ໃນຕອນບ່າຍຂອງວັນທີ 26 ກໍລະກົດ 2024, ທີ່ ຫໍປະຊຸມແຫ່ງຊາດ, ທ່ານ ສະເຫຼີມໄຊ ກົມມະສິດ, ຮອງນາຍົກລັດຖະມົນ ຕີ, ລັດຖະມົນຕີກະຊວງການຕ່າງປະເທດ ໄດ້ພົບປະສອງຝ່າຍກັບ ທ່ານ ນາງ ເພັນນີ ວອງ (Penny WONG), ລັດຖະມົນຕີກະຊວງການຕ່າງປະເທດ ແຫ່ງ ອົດສະຕຣາລີ, ໃນໂອກາດເດີນ ທາງມາເຂົ້າຮ່ວມກອງປະຊຸມລັດຖະມົນຕີຕ່າງປະເທດອາ ຊຽນທີ່ກ່ຽວຂ້ອງ ທີ່ ນະຄອນຫຼວງວຽງຈັນ.
ໃນໂອກາດນີ້, ສອງຝ່າຍໄດ້ຕີລາຄາສູງຕໍ່ສາຍພົວພັນມິດຕະ ພາບທີ່ເປັນມູນເຊື້ອ ແລະ ການຮ່ວມມືທີ່ດີ ລະຫວ່າງສອງປະ ເທດທີ່ໄດ້ຮັບການເສີມຂະຫຍາຍ ແລະ ມີຜົນສໍາເລັດເປັນກ້າວໆມາ ໂດຍສະເພາະແມ່ນຜົນສໍາເລັດຂອງການຢ້ຽມຢາມ ອົດສະຕຣາລີ ຢ່າງເປັນທາງການ ແລະ ການເປັນປະທານຮ່ວມກອງປະ ຊຸມສຸດຍອດສະໄໝພິເສດ ອາຊຽນ-ອົດສະຕຣາລີ ເພື່ອສະເຫຼີມສະຫຼອງການພົວພັນຮ່ວມມື ອາຊຽນ-ອົດສະຕຣາລີ ຄົບຮອບ 50 ປີ ຂອງ ພະນະທ່ານ ສອນໄຊ ສີພັນດອນ, ນາຍົກລັດຖະມົນ ຕີ ແຫ່ງ ສປປ ລາວ ລວມທັງການຍົກລະດັບການພົວພັນສອງຝ່າຍເປັນ ຄູ່ຮ່ວມມືຮອບດ້ານ; ການສ້າງຕັ້ງສະມາຄົມມິດຕະ ພາບ ລາວ-ອົດສະຕຣາລີ; ແລະ ການສະເຫຼີມສະຫຼອງ ຄົບຮອບ 30 ປີ ຂົວມິດຕະພາບ ລາວ-ໄທ ແຫ່ງທີ 1.
ສອງຝ່າຍໄດ້ປຶກສາຫາລື ແລະ ແລກປ່ຽນຄໍາຄິດຄໍາເຫັນ ກ່ຽວກັບການຮ່ວມມືທາງດ້ານການຄ້າ-ການລົງທຶນ ເປັນຕົ້ນໃນການດຶງດູດເອົາບໍລິສັດໃຫຍ່ຂອງ ອົດສະຕຣາລີ ມາລົງທຶນຢູ່ ສປປ ລາວ ໃຫ້ເພີ່ມຂຶ້ນ, ການເກັບກູ້ລະເບີດບໍ່ທັນແຕກ, ການ ຮ່ວມມືຂອບ ແມ່ຂອງ-ອົດສະຕຣາລີ, ການຮ່ວມມືຂອບອາ ຊຽນ-ອົດສະຕຣາລີ. ນອກນັ້ນ, ສອງຝ່າຍຍັງໄດ້ສະແດງຄວາມຂອບໃຈການສະໜັບສະໜູນຊຶ່ງກັນ ແລະ ກັນໃນເວທີພາກພື້ນ ແລະ ສາກົນ, ພ້ອມທັງແລກປ່ຽນຄຳເຫັນຕໍ່ສະພາບການພາກ ພື້ນ ແລະ ສາກົນ ທີ່ສອງຝ່າຍມີຄວາມສົນໃຈ.
ທ່ານຮອງນາຍົກລັດຖະມົນຕີ ສະເຫຼີມໄຊ ກົມມະສິດ ໄດ້ສະ ແດງຄວາມຍິນດີຕ້ອນຮັບ ແລະ ໄດ້ຕາງໜ້າໃຫ້ລັດຖະບານ ແລະ ປະຊາຊົນລາວ ສະແດງຄວາມຂອບໃຈຕໍ່ການສະໜັບສະໜູນ ແລະ ຊ່ວຍເຫຼືອຂອງ ລັດຖະບານ ອົດສະຕຣາລີ ທັງໃນຂອບສອງຝ່າຍ ແລະ ຫຼາຍຝ່າຍ ໃນຕະຫຼອດໄລຍະຜ່ານມາ ກໍຄື ການສະ ໜັບສະໜູນການກະກຽມເປັນປະທານອາຊຽນຂອງ ສປປ ລາວ ໃນປີ 2024 ນີ້.
ທ່ານລັດຖະມົນຕີກະຊວງການຕ່າງປະເທດ ເພັນນີ ວອງ ກໍໄດ້ສະແດງຄວາມຂອບໃຈຕໍ່ການຕ້ອນຮັບອັນອົບອຸ່ນ ແລະ ສະແດງຄວາມຊົມເຊີຍຕໍ່ການເປັນເຈົ້າພາບຈັດກອງປະຊຸມລັດຖະມົນຕີຕ່າງປະເທດອາຊຽນທີ່ກ່ຽວຂ້ອງໃນຄັ້ງນີ້ ພ້ອມທັງອວຍພອນໃຫ້ການເປັນປະທານອາຊຽນຂອງ ສປປ ລາວ ໃນປີ 2024 ນີ້ ປະສົບຜົນສໍາເລັດຢ່າງຈົບງາມ.
ທີ່ມາ: ກົມການຂ່າວ, ກະຊວງການຕ່າງປະເທດ
