ວັນທີ 7 ສິງຫາ 2024 ໄດ້ມີພິທີເຊັນສັນຍາຮ່ວມຮຸ້ນ ເພື່ອສ້າງຕັ້ງ ທະນາຄານຄຳ ລາວ ຈໍາກັດ ລະຫວ່າງ ລັດຖະບານ ແຫ່ງ ສປປ ລາວ ຕາງໜ້າໂດຍ ກະຊວງການເງິນ ແລະ ບໍລິສັດ ພີທີແອວ ໂຮນດິ້ງ ຈຳກັດ ທີ່ ໂຮງແຮມຄຣາວພລ່າຊາ, ນະຄອນຫລວງວຽງຈັນ.
ຈຸດປະສົງເພື່ອສ້າງຕັ້ງ ທະນາຄານຄຳ ລາວ ຈໍາກັດ ເຊິ່ງສະແດງໃຫ້ເຫັນເຖິງການຮ່ວມມືກັນລະຫວ່າງລັດຖະບານ ແລະ ເອກະຊົນ ເພື່ອຢັ້ງຢືນເຖິງວັດຖຸປະສົງດຽວ ກັນຈັດຕັ້ງຜັນຂະຫຍາຍແນວຄິດວິໄສທັດຂອງພັກ ແລະ ລັດຖະບານແຫ່ງ ສປປ ລາວ ວ່າດ້ວຍການສຳຮອງຄວາມໝັ້ນຄົງ ແລະ ສ້າງສະຖຽນລະພາບດ້ານເສດຖະກິດ ຂອງປະເທດຊາດ ຜ່ານການສ້າງຕັ້ງທະນາຄານຄຳ ລາວ ຈໍາກັດ ທີ່ຈະສາມາດປົດລັອກທ່າແຮງ ທາງດ້ານການເງິນ, ການຄັງ, ສ້າງຄວາມເຂັ້ມແຂງໃຫ້ສະກຸນເງິນກີບ, ການລະດົມທຶນ ແລະ ເສີມສ້າງສະພາບຄ່ອງ ເພື່ອເຂົ້າມາໝຸນໃຊ້ສ້າງພັດທະນາປະ ເທດຊາດໃຫ້ໄດ້ຢ່າງມີປະສິດຕິພາບ ແລະ ເກີດຜົນປະໂຫຍດສູງສຸດຕໍ່ກັບເສດຖະກິດຂອງປະເທດ.
ສປປ ລາວ ເປັນໜຶ່ງໃນປະເທດອັນດັບຕົ້ນໆຂອງໂລກ ດ້ານການຂຸດຄົ້ນ ແລະ ຜະລິດຄຳ; ເປັນອັນດັບ 3 ຂອງ ASEAN ແລະ ອັນດັບ 6 ໃນທະວີບອາຊີ, ຜ່ານການສໍາຫຼວດເບື້ອງຕົ້ນ ເຊິ່ງຄາດຄະເນວ່າ ມີເເຮ່ຄໍາທີ່ຍັງບໍ່ໄດ້ຖືກຂຸດຄົ້ນ ປະມານ 500-1,000 ໂຕນ ແລະ ຫາກໄດ້ຮັບການອອກໃບຢັ້ງຢືນບົດລາຍງານ ເຊິ່ງຮັບຮອງ ຈາກສາກົນ ໂດຍສະເພາະໜ່ວຍງານສຶກສາສໍາຫຼວດບໍ່ເເຮ່ ທີ່ກ່ຽວຂ້ອງເເລ້ວນັ້ນ, ຈະສາ ມາດຕີມູນຄ່າມາເພີ່ມທະວີ ປະລິມານຄັງສຳຮອງພາຍໃນປະເທດໄດ້ເຖິງ 50 – 76 ຕື້ ໂດລາສະຫະລັດ ເພື່ອເພີ່ມສະພາບຄ່ອງ ດ້ານການເງິນ ແລະ ເປັນແຫລ່ງທຶນຮອນເຂົ້າມາ ນຳໃຊ້ໃນການພັດທະນາບັນດາໂຄງການຍຸດທະສາດດ້ານພື້ນຖານໂຄງລ່າງ, ກະສິກຳ ແລະ ອຸດສາຫະກຳ ທີ່ສຳຄັນຈຳເປັນໃນການສ້າງພື້ນຖານທີ່ເຂັ້ມແຂງ ແລະ ຄວາມໝັ້ນຄົງໃຫ້ແກ່ລະບົບເສດຖະກິດຂອງປະເທດໃຫ້ນັບມື້ນັບຈະເລີນກ້າວໜ້າ.
ການສ້າງຕັ້ງ ແລະ ໃຫ້ບໍລິການທະນາຄານຄຳນີ້ ຈະສາມາດພັດທະນາຍົກລະດັບການຄຸ້ມຄອງບໍລິຫານຈັດ ການຄຳ ຂອງ ສປປ ລາວ ໃຫ້ໄດ້ມາດຕະຖານ London Bullion Market Association (LBMA) ກາຍເປັນທີ່ຍອມຮັບ ແລະ ສາມາດແຂ່ງກັນໄດ້ກັບພາກພື້ນ ແລະ ສາກົນ ຜ່ານບັນດາກົນໄກການບໍລິການຕ່າງໆຂອງທະນາ ຄານຄຳ ເປັນຕົ້ນແມ່ນ ບັນຊີຝາກຄຳ, ສິນເຊື່ອການໃຫ້ກູ້ເງິນ ແລະ ຄຳ, ການຢັ້ງຢືນຮັບຮອງຍົກລະດັບມາດຕະຖານ ຄຸນະພາບຄຳ ໃຫ້ເປັນລະດັບສາກົນ (LBMA) ເຊິ່ງບັນດາກົນໄກການບໍລິການຕ່າງໆເຫຼົ່ານີ້ ຈະສາມາດ ຍົກສູງພາລະບົດບາດ ອຸດສາຫະ ກຳ ແລະ ຕ່ອງໂສ້ການສະໜອງຄຳຂອງປະເທດລາວ, ສ້າງໃບໜ້າ ອັນໃໝ່ ແລະ ຊ່ວຍເຮັດໃຫ້ ສປປ ລາວ ເພີ່ມຄວາມອາດສາມາດກາຍເປັນໜຶ່ງໃນຜູ້ນຳດ້ານອຸດສາ ຫະກຳຄໍາ ທີ່ສາມາດແຂ່ງຂັນໄດ້ ກັບພາກພື້ນ ແລະ ສາກົນ ສ້າງຊື່ສຽງໃຫ້ ສປປ ລາວ ເປັນທີ່ຮູ້ຈັກ ແລະ ຍອມຮັບໃນເວທີເສດຖະກິດໂລກ ອີກທັງຈະເປັນການສົ່ງເສີມ ແລະ ດຶງດູດການລົງທຶນຈາກທັງພາຍໃນ ແລະ ຕ່າງປະເທດປະກອບສ່ວນເພີ່ມທະວີໃຫ້ມູນຄ່າທາງດ້ານເສດຖະກິດຂອງລາວ ໃຫ້ນັບມື້ນັບຂະຫຍາຍຕົວ.
ຮ່ວມລົງນາມໃນພິທີຄັ້ງນີ້ ແມ່ນທ່ານ ສັນຕິພາບ ພົມວິຫານ ລັດຖະມົນຕີ ກະຊວງການເງິນ ແລະ ທ່ານ ຈັນທອນ ສິດທິໄຊ ປະທານ ແລະ ຜູ້ກໍ່ຕັ້ງບໍລິສັດ PTL Holding ຈຳກັດ ໂດຍມີ ທ່ານ ສະເຫຼີມໄຊ ກົມມະສິດ, ຮອງນາຍົກລັດຖະມົນຕີ, ລັດຖະມົນຕີ ກະຊວງການຕ່າງປະເທດ ແລະ ແຂກຮັບເຊີນເຂົ້າຮ່ວມ.
