ສະຫງວນລິຂະສິດ © ສະຖານີ ວິທະຍຸກະຈາຍສຽງແຫ່ງຊາດລາວ

ວິທະຍຸກະຈາຍສຽງແຫ່ງຊາດລາວ

Lao National Radio

ຊົມເຊີຍ ວັນສ້າງຕັ້ງວິທະຍຸກະຈາຍສຽງແຫ່ງຊາດລາວ ຄົບຮອບ 60 ປີ
(13 ສິງຫາ 1960-13 ສິງຫາ 2020) ຢ່າງສຸດໃຈ

ລັດຖະບານ ແຫ່ງ ສສ ຫວຽດນາມ ມອບເຄື່ອງຊ່ວຍເຫຼືອ ປ້ອງກັນ ພະຍາດ (COVID-19) ໃຫ້ລັດຖະບານແຫ່ງ ສປປ ລາວ.

ພິ​ທີ​ມອບ-ຮັບ ​ເຄື່ອງ​ຊ່ວຍ​ເຫລືອ​ອຸ​ປະ​ກອນ​ການ​ແພດ ຈາກ​ລັດ​ຖະ​ບານ​ແລະ​ປະ​ຊາ​ຊົນ​ຫວຽດ​ນາມ ໃຫ້ ​ລັດ​ຖະ​ບານ ແລະ ປະ​ຊາ​ຊົນ​ລາວ ເພື່ອ​ປ້ອງ​ກັນ​ແລະ​ຕ້ານ​ພະ​ຍາດ​ໂຄວິດ19 ​ຢ່າງ​ເປັນ​ທາງ​ການ ຈັດ​ຂື້ນ​ໃນ​ຕອນ​ເຊົ້າ​ ວັນທີ 4 ເມສາ ​ນີ້ ຢູ່​ອາ​ຄານ​ກຽດ​ຕິ​ຍົດ ສ​ະ​ຫນາມ​ບີນ​ສາ​ກົນ​ວັດ​ໄຕ ນະ​ຄອນ​ຫລວງວຽງ​ຈັນ ຕາງ​ຫນ້າ​ລັດ​ຖະ​ບານ ແລະ ປະ​ຊາ​ຊົນ​ຫວຽດ​ນາມ ກ່າວມອບ​ໂດຍ​ທ່ານ ຫວຽນ​ບ໋າ​ຫຸ່ງ ເອກ​ອັກ​ຄະ​ລັດ​ຖະ​ທູດ ແຫ່ງ ສສ ຫວຽດ​ນາມ​ປະ​ຈຳ​ລາວ, ຕາງ​ຫນ້າ​ລັດ​ຖະ​ບານ ແລະ ປະ​ຊາ​ຊົນ​ລາວ ກ່າວຮັບ​ໂດຍ ທ່ານ​ສົມ​ດີ ດວງ​ດີ ຮອງ​ນາ​ຍົກ​ລັດ​ຖະ​ມົນ​ຕີ ລັດ​ຖະ​ມົນ​ຕີ​ກະ​ຊວງ​ການ​ເງີນ ຫົວ​ຫນ້າ​ຄະ​ນະ​ສະ​ເພາ​ະ​ກິດ ປ້ອງ​ກັນ ຄວບ​ຄຸມ ແລະ ແກ້ໄຂການລະບາດຂອງພະ​ຍາດ​ອັກ​ເສບ​ປອດ​ທີ່​ເກີດ​ຈາກ​ເຊື້ອ​ຈຸ​ລະ​ໂລກ​ສາ​ຍ​ພັນ​ໃຫມ່ ຫລື ໂຄວິດ19 ມີ​ການ​ນຳ​ຂັ້ນ​ສູງສອງ​ປະ​ເທດ​ລາວ-ຫວຽດ​ນາມ ​ພ້ອມ​ດ້ວຍ​ພາກ​ສ່ວນ​ກ່ຽວ​ຂ້ອງເຂົ້າ​ຮ່ວມ.

ທ່ານ ຫວຽນ​ບ໋າ​ຫຸ່ງ ເອກ​ອັກ​ຄະ​ລັດ​ຖະ​ທູດ ຫວຽດ​ນາມ​ປະ​ຈຳ​ລາວ ມີ​ຄຳ​ເຫັນ​ວ່າ:ປັດ​ຈຸ​ບັນ​ພະ​ຍາດ​ໂຄວິດ19 ກຳ​ລັງ​ກາຍ​ເປັນ​ໄພ​ຄຸກ​ຄາມ​ຮ້າຍ​ແຮງ​ທີ່ລະບາດໄປ​ທົ່ວ​ໂລກ ​ໂດຍສະ​ເພາະ​ສອງ​ປະ​ເທດ    ​ຫວ​ຽດ​ນາມ-ລ​າວ ​ກຳ​ລັງ​ພົບ​ກັບ​ບັນ​ຫາ​ການ​ລະ​ບາດ​ຂອງ​ພະ​ຍາດໂຄວິດ19ເຊັ່ນ​ດຽວ​ກັນ ແຕ່​ພາຍ​ໃຕ້​ສາຍ​ພົວ​ພັນ​ມິດ​ຕະ​ພາບ​ທີ່​ເປັນ​ມູນ​ເຊື້ອ​ອັນ​ຍີ່ງ​ໃຫຍ່ ຄວາມ​ສາ​ມັກ​ຄີ​ແບບ​ເສດ ແລະ ການ​ຮ່ວມ​ມື​ຮອບ​ດ້ານ ລະ​ຫວ່າງ​ຫວຽດ​ນາມ-ລາວ,ພັກ-ລັດ​ ແລະປະ​ຊາ​ຊົນ​ຫວຽດ​ນາມ ພ້ອມ​ທີ່​​ຈະໃຫ້​ການ​ຊ່ວຍ​ເຫລືອ​ພັກ-ລັດ ແລະ ປະ​ຊົ​ນ​ລາວ​ໃນ​ທຸ​ເວ​ລາ​ເຖີງວ່າ​ປັດ​ຈຸ​ບັນ​ຫວຽດ​ນາມ​ຈະ​ປະສົບກັບ​ການ​ແຜ່​ລະ​ບາດ​ຂອງ​ພະ​ຍາດ​ໂຄ​ວິດ19ກໍ່​ຕາມ ໂດຍ​ສະ​ເພາະ​ການ​ສະ​ຫນອງ​ອຸ​ປະ​ກອນ​ການ​ແພດ​ທີ່​ຈຳ​ເປັນ, ລວມ​ເຖີງ​ບຸກ​ຄະ​ລາ​ກອນ​ແພດ​ຫມໍ,ຢາ​ປີ່ນ​ປົວ​ພະ​ຍາດ ເພື່ອ​ຕ້ານ​ແລະ​ ສະ​ກັດ​ກັ້ນ​ການ​ແຜ່​ລະ​ບາດ​ຂອງ​ພະ​ຍາດ​ໂຄວິດ19ບໍ່​ໃຫ້​ຂະ​ຫຍາຍ​ເປັນ​ບໍ​ລິ​ເວນກວ້າງ ພ້ອມ​ທັງ​ເຊື່ອ​ຫມັ້ນ​ຢ່າງ​ຫນັກ​ແຫນ້ນ​ວ່າ ຫວຽດ​ນາມ-ລາວ​ຈະ​ຄຽງ​ບ່າ​ຄຽງ​ໄລ່​ກັນ, ຈັບ​ມື​ກັນ​ຜ່ານ​ຜ່າ​ວິ​ກິດ​ການ​ຄັ້ງ​ນີ້​ໄປ​ໄດ້​ໂດຍ​ໄວ.

ໂອ​ກາດ​ດຽວ​ກັນ​ນີ້ ທ່ານ​ສົມ​ດີ ດວງ​ດີ ຮອງ​ນາ​ຍົກ​ລັດ​ຖະ​ມົນ​ຕີ ລັດ​ຖະ​ມົນ​ຕີ​ກະ​ຊວງ​ການ​ເງີນ ຫົວ​ຫນ້າ​ຄະ​ນະ​ສະ​ເພາ​ະ​ກິດ ປ້ອງ​ກັນ ຄວບ​ຄຸມ ແລະແກ້ໄຂການລະບາດຂອງພະ​ຍາດ​ອັກ​ເສບ​ປອດ​ທີ່​ເກີດ​ຈາກ​ເຊື້ອ​ຈຸ​ລະ​ໂລກ​ສາ​ຍ​ພັນ​ໃຫມ່ ຫລື ໂຄວິດ19 ຕາງ​ຫນ້າໃຫ້​ພັກ-ລັດ ແລະ ປະ​ຊາ​ຊົນ​ລາວ ຕີ​ລາ​ຄາ​ສູງ​ ແລະ ສະ​ແດງ​ຄວາມ​ຂອບ​ໃຈ ຕໍ່​ການ​ຊ່ວຍ​ເຫລືອ​ອັນ​ລ້ຳ​ຄ່າ​ຂອງ​ພັກ-ລັດ ແລະ ປະ​ຊາ​ຊົນ​ຫວຽດ​ນາມ ທີ່​ຍາມ​ໃດ​ກໍ່​ເປັນ​ຫ່ວງ​ເປັນ​ໃຍ ຕໍ່​ພັກ-ລັດ​ຖະ​ບານ ແລະ ປະ​ຊາ​ຊົນ​ລາວ​ມາ​ໂດຍ​ຕະ​ຫລອດ ພ້ອມ​ທັງ​ໃຫ້​ຄຳ​ຫມັ້ນ​ສັນ​ຍາ​ວ່າ​ຈະ​ນຳ​ເອົາ​ເຄື່ອງ​ຊ່ວຍ​ເຫລືອ​ຈາກ​ພັກ-ລັດ ແລະ ປະ​ຊາ​ຊົນ​ຫວຽດ​ມອບ​ໃຫ້​ໃນ​ຄັ້ງ​ນີ້​ໄປ​ນຳ​ໃຊ້ ເຂົ້າ​ໃນ​ວຽກ​ງານ ປ້ອງ​ກັນ ຄວບ​ຄຸມ ແລະ ສະ​ກັດ​ກັ້ນ​ພະ​ຍາດ​ໂຄວິດ19 ໃຫ້​ເກີດ​ຜົນ​ປະ​ໂຫຍດ​ສູງ​ສຸດ.

ສຳ​ລັບ​ເຄື່ອງ​ຊ່ວຍ​ເຫລືອ ທີ່​ພັກ-ລັດ ແລະ ປະ​ຊາ​ຊົນ​ຫວຽດ​ນາມ​ນຳ​ມາ​ຊ່ວຍ​ເຫລືອ ພັກ-ລັດ ແລະ​ປະ​ຊາ​ຊົນ​ລາວ​ໃນ​ຄັ້ງ​ນີ້ ປະ​ກອບ​ມີ ຜ້າ​ອັດ​ປາກ, ອັດ​ດັງ, ນ້ຳ​ຢາ​ກວດ​ຫາ​ເຊື້ອ​ພະ​ຍາດ​ໂຄວິດ19, ຊຸດ​ປ້ອງ​ກັນ ລວມ​ເຖີງ​ອຸ​ປະ​ກອນ​ການ​ແພດ​ທີ່​ຈຳ​ເປັນ​ຈຳ​ນວນ​ຫນື່ງ ລວມ​ມູນ​ຄ່າ 1ແສນ​ໂດ​ລາ​ສະ​ຫະ​ລັດ,ນອກ​ນັ້ນ​ກະ​ຊວງ​ສາ​ທາ​ລະ​ນະ​ສຸກຫວຽດ​ນາມ​ຍັງ​ມອບ​ເງີນ​ຈຳ​ນວນ 5ຕຶ້​ດົ້ງສະກຸນເງີນຫວຽດນາມ ແລະ ກະ​ຊວງວິ​ທະ​ຍາ​ສາດ​ແລະ​ເຕັກ​ໂລ​ຊີ ຂອງ​ຫວຽດ​ນາມ ​ຍັງ​ມອບ​ເງີນ​ຈຳ​ນວນ 250ລ້ານ​ດົ້ງ ລວມ​ເຖີງການຊ່ວຍ ເຫລືອຈາກ​ພາກ​ສ່ວນ​ຕ່າງໆ​ຂອງ​ຫວຽດ​ນາມຕື່ມ​ອີກ​ລວມ​ເປັນ​ເງີນ​ທັງ​ຫມົດຫລາຍກວ່າ3ແສນ​ໂດ​ລາ​ສະ​ຫະ​ລັດ ເພື່ອໃຫ້​ພັກ-ລັດ ແລະ ປະ​ຊາ​ຊົນ​ລາວ ນຳ​ໃຊ້​ເຂົ້າ​ໃນ​ວຽກ​ງານ​ປ້ອງ​ກັນ ຄວບ​ຄຸມ ແລະ ແກ້ໄຂ ການລະບາດຂອງ​ພະ​ຍາດ​ໂຄວິດ19ຢູ່​ລາວ​.

ໂດຍ: ເດດອາລຸນ ແກ້ວວິໄລ