ໃນວັນທີ 24 ມິຖຸນາ 2024 ທີ່ສຳນັກງານນາຍົກລັດຖະມົນຕີ, ລັດຖະບານ ໄດ້ດຳເນີນກອງປະຊຸມວິສາມັນ, ພາຍໃຕ້ການເປັນປະທານ ຂອງທ່ານ ສອນໄຊ ສີພັນດອນ, ນາຍົກລັດຖະມົນຕີ; ມີບັນດາທ່ານ ຮອງນາຍົກລັດຖະມົນຕີ, ສະມາຊິກລັດຖະບານ, ຜູ້ຕາງໜ້າກະຊວງ-ອົງການເຂົ້າຮ່ວມ.
ກອງປະຊຸມເຫັນດີດ້ານຫຼັກການຮັບຮອງເອົາ ຮ່າງແຜນແມ່ບົດການພັດທະນາ ແລະ ຄຸ້ມຄອງຕົວເມືອງທ່ອງທ່ຽວ ເມືອງວັງວຽງ ແລະບໍລິເວນອ້ອມຮອບ ໄລຍະ 2024-2034 ໂດຍມອບໃຫ້ກະຊວງຖະແຫຼງຂ່າວ, ວັດທະນະທຳ ແລະ ທ່ອງທ່ຽວ ສົມທົບຂະແໜງການ ແລະ ພາກສ່ວນກ່ຽວຂ້ອງ ປັບປຸງຕາມການປະກອບຄຳເຫັນຂອງສະມາຊິກລັດຖະບານ ເປັນຕົ້ນ: ການກຳນົດເນື້ອໃນສະພາບລວມ ໃຫ້ຊັດເຈນ, ສັ້ນກະທັດຮັດ ແລະ ເຂົ້າໃຈງ່າຍຕື່ມ; ກຳນົດຈຸດປະສົງ ໃຫ້ສອດຄ່ອງກັບຄວາມຮຽກ ຮ້ອງຕ້ອງການ ໃນການພັດທະນາຕົວຈິງກວ່າເກົ່າ; ສິ່ງທ້າທາຍຕ່າງໆ ເມື່ອສາມາດກຳນົດທິດທາງແກ້ໄຂໄດ້ຢ່າງຖືກຕ້ອງ; ແຜນພັດທະນາບັນດາກິດຈະການ ໃຫ້ມີການຈັດລຽງບູລິມະສິດ, ເປັນລະບົບຄົບຊຸດ, ກົມກຽວກັນ ແລະ ຮັບໃຊ້ການພັດທະນາຢ່າງແທ້ຈິງ; ເຂດພັດທະນາ ໃຫ້ສອດຄ່ອງກັບແຜນພັດທະນາທີ່ດິນ, ແຜນປົກປັກຮັກສາສິ່ງແວດລ້ອມ ແລະ ແຜນພັດທະນາອື່ນໆ ທີ່ໄດ້ປະກາດນໍາໃຊ້ແລ້ວ; ຄວາມຮັບຜິດຊອບ ແລະ ການມີສ່ວນຮ່ວມ ຂອງທຸກພາກສ່ວນໃນສັງຄົມ ໃຫ້ລະອຽດຈະແຈ້ງກວ່າເກົ່າ; ໃຫ້ມີແຫຼ່ງທຶນບຳລຸງຮັກສາ ແລະ ພັດທະນາການທ່ອງທ່ຽວ; ການກຳນົດອັກສອນຫຍໍ້ ແລະ ຄຳອະທິບາຍສັບ ໃນແຜນແມ່ບົດ ຕ້ອງໃຫ້ເຂົ້າໃຈງ່າຍ ແລະ ເປັນເອກະພາບ; ແຜນແກ້ໄຂບັນດາກິດຈະການທີ່ເຫັນວ່າ ບໍ່ສອດຄ່ອງກັບທິດທາງການພັດທະນາໃນປັດຈຸບັນ ແລະ ອະນາຄົດ ຕ້ອງໃຫ້ຈະແຈ້ງຊັດເຈນ; ກຳນົດແຈ້ງບັນດາຈຸດທ່ອງທ່ຽວ ທີ່ເປັນເອກະລັກສະເພາະຂອງເມືອງວັງວຽງ ເປັນຕົ້ນ ສາຍນ້ຳຊອງ, ບໍ່ນ້ຳ, ທົ່ງນາລຽບຕາມຝາຫີນ, ການຜະລິດກະສິກຳ ແລະ ອື່ນໆ; ບັນດາກິດຈະກຳການທ່ອງທ່ຽວ ເພື່ອຮັບໃຊ້ໃຫ້ແກ່ການພັດທະນາ; ລະບົບການຄຸ້ມຄອງປົກປັກຮັກສາສິ່ງແວດລ້ອມ; ກົນໄກການຈັດຕັ້ງປະຕິບັດແຜນແມ່ບົດ; ບັນດາແຜນ ກໍ່ຄືທິດທາງການພັດທະນາ ແລະ ການປົກປັກຮັກສາດ້ານຕ່າງໆ ບົນພື້ນຖານ ຮັບປະກັນຄວາມສະອາດຈົບງາມ, ເປັນລະບຽບຮຽບຮ້ອຍ, ສະຫງົບປອດໄພ, ທັນສະໄໝ, ສີຂຽວ ແລະ ຍືນຍົງ.
ພ້ອມດຽວກັນນີ້, ເຫັນດີຍົກລະດັບເຂດທ່ອງທ່ຽວເມືອງວັງວຽງ ເປັນເຂດທ່ອງທ່ຽວລະດັບຊາດ ແລະ ເຫັນດີໃຫ້ກຳນົດຊື່ຂອງແຜນແມ່ບົດດັ່ງກ່າວ ເປັນ “ແຜນແມ່ບົດການພັດທະນາ ແລະ ຄຸ້ມຄອງເຂດທ່ອງທ່ຽວລະດັບຊາດເມືອງວັງວຽງ ໄລຍະແຕ່ປີ 2025-2035”. ຫຼັງຈາກນັ້ນໃຫ້ນຳໄປສໍາມະນາລະດົມຄວາມຄິດເຫັນ ຈາກພາກສ່ວນຕ່າງໆໃນສັງຄົມ ເພື່ອໃຫ້ມີເນື້ອໃນສົມບູນ ແລະ ສາມາດຈັດຕັ້ງປະຕິບັດໄດ້ ຢ່າງມີປະສິດທິຜົນສູງ.
