອຸປະທູດຂອງຄະນະຜູ້ແທນ ສະຫະພາບເອີຣົບ ປະຈໍາ ສປປ ລາວ, ກ່າວ: “ການປົກປັກ, ສົ່ງເສີມ ແລະ ສະໜັບສະໜູນ ການລ້ຽງລູກດ້ວຍນົມແມ່ ແມ່ນຕ້ອງການການຮ່ວມມືຈາກຫຼາຍໆພາກສ່ວນ ເເລະ ພວກເຮົາທຸກຄົນມີບົດບາດທີ່ຈະຕ້ອງປະຕິບັດ, ບໍ່ວ່າຈະເເມ່ນຜູ້ໃຫ້ບໍລິການດ້ານສຸຂະພາບ ຫຼື ສະຖານທີ່ເຮັດວຽກ ແລະ ບັນດາຊຸມຊົນ, ເພື່ອແກ້ໄຂສິ່ງທ້າທາຍ ແລະ ເພີ່ມຄວາມສາມາດຂອງພາກສ່ວນທີ່ກ່ຽວຂ້ອງທຸກຄົນທີ່ເປັນສ່ວນໜຶ່ງຂອງວຽກງານສົ່ງເສີມການລ້ຽງລູກດ້ວຍນົມແມ່.”
ທ່ານ ນາງ ດຣ. ເພຍ ເຣເບນໂລ ບຣິໂຕ, ຜູ້ຕາງໜ້າອົງການຢູນິເຊັບ ປະຈໍາ ສປປ ລາວ, ໄດ້ກ່າວວ່າ: “ໃນໂອກາດ ສັບປະດາສາກົນຂອງການລ້ຽງລູກດ້ວຍນົມແມ່ນີ້, ພວກເຮົາຮຽກຮ້ອງໃຫ້ລັດຖະບານ, ຄູ່ຮ່ວມພັດທະນາ, ອົງການຈັດຕັ້ງສັງຄົມ ແລະ ພາກສ່ວນເອກະຊົນ ເພີ່ມທະວີການສະໜັບສະໜູນການສຶກສາກ່ຽວກັບການລ້ຽງລູກດ້ວຍນົມແມ່ ແລະ ການຫັນປ່ຽນລະບົບຕ່າງໆທີ່ກ່ຽວຂ້ອງກັບການສະໜັບສະໜູນການລ້ຽງລູກດ້ວຍນົມແມ່ທີ່ມີຢູ່ໃນປັດຈຸບັນ ເພື່ອຊ່ວຍສົ່ງເສີມການລ້ຽງລູກດ້ວຍນົມແມ່ ເພື່ອຜົນປະໂຫຍດຂອງແມ່ ແລະ ເດັກທຸກຄົນໃນ ສປປ ລາວ. ການລ້ຽງລູກດ້ວຍນົມແມ່ສາມາດຊ່ວຍຊີວິດໄດ້ ແລະ ຍັງປະກອບສ່ວນເຂົ້າໃນການພັດທະນາແຫຼ່ງທຶນມະນຸດ ເເລະ ສາມາດສົ່ງຜົນປະໂຫຍດໃຫ້ເເກ່ຊາດໄດ້. ອົງການຢູນິເຊັບ, ພ້ອມດ້ວຍຄູ່ຮ່ວມພັດທະນາຂອງພວກເຮົາ, ໃຫ້ຄຳໝັ້ນສັນຍາວ່າ ຈະສືບຕໍ່ເປັນພັນທະມິດຫຼັກຂອງລັດຖະບານເເຫ່ງ ສປປ ລາວ ໃນວຽກງານສົ່ງເສີມການລ້ຽງລູກດ້ວຍນົມແມ່ ເຊີ່ງເປັນວິທີແບບງ່າຍໆ ທີ່ສາມາດຊ່ວຍຊີວິດຂອງເດັກໄດ້.”
