ໃນວັນທີ 18 ມິຖຸນາ 2021 ທີ່ກະຊວງການຕ່າງປະເທດ ທ່ານ ສະເຫລີມໄຊ ກົມມະສິດ ລັດຖະມົນຕີ ກະຊວງການຕ່າງປະເທດ ໄດ້ໃຫ້ກຽດຕ້ອນຮັບການເຂົ້າຢ້ຽມຂໍ່ານັບອຳລາ ຂອງທ່ານ ດຣ. ມາກ ຈາຄັອບ ຜູ້ຕາງໜ້າອົງການອະນາໄມໂລກ (WHO) ປະຈໍາ ສປປ ລາວ ເນື່ອງຈາກສຳເລັດການປະຕິບັດໜ້າທີ່ຢູ່ ສປປ ລາວ.
ໂອກາດດຽວກັນນີ້, ທ່ານ ສະເຫລີມໄຊ ໄດ້ຕາງໜ້າໃຫ້ລັດຖະບານລາວ ປະດັບຫລຽນກາມິດຕະ ພາບໃຫ້ແກ່ ທ່ານ ດຣ. ມາກ ເອັນດຣິວ ຈາຄັອບ ເພື່ອເປັນການຍ້ອງຍໍຊົມເຊີຍຜົນງານຂອງຜູ້ກ່ຽວ ພາຍ ຫລັງສິ້ນສຸດການປະຕິບັດໜ້າທີ່ຢູ່ ສປປ ລາວ, ໂດຍມີ ທ່ານ ສະໜອງ ທອງຊະນະ ຮອງລັດຖະມົນຕີກະ ຊວງສາທາລະນະສຸກ ພ້ອມດ້ວຍການນຳຂັ້ນສູງຈາກ ບັນດາກະຊວງຂະແໜງການກ່ຽວຂ້ອງ ແລະ ຜູ້ຕາງໜ້າຫ້ອງການຜູ້ປະສານງານ ສປຊ ປະຈຳ ສປປ ລາວ ເຂົ້າຮ່ວມ.
ທ່ານລັດຖະມົນຕີ ກະຊວງການຕ່າງປະເທດ ໄດ້ກ່າວສະແດງຄວາມຊົມເຊີຍ ແລະ ຕີລາຄາສູງຕໍ່ຜົນສຳເລັດ ໃນການປະຕິບັດໜ້າທີ່ວຽກງານໃນໄລຍະຜ່ານມາ ຂອງ ທ່ານ ມາກ ຈາຄັອບ ທີ່ໄດ້ປະກອບ ສ່ວນຢ່າງຕັ້ງໜ້າ ໃນການຮ່ວມມື ແລະ ຊ່ວຍເຫລືອ ສປປ ລາວ ໂດຍສະເພາະ ໃນການຮັບມືກັບບັນຫາການລະບາດຂອງພະຍາດໂຄວິດ-19 ທີ່ພວກເຮົາກໍາລັງປະເຊີນໜ້າຢູ່ໃນປັດຈຸບັນ, ໃນດ້ານການໃຫ້ຄໍາປຶກ ສາທາງດ້ານວິຊາການ, ມາດຕະການປ້ອງກັນການຕິດເຊື້ອ, ການປິ່ນປົວ, ການນໍາໃຊ້ວັກແຊັງ ແລະ ການຂົນຂວາຍອຸປະກອນການແພດທີ່ຈຳເປັນ ແລະ ທຶນຈຳນວນ​ໜຶ່ງ. ນອກຈາກນັ້ນ, ພາຍໃຕ້ການນໍາພາຂອງ ທ່ານ ຈາຄັອບ ຫ້ອງການອົງການອານາໄມໂລກ ປະຈໍາ ສປປ ລາວ ຍັງໄດ້ໃຫ້ການຊ່ວຍເຫລືອ ແລະ ແນະນຳ ໃນການສ້າງແຜນພັດທະນາ ຂະແໜງສາທາລະນະສຸກແຫ່ງຊາດ, ຍຸດທະສາດຂອງຂະ ແໜງສາທາລະນະສຸກ ແລະ ຍຸດທະສາດດ້ານການເງິນຂອງຂະແໜງສາທາລະນະສຸກ, ການຄວບຄຸມການລະບາດຂອງພະຍາດໄຂ້ຍຸງລາຍ, ໄຂ້ໝາກແດງໃຫຍ່, ການປັບປຸງສຸຂະພາບແມ່ ແລະ ເດັກ, ການສ້າງຄວາມເຂັ້ມແຂງໃຫ້ແກ່ຂະແໜງສາທາລະນະສຸກ ຕໍ່ກັບການປ່ຽນແປງດິນຟ້າອາກາດ ແລະ ໄພພິບັດ, ສ້າງຄວາມເຂັ້ມແຂງໃຫ້ລະບົບຂໍ້ມູນຂ່າວສານ ດ້ານສຸຂະພາບແຫ່ງຊາດ ແລະ ຄວາມສາມາດໃນການຕອບສະໜອງຂໍ້ມູນໃນລະດັບຊາດ, ແຂວງ ແລະ ທ້ອງຖິ່ນ, ແລະ ອື່ນໆ.
ໂອກາດດຽວກັນ, ທ່ານ ດຣ. ມາກ ຈາຄັອບ ກໍ່ໄດ້ສະແດງຄວາມຂອບອົກຂອບໃຈ ຕໍ່ການຮ່ວມມື ແລະ ສະໜັບ​ສະໜູນຂອງລັດຖະບານລາວ ຕະຫລອດໄລຍະການປະຕິບັດໜ້າທີ່ຂອງທ່ານ ໃນໄລຍະເວ ລາເກືອບ 4 ປີ ທີ່ຜ່ານມາ, ພ້ອມທັງຢືນຢັນຈະສືບຕໍ່ປະກອບສ່ວນ ຊຸກຍູ້ໃຫ້ມີການຊ່ວຍເຫລືອ ແລະ ສະໜັບສະໜູນຮ່ວມມືຂອງ ອົງການ WHO ໃຫ້ແກ່ ສປປ ລາວ ໃນຕໍ່ໜ້າ.
ຂ່າວ: ມະນີທອນ
ພາບ: ຂັນໄຊ
Loading...