ສະຫງວນລິຂະສິດ © ສະຖານີ ວິທະຍຸກະຈາຍສຽງແຫ່ງຊາດລາວ

ວິທະຍຸກະຈາຍສຽງແຫ່ງຊາດລາວ

Lao National Radio

ຊົມເຊີຍ ວັນສ້າງຕັ້ງວິທະຍຸກະຈາຍສຽງແຫ່ງຊາດລາວ ຄົບຮອບ 60 ປີ
(13 ສິງຫາ 1960-13 ສິງຫາ 2020) ຢ່າງສຸດໃຈ

 ລັດຖະບານ ຈະນຳໃຊ້ງົບປະມານທີ່ໄດ້ຮັບການຊ່ວຍເຫລືອຈາກສັງຄົມ ເພື່ອປ້ອງກັນພະຍາດໂຄວິດ-19 ຢ່າງໂປ່ງໃສທີ່ສຸດ

          ນັບແຕ່ວັນທີ 19 ກຸມພາ-ເຖິງວັນທີ 6 ພຶດສະພາ 2020 ລັດຖະບານໄດ້ຮັບເງິນຊ່ວຍເຫລືອຈາກອົງການຈັດຕັ້ງລັດ ແລະ ພາກສ່ວນຕ່າງຯ ຂອງສັງຄົມ ເພື່ອນຳໃຊ້ເຂົ້າໃນວຽກງານປ້ອງກັນ, ຄວບຄຸມ ແລະ ແກ້ໄຂການລະບາດຂອງພະຍາດໂຄວິດ-19 ລວມເປັນເງິນທັງໝົດ 11.307.820.998 ກີບ, 488.390 ໂດລາສະຫະລັດ ແລະ 2.581.500 ບາດ.

ທ່ານ ບຸນໂຈມ ອຸບົນປະເສີດ, ຮອງລັດຖະມົນຕີກະຊວງ ການເງິນ ໃຫ້ຮູ້ໃນໂອກາດຖະແຫລງຂ່າວຕໍ່ສື່ມວນຊົນຢູ່ກະຊວງ ສາທາລະນະສຸກ ໃນວັນທີ 6 ພຶດສະພາ 2020 ວ່າ: ເງິນທີ່ໄດ້ຮັບການຊ່ວຍເຫລືອທັງໝົດນີ້ ລັດຖະ ບານຈະບໍ່ນຳໄປໃຊ້ເປັນເງິນອັດຕານະໂຍບາຍຂອງພະນັກງານ ກໍ່ຄື ເຈົ້າໜ້າທີ່ກ່ຽວຂ້ອງທີ່ເຮັດວຽກ ເພື່ອປ້ອງກັນ, ຄວບຄຸມ ແລະ ແກ້ໄຂການລະບາດຂອງພະຍາດໂຄວິດ-19 ແຕ່ຈະນໍາໃຊ້ເພື່ອຊື້ອຸປະກອນການແພດທັງໝົດ ເພື່ອປະກອບໃຫ້ໂຮງໝໍສູນກາງ ແລະ ທ້ອງຖິ່ນໃນທົ່ວປະເທດ ໂດຍຈະຈັດຊື້ເຄື່ອງເພື່ອຕິດຕາມອາການຄົນເຈັບ ຈຳນວນ 23 ຊຸດ, ເຄື່ອງຊ່ວຍຫາຍໃຈ ຈໍານວນ 14 ຊຸດ ແລະ ລົດຂົນສົ່ງຄົນເຈັບ ຈໍານວນ 10 ຄັນ, ສະເພາະລົດຂົນສົ່ງຄົນເຈັບນີ້ ມີ 1 ຄັນຈະຈັດຊື້ຄົບຊຸດເພື່ອຂົນສົ່ງຄົນເຈັບທີ່ຕິດເຊື້ອພະຍາດໂຄວິດ-19, ສ່ວນທີ່ເຫລືອແມ່ນຈະຈັດຊື້ສະເພາະອຸປະກອນຄົບຊຸດແຕ່ສະເພາະຮັບໃຊ້ການຂົນສົ່ງຄົນເຈັບທົ່ວໄປ ເພື່ອປະກອບໃຫ້ໂຮງໝໍມິດຕະພາບ 150 ຕຽງ ເຊີ່ງເປັນໂຮງໝໍທີ່ຮັບໃຊ້ສໍາລັບການປິ່ນປົວຜູ້ຕິດເຊື້ອພະຍາດໂຄວິດ-19ສະເພາະ. ນອກຈາກນີ້ ຈະປະກອບໃຫ້ໂຮງໝໍ 103, ໂຮງໝໍເສດຖາທິລາດ, ໂຮງໝໍແຂວງ ສະຫວັນນະເຂດ, ໂຮງໝໍແຂວງ ຈໍາປາສັກ ແລະ ໂຮງໝໍແຂວງອີກຈໍານວນໜຶ່ງ.

ຮອງລັດຖະມົນຕີກະຊວງ ການເງິນ ໃຫ້ຮູ້ຕື່ມວ່າ: ຄະນະຈັດຊື້-ຈັດຈ້າງຂອງຄະນະສະເພາະກິດເພື່ອປ້ອງກັນ, ຄວບຄຸມ ແລະ ແກ້ໄຂການລະບາດຂອງພະຍາດໂຄວິດ-19 ໄດ້ຮັບການຈັດຕັ້ງຂຶ້ນແລ້ວ, ປັດຈຸບັນ ຄະນະດັ່ງກ່າວພວມຄົ້ນຄ້ວາ ແລະ ອອກແບບມາດຕະຖານເຕັກນິກ ໂດຍຈະເຊື້ອເຊີນທຸກພາກສ່ວນກ່ຽວຂ້ອງເຂົ້າຮ່ວມໃນການທາບທາມ ແລະ ປະມູນການຈັດຊື້ ເພື່ອໃຫ້ມີຄວາມໂປ່ງໃສ ແລະ ກວດສອບໄດ້ ເພື່ອໃຫ້ເງິນທີ່ໄດ້ຮັບການຊ່ວຍເຫລືອຈາກສັງຄົມຖືກນໍາໃຊ້ຢ່າງໂປ່ງໃສ ແລະ ມີປະສິດທິຜົນທີ່ສຸດ.

ໂດຍ: ມົດແດງນ້ອຍ