ວິທະຍຸກະຈາຍສຽງແຫ່ງຊາດລາວ

Lao National Radio

ຕັ້ງໜ້າຜັນຂະຫຍາຍມະຕິກອງປະຊຸມໃຫຍ່ ຄັ້ງທີ XI ຂອງພັກ ເຂົ້າສູ່ຊີວິດຈິງ
ການສ້າງປັດໄຈການຜະລິດ ໂດຍສະເພາະ ຊົນລະປະທານ ເພື່ອຮັບປະກັນການສະໜອງນໍ້າ ໃຫ້ແກ່ການຜະລິດຂອງຊາວກະສິກອນ, ຂະແໜງການກ່ຽວຂ້ອງ ໄດ້ມີການຄຸ້ມຄອງບໍລິຫານຄືແນວໃດ ເພື່ອບໍ່ໃຫ້ຄອງຊົນລະປະທານ ທີ່ໄດ້ທຸ້ມເທງົບປະມານສ້າງຂຶ້ນມາພັດທະນານໍາໃຊ້ໃນຈຸດປະສົງອື່ນ. ນີ້ແມ່ນຄໍາຊັກຖາມຂອງສະມາຊິກສະພາແຫ່ງຊາດຢູ່ໃນກອງປະຊຸມສະໄໝສາມັນ ເທື່ອ 7 ຂອງສະພາແຫ່ງຊາດ ຊຸດທີ IX.
ຕໍ່ຄໍາຖາມດັ່ງກ່າວ, ທ່ານ ລິນຄໍາ ດວງສະຫວັນ, ລັດຖະມົນຕີກະຊວງກະສິກໍາ ແລະ ປ່າໄມ້ ໄດ້ຊີ້ແຈງໃນວັນທີ 13 ມິຖຸນານີ້ວ່າ: ກະຊວງກະສິກຳ ແລະ ປ່າໄມ້ ໄດ້ເປັນເຈົ້າການໃນການຈັດຕັ້ງປະຕິບັດວຽກງານດັ່ງກ່າວ, ໃນທົ່ວປະເທດ ມີເນື້ອທີ່ນາທັງໝົດ 805,900 ເຮັກຕາ ໃນນັ້ນ: ມີໂຄງການທີ່ສາມາດສະໜອງນໍ້າໃນລະດູຝົນທັງໝົດ 19,453 ໂຄງການ, ສາມາດສະໜອງນໍ້າ ໄດ້ 317,400 ເຮັກຕາ, ໃນນັ້ນ ສະໜອງນໍ້າໃຫ້ການຜະລິດເຂົ້ານາປີ 263,300 ເຮັກຕາ ເທົ່າກັບ 32% ຂອງເນື້ອທີ່ປູກເຂົ້ານາປີທັງໝົດ ສ່ວນເຫຼືອແມ່ນສະໜອງໃຫ້ການປູກພືດ. ໃນລະດູແລ້ງ, ໂຄງການທີ່ສາມາດສະໜອງນໍ້າໃຫ້ແກ່ການຜະລິດທັງໝົດມີ 11,602 ໂຄງການ, ສາມາດສະໜອງນໍ້າໄດ້ 182,500 ເຮັກຕາ, ໃນນັ້ນ ສະໜອງໃຫ້ການຜະລິດເຂົ້ານາແຊງ 92,200 ເຮັກຕາ ເທົ່າກັບ 11.5% ຂອງເນື້ອທີ່ນາທັງໝົດ.
ໃນທັງໝົດ 19,453 ໂຄງການ ມີປະເພດໂຄງການຊົນລະປະທານນໍ້າໄຫຼເອງ ຈໍານວນ 4,007 ໂຄງການ, ສ່ວນທີ່ເຫຼືອ ແມ່ນປະເພດໂຄງການຊົນລະປະທານຈັກສູບນໍ້າໄຟຟ້າ, ຈັກສູບນໍ້າພະລັງງານແສງອາທິດ ແລະ ຝາຍ ປວງຊົນຂະໜາດນ້ອຍ.
ປັດຈຸບັນ ໂຄງການທີ່ກຳລັງດໍາເນີນ ໂດຍການລົງທຶນຂອງລັດຖະບານ ມີທັງໝົດ 8 ໂຄງການ, ຖ້າສໍາເລັດ ຈະສາມາດສະໜອງນໍ້າໄດ້ທັງໝົດ 24,900 ເຮັກຕາ, ຊຶ່ງກວມເອົາ 8 ເມືອງ ຂອງ 5 ແຂວງ. ໃນນັ້ນ, ມີໂຄງການມີຄວາມຄືບໜ້າຕໍ່າສຸດ 22% ແລະ ສູງສຸດ 78%.
ນອກຈາກ 8 ໂຄງການທີ່ກ່າວມານັ້ນ, ເພື່ອຫຼຸດຜ່ອນຄ່າໃຊ້ຈ່າຍໃນການນໍາໃຊ້ນໍ້າ ກະຊວງກະສິກຳ ແລະ ປ່າໄມ້ ຍັງໄດ້ສຸມໃສ່ການສຶກສາ, ສໍາຫຼວດ-ອອກແບບຊົນລະປະທານນໍ້າໄຫຼເອງ ດັ່ງທີ່ສະມາຊິກສະພາຫຼາຍ ທ່ານໄດ້ສະເໜີ ມີ 4 ໂຄງການ ຊຶ່ງກວມ 4 ເມືອງ ຂອງ 4 ແຂວງ. ຖ້າຫາກໂຄງການໄດ້ຮັບການຈັດຕັ້ງປະຕິບັດສຳເລັດ ຈະສາມາດສະໜອງນໍ້າຕື່ມອີກ 10,200 ກວ່າ ເຮັກຕາ.
ລັດຖະມົນຕີກະຊວງກະສິກໍາ ແລະ ປ່າໄມ້ ໃຫ້ຮູ້ຕື່ມວ່າ: ວຽກຄຸ້ມຄອງ ແລະ ນໍາໃຊ້ຊົນລະ ປະທານ: ນອກຈາກສຸມໃສ່ການລົງທຶນໃນການກໍ່ສ້າງພື້ນຖານໂຄງລ່າງແລ້ວ ກໍໄດ້ອອກນິຕິກຳຈຳນວນໜຶ່ງ ເຊັ່ນ: ຂໍ້ຕົກລົງວ່າດ້ວຍການສ້າງຕັ້ງ ແລະ ຄຸ້ມຄອງກຸ່ມຜູ້ນໍາໃຊ້ນໍ້າ ຊົນລະປະທານ; ຂໍ້ຕົກລົງວ່າດ້ວຍການສ້າງຕັ້ງ ແລະ ຄຸ້ມຄອງກອງທຶນພັດທະນາຊົນລະທານ ປະກາດໃຊ້ໃນປີ 2024.
ສໍາລັບການແກ້ໄຂບັນຫາໃນຕໍ່ໜ້າ ສໍາລັບໂຄງການ ຫ້ວຍອາໄກ້ ມີຄວາມຄືບໜ້າ 74% ແລະ ຫ້ວຍ ຜາແລງ ມີຄວາມຄືບໜ້າ 36%. ທັງສອງໂຄງການ ບໍລິສັດຮັບເໝົາກໍ່ສ້າງ ແມ່ນມີຄວາມກຽມພ້ອມໃນການຈັດຕັ້ງປະຕິບັດ, ຍັງແຕ່ລໍຖ້າການດັດແກ້ມູນຄ່າໂຄງການ, ປັດຈຸບັນ ລັດຖະບານກໍາລັງຄົ້ນຄວ້າ ເພື່ອສະເໜີສະພາແຫ່ງຊາດພິຈາລະນາຮັບຮອງ. ສ່ວນໂຄງການຫ້ວຍທ່າຮາວ ແມ່ນໄດ້ຮັບຮອງເອົາການສະເໜີຂໍດັດແກ້ມູນຄ່າ ຈາກສະພາແຫ່ງຊາດແລ້ວ, ມາຮອດປັດຈຸບັນ ສໍາເລັດການກໍ່ສ້າງ 68% ແລະ ຄາດຄະເນຈະສໍາເລັດຕາມແຜນໃນທ້າຍປີ 2026.
May be an image of 3 people and text