ON AIR

ຟັງວິທະຍຸ FM103.7Mhz ອອນລາຍ
Listen to Radio FM103.7Mhz Online

ລັດຖະມົນຕີກະຊວງການຕ່າງປະເທດ ລົງເຄື່ອນໄຫວຢ້ຽມຢາມ ແລະພົບປະ ປະຊາຊົນເມືອງສະໜາມໄຊ, ແຂວງອັດຕະປື:

ໃນວັນທີ 06 ກຸມພາ 2019, ທ່ານ ສະເຫຼີມໄຊ ກົມມະສິດ, ລັດຖະມົນຕີກະຊວງການຕ່າງປະເທດ ພ້ອມດ້ວຍຄະນະ ໄດ້ລົງໄປເຄື່ອນໄຫວຢ້ຽມຢາມປະຊາຊົນ ທີ່ໄດ້ຮັບຜົນກະທົບຈາກເຫດການໄພພິບັດນຳຖ້ວມຢູ່ເມືອງສະໜາມໄຊ, ແຂວງອັດຕະປື ໂດຍໄດ້ຮັບການຕ້ອນຮັບຢ່າງອົບອຸ່ນຈາກອຳນາດການປົກຄອງແຂວງ, ເມືອງ ແລະຊາຊົນເປັນຢ່າງດີ.
ການລົງເຄື່ອນໄຫວຢ້ຽມຢາມແຂວງອັດຕະປື ຂອງທ່ານລັດຖະມົນຕີ ແລະ ຄະນະຄັ້ງນີ້ ຍັງໄດ້ນຳ ເອົາເງິນສົດຈຳນວນ 950,000,000 ກີບ ແລະ ເຄື່ອງອຸປະໂພກບໍລິໂພກອີກຈຳນວນໜຶ່ງໄປມອບໃຫ້ປະຊາຊົນຜູ້ໄດ້ຮັບຜົນກະທົບຈາກໄພພິບັດນໍ້າຖ້ວມ ຢູ່ເມືອງສະໜາມໄຊ, ແຂວງອັດຕະປື ໃນທ້າຍເດືອນກໍລະກົດ 2018 ຜ່ານມາ, ເຊິ່ງເງິນສົດ ແລະ ເຄື່ອງອຸປະໂພກດັ່ງກ່າວແມ່ນໄດ້ຮັບການປະກອບສ່ວນຈາກພີ່ນ້ອງຄົນເຊື້ອຊາດລາວຢູ່ປະເທດຕ່າງໆ, ລວມທັງ ຈາກພະນັກງານກະຊວງການຕ່າງປະເທດ ທັງຢູ່ພາຍໃນ ແລະ ປະຈຳການຢູ່ຕ່າງປະເທດ ແລະ ຈາກບັນດາອົງການຈັດຕັ້ງສາກົນ ປະຈຳ ສປປ ລາວ ອີກຈຳນວນໜຶ່ງ.
ຕາງໜ້າໃຫ້ອຳນາດການປົກຄອງແຂວງ ຮັບເອົາເຄື່ອງຊ່ວຍເຫຼືອດັ່ງກ່າວ ແມ່ນ ທ່ານ ບຸນຮຽນ ແກ້ວບົວພາດ ປະທານກວດກາພັກ-ລັດແຂວງອັດຕະປື, ຊຶ່ງທ່ານໄດ້ລາຍງານສະພາບຄວາມຄືບໜ້າໃນການແກ້ໄຂ ແລະ ຟື້ນຟູ ຊີວິດການເປັນຢູ່ຂອງ ປະຊາຊົນທີ່ໄດ້ຮັບຜົນກະທົບຈາກເຫດການໄພພິບັດດັ່ງກ່າວໃຫ້ຄະນະ ຊາບວ່າ: ມາຮອດປະຈຸບັນ ຜູ້ປະສົບໄພທັງໝົດແມ່ນໄດ້ຍົກຍ້າຍເຂົ້າ ພັກເຊົາຢູ່ເຮືອນພັກເຊົາຊົ່ວຄາວທີ່ທາງການໄດ້ຈັດສັນໃຫ້, ແລະ ໄດ້ຮັບການສະໜອງເຂົ້າກິນ, ເງິນອົດໜູນ, ການບໍລິການດ້ານສາທາລະນະສຸກ ແລະ ອື່ນໆ.
ສຳລັບວຽກງານຈຸດສຸມໃນສະເພາະໜ້າ ແມ່ນການສ້າງເຮືອນຖາວອນ, ຟື້ນຟູພື້ນຖານໂຄງລ່າງ, ພື້ນຖານການຜະລິດ ເພື່ອຊຸກຍູ້ປະຊາຊົນຫັນເຂົ້າສູ່ການຜະລິດໂດຍໄວ ແນ່ໃສ່ເລັ່ງລັດປົວແປງຊີວິດການເປັນຢູ່ຂອງເຂົາເຈົ້າ ໃຫ້ກັບເຂົ້າສູ່ສະພາບປົກກະຕິ. ໃນໂອກາດດັ່ງກ່າວ, ທ່ານລັດຖະມົນຕີກະຊວງການຕ່າງປະເທດ ກໍ່ໄດ້ກ່າວສະແດງຄວາມຍ້ອງຍໍຊົມເຊີຍຕໍ່ອຳນາດການປົກຄອງແຂວງ ແລະ ເມືອງທີ່ໄດ້ຕັ້ງຫນ້າເອົາໃຈໃສ່ ເບິ່ງແຍງຊີວິດການເປັນຢູ່ຂອງປະຊາຊົນທີ່ໄດ້ຮັບຜົນກະທົບຈາກໄພພິບັດໃນຄັ້ງນີ້.

ໂອກາດດຽວກັນນີ້ ລັດຖະມົນຕີກະຊວງການຕ່າງປະເທດ ແລະ ຄະນະໄດ້ລົງໄປພົບປະໂອ້ລົມ ນາຍແລະພົນທະຫານ ຢູ່ກອງພັນ 21 ແຂວງອັດຕະປື ເນື່ອງໃນໂອກາດສະເຫຼີມສະຫຼອງວັນສ້າງຕັ້ງກອງທັບປະຊາຊົນລາວ ຄົບຮອບ 70 ປີ ຢ່າງມີຄວາມໝາຍອັນເລິກເຊິ່ງ ອີກດ້ວຍ.