ON AIR

ຟັງວິທະຍຸ FM103.7Mhz ອອນລາຍ
Listen to Radio FM103.7Mhz Online

ລັດຖະມົນຕີກະຊວງການຕ່າງປະເທດ ພົບປະກັບຜູ້ຕາງໜ້າພິເສດຂອງ ປະທານາທິບໍດີ ຣູວັນດາ

ໃນວັນທີ 10 ສິງຫາ 2018, ທີ່ ກະຊວງການຕ່າງປະເທດ, ທ່ານ ສະເຫຼີມໄຊ ກົມມະສິດ, ລັດຖະມົນຕີກະຊວງການຕ່າງປະເທດ ແຫ່ງ ສປປ ລາວ ໄດ້ຕ້ອນຮັບ ແລະ ພົບປະກັບ ທ່ານ ນາງ ຫຼຸຍ ມູຊິກິວາໂດ, ຜູ້ຕາງໜ້າພິເສດຂອງປະທານາທິບໍດີ, ລັດຖະມົນຕີກະຊວງການຕ່າງປະເທດ ແຫ່ງ ສາທາລະນະລັດ ຣູວັນດາ, ໃນໂອກາດເຄື່ອນໄຫວຢ້ຽມຢາມ ແລະ ເຮັດວຽກຢູ່ ສປປ ລາວ ໃນລະຫວ່າງວັນທີ 9-10 ສິງຫາ 2018.

ໃນການພົບປະຄັ້ງນີ້, ສອງລັດຖະມົນຕີ ໄດ້ຕີລາຄາສູງຕໍ່ສາຍພົວພັນມິດຕະພາບ ແລະ ການຮ່ວມມືອັນດີ ລະຫວ່າງສອງປະເທດ ລາວ-ຣູວັນດາ ທີ່ໄດ້ຮັບການເສີມຂະຫຍາຍເປັນຢ່າງດີ ນັບແຕ່ສອງປະເທດໄດ້ສ້າງຕັ້ງສາຍພົວພັນການທູດນຳກັນ ໃນວັນທີ 31 ສິງຫາ 2009. ພ້ອມນັ້ນ, ສອງຝ່າຍ ຍັງໄດ້ເຫັນດີສົ່ງເສີມໃຫ້ມີການແລກປ່ຽນການຢ້ຽມຢາມຊຶ່ງກັນ ແລະ ກັນ ໃນຫຼາຍລະດັບ ເພື່ອຊອກຫາຊ່ອງທາງການຮ່ວມມືກັນໃນຂະແໜງການຕ່າງໆ ໃນອະນາຄົດ, ໂດຍສະເພາະ ຂະແໜງການກະສິກຳ, ການທ່ອງທ່ຽວ ແລະ ອື່ນໆ, ພ້ອມທັງເຫັນດີສືບຕໍ່ສະໜັບສະໜູນເຊິ່ງກັນ ແລະ ກັນ ໃນເວທີພາກພື້ນ ແລະ ສາກົນ,​ໂດຍສະເພາະ ໃນກອບຂອງອົງການສະຫະປະຊາຊາດ ແລະ ອົງການຈັດຕັ້ງສາກົນອື່ນໆ.

ໃນໂອກາດນີ້, ທ່ານລັດຖະມົນຕີ ສະເຫຼີມໄຊ ກົມມະສິດ ໄດ້ສະແດງຄວາມຍິນດີຕ້ອນຮັບ ແລະ ຕີລາຄາສູງ ຕໍ່ການຢ້ຽມຢາມ ສປປ ລາວ ໃນຄັ້ງນີ້,​ ຊຶ່ງເປັນການຢ້ຽມຢາມຄັ້ງປະຫວັດສາດ ແລະ ເປັນຄັ້ງທຳອິດຂອງຄະນະຜູ້ແທນຂັ້ນສູງຈາກ ສ. ຣູວັນດາ ແລະ ຈະເປັນການປະກອບສ່ວນອັນສຳຄັນ ເຂົ້າໃນການເສີມຂະຫຍາຍການພົວພັນຮ່ວມມື ລະຫວ່າງສອງປະເທດ. ພ້ອມກັນນີ້, ທ່ານ ສະເຫຼີມໄຊ ກົມມະສິດ ຍັງແຈ້ງໃຫ້ຊາບໂດຍຫຍໍ້ ກ່ຽວກັບ ສະພາບການພັດທະນາເສດຖະກິດ-ສັງຄົມ ແລະ ການເຄື່ອນໄຫວວຽກງານການຕ່າງປະເທດຂອງ ສປປ ລາວ, ພ້ອມທັງແຈ້ງໃຫ້ຊາບເຖິງເຫດການໄພພິບັດ ຢູ່ແຂວງອັດຕະປື.

ໃນໂອກາດດຽວກັນ, ທ່ານ ນາງ ຫຼູຍ ມູຊິກິວາໂດ ກໍໄດ້ສະແດງຄວາມຂອບໃຈ ຕໍ່ການຕ້ອນຮັບອັນອົບອຸ່ນ ແລະ ຂອບໃຈຕໍ່ລັດຖະບານ ສປປ ລາວ ທີ່ໄດ້ໃຫ້ການສະໜັບສະໜູນ ສ. ຣູວັນດາ ໃນການສະໝັກເປັນສະມາຊິກຂອງອົງການຈັດຕັ້ງສາກົນຕ່າງໆ ໃນໄລຍະຜ່ານມາ. ນອກຈາກນັ້ນ, ທ່ານຜູ້ຕາງໜ້າພິເສດຂອງປະທານາທິບໍດີ ຣູວັນດາ ຍັງໄດ້ສະແດງຄວາມເຫັນໃຈມາຍັງລັດຖະບານ ແລະ ປະຊາຊົນລາວ, ໂດຍສະເພາະຜູ້ປະສົບເຄາະຮ້າຍຈາກເຫດການໄພພິບັດ ຢູ່ແຂວງອັດຕະປື ໃນຄັ້ງນີ້.

ໃນວັນດຽວກັນ, ທ່ານ ນາງ ຫຼຸຍ ມູຊິກິວາໂດ ແລະ ຄະນະ ຍັງໄດ້ພົບປະກັບ ທ່ານ ບຸນເກີດ ສັງສົມສັກ, ລັດຖະມົນຕີປະຈຳສຳນັກງານນາຍົກລັດຖະມົນຕີ, ຜູ້ຮັບຜິດຊອບວຽກງານຟຣັງໂກໂຟນີ ຂອງ ສປປ ລາວ ອີກດ້ວຍ.

ຂ່າວຈາກ:

ກົມການຂ່າວ
ກະຊວງການຕ່າງປະເທດ