ສະຫງວນລິຂະສິດ © ສະຖານີ ວິທະຍຸກະຈາຍສຽງແຫ່ງຊາດລາວ

ວິທະຍຸກະຈາຍສຽງແຫ່ງຊາດລາວ

Lao National Radio

ຊົມເຊີຍ ວັນສ້າງຕັ້ງວິທະຍຸກະຈາຍສຽງແຫ່ງຊາດລາວ ຄົບຮອບ 60 ປີ
(13 ສິງຫາ 1960-13 ສິງຫາ 2020) ຢ່າງສຸດໃຈ

ລັດຖະມົນຕີກະຊວງການຕ່າງປະເທດ ເຄື່ອນໄຫວເຮັດວຽກ ທີ່ ແຂວງຈໍາປາສັກ

ໃນລະຫວ່າງວັນທີ 5-8 ສິງຫາ 2020, ທ່ານ ສະເຫຼີມໄຊ ກົມມະສິດ, ກໍາມະການສູນກາງພັກ, ເລຂາຄະນະບໍລິຫານພັກກະຊວງ, ລັດຖະມົນຕີກະຊວງການຕ່າງປະເທດ ໄດ້ນໍາພາຄະນະມາເຄື່ອນໄຫວເຮັດວຽກ ທີ່ ແຂວງຈໍາປາສັກ, ຊຶ່ງໃຫ້ການຕ້ອນຮັບໂດຍ ທ່ານ ປອ. ວິໄລວົງ ບຸດດາຄໍາ, ກໍາມະການສູນກາງພັກ, ເລຂາຄະນະບໍລິຫານພັກແຂວງ, ເຈົ້າແຂວງ-ແຂວງຈໍາປາສັກ ດ້ວຍບັນຍາກາດໄມຕີຈິດມິດຕະພາບອັນອົບອຸ່ນ.

ໃນໂອກາດມາເຄື່ອນໄຫວເຮັດວຽກຄັ້ງນີ້, ທ່ານ ລັດຖະ​ມົນຕີກະຊວງການຕ່າງປະເທດ ໄດ້ເຜີຍແຜ່ສະພາບການທີ່ພົ້ນເດັ່ນໃນພາກພື້ນ, ສາກົນ ແລະ ວຽກງານຊາຍແດນ ໃຫ້ຄະນະພັກ-ຄະນະນໍາ, ພະນັກງານຫຼັກແຫຼ່ງ, ທະຫານ, ຕໍາຫຼວດ ແລະ ຕະຫຼອດຮອດພໍ່ແມ່ປະຊາຊົນບັນດາເຜ່ົ່າໃນທົ່ວແຂວງຈໍາປາສັກ ໄດ້ຮັບຮູ້ ແລະ ເຂົ້າໃຈເຖິງສະພາບ​ການທີ່ເກີດຂຶ້ນໃນປະຈຸບັນ ແລະ ພົບປະເຮັດວຽກກັບການນໍາຂອງແຂວງຈໍາປາສັກ.

ຈາກນັ້ນ, ທ່ານ ລັດຖະມົນຕີກະຊວງການຕ່າງປະເທດ ກໍ່ໄດ້ໃຫ້ກຽດເປັນປະທານໃນກອງປະຊຸມທາບທາມຮ່າງກົດໝາຍ ວ່າດ້ວຍ ຊາຍແດນແຫ່ງຊາດ ຮ່ວມກັບການນໍາ ແລະ ພາກສ່ວນກ່ຽວຂ້ອງຂອງ 4 ແຂວງພາກໃຕ້ ເພື່ອທາບທາມຄຳຄິດຄຳເຫັນອຳນາດການປົກຄອງທ້ອງຖິ່ນ, ຊຶ່ງຜ່ານມາກະຊວງການຕ່າງປະເທດ ໄດ້ທາບທາມຮ່າງກົດໝາຍດັ່ງກ່າວຮ່ວມກັບ 8 ແຂວງພາກເໜືອ ແລະ 6 ແຂວງພາກກາງສໍາເລັດແລ້ວ. ຫຼັງຈາກສໍາເລັດຂະບວນ​ການທາບທາມຄໍາເຫັນຕໍ່ຮ່າງກົດໝາຍສະບັບນີ້ແລ້ວ, ຄະນະຮັບຜິດຊອບສ້າງຮ່າງກົດໝາຍ ກໍຈະສັງລວມຄຳເຫັນ ແລະ ຂໍ້ສະເໜີ ຕ່າງໆ ເພື່ອນຳໄປປັບປຸງໃຫ້ມີເນື້ອໃນ ລະອຽດ, ຈະແຈ້ງ, ຄົບຖ້ວນ ແລະ ຮັດກຸມ ເພື່ອໃຫ້ສາມາດນໍາເອົາຮ່າງກົດໝາຍດັ່ງກ່າວ ເຂົ້າພິຈາລະນາຢູ່ກອງປະຊຸມລັດຖະບານ ປະຈຳ ເດືອນສິງຫາ 2020 ແລະ ນໍາເຂົ້າພິຈາລະນາຢູ່ກອງປະຊຸມສະໄໝສາມັນ ເທື່ອທີ 10 ຂອງສະພາແຫ່ງຊາດ ຊຸດທີ VIII ໃນທ້າຍປີ 2020 ຕາມລໍາດັບ.

ໃນໂອກາດນີ້, ທ່ານ ລັດຖະມົນຕີກະຊວງການຕ່າງປະເທດ ກໍ່ໄດ້ໂອ້ລົມອ້າຍນ້ອງກອງສໍາຫຼວດ ແລະ ປັກຫຼັກ ໝາຍຊາຍແດນ ລາວ-ໄທ ທາງບົກ, ລາວ-ໄທ ທາງນໍ້າ ແລະ ລາວ-ກໍາປູເຈຍ ທີ່ພວມປະຈໍາການ ແລະ ເຮັດວຽກງານສໍາຫຼວດ ແລະ ປັກຫຼັກໝາຍຊາຍແດນຮ່ວມກັບປະເທດໃກ້ຄຽງຢູ່ແຂວງຈໍາປາສັກ ເພື່ອເປັນທິດທາງ ແລະ ຂວັນກໍາລັງໃຈໃນການສືບຕໍ່ດໍາເນີນວຽກງານຊາຍແດນອັນໜັກໜ່ວງ, ແຕ່ມີກຽດທີ່ພັກ-ລັດມອບໝາຍໃຫ້.