ລັດຖະບານ ສຸມໃສ ແກ້ໄຂ 6ວາລະສໍາຄັນຂອງຊາດ
ທ່ານ ສົມກຽດ ພະສີ, ຮອງລັດຖະມົນຕີ, ຮອງຫົວໜ້າຫ້ອງວ່າການສໍານັກງານນາຍົກລັດຖະມົນຕີ,ຖະແຫລງຕໍ່ສື່ມວນຊົນ ໃນວັນທີ 26 ເມສາ 2024 ເຖິງຜົນຂອງກອງປະຊຸມສະໄໝສາມັນຂອງລັດຖະບານ ປະຈຳເດືອນເມສາ 2024 ໄດ້ໄຂຂຶ້ນໃນຕອນເຊົ້າວັນທີ 25 ແລະ ອັດລົງໃນຕອນເຊົ້າວັນທີ 26 ເມສາ 2024 ທີ່ສໍານັກງານນາຍົກລັດ ຖະມົນຕີ, ພາຍໃຕ້ການເປັນປະທານ ຂອງທ່ານ ສອນໄຊ ສີພັນດອນ, ນາຍົກລັດຖະມົນຕີ; ມີບັນດາທ່ານ ຮອງນາຍົກ ລັດຖະມົນຕີ, ສະມາຊິກລັດຖະບານ, ຜູ້ຕາງໜ້າກະຊວງ-ອົງການ ເຂົ້າຮ່ວມແບບເຊິ່ງໜ້າ; ການນໍາຂອງບັນດາແຂວງ ແລະ ນະຄອນຫຼວງວຽງຈັນ ເຂົ້າຮ່ວມຜ່ານລະບົບກອງປະຊຸມທາງໄກ ເພື່ອຮັບຟັງການລາຍງານສະພາບພົ້ນເດັ່ນ ປະຈຳເດືອນເມສາ ແລະ ທິດທາງແຜນການ ປະຈຳເດືອນພຶດສະພາ 2024.
ທ່ານ ສົມກຽດ ພະສີ ໃຫ້ຮ້ວ່າ: ກອງປະຊຸມຄັ້ງນີ້ ໄດ້ພ້ອມກັນຄົ້ນຄວ້າ, ປຶກສາຫາລື ແລະ ປະກອບຄຳເຫັນດ້ວຍຄວາມເອົາໃຈ ໃສ່ ຕໍ່ 6 ວາລະ ດັ່ງນີ້:
ວາລະທີ 1. ກອງປະຊຸມເຫັນດີດ້ານຫຼັກການຮັບຮອງເອົາ ການສະຫຼຸບວຽກງານພົ້ນເດັ່ນ ຂອງລັດຖະບານປະຈໍາເດືອນເມສາ ແລະ ທິດທາງແຜນການ ປະຈຳເດືອນພຶດສະພາ 2024 ໂດຍມອບໃຫ້ຫ້ອງວ່າການສໍານັກງານນາຍົກ ລັດຖະມົນຕີ ປັບປຸງຕາມການປະກອບຄຳເຫັນຂອງສະມາຊິກລັດຖະບານ. ພ້ອມກັນນີ້ ໃຫ້ບັນດາຂະແໜງການກ່ຽວ ຂ້ອງ ສືບຕໍ່ເອົາໃຈໃສ່ວຽກງານຈຸດສຸມໃນເດືອນພຶດສະພາ ເປັນຕົ້ນ:
1) ສຸມໃສ່ກະກຽມຄວາມພ້ອມດ້ານເນື້ອໃນ ເພື່ອລາຍງານຕໍ່ກອງປະຊຸມຄົບຄະນະບໍລິຫານງານສູນກາງພັກ ຄັ້ງທີ 8 ສະໄໝທີ XI ທີ່ຈະຈັດຂຶ້ນໃນຕໍ່ໍ່ໜ້ານີ້;
2) ຈັດຕັ້ງຜັນຂະຫຍາຍທິດຊີ້ນຳຂອງກົມການເມືອງສູນກາງພັກ ຕາມມະຕິ 04/ກມສພ, ລົງວັນທີ 11 ເມສາ 2024 ວ່າດ້ວຍການສ້າງເສດຖະກິດເອກະລາດ ເປັນເຈົ້າຕົນເອງ ຫຼື ເອີ້ນວ່າ “ສອຈ’’ ໃນໄລຍະໃໝ່ ໃຫ້ເປັນແຜນວຽກ, ແຜນງານ ແລະ ມາດຕະການຕົວຈິງ ເຂົ້າໃນການຈັດຕັ້ງປະຕິບັດຂົງເຂດວຽກງານ ຂອງຂະແໜງການຕົນ;
3) ເປັນເຈົ້າການຈັດຕັ້ງປະຕິບັດດຳລັດ ສະບັບເລກທີ 381/ນຍ, ລົງວັນທີ 21 ທັນວາ 2023 ວ່າດ້ວຍການກໍານົດໜ້າວຽກ ແລະ ແບ່ງຄວາມຮັບຜິດຊອບ ໃນການຈັດຕັ້ງປະຕິບັດແຜນພັດທະ ນາເສດຖະກິດ-ສັງຄົມແຫ່ງຊາດ 5 ປີ ຄັ້ງທີ IX ທ້າຍສະໄໝ ຮອດປີ 2025, ແຜນພັດທະນາເສດຖະກິດ-ສັງຄົມແຫ່ງຊາດ, ແຜນງົບປະມານແຫ່ງລັດ ແລະ ແຜນເງິນຕາ ປະຈໍາປີ 2024 ແລະ ແຜນການແກ້ໄຂຜົນການກວດສອບ; ແລະ ມະຕິຂອງລັດຖະບານ ສະບັບເລກທີ 17/ລບ, ລົງວັນທີ 12 ທັນວາ 2023 ວ່າດ້ວຍການແບ່ງຄວາມຮັບຜິດຊອບ ໃນການຈັດຕັ້ງປະຕິບັດມະຕິຂອງຄະນະບໍລິຫານງານສູນກາງພັກ ວ່າດ້ວຍສືບຕໍ່ຍູ້ແຮງການຜັນຂະຫຍາຍແນວທາງການປ່ຽນແປງໃໝ່ສູ່ລວງເລິກ ສ້າງການຫັນປ່ຽນທີ່ແຂງແຮງ, ເລິກເຊິ່ງ ແລະ ຮອບດ້ານ ໃນການນໍາພາຂອງພັກ ສະບັບເລກທີ 05/ຄບສພ, ລົງວັນທີ 05 ກັນຍາ 2023.
4) ສືບຕໍ່ແກ້ໄຂບັນຫາເຄັ່ງຮ້ອນທາງດ້ານເສດຖະກິດ-ການເງິນ ໂດຍຈັດຕັ້ງປະຕິບັດບັນດາມາດຕະການ, ນິຕິກໍາ ທີ່ຄະນະສະເພາະກິດ 19/ກມສພ ວາງອອກໃຫ້ເປັນຮູບປະທຳຕົວຈິງ ເພື່ອແກ້ໄຂບັນຫາເງິນເຟີ້, ອັດຕາແລກປ່ຽນ, ແກ້ໄຂບັນຫານໍ້າມັນເຊື້ອໄຟ ດ້ວຍຫຼາຍວິທີ ແລະ ຫຼາຍມາດຕະການ ເພື່ອບໍ່ໃຫ້ຕົກຢູ່ໃນສະພາບຂາດເຂີນນໍ້າມັນເຊື້ອໄຟ, ການຄຸ້ມຄອງລາຄາສິນຄ້າ ບໍ່ໃຫ້ມີການສວຍໂອກາດຂຶ້ນລາຄາ, ສົ່ງເສີມການຜະລິດ ເພື່ອບໍລິໂພກ ແລະ ທົດແທນການນໍາເຂົ້າ, ການແກ້ໄຂໜີ້ສິນຕ່າງປະທດ, ການຊຸກຍູ້ການສົ່ງອອກ ເພື່ອນໍາເອົາເງິນຕາຕ່າງປະເທດເຂົ້າມາໃຫ້ຫຼາຍຂຶ້ນ; ການດໍາເນີນທຸລະກິດນໍາເຂົ້າ ແລະ ສົ່ງອອກສິນຄ້າ, ການລົງທຶນຜ່ານລະບົບທະນາຄານ ໃຫ້ຫຼາຍຂຶ້ນ;
5) ສືບຕໍ່ສຸມໃສ່ເກັບລາຍຮັບງົບປະມານ ຈາກທຸກແຫຼ່ງລາຍຮັບ ໃຫ້ໄດ້ຕາມແຜນ ຫຼື ລື່ນແຜນ ໃນນັ້ນ ໃຫ້ເລັ່ງຫັນການເກັບລາຍຮັບເປັນທັນສະໄໝ ຄຽງຄູ່ກັບການແກ້ໄຂຊ່ອງຫວ່າງການຮົ່ວໄຫຼຂອງງົບປະມານ ທຸກຮູບແບບ ຢ່າງເຂັ້ມງວດ ແລະ ເດັດຂາດ; ພ້ອມກັນນັ້ນ ກໍໃຫ້ສຸມໃສ່ຄຸ້ມຄອງການປະຕິບັດແຜນລາຍຈ່າຍ ດ້ວຍມາດຕະການປະຢັດ ແລະ ຕ້ານການຟູມເຟືອຍ ໂດຍສະເພາະ ໃຫ້ເອົາໃຈໃສ່ປະຢັດເງິນຕາຕ່າງປະເທດ;
6) ສືບຕໍ່ສຸມໃສ່ຊຸກຍູ້ຕິດຕາມ, ກວດກາໂຄງການລົງທຶນຂະໜາດໃຫຍ່ ໃຫ້ມີຄວາມຄືບໜ້າ ແລະ ສໍາເລັດຕາມແຜນ ໂດຍສະເພາະ ບັນດາໂຄງການພະລັງງານໄຟຟ້າ ທີ່ຈະຂາຍໄຟໄປປະເທດໃກ້ຄຽງ, ໂຄງການທາງດ່ວນ, ໂຄງການເຂດເສດຖະກິດພິເສດ ແລະ ໂຄງການອື່ນໆ ລວມທັງ ການແກ້ໄຂບັນຫາການສະໜອງໄຟຟ້າພາຍໃນ ໃຫ້ພຽງພໍ ຕາມທີ່ລັດຖະບານ ໄດ້ຊີ້ນຳຜ່ານມາ;
7) ສືບຕໍ່ຊຸກຍູ້ຕິດຕາມ, ກວດກາບັນດາບໍລິສັດຂຸດຄົ້ນບໍ່ແຮ່ ໃນຂອບເຂດທົ່ວປະເທດ ໂດຍໃຫ້ເອົາໃຈໃສ່ປະຕິ ບັດມາດຕະການ ປົກປັກຮັກສາສິ່ງແວດລ້ອມ ຢ່າງເຂັ້ມງວດ, ຖ້າຫາກມີການລະເມີດ ກໍ່ຕ້ອງມີມາດຕະການແກ້ໄຂທີ່ເຂັ້ມງວດ, ເດັດຂາດ ຕາມກົດໝາຍ ແລະ ລະບຽບການກ່ຽວຂ້ອງ;
8) ສືບຕໍ່ປັບປຸງບັນດາເສັ້ນທາງຫຼວງແຫ່ງຊາດ, ເສັ້ນທາງໃນເທດສະບານບັນດາຕົວເມືອງ, ແຂວງຕ່າງໆ ທີ່ເປ່ເພ່ ໃຫ້ສໍາເລັດກ່ອນລະດູຝົນ;
9) ສືບຕໍ່ແກ້ໄຂບັນຫາມົນລະພິດທາງອາກາດ ໂດຍສະເພາະ ການຈູດປ່າ ເພື່ອທຳການຜະລິດ ໂດຍສົມທົບກັບອົງການປົກຄອງທ້ອງຖິ່ນ ເພີ່ມທະວີໃນການຕິດຕາມຢ່າງໃກ້ຊິດ; ຕິດຕາມບັນຫາຝຸ່ນລະອອງ PM 2.5 ທີ່ອາດຈະກະທົບຕໍ່ສຸຂະພາບຂອງປະຊາຊົນ; ໃຫ້ພາກສ່ວນກ່ຽວຂ້ອງ ເອົາໃຈໃສ່ກຽມແຜນຮັບມືບັນຫາໄພພິບັດທາງທຳມະຊາດ ແລະ ບັນຫາສະພາບອາກາດຮ້ອນ ດ້ວຍວິທີທີ່ເໝາະສົມ ແລະ ແຈ້ງໃຫ້ສັງຄົມຮັບຊາບ ເປັນແຕ່ລະໄລຍະ ຢ່າງທັນການ.
10) ສືບຕໍ່ປະຕິບັດແຜນຍຸດທະສາດ ຫັນລົງກໍ່ສ້າງຮາກຖານການເມືອງ, ພັດທະນາຊົນນະບົດ ແລະ ແກ້ໄຂຄວາມທຸກຍາກຂອງປະຊາຊົນ ຕິດພັນກັບການສ້າງທ່າສະໜາມປ້ອງກັນຊາດ-ປ້ອງກັນຄວາມສະຫງົບທົ່ວປວງຊົນ ແລະ ວຽກງານ 3 ສ້າງ; ສົມທົບກັບອົງການປົກຄອງທ້ອງຖິ່ນ ເພື່ອແກ້ໄຂບັນຫາຢູ່ຈຸດທີ່ຍັງບໍ່ທັນມີຄວາມສະຫງົບດີ; ເອົາໃຈໃສ່ວຽກງານຄຸ້ມຄອງຊາຍແດນ, ເລັ່ງໃສ່ການເຄື່ອນໄຫວລາດຕະເວນ, ສະກັດກັ້ນອັດປ່ອງຂ້າມລອຍ, ເຂົ້າເມືອງຜິດກົດໝາຍ, ຕິດຕາມແກ້ໄຂປະກົດການຫຍໍ້ທໍ້ໃນທົ່ວສັງຄົມ ດ້ວຍຫຼາຍຮູບການ ແລະ ທັນສະພາບການ ໂດຍສະເພາະ ບັນຫາຄາດຕະກໍາ, ຂີ້ລັກງັດແງະ, ປຸ້ນຈີ້ຊີງຊັບ, ບັນຫາອາວຸດເຖື່ອນ, ບັນຫາມົ້ວສຸມ ແລະ ໃຊ້ສານເສບຕິດປະເພດຕ່າງໆ ຢູ່ຕາມສະຖານທີ່ບັນເທີງ ແລະ ສະຖານທີ່ອື່ນໆ;
11) ສືບຕໍ່ຕິດຕາມສະພາບພົ້ນເດັ່ນ ທີ່ເກີດຂຶ້ນຢູ່ພາກພື້ນ ແລະ ສາກົນ ໃຫ້ທັນການ; ສືບຕໍ່ກະກຽມໃຫ້ແກ່ການ ເຄື່ອນໄຫວວຽກງານຕ່າງປະເທດ ຂອງການນຳຂັ້ນສູງ, ພ້ອມທັງ ເອົາໃຈໃສ່ຜັນຂະຫຍາຍຜົນການເຄື່ອນໄຫວ ໃຫ້ມີຜົນສຳເລັດ.
• ສຳລັບການຈັດຕັ້ງປະຕິບັດ ຄໍາສັ່ງເລກທີ 11/ນຍ, ລົງວັນທີ 21 ກໍລະກົດ 2023, ກອງປະຊຸມມອບໃຫ້ບັນດາຂະແໜງການ ແລະ ພາກສ່ວນກ່ຽວຂ້ອງ ສືບຕໍ່ເພີ່ມທະວີການຈັດຕັ້ງປະຕິບັດຄຳສັ່ງດັ່ງກ່າວ ແລະ ປະຕິບັດບັນດາມາດຕະການໃໝ່ ຕາມທີ່ກະຊວງກະສິກຳ ແລະ ປ່າໄມ້ ໄດ້ລາຍງານ ໃນນັ້ນ ກໍໃຫ້ກະຊວງການເງິນ ເປັນໃຈກາງສົມທົບກັບ ກະຊວງກະສິກຳ ແລະ ປ່າໄມ້ ແລະ ພາກສ່ວນກ່ຽວຂ້ອງ ຮີບຮ້ອນຄົ້ນຄວ້າມາດຕະການທາງດ້ານການເງິນ ເປັນຕົ້ນ ການເກັບພາສີຂາອອກ ສຳລັບການສົ່ງອອກວັດຖຸດິບ ທີ່ບໍ່ທັນໄດ້ປຸງແຕ່ງ ເພື່ອຈຳກັດການສົ່ງອອກວັດຖຸດິບ ແລະ ສົ່ງເສີມການປຸງແຕ່ງເປັນຜະລິດຕະພັນສຳເລັດຮູບພາຍໃນ.
• ຕໍ່ກັບການປັບປຸງຄຸນນະພາບການສຶກສາ ແລະ ການແກ້ໄຂການປະລະການຮຽນຂອງນັກຮຽນ, ກອງປະຊຸມ ມອບໃຫ້ກະຊວງສຶກສາທິການ ແລະ ກິລາ ຮີບຮ້ອນສືບຕໍ່ປັບປຸງຕາມການປະກອບຄຳເຫັນຂອງສະມາຊິກລັດຖະບານ ໃຫ້ສຳເລັດ ແລະ ທັນລາຍງານ ຕໍ່ກອງປະຊຸມຄົບຄະນະບໍລິຫານງານສູນກາງພັກ ຄັ້ງທີ 8 ສະໄໝທີ XI.
ວາລະທີ 2: ກອງປະຊຸມໄດ້ພິຈາລະນາ ແລະ ເຫັນດີດ້ານຫຼັກການ ຮັບຮອງເອົາ ຮ່າງເບື້ອງຕົ້ນກ່ຽວກັບການສະຫຼຸບຕີລາຄາການຈັດຕັ້ງປະຕິບັດແຜນພັດທະນາເສດຖະກິດ-ສັງຄົມ 5 ປີ ຄັ້ງທີ IX (2021-2025) ແລະ ຮ່າງແຜນພັດທະນາເສດຖະກິດ-ສັງຄົມ 5 ປີ ຄັ້ງທີ X (2026-2030); ການຕີລາຄາການຈັດຕັ້ງປະຕິບັດແຜນພັດນາເສດຖະ ກິດ-ສັງຄົມ, ແຜນເງິນຕາ, ງົບປະມານແຫ່ງລັດ 6 ເດືອນຕົ້ນປີ ແລະ ທິດທາງ 6 ເດືອນທ້າຍປີ 2024 ຕິດພັນກັບການປະຕິບັດ 2 ວາລະແຫ່ງຊາດ. ກອງປະຊຸມ ມອບໃຫ້ກະຊວງແຜນການ ແລະ ການລົງທຶນ ແລະ ກະຊວງປ້ອງກັນຄວາມສະຫງົບ ສົມທົບກັບພາກສ່ວນກ່ຽວຂ້ອງ ຮີບຮ້ອນປັບປຸງບັນດາເນື້ອໃນເອກະສານດັ່ງກ່າວ ຕາມການປະກອບຄຳເຫັນຂອງສະມາຊິກລັດຖະບານ ໃຫ້ສຳເລັດ ແລະ ທັນລາຍງານ ຕໍ່ກອງປະຊຸມຄົບຄະນະບໍລິຫານງານສູນກາງພັກ ຄັ້ງທີ 8 ສະໄໝທີ XI ທີ່ຈະຈັດຂຶ້ນໃນຕໍ່ໜ້ານີ້.
ວາລະທີ 3: ກອງປະຊຸມໄດ້ພິຈາລະນາ ແລະ ເຫັນດີດ້ານຫຼັກການ ຮັບຮອງເອົາຮ່າງແຜນຍຸດທະສາດການພັດທະນາເຂດເສດຖະກິດພິເສດ ແຕ່ປີ 2021-2030 ໂດຍມອບໃຫ້ກະຊວງແຜນການ ແລະ ການລົງທຶນ ສົມທົບກັບຂະແໜງການ ແລະ ພາກສ່ວນກ່ຽວຂ້ອງ ປັບປຸງຕາມການປະກອບຄຳເຫັນຂອງສະມາຊິກລັດຖະບານ ເປັນຕົ້ນ ການກຳນົດໄລຍະເວລາ ຂອງຍຸດທະສາດ ໃຫ້ສອດຄ່ອງກົມກຽວກັບໄລຍະເວລາຂອງແຜນພັດທະນາເສດຖະກິດ-ສັງຄົມ; ປັບປຸງບາງຄໍາສັບ ທີ່ຍັງບໍ່ທັນສອດຄ່ອງ; ການກຳນົດໜ້າວຽກ ແລະ ການມີສ່ວນຮ່ວມຂອງຂະແໜງການຕ່າງໆ ໃຫ້ຄົບຖ້ວນຕື່ມ; ການນິຍາມຄຳສັບ ໃຫ້ຈະແຈ້ງຊັດເຈນ; ພ້ອມທັງ ໃຫ້ພິຈາລະນານຳໄປຈັດກອງປະຊຸມສຳມະນາລະດົມຄວາມຄິດເຫັນຕື່ມ ເພື່ອເຮັດໃຫ້ແຜນຍຸດທະສາດດັ່ງກ່າວ ມີເນື້ອໃນຄົບຖ້ວນສົມບູນ ແລະ ສາມາດຈັດຕັ້ງປະຕິບັດໄດ້ ຢ່າງເປັນຮູບປະທຳ ແລະ ມີປະສິດທິຜົນ.
ວາລະທີ 4: ກອງປະຊຸມໄດ້ພິຈາລະນາ ແລະ ເຫັນດີດ້ານຫຼັກການ ຮັບຮອງເອົາຮ່າງຍຸດທະສາດ ກ່ຽວກັບຜູ້ອາຍຸສູງ ໄລຍະ 10 ປີ ໂດຍມອບໃຫ້ກະຊວງແຮງງານ ແລະ ສະຫວັດດີການສັງຄົມ ສົມທົບກັບຂະແໜງການ ແລະ ພາກສ່ວນກ່ຽວຂ້ອງ ປັບປຸງຕາມການປະກອບຄໍາເຫັນຂອງສະມາຊິກລັດຖະບານ ເປັນຕົ້ນ ກໍານົດໄລຍະເວລາ 10 ປີ ຮອດປີ 2035, ການຈັດລຽງເນື້ອໃນໂຄງຮ່າງຍຸດທະສາດ; ການນໍາໃຊ້ຄໍາສັບເຕັກນິກ ໃຫ້ສອດຄ່ອງກັບຕົວຈິງຕື່ມ; ການກຳນົດບັນດາກິດຈະກຳ ເພື່ອສະແດງຄວາມຮູ້ບຸນຄຸນຕໍ່ຜູ້ອາຍຸສູງ ທີ່ມີຜົນງານ, ລວມທັງ ການສ້າງເງື່ອນໄຂອຳນວຍຄວາມສະດວກ ໃຫ້ຜູ້ອາຍຸສູງ ສາມາດເຂົ້າເຖິງການບໍລິການສາທາລະນະ ໃຫ້ຈະແຈ້ງຕື່ມ; ການກຳນົດບາງນະໂຍບາຍ ຕໍ່ຜູ້ອາຍຸສູງ ກໍ່ໃຫ້ສອດຄ່ອງກັບກົດໝາຍ ແລະ ນິຕິກຳ ທີ່ໄດ້ປະກາດນຳໃຊ້ແລ້ວ.
ວາລະທີ 5: ກອງປະຊຸມໄດ້ພິຈາລະນາ ແລະ ເຫັນດີດ້ານຫຼັກການ ຮັບຮອງເອົາຮ່າງຍຸດທະສາດປ່າໄມ້ ຮອດປີ 2035 ແລະ ວິໄສທັດ ຮອດປີ 2050 (ສະບັບປັບປຸງ) ໂດຍມອບໃຫ້ກະຊວງກະສິກຳ ແລະ ປ່າໄມ້ ສົມທົບກັບຂະ ແໜງການ ແລະ ພາກສ່ວນກ່ຽວຂ້ອງ ນຳໄປປັບປຸງຕາມການປະກອບຄຳເຫັນຂອງສະມາຊິກລັດຖະບານ ໃຫ້ມີເນື້້ອໃນຈະແຈ້ງ, ເຂົ້າໃຈງ່າຍ, ຮັດກຸມ, ຄົບຖ້ວນສົມບູນ ເປັນຕົ້ນ ສັງລວມບາງປະໂຫຍກ ໃຫ້ສັ້ນກະທັດຮັດ ແລະ ອະທິບາຍບາງຄຳສັບ ໃຫ້ຈະແຈ້ງຕື່ມ; ຈັດລຽງເນື້ອໃນເປັນໝວດໝູ່ ແລະ ກົມກຽວກັນ; ເພີ່ມເນື້ອໃນ ກ່ຽວກັບການຮັບມືກັບການປ່ຽນແປງຂອງດິນຟ້າອາກາດ ແລະ ປະກອບເອກະສານທີ່່ກ່ຽວຂ້ອງໃຫ້ຄົບຖ້ວນ.
ວາລະທີ 6: ກອງປະຊຸມໄດ້ພິຈາລະນາ ແລະ ເຫັນດີດ້ານຫຼັກການຮັບຮອງເອົາຮ່າງດໍາລັດ ວ່າດ້ວຍການຄຸ້ມຄອງການຄ້າຂາຍ ສັດນໍ້າ, ສັດປ່າ ແລະ ພືດປ່າ ທີ່ໃກ້ຈະສູນພັນລະຫວ່າງຊາດ (ສະບັບປັບປຸງ) ໂດຍມອບໃຫ້ກະຊວງກະສິກຳ ແລະ ປ່າໄມ້ ສົມທົບກັບຂະແໜງການ ແລະ ພາກສ່ວນກ່ຽວຂ້ອງ ປັບປຸງຕາມຄໍາເຫັນຂອງສະມາຊິກລັດຖະ ບານ ເປັນຕົ້ນ ກຳນົດລາຍການໃຫ້ລະອຽດ ອັນໃດອະນຸຍາດ, ອັນໃດບໍ່ອະນຸຍາດ; ການກໍານົດໜ່ວຍງານຄຸ້ມຄອງໄຊເຕັດ ໃຫ້ສອດຄ່ອງກັບພາລະບົດບາດຂອງຂັ້ນຄຸ້ມຄອງຄັກແນ່; ຮຽບຮຽງຄືນເນື້ອໃນ ໃຫ້ສອດຄ່ອງກັບສົນທິສັນຍາໄຊເຕັດ ກໍ່ຄືສົນທິສັນຍາສາກົນອື່ນໆທີ່ກ່ຽວຂ້ອງ.
ຕອນທ້າຍ ທ່ານ ສົມກຽດ ພະສີ, ຮອງລັດຖະມົນຕີ, ຮອງຫົວໜ້າຫ້ອງວ່າການສໍານັກງານນາຍົກລັດຖະມົນຕີກ່າວວ່າ: ໃນໂອກາດກ່າວປິດກອງປະຊຸມ, ທ່ານ ນາຍົກລັດຖະມົນຕີ ໄດ້ຮຽກຮ້ອງມາຍັງບັນດາທ່ານ ສະມາຊິກລັດຖະ ບານ ຈົ່ງນຳເອົາແຜນວຽກຈຸດສຸມເດືອນພຶດສະພາ ໄປຜັນຂະຫຍາຍເປັນແຜນຈັດຕັ້ງປະຕິບັດວຽກງານ ຂອງຂະແໜງການຕົນ ໃຫ້ລະອຽດ, ມີການແບ່ງຄວາມຮັບຜິດຊອບຢ່າງຈະແຈ້ງ, ປະກອບບຸກຄະລາກອນເຄື່ອນໄຫວຊຸກຍູ້ຊ່ວຍເຫຼືອວຽກງານຢູ່ທ້ອງຖິ່ນ ຕາມຄວາມເໝາະສົມ ແລະ ກຳນົດຄາດໝາຍເວລາສຳເລັດທີ່ຊັດເຈນ, ສອດຄ່ອງກັບສະພາບຄວາມເປັນຈິງ, ເຄື່ອນໄຫວວຽກງານ ຢ່າງແຂງແຮງ ແລະ ໄດ້ຮັບຜົນດີ.
