ສະຫງວນລິຂະສິດ © ສະຖານີ ວິທະຍຸກະຈາຍສຽງແຫ່ງຊາດລາວ

ວິທະຍຸກະຈາຍສຽງແຫ່ງຊາດລາວ

Lao National Radio

ຊົມເຊີຍ ວັນສ້າງຕັ້ງວິທະຍຸກະຈາຍສຽງແຫ່ງຊາດລາວ ຄົບຮອບ 60 ປີ
(13 ສິງຫາ 1960-13 ສິງຫາ 2020) ຢ່າງສຸດໃຈ

ລັດຖະມົນຕີກະຊວງຖະແຫລງຂ່າວ ວັດທະນະທໍາ ແລະທ່ອງທ່ຽວ ຕ້ອນຮັບຜູ້ຕາງໜ້າອົງການອຸຍນີເຊັບ

ຕອນບ່າຍວັນທີ 2 ກັນຍາ 2020 ຢູ່ຫ້ອງປະຊຸມກະຊວງຖະແຫຼງຂ່າວ ວັດທະນະທໍາ ແລະ ທ່ອງທ່ຽວ ນະຄອນຫລວງວຽງຈັນ ທ່ານ ກິແກ້ວ ໄຂຄໍາພິທູນ ລັດຖະມົນຕີກະຊວງຖະແຫລງຂ່າວວັດທະນະທໍາ ແລະ ທ່ອງທ່ຽວ ຕ້ອນຮັບການເຂົ້າຢ້ຽມຂໍ່ານັບຂອງ ດຣ ນາງ ເພຍ ຣີໂບໂລ ບຣີດໂຕ ຜູ້ຕາງຫນ້າອົງການສະຫະປະຊາຊາດສໍາລັບເດັກນ້ອຍ ຫລື ອຸຍນີເຊັຟ ຄົນໃຫມ່ປະຈໍາລາວ ໂດຍມີພາກສ່ວນກ່ຽວຂ້ອງຂອງສອງຝ່າຍເຂົ້າຮ່ວມ.
ໂອກາດນີ້ ທ່ານ ກິແກ້ວ ໄຂຄໍາພິທູນ ລັດຖະມົນຕີກະຊວງຖະແຫລງຂ່າວວັດທະນະທໍາ ແລະ ທ່ອງທ່ຽວ ສະແດງຄວາມຍິນດີຕ້ອນຮັບອັນອົບອຸ່ນ ແລະ ຕີລາຄາສູງມາຍັງຜູ້ຕາງຫນ້າອົງການສະຫະປະຊາຊາດສໍາລັບເດັກນ້ອຍ ຫລື ອຸຍນີເຊັຟຄົນໃຫມ່ປະຈໍາລາວ ພ້ອມທັງສະແດງຄວາມຂອບໃຈເປັນຢ່າງສູງຕໍ່ການຊ່ວຍເຫລືອຂອງອົງການອຸຍນີເຊັຟ ຕໍ່ລັດຖະບານລາວໃນໄລຍະຜ່ານມາໃນການຈັດຕັ້ງປະຕິບັດໂຄງການ ຕ່າງໆຢ່າງໃກ້ຊິດ ຮ່ວມກັບກະຊວງຖະແຫລງຂ່າວວັດທະນະທໍາແລະທ່ອງທ່ຽວເພື່ອສ້າງຄວາມ ເຂັ້ມແຂງໃຫ້ສື່ມວນຊົນລາວດ້ານການນໍາໃຊ້ເຕັກໂນໂລຊີທີ່ທັນສະໄຫມ ເຊີ່ງມີບົດບາດສໍາຄັນໃນການ ບັນລຸເປົ້າຫມາຍການພັດທະນາແບບຢືນຍົງ ແລະ ແຜນພັດທະນາເສດຖະກິດສັງຄົມແຫ່ງຊາດ 5 ປີຄັ້ງ ທີ 8 ໂດຍການເລີ່ມຜະລິດລາຍການຜ່ານໂທລະພາບສໍາລັບເດັກກ່ອນໄວຮຽນ, ໂຄງການວິທະຍຸໄວຫນຸ່ມ ແລະ ອື່ນໆ ແລະ ເມື່ອບໍ່ດົນມານີ້ອົງການອຸຍນີເຊັຟ ຮ່ວມກັບລັດຖະບານລາວ ກໍຄືກະຊວງ ຖວທ ເພີ່ມທະວີການໂຄສະນາຂໍ້ມູນຂ່າວສານໃຫ້ຄວາມຮູ້ກ່ຽວກັບວິທີປ້ອງກັນແລະສະກັດກັ້ນພະຍາດໂຄວິດ 19ຜ່ານພາຫະນະສື່ມວນຊົນຕ່າງໆ ເພື່ອໃຫ້ປະຊາຊົນລາວຮັບຮູ້ເຂົ້າໃຈ ເຖິງຜົນຮ້າຍແລະໄພອັນຕະລາຍຂອງພະຍາດ ໂຄວິດ 19 ໄດ້ຢ່າງທົ່ວເຖິງ.
ໂອກາດນີ້ ດຣ ນາງ ເພຍຣີໂບໂລ ບຣີດໂຕ ຜູ້ຕາງຫນ້າອົງການສະຫະປະຊາຊາດສໍາລັບເດັກນ້ອຍ ຫລືອຸຍນີເຊັຟຄົນໃຫມ່ປະຈໍາລາວ ສະແດງຄວາມຊົມເຊີຍ ແລະ ຕີລາຄາສູງຕໍ່ການຕ້ອນອັນອົບອຸ່ນ ຂອງລັດຖະມົນຕີກະຊວງ ຖວທ ພ້ອມດ້ວຍຄະນະ ແລະ ການຮ່ວມມືກັບກະຊວງ ຖວທ ພັດທະນາວຽກງານສື່ມວນຊົນຢູ່ລາວໃນໄລຍະຜ່ານມາ ພ້ອມທັງອວຍພອນໄຊອັນປະເສີດ ມາຍັງການນໍາພັກ-ລັດກໍ່ຄືສື່ມວນຊົນລາວທຸກຄົນທົ່ວຫນ້າຈົ່ງມີພາລານາໄມສົມບູນໃນໂອກາດສະເຫລີມສະຫລອງວັນສ້າງຕັ້ງສື່ມວນຊົນແລະການພິມຈໍາຫນ່າຍລາວ ຄົບຮອບ 70 ປີ ແລະ ໃຫ້ຄໍາຫມັ້ນສັນຍາ ວ່າ ອົງການອຸຍນີເຊັຟ ຈະສືບຕໍ່ໃຫ້ການສະຫນັບສະຫນູນ ຊ່ວຍເຫລືອລາວໃນດ້ານຕ່າງໆຢ່າງຕໍ່ເນື່ອງ ໂດຍສະເພາະການສົ່ງເສີມຄວາມກ້າວຫນ້າຂອງແມ່ຍິງແມ່ ແລະ ເດັກນ້ອຍປັບປຸງລາຍການເດັກກ່ອນໄວຮຽນທີ່ອອກອາກາດຜ່ານໂທລະພາບ, ວິທະຍຸໄວຫນຸ່ມ ແລະ ອື່ນໆ ໃຫ້ດີຂຶ້ນກວ່າເກົ່າ.
ຂ່າວ: ເດດອາລຸນ ແກ້ວວິໄລ.
ພາບ:ຕາລີເຊຍ ລໍມີໄຊ