ສະຫງວນລິຂະສິດ © ສະຖານນີ ວິທະຍຸກະຈາຍສຽງແຫ່ງຊາດລາວ

ວິທະຍຸກະຈາຍສຽງແຫ່ງຊາດ

Lao National Radio

ຊົມເຊີຍ ວັນສ້າງຕັ້ງພັກປະຊາຊົນປະຕິວັດລາວ
ຄົບຮອບ 65 ປີ ຢ່າງສຸດໃຈ

ລັດຖະບານ ເນັ້ນໜັກໃຫ້ທຸກພາກສ່ວນໃນສັງຄົມເອົາໃຈໃສ່ປະຕິບັດບັນດາມາດຕະການປ້ອງກັນ ພະຍາດ ໂຄວິດ-19 ໃຫ້ເຂັ້ມງວດທີ່ສຸດ

ລັດຖະບານ ເນັ້ນໜັກໃຫ້ທຸກພາກສ່ວນໃນສັງຄົມເອົາໃຈໃສ່ປະຕິບັດບັນດາມາດຕະການເພື່ອປ້ອງກັນ ແລະ ສະກັດກັ້ນການລະບາດຂອງພະຍາດອັກເສບປອດຍ້ອນເຊື້ອຈຸລະໂລກສາຍພັນໃໝ່ ຫລື ໂຄວິດ-19 ທີ່ລັດຖະບານວາງອອກໃຫ້ເຂັ້ມງວດທີ່ສຸດ, ຫລັງຈາກທີ່ລາວເຮົາກວດພົບຜູ້ຕິດເຊື້ອພະຍາດນີ້ແລ້ວ 3 ຄົນ.

ທ່ານ ທອງລຸນ ສີສຸລິດ, ນາຍົກລັດຖະມົນ ຮ່ວມກັບຄະນະກໍາມະການສະເພາະກິດ ເພື່ອປ້ອງກັນ, ຄວບຄຸມ ແລະ ແກ້ໄຂການລະບາດຂອງພະຍາດ ໂຄວິດ-19 ຖະແຫລງຂ່າວຕໍ່ສື່ມວນຊົນລາວໃນຕອນເຊົ້າມື້ນີ້ ( 25.3.2020 ) ທີ່ສໍານັກງານນາຍົກລັດຖະມົນຕີ ວ່າ: ລັດຖະບານໄດ້ອອກຫລາຍມາດຕະການສໍາຄັນເພື່ອປ້ອງກັນ ແລະ ສະກັດກັ້ນພະຍາດໂຄວິດ-19 ນັບແຕ່ວັນທີ 18 ມີນາ ເປັນຕົ້ນມາ, ແຕ່ມາຮອດວັນທີ 25 ມີນານີ້ ສະພາບການມີການປ່ຽນແປງ ຍ້ອນລາວເຮົາກວດພົບຜູ້ຕິດເຊື້ອ ແລ້ວ 3 ຄົນ, ເຊີ່ງພາກສ່ວນກ່ຽວຂ້ອງກັບກໍາລັງປິ່ນປົວ ແລະ ຕາມຫາບຸກຄົນທີ່ຢູ່ໃກ້ສິດພວກກ່ຽວຢູ່. ສະນັ້ນ ນັບແຕ່ນີ້ ເປັນຕົ້ນໄປທຸກພາກສ່ວນໃນສັງຄົມຕ້ອງຍົກສູງການຈັດຕັ້ງບັນດາມາດຕະການທີ່ລັດຖະບານວາງອອກໃຫ້ເຂັ້ມງວດທີ່ສຸດ ໂດຍສະເພາະບັນດາແຮງງານລາວທີ່ເດີນທາງກັບມາຈາກໄທ ຕ້ອງໄດ້ກັກຕົວເອງ 14 ວັນຕາມຫລັກການທີ່ກໍານົດໄວ້ຢ່າງເຂັ້ມງວດທີ່ສຸດ, ອົງການປົກຄອງທຸກທ້ອງ ຖິ່ນ-ທຸກຂັນຕ້ອງເອົາໃຈໃສ່ປະຕິບັດໜ້າທີ່ຂອງຕົນໃຫ້ເຂັ້ມງວດທີ່ສຸດ, ບຸກຄົນໃດທີ່ມີອາການສົງໃສວ່າຕິດເຊື້ອພະຍາດໂຄວິດ- 19 ຕ້ອງໄປກວດ ຫລື ແຈ້ງພາກສ່ວນກ່ຽວຂ້ອງໂດຍດ່ວນ,  ສ່ວນຢູ່ສໍານັກງານອົງການຕ່າງຯ ຄວນຢຸດຕິການປະຊຸມ, ເວລາຢູ່ຫ້ອງການຕ້ອງຢູ່ຫ່າງກັນ, ພ້ອມທັງໃສ່ຜ້າອັດປາກ-ອັດດັງ ຫລື ຖ້າມີຄວາມສາມາດເຮັດວຽກທາງອອນລາຍແມ່ນໃຫ້ຈັດຕັ້ງປະຕິບັດໄດ້ເລີຍ.

ທ່ານ ທອງລຸນ ສີສຸລິດ ຍັງໄດ້ເນັ້ນໜັກໃຫ້ຄະນະກໍາມະການສະເພາະກິດ ເພື່ອປ້ອງກັນ, ຄວບຄຸມ ແລະ ແກ້ໄຂການລະບາດຂອງພະຍາດ ໂຄວິດ-19 ອອກຂໍ້ກໍານົດ ຫລື ມາດຕະການຕ່າງຯ ເພີ່ມອີກໃຫ້ລະອຽດຊັດເຈນກ່ວາເກົ່າເພື່ອໃຫ້ທຸກພາກສ່ວນໃນສັງຄົມຮ່ວມກັນຈັດຕັ້ງປະຕິບັດບັນດາມາດຕະການໃນການປ້ອງກັນ ແລະ ສະກັດກັ້ນພະຍາດນີ້ໃຫ້ມີປະສິດທິຜົນທີ່ສຸດ.

ສໍາລັບແຮງງານລາວທີ່ໄປເຮັດວຽກຢູ່ໄທທີ່ຍັງຕົກຄ້າງຢູ່ປະເທດໄທຈໍານວນຫລາຍ ທ່ານ ທອງລຸນ ສີສຸລິດ ມີຄໍາເຫັນວ່າ: ພວກເຂົາເລົ່ານັ້ນແມ່ນຄົນລາວ, ສະນັ້ນ ລັດຖະບານຈະຊອກທຸກວິທີທາງເພື່ອຊ່ວຍເຫລືອເຂົາເຈົ້າໃຫ້ໄດ້ກັບຄືນບ້ານເກີດເມືອງນອນ, ແຕ່ຖ້າຫາກໄດ້ຮັບການຊ່ວຍເຫລືອກັບມາລາວແລ້ວທຸກຄົນຕ້ອງໄດ້ຮັບການກວດກາຫາເຊື້ອພະຍາດໂຄວິດ-19 ຫລື ມີການກັກຕົວ 14 ວັນຕາມຫລັກການສາກົນທີ່ກໍານົດ, ສ່ວນຜູ້ປະກອບການທຸລະກິດຕ່າງຯ ທີ່ໄດ້ຮັບຜົນກະທົບຈາກການລະບາດຂອງພະຍາດໂຄວິດ-19 ລັດຖະບານກໍາລັງວາງແຜນຢູ່ ແລະ ຈະປະກາດຢ່າງເປັນທາງການໃນອີກບໍ່ດົນນີ້.

ຂ່າວ: ບຸນຕຽງ ຈັນທະວົງ