ສຳນັກພິມ ແລະ ຈຳໜ່າຍພາສາຕ່າງປະເທດຈີນ ຮ່ວມກັບສູນໂຄສະນາອາຊີ-ປາຊີຟິກ, ກຸ່ມການສື່ສານສາກົນຈີນ, ສຳນັກພິມ ແລະ ຈຳໜ່າຍປະຊາຊົນຟູຈ້ຽນ, ສຳນັກພິມ ແລະ ຈຳໜ່າຍປຶ້ມແຫ່ງລັດ ສປປ ລາວ ໄດ້ຈັດພິທີມອບ-ຮັບປຶ້ມຫຼຸດພົ້ນອອກຈາກຄວາມທຸກຍາກສະບັບພາສາລາວຄັ້ງທຳອິດ ແລະ ກອງປະຊຸມສຳມະນາກ່ຽວກັບການບໍລິຫານປະເທດລະຫວ່າງລາວ-ຈີນ ຂຶ້ນໃນວັນທີ 4 ກັນຍານີ້ ທີ່ຫໍປະຊຸມແຫ່ງຊາດ ນະຄອນຫຼວງວຽງຈັນ ໃຫ້ກຽດມອບ ໂດຍທ່ານ ຕູ້ຈ້ານຢວນ ປະທານກຸ່ມການສື່ສານສາກົນຈີນ ແລະ ເປັນກຽດຮັບໂດຍ ທ່ານ ທອງສະລິດ ມັງໜໍ່ເມກ ຄະນະເລຂາທິການສູນກາງພັກ ຫົວໜ້າຫ້ອງວ່າການສູນກາງພັກ ໂດຍມີທ່ານນາງ ຟາງຫົງ ເອກອັກຄະລັດຖະທູດວິສາມັນຜູ້ມີອຳນາດເຕັມ ສປ ຈີນ ປະຈຳລາວ, ທ່ານ ຮູຄ່າຍໝິນ ຜູ້ອຳນວຍການສຳນັກພິມ ແລະ ຈຳໜ່າຍພາສາຕ່າງປະເທດຈີນ ພ້ອມດ້ວຍການນຳຝ່າຍລາວ ແລະ ຈີນ ເຂົ້າຮ່ວມເປັນສັກຂີພິຍານ.
ທ່ານ ໂພສີ ແກ້ວມະນີວົງ ຮອງລັດຖະມົນຕີກະຊວງຖະແຫຼງຂ່າວ, ວັດທະນະທຳ ແລະ ທ່ອງທ່ຽວ ກ່າວວ່າ: ສປປ ລາວ ແລະ ສປ ຈີນ ເປັນປະເທດເພື່ອນມິດບ້ານໃກ້ເຮືອນຄຽງທີ່ມີສາຍພູ ແລະ ແມ່ນໍ້າຕິດຈອດກັນປະຊາຊົນສອງຊາດໄດ້ມີການໄປມາຫາສູ່ກັນມາແຕ່ບູຮານນະການ ຊຶ່ງສອງປະເທດລາວ-ຈີນ ພວມສືບຕໍ່ປະກອບສ່ວນ ແລະ ເສີມຂະຫຍາຍສາຍພົວພັນໃຫ້ມີຜົນໄດ້ຮັບອັນໃຫຍ່ຫຼວງ ເປັນຕົ້ນການຮ່ວມມືໃນການຮັບຮູ້ທິດສະດີ, ວັດທະນະທໍາອັນຍອດຍິ່ງເພື່ອແລກປ່ຽນປະສົບການ ແລະ ແບ່ງຄວາມຮູ້ໃນການຫຼຸດພົ້ນອອກຈາກຄວາມທຸກຍາກ. ປຶ້ມຫົວນີ້ແມ່ນປຶ້ມທີ່ໃຫ້ຂໍ້ຄິດທີ່ເປັນປະໂຫຍດຫຼາຍຢ່າງ ເປັນຕົ້ນການຮຽນຮູ້ການຕໍ່ສູ້ກັບຄວາມທຸກຍາກ, ໃຫ້ຄວາມເຂົ້າໃຈ ແລະ ແນະນໍາການຈັດຕັ້ງປະຕິບັດເນື້ອໃນຈິດໃຈທີ່ເວົ້າກ່ຽວກັບເອກະລັກສະເພາະຂອງການຫຼຸດພົ້ນອອກຈາກຄວາມທຸກຍາກ ໃຫ້ກາຍເປັນບົດສັງລວມນິທານ ຊຶ່ງສະທ້ອນໃຫ້ເຫັນລັກສະນະສະເພາະ, ລັກສະນະທີ່ມີຊີວິດຊີວາ ແລະ ລັກສະນະລະອຽດອ່ອນ ເພື່ອຈະໄດ້ສຶກສາຮຽນຮູ້ຕໍ່ກັບເນື້ອໃນນະໂຍບາຍຂອງ ປະທານ ສີຈິ້ນຜິງ ວ່າດ້ວຍການຫຼຸດພົ້ນອອກຈາກຄວາມທຸກຍາກຂອງ ສປ ຈີນ ທີ່ໄດ້ຜັນຂະຫຍາຍອອກ ແລະ ເວົ້າເຖິງ ຊຶ່ງລວມທັງໝົດມີ 27 ຫົວຂໍ້ຍ່ອຍ ຊຶ່ງແຕ່ລະຫົວຂໍ້ແມ່ນມີເນື້ອຫາສາລະຄວາມຮູ້ທີ່ໂດດເດັ່ນ ແລະ ມີຄວາມສໍາຄັນໃຫ້ແກ່ການຄົ້ນຄວ້າເພື່ອປະກອບສ່ວນເຂົ້າໃນການພັດທະນາເສດຖະກິດ, ວັດທະນະທໍາ ແລະ ສັງຄົມ.
ການມອບປຶ້ມໃນຄັ້ງນີ້, ເປັນການປະກອບສ່ວນ ແລະ ເສີມຂະຫຍາຍສາຍພົວພັນຂອງສອງປະເທດລາວ – ຈີນ ຊຶ່ງປຶ້ມດັ່ງກ່າວຖືວ່າເປັນບົດຮຽນທີ່ລໍ້າຄ່າໃຫ້ແກ່ ສປປ ລາວ ໄດ້ສຶກສາ ແລະ ຄົ້ນຄວ້າຕໍ່ກັບນະໂຍບາຍຂອງປະທານ ສີຈິ້ນຜິງ ໃນວຽກງານການແກ້ໄຂຄວາມທຸກຍາກໃນໄລຍະຜ່ານມາ ແລະ ເປັນໝາກຜົນແຫ່ງຄວາມສໍາເລັດທີ່ຍິ່ງໃຫຍ່ຂອງ ສປ ຈີນ. ຈໍານວນປຶ້ມທີ່ໄດ້ນໍາມາມອບໃຫ້ຝ່າຍລາວໃນຄັ້ງນີ້ກະຊວງ ຖວທ ຈະໄດ້ນໍາໄປມອບຕໍ່ໃຫ້ບັນດາອົງການສາຍພັກ, ສາຍລັດໃນຂັ້ນສູນກາງ ແລະ ທ້ອງຖິ່ນ.
ທ່ານ ໂພສີ ແກ້ວມະນີວົງ ຍັງໄດ້ຕາງໜ້າໃຫ້ກະຊວງ ຖວທ ກໍຄືຕາງໜ້າໃຫ້ພັກ-ລັດຖະບານ ສປປ ລາວ ສະແດງຄວາມຂອບໃຈ ແລະ ຮູ້ບຸນຄຸນຢ່າງສູງມາຍັງພັກ-ລັດຖະບານ ສປ ຈີນ ກໍຄືກຸ່ມການສື່ສານສາກົນຈີນ ແລະ ສຳນັກພິມ ແລະ ຈຳໜ່າຍພາສາຕ່າງປະເທດ ສປ ຈີນທີ່ໄດ້ນໍາເອົາປຶ້ມດັ່ງກ່າວມາໃຫ້ມອບໃຫ້ ສປປ ລາວ ໃນຄັ້ງນີ້ ແລະ ຂໍອວຍພອນໃຫ້ສາຍພົວພັນມິດຕະພາບອັນເປັນມູນເຊື້ອ ແລະ ການພົວພັນແບບຄູ່ຮ່ວມຊາຕາກຳສັງຄົມນິຍົມລະຫວ່າງສອງພັກ, ສອງລັດ ແລະ ປະຊາຊົນສອງຊາດລາວ-ຈີນ, ຈີນ-ລາວ ຈົ່ງໝັ້ນຄົງຂະໜົງແກ່ນ ແລະ ສືບຕໍ່ໄດ້ຮັບການເສີມຂະຫຍາຍຢ່າງບໍ່ຢຸດຢັ້ງ.
ການມອບປຶ້ມຄັ້ງນີ້ ໄດ້ຮັບການອຸປະຖໍາໂດຍ: ຫ້ອງວ່າການຖະແຫຼງຂ່າວລັດຖະບານ ສປ ຈີນ, ກຸ່ມການສື່ສານສາກົນຈີນ ແລະ ສະຖານທູດສປ ຈີນ ປະຈຳລາວ.
